ARTIKULO MËDIˈIBË YAˈËXPËJKP 29
Nˈokpudëjkëmë Jesus mëdiˈibë nWintsënˈäjtëm
“Ëjts të xymyoˈoy ja Dios tëgekyë kutujkën, dëˈën jam tsäjpotm es dëˈën yä naxwiiny” (MAT. 28:18).
ËY 13 Nˈokpanëjkxëmë Kristë yˈijxpajtën
MËDIˈIBË YAJNIMAYTYÄˈÄGÄÄMP *
1. ¿Ti Jyobaa tsyojkypy ets nduˈunëm?
JYOBAA tsyojkypy ets yajkäjpxwäˈkxëdë yˈayuk abëtsëmy nyaxwinyëdë (Mar. 13:10; 1 Tim. 2:3, 4). Ets kom jëjpˈam dyajnaxyë yäˈädë tuunk, pääty të ttuknipëkyë yˈUˈunk parë yëˈë xynyëˈëmoˈoy xytyuˈumoˈoyëm. Mbäät nˈijtëm seguurë ko Jyobaa agujk jotkujk nyayjyawëyaˈanyëty ko nduˈunëm ja tyuunk extëm ttsoky (Mat. 24:14).
2. ¿Ti nˈixäˈänëm mä yäˈädë artikulo?
2 Mä yäˈädë artikulo, nˈixäˈänëm ko Jesus yëˈë yajtuumpy “ja tuumbë mëdiˈibë kuwijy ets tyuumpy ti wyintsën tsyojkypy” parë njaygyujkëm ja Diosë yˈAyuk ets parë yajtukniwitsët wiˈix nˈëwäˈkx ngäjpxwäˈkxëm abëtsëmy nyaxwinyëdë (Mat. 24:45, TNM). Nanduˈun nˈixäˈänëm ti mbäät nduˈunëm niduˈuk niduˈuk parë nbudëjkëmë Jesus ets ja tuumbë mëdiˈibë kuwijy.
JESUS YËˈË XYNYËˈËMOˈOY XYTYUˈUMOˈOYËM MÄ NˈËWÄˈKX NGÄJPXWÄˈKXËM
3. ¿Ti Jesus të yajtuknipëky?
3 Jesus yëˈë tyam xynyëˈëmoˈoy xytyuˈumoˈoyëm mä nˈëwäˈkx ngäjpxwäˈkxëm ja Diosë ayuk. ¿Tiko duˈun njënäˈänëm? Mä netyë Jesus kyanëjkxynyëm tsäjpotm, ta tyuˈukmujky mët niduˈuk nimajtsk ja yˈapostëlëty mä tuˈugë kopk jam Galilea ets tˈanmääy: “Ëjts të xymyoˈoy ja Dios tëgekyë kutujkën, dëˈën jam tsäjpotm es dëˈën yä naxwiiny”. Ta net tˈakˈanmääy: “Nëjx yaˈëxpëktë jäˈäyëty mä tëgekyë naxwinyëdë esëts ëj njäˈäyˈattët” (Mat. 28:18, 19). Tuk pëky mëdiˈibë Jesus të yajtuknipëky, yëˈë xynyëˈëmoˈoy xytyuˈumoˈoyëm mä nˈëwäˈkx ngäjpxwäˈkxëm.
4. ¿Tiko nˈijtëm seguurë ko Jesus duˈunyëm xynyëˈëmoˈoy xytyuˈumoˈoyëm mä nˈëwäˈkx ngäjpxwäˈkxëm?
4 Jesus jyënany ko yajkäjpxwäˈkxäˈäny ja Diosë yˈayuk “mä tëgekyë naxwinyëdë” parë jäˈäy pyanëjkxëdët. Nanduˈun tˈanmääy ja yˈëxpëjkpëty: “Nyajpäädäˈänyëts mët miitsëty tuˈuk tuˈugë xëëw axtë ko jyëjpkëxëdë yäˈädë jukyˈäjtën” (Mat. 28:20, TNM). Yäˈädë yëˈë yajxon xytyukˈijxëm ko Jesus, yëˈë tyambäät xynyëˈëmoˈoy xytyuˈumoˈoyëm mä ngäjpxwäˈkxëmë Diosë yˈayuk.
