Nˈokpaˈˈayoˈowëm oytyim pënëty
KO JESUS ttukniˈˈijxë ja yˈëxpëjkpëty ets kyäjpxwäˈkxtët, nyijäˈäwëbë nety ko kyaj niˈamukë jäˈäy tˈoymyëdowäˈäny (Luk. 10:3, 5, 6). Ëtsäjtëm, nan nbatëm näˈätyë jäˈäy diˈib jotˈambëjktëp ets diˈib axëëk xyˈatsoˈowëm, pääty xytsyiptakxëm nyaˈijxëm ja paˈˈayoˈowën.
Tuˈugë jäˈäy diˈib paˈˈayoop, yˈijxypy tijaty jotmay pyatypy ja myëguˈuk ets tijaty yajtëgoyˈajtypy, pyaˈˈayoopy ets pyudëkëyaampy. Per pën kyaj nëgoo nekyjyäˈäwëm ja paˈˈayoˈowën, mbäät kyaj nëgoo nekytyukxondakëm ja Diosë tyuunk ets kyaj nekyjyäjtëm wiˈixë jäˈäy nbudëjkëm. Per pën nduˈunëmë mëjääw parë jäˈäy nbaˈˈayoˈowëm, ta ndukxondäˈägäˈänëm ja Diosë tyuunk. Duˈunxyëp extëm ko jäˈäxy njëjpkäjpëm parë ja jëën kyaj pyiˈitsët (1 Tes. 5:19).
¿Wiˈix mbäät mas niˈigyë nyaˈijxëm ja paˈˈayoˈowën? Min nˈokˈijxëm pënatyë yˈijxpajtën mbäät nbanëjkxëm: Jyobaa, Jesus etsë apostëlë Pablo.
NˈOKPAˈˈAYOˈOWËM EXTËMË JYOBAA
Kanäk mil jëmëjtë Jyobaa kujk tmëmadaˈaky ko jäˈäy nyiwäämbetyëty, per yëˈë duˈunyëm ttunyë “oybyë axtë mët yëˈë pekyjyaˈay es pënëty kyaj jyaˈaygyëdaˈagyëty” (Luk. 6:35). Nan yajnigëxëˈkypy ko myaˈkxtuky, “pes yëˈë tsyejpy es nidëgekyë [nyitsoˈoktët]” (1 Tim. 2:3, 4). Jyobaa yˈaxëkˈijxypyë axëkˈäjtën, per yajtsobatypyë naxwinyëdë jäˈäy ets kyaj ttsoky parë nituˈuk kyutëgoyët (2 Peed. 3:9).
Jyobaa nyijäˈäwëp ko Satanás të twingubaˈanë pënaty kyaj tmëdattë mëbëjkën (2 Kor. 4:3, 4). Mayë jäˈäy kyaj të yajtukniˈˈixëdë tëyˈäjtën mä pënën Dios desde të myutskˈattë. Pääty tëgatsy wyinmaytyë ets tsiptakxëp tkupëktët ja tëyˈäjtën. Perë Jyobaa pudëkëyanëdëp. ¿Tiko duˈun njënäˈänëm?
Min nˈokˈijxëm wiˈixë Jyobaa wyinmääy mä ja jäˈäyëty diˈib Nínive. Yëˈëjëty jantsy axëkjäˈäyëtyë nety, perë Jyobaa ta tˈanmääyë Jonás: “¿Ets ti kyajtsë net mbäät nbaˈˈayoy ja Nínive mëj käjpn mä jyamëty naxy 120 milë yetyëjk diˈib kyaj tnijawëdë diˈibën oy ets diˈibën kaˈoy”[?] (Jon. 4:11). Jyobaa yˈijx ko ja jäˈäyëty diˈib Nínive kyaj nety yˈixyˈatëdë. Pääty tpaˈˈayooy ets ojts ttukˈaneˈemyë Jonás parë nëjkx ttukˈawanë ti nety tyunaampy.