5. ¿Wiˈix tyam nyaˈˈadëˈëwëm mëdiˈibë ojts yajnaskäjpxë mä Salmo 110:3?
5 Jesus ijtpë nety seguurë ko mä ja tiempë jyëjpkëxanë mayë tuumbë kyëxëˈëgäˈäny, nyijäˈäwëbë nety ko yëˈë adëwäämp mëdiˈibë ojts yajnaskäjpxë mä Salmo 110:3: “Yëˈë mgäjpn nyayˈawanëyaˈanyëty namayˈäjtën ja xëëw mä mtsiptuny”. Pën mˈëwaˈkxy mgäjpxwaˈkxypyë Diosë yˈayuk, yëˈë mbudëjkëbë Jesus, ja tuumbë mëdiˈibë kuwijy ets duˈun xyaˈˈadëy mëdiˈibë ojts yajnaskäjpxë mä Biiblyë. Tyam, taajën duˈun yajkäjpxwaˈkxyë Diosë yˈayuk, per näˈäty yajwinguwäˈkëbë amay jotmay.
6. Oknigäjpx tuk pëky ti jotmay nwinguwäˈkëm.
6 Tuk pëkyë jotmay mëdiˈibë nwinguwäˈkëm, yëˈë ko nyajnibëdëˈkëm, xynyiwäämbajtëmë apostatas, gobiernëtëjk ets pënaty nyiwintsënˈäjttëbë relijyonk. Ko yajtukmëbëktë ja jëëky mëguˈuk, pënaty xyˈixyˈäjtëm o pënaty mëët nduˈunëm, mbäädë net xyˈanmäˈäyëm parë kyaj nekymyëduˈunëmë Jyobaa ets kyaj nekyˈëwäˈkx nekykyäjpxwäˈkxëm. Mä näägë it lugäär yajnibëdëˈktëbë nmëguˈukˈäjtëm, axëëk yajtundë ets axtë yajtsuum yajmäjtstëp. Nnijäˈäwëm tiko duˈun tyuny jyatyëty, pesë Jesus jyënany: “Nidëgekyë naxwinyëdë jäˈäyëty mdukˈakˈatäˈänëdë mët ëjtskyëjxm” (Mat. 24:9). Ko duˈunë jäˈäy xyˈaxëkˈijxëm extëmë Jesus, yëˈë xytyukˈijxëm ko Jyobaa xykyupëjkëm (Mat. 5:11, 12). Satanás yëˈën nyigëbäjkˈäjtypy ko duˈunë jäˈäy xynyibëdëˈkëm, perë Jesus niˈigyë kyumëjääwëty, këdiinëmë Satanás. Ets kom yëˈë Jesus xynyëˈëmoˈoy xytyuˈumoˈoyëm, mbäädë net niˈamukë jäˈäy tmëdowdë ja Diosë yˈayuk oy mää yajpäättët.
7. ¿Tijaty tyam xytyukˈijxëm ko taajën yˈadëy mëdiˈibë ojts yajnaskäjpxë mä Diˈibʉ Jatanʉp 14:6, 7?
7 Jatuˈugë jotmay mëdiˈibë yajwinguwäˈkëp, yëˈë ko mayë jäˈäy tkäjpxtë wiink ayuk. Perë apostëlë Juan ojts yajtukˈijxy ko kyaj nety yëˈë xyajtuˈuˈadukäˈänëm parë nˈëwäˈkx ngäjpxwäˈkxëm ja Diosë yˈayuk (käjpxë Diˈibʉ Jatanʉp 14:6, 7). ¿Wiˈix yajpudëkëdë yäˈädë jäˈäyëty? Yëˈko mä sitio jw.org të yajpëjktaˈagyë ëxpëjkpajn naxy tuk mil ayuk. Ets pënaty Wyoowˈyoˈoytyëbë Jyobaa tyestiigëty të jyënäˈändë ko 700 ayuk naxy yajkäjpxnaxëdë liibrë Jukyˈat agujk jotkujk mëdiˈibë mëdë jäˈäy nˈëxpëjkëm. Pëtsëëmp nanduˈunë bideo parë jäˈäyëty mëdiˈibë uum ets nat, ets nanduˈun braille parë pënaty kyaj yˈixtë. Ko duˈun yajtuny, ta mbäät niˈamukë jäˈäy tmëdoowdë ja Diosë yˈayuk. Ta tyam yˈadëy tijaty ojts yajnaskäjpxë mä Biiblyë, pes pënaty “kyäjpxtëp tukëˈëyë ayuk mäjatyë nax käjpn”, taajën tyam tnijawëdë ja tëyˈäjtën ets tkäjpxtë ja ayuk mëdiˈibë wäˈäts (Zac. 8:23; Sof. 3:9). Tukëˈëyë yäˈädë yajtuny mët ko Jesus xynyëˈëmoˈoy xytyuˈumoˈoyëm.