Ëtsäjtëm nan nyajtsobatëmë jäˈäy duˈun extëmë Jyobaa. Mbäät nbanëjkxëmë yˈijxpajtën ko njantsy pyudëkëyäˈänëm pënaty myëdoowˈijttëp, oy nˈijxëm ko kyaj jyawë tˈaxäjëyäˈändë ja tëyˈäjtën.
NˈOKPAˈˈAYOˈOWËM EXTËMË JESUSË
Jesus nan ojts tpaˈˈayoyë jäˈäy extëmë Tyeety, ets tyukpudëkëyan ja Dios yˈayuk. Ko “tˈijxy ja mayjyaˈayëty nyiminëdë, ta tpaˈˈayoodë, mët ko moon tujktëbë naty extëmë borreegë diˈibë kyajpë yˈijxˈijt kyuentˈäjtpë” (Mat. 9:36). Jesus kyaj jeˈeyë tˈijxyë jäˈäy nikëjxy këbajky. Pyëjkë kuentë ko axëktuunëdëbë nety ja wintsëndëjk diˈib mä ryelijyonk ets ko yëˈë nety të tyukniˈˈixëdë diˈib kyaj tyëyˈäjtënëty. Ets oy tjanijäˈäwë ko kyaj nimay pyanëjkxäˈänyëty mët ko tiiyëm yajtuˈuwëˈëmëyanëdëp, tyukniˈˈijxë tijaty “kanäk peky” (Mar. 4:1-9).
Kyaj nˈëxtëkëwäˈkëm pën tuˈugë jäˈäy kyaj tˈoymyëdoy ko tim ogäˈän nmëtmaytyakëm
Tëgäjtspë jäˈäyë jyukyˈäjtën, ets nan mbäät tyëgatsy ja wyinmäˈäny mä wiˈix tˈixy ja tëyˈäjtën
Ko jäˈäy tkamëdowäˈänëdë Diosë yˈayuk, oy ko nnayajtëˈëwëm tiko kyaj tmëdowäˈändë ets kyaj jeˈeyë nˈijxëm nikëjxy këbajky. Pes mbäät tjëjpkugäjpxëdë Biiblyë mët ko pënaty nayajnäjxëdëp kristianë kyaj dyaktë oyë ijxpajtën. O waˈan tëgatsy të yajtukmëtmaytyaˈaky mä tijaty nmëbëjkëm. Nan mbäät jyaˈˈatyë jäˈäy diˈib tsyëˈkëbë myëjënbäˈä myëdëjkpäˈä o jyiiky myëguˈuk ko nyëxiˈik tyukxiˈigëdët.
Nan taa jäˈäy diˈib kyaj oy xyˈatsoˈowëm mët ko axëëk të jyat të kyëbattë mä jyukyˈäjtën. Kim, diˈib tuump misioneerë, jyënaˈany: “Tuˈugë lugäär mäts ngäjpxwäˈkxtë, mayë jäˈäy tkuˈayoˈowëdë ko tyuunë tuˈugë tsip mä dyajtëgooytyaaytyë jyukyˈäjt myadakën. Kyaj ti oyˈäjtënë tˈawix tjëjpˈixtë, axëëk nyayjyawëdë ets kyaj pën ttukjotkujkˈattë. Mä tyäˈädë lugäär nbattëbëtsë jäˈäy diˈib kyaj tmëdowäˈändë Diosë yˈayuk. Tëgok, ojtsëts xynyibëdëˈëktë mätsë nety ngäjpxwaˈkxy”.
¿Ti tyuumbyë Kim parë duˈunyëmë jäˈäy tpaˈˈayoy? Yëˈë jyënaˈany: “Kotsë jäˈäy axëëk xyˈatsoy, yëˈëts njamyejtsypy wiˈix jyënaˈanyë Proverbios 19:11: Ko jäˈäy kajabäät wyinmay, kyaj tsojk jyotˈambëky. Kots nwinmay wiˈixë tyäˈädë jäˈäy yaˈix yajpäättë, yëˈëts xypyudëjkëp parëts nbaˈˈayowdët. Nan kyaj niˈamukë duˈun jyaˈayˈattë, pes tamëtsë jäˈäy nijëmbittë diˈib jyantsy yˈoymyëdoowdëp”.
Nan oy ko nnayajtëˈëwëm wiˈixxyëp ëtsäjtëm nˈatsoˈowëm ko nyajtukmëtmaytyakëmë Diosë yˈayuk koxyëp nyajpatëm extëmë jäˈäyëty. Extëm nˈokpëjtakëm, koxyëp janääm jatsojkë jäˈäy tnimaytyäˈäktë axëëgë Jyobaa tyestiigë, ¿këdii nan axëëkxyëp nˈatsoˈowëm ets ntsojkëmxyëp nyajpaˈˈayoˈowëm? Jesus jyënany: “Diˈibë miits mtsojktëp es ja wiinkpëty mdukmëdunëdët, miits mdukmëdundëbë taadë”. Ko tyäˈädë njamyajtsëm, yëˈë xypyudëkëyäˈänëm parë nbaˈˈayoˈowëmë jäˈäy axtë mä xytsyiptakxëm (Mat. 7:12).
NˈOKPAˈˈAYOˈOWËM EXTËM JA APOSTËLË PABLO
Apostëlë Pablo pyaˈˈayoow axtë pënaty tuunëdë axëëk. ¿Tiko? Yëˈko tjamyejtsy wiˈixë nety yëˈë të yˈadëˈëtsy. Jyënany: “Oyëts ëj jawyinyëp ngamëjˈijxy mëdëtsë nˈayuk, es oyëts oj njajënäˈäny tsäätsykyëbety mët yëˈë, es nbajëdijtyëts ja jyaˈay. Perë Dios myëdäjt ja paˈˈayoˈon mët ëj, jaˈa ko kyajnëmtsë naty nmëbeky ja Jesukristë es kyajtsë naty nnijawë tiitsë dëˈën ndiimpy” (1 Tim. 1:13). Pablo yˈëxkäjp ko Jyobaa mëdë Jesus të nety pyaˈˈayowëdë mëjwiin kajaa. Waˈan wyinmääy ko nanduˈunë nety näägë jäˈäy yajpääty extëmë yëˈë të jyukyˈaty.
Pablo nan ojts näägë jäˈäy tpääty diˈibë nety tsip tmastuˈudët tijaty myëbëjkypy. ¿Wiˈix nyayjyäˈäwë? Apostʉlʉty 17:16 tmaytyaˈaky ko yajpaty Atenas, “net jyantsyjyotmayˈeˈky ko tˈijxy jap käjpnoty oymyääty tapë agojwinnax”. Per nan yëˈë Pablo yajtuunë tyäˈädë awinax parë ojts tnimaytyaˈaky ja Diosë yˈayuk (Apos. 17:22, 23). Yëˈë yˈijx tijatyë nety ja jäˈäy myëbëjktëp parë tnijäˈäwë wiˈix tnimaytyäˈägëdë Diosë yˈayuk ets duˈun nyitsoˈoktët niduˈuk nimajtsk (1 Kor. 9:20-23).