8. ¿Wiˈix tyam wyimbëtsëmy ko nˈëwäˈkx ngäjpxwäˈkxëm?
8 Tyam, ja jyaˈˈatyë Diosmëduumbëty tuktujk miyonk naxy mä 240 paˈis, ets jëmëjt jëmëjt milˈamë jäˈäy nyëbattë parë tyëkëdë mä Diosë nyax kyäjpn. Per kyaj yëˈëyë yaˈixy nuˈunë jäˈäy të nyëbattë, pes mëdiˈibë niˈigyë tsobatp, yëˈë ko yäˈädë nmëguˈukˈäjtëm të dyajtëgatstë jyukyˈäjtën ets të dyajtsondäˈäktë ja jembyë (Kol. 3:8-10). Kyaj tnekyˈëxtäˈäytyë jëën tsip, kyaj axëëk ja jyukyˈäjtënë tnekyyajnëjkxtë, kyaj tnekyyajmëjpëtsëmdë ja pyaˈis, tuˈugyë yˈittë mëdë myëguˈuktëjk, oy mää tsyoondë ets oy wiˈixëm ja kostumbrë tmëdattë. Ta tyam yˈadëy mëdiˈibë ojts yajnaskäjpxë mä Isaías 2:4: “Kyaj pën tnekynyiˈëxpëkëyaˈanyë tsip”. Ko mayë jäˈäy tˈixtë ko të nyajtëgäjtsëmë jukyˈäjtën, yëˈë net pudëjkëdëp parë tmëwingondë Diosë kyäjpn. Ets duˈun nyajnigëxëˈkëm ko Jesus yëˈë xynyëˈëmoˈoy xytyuˈumoˈoyëm (Fwank 13:35; 1 Peed. 2:12). Tyam, ta nimayë jäˈäy dyajtëgatstë jyukyˈäjtën mët ko Jesus yëˈë xypyudëjkëm.
JESUS TWINˈIXY JA TUUMBË MËDIˈIBË KUWIJY
9. Extëm jyënaˈanyë Mateo 24:45-47, ¿ti Jesus ojts tnaskäjpxë tyunäˈäny jyatäˈänyëty mä tiempë jyëjpkëxanë?
9 (Käjpxë Mateo 24:45-47, TNM). Jesus jyënany ko mä ja tiempë jyëjpkëxanë, yëˈë nety tyuknipëkaampy “ja tuumbë mëdiˈibë kuwijy ets tyuumpy ti wyintsën tsyojkypy” parë xypyudëjkëm ets njaygyujkëm ja Diosë yˈayuk. Yäˈädë tuumbë mëdiˈibë kuwijy, mëkë nety tyukëdäˈägäˈänëdë ja tuunk ets tyam taajën duˈun ttundë, pes ta xymyoˈoyëm ja käˈäy ukën “mä meerë ttiempëty” ets ta nanduˈun yajpudëkëdë pënaty myëwingonandëbë Dios. Yäˈädë nmëguˈukˈäjtëm kyaj yëˈë tniwintsënˈäjtëdë ja myëguˈuktëjkë myëbëjkën (2 Kor. 1:24). Nyijäˈäwëdëp ko Jesus yëˈë duˈun “wintsën ets komandantë mäjatyë nasionk” (Is. 55:4).
10. ¿Mëdiˈibë liibrë të mbudëkëty parë tyam xymyëdunyë Jyobaa?