Ëtsäjtëm, nan mbäät duˈun nduˈunëm extëmë Pablo ko nbatëmë jäˈäy diˈib kyaj tmëdowäˈäny o diˈib tëgatsyë myëbëjkën. Ko nnijäˈäwëm wiˈix yaˈix yajpäättë, mbäät yëˈë xypyudëjkëm parë nduknijäˈäwëm ja “oybyë ayuk diˈib mas oy” (Is. 52:7). Duˈun ttuny tuˈugë nmëguˈukˈäjtëm diˈib xyëwˈäjtypy Dorothy, yëˈë jyënaˈany: “Mäts ngäjpxwäˈkxtë, mayë jäˈäy të yajtukniˈˈixëdë ko Dios jantsy mëk xypyayoˈoyëm. Pääty, diˈibëts tim jawyiin nduumpy, yëˈëts nˈanëëmë ko jantsy oy ko tmëbëkyë Dios, tatsë net ndukniˈˈixë ko Biiblyë jyënaˈany ko Jyobaa tsojkp, etsëts ndukmëtmaytyaˈaky tijaty të twandaˈaky mä tiempë myiny kyëdaˈaky”.
“MMËMADÄˈÄKTË JA AXËKˈÄJTËN MËT KO XYTYUNDËT JA OYˈÄJTËN”
Mientrës ndukjukyˈäjtëm ja tiempë diˈib jëjpkëxanëp, “waanë niˈigyë” jäˈäy axëëk jyaˈayˈatäˈändë (2 Tim. 3:1, 13). Per kyaj mbäät nasˈijxëm ets xypyëjkëm ja jotkujkˈäjtën o kyaj nˈokˈyaˈijxënë ja paˈˈayoˈowën. Jyobaa yëˈë xymyëjääwmoˈoyëm parë nmëmadakëm ja axëkˈäjtën ko nduˈunëm ja oybyë (Rom. 12:21). Jessica, tuˈugë prekursoora jyënaˈany: “Janääm jatsojkëtsë jäˈäy nbääty diˈib kyaj xyˈixäˈänëm ets ni tkamëdowäˈänyë Diosë yˈayuk. Tyäˈädë mbäät axëëk xyyajnayjyäˈäwëm. Pääty kots tuˈugë jäˈäy nmëtmaytyaktsoony, tats nwinmäˈänyoty nˈanëëmë Jyobaa parëts xypyudëkët etsëts nˈixët ja jäˈäy extëm yëˈë tˈixy. Netëts kyaj jeˈeyë nmëjpëjtäˈägët wiˈixëts nnayjyawëty, niˈigyëts nwinmayët wiˈixëts mbäät nbudëkë”.
Nˈokˈëxtäˈäyˈadëtsëm pënaty pyäädandëp ja tëyˈäjtën
Ko tiempë nyaxët, mbäät näägë jäˈäy tˈaxäjëdë ja naybyudëkë ets tˈixyˈattëdë Jyobaa
Nan oy ko nwinmäˈäyëm wiˈix mbäät nbudëjkëm ja nmëguˈukˈäjtëm diˈib mëët ngäjpxwäˈkxëm. Jessica jyënaˈany: “Pën jamëts axëëgë jäˈäy të xyˈatsowdë, mas oy kots kyaj nëgoo ndimmëjpëjtaˈaky. Nik yëˈëts nimaytyaktëp diˈibëts mbäät oy xyyajnayjyawëdë, extëm wiˈix oy wyimbëtsëmy ko ngäjpxwäˈkxëm oy näägë jäˈäy tkamëdowäˈäny”.
Jyobaa yajxon tnijawë tijaty jotmay nwinguwäˈkëm ko ngäjpxwäˈkxëm, ets seguurë ko jantsy jotkujk nyayjyawëty ko nyaˈijxëmë paˈˈayoˈowën extëm yëˈë (Luk. 6:36). Jyobaa kyaj winë xëëw tpaˈˈayowäˈänyë jäˈäy. Mbäät nˈijtëm seguurë ko nyijäˈäwëp näˈä dyajminäˈäny ja kutëgoˈoyën. Per mientrës jyaˈty, jëjpˈam ets duˈunyëm ngäjpxwäˈkxëm (2 Tim. 4:2). Pääty, nˈoktukxondakëmë tyäˈädë tuunk ets nˈokpaˈˈayoˈowëm oytyim pënëty.