10 Desde mä jëmëjt 1919 ja tuumbë mëdiˈibë kuwijy, ja dyajpëtsëëmtsondakyë ëxpëjkpajn parë mbäädë jäˈäy tnijawëdë ja tëyˈäjtën. Extëm nˈokpëjktakëm mä jëmëjt 1921, ja dyajpëtsëëmdë tuˈugë liibrë inglés El Arpa de Dios parë jäˈäy yajtukniˈˈijxëdë ja tëyˈäjtën. Ko tiempë yˈaknäjxy, ta pyëtsëëmy kanäägë liibrë. Mijts, ¿mëdiˈibë liibrë të mbudëkëty parë të xyˈixyˈatyë Jyobaa ets tyam xymyëduny? Waˈan yëˈë xyˈëxpëjkyë liibrë: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Ti tëyˈäjtën jantsy tukniˈˈijxëbë Biiblyë? o ¿Ti xytyukniˈˈijxëmë Biiblyë? O waˈan tyam yëˈë xyˈëxpëkyë jembyë liibrë Jukyˈat agujk jotkujk. Tukëˈëyë yäˈädë liibrë të xypyudëjkëm parë jäˈäy nyaˈëxpëjkëm ets tˈixyˈattëdë Dios, xëmë të pyëtsëmy mä meerë nyajtëgoyˈäjtëm.
11. ¿Tiko jyëjpˈamëty niˈamukë nˈixyˈäjtëm niˈigyë Jyobaa ets njaygyujkëm ja tëyˈäjtën mëdiˈibë yajpatp mä Biiblyë?
11 Niˈamukë tsyokyëty nˈixyˈäjtëmë Jyobaa ets yajxon njaygyujkëm ja tëyˈäjtën mëdiˈibë miimp mä Biiblyë. Apostëlë Pablo duˈun tkujäˈäyë: “Ja jeˈxyë tëˈëtspë yëˈë parë jäˈäy mëdiˈibë të myëjääwnëdë”. Nanduˈun jyënany ko pën nguytyuˈunëm tijaty nˈëxpëjkëm, yëˈë xypyudëkëyäˈänëm parë nˈëxkäjpëm “mëdiˈibë oy ets axëëk” (Heb. 5:14, TNM). Ko tyamë naxwinyëdë jäˈäy axëëgë jukyˈäjtën dyajnëjkxtë, mbäädë net xytsyiptakxëm nmëmëdoˈowëmë Jyobaa yˈanaˈamën. Perë Jesus xëmë xymyoˈoyëm tijaty mbäät xypyudëjkëm parë niˈigyë mëbëjkën nyajkëktëjkëm mët yëˈëgyëjxmë Biiblyë. Jesus yëˈë tyam nyëˈëmoopy tyuˈumoopy ja tuumbë mëdiˈibë kuwijy parë xymyoˈoyëm tijaty nyajtëgoyˈäjtëm.
12. ¿Ti të nduˈunëm parë nyajmëjpëtsëˈëmëmë Diosë xyëëw extëmë Jesus ttuuny?
12 Ëtsäjtëm nyajmëjpëtsëˈëmëmë Jyobaa xyëëw, duˈun extëm ttuunyë Jesus (Fwank 17:6, 26). Extëm nˈokpëjktakëm, mä jëmëjt 1931 ja ojts nyajxëëwmoˈoyëm Jyobaa tyestiigëty. Duˈun ojts nyajnigëxëˈkëm ko jantsy yaˈixyˈatäˈänëm extëmë Jyobaa tyestiigë ets ko mëjjën nyajnäjxëm ja xyëëw (Is. 43:10-12). Oktuubrë mä jëmëjt 1931, jaa nanduˈun pyëtsëëmtsondakyë Diosë xyëëw mä rebistë nyiˈak mëdiˈibë inglés. Nanduˈun mä Traducción del Nuevo Mundo të yajpëjktaktäˈäyë Diosë xyëëw mäjatyë nety myiny. Per mayë relijyonk niˈigyë të dyajjëgaˈaktë Diosë xyëëw mä Biiblyë.
JESUS TTUKNIWITSË WIˈIX TIJATY YAJTUNËT
13. ¿Tiko mˈity seguurë ko Jesus yëˈëdën tyam yajtuumpy “ja tuumbë mëdiˈibë kuwijy ets tyuumpy ti wyintsën tsyojkypy”? (Fwank 6:68).
13 Jesus të dyajnaxkëdaˈagyë Diosë kyäjpn yä Naxwiiny parë jäˈäy tnijawëdët ja tëyˈäjtën ets duˈun të ttuny mët yëˈëgyëjxm “ja tuumbë mëdiˈibë kuwijy ets tyuumpy ti wyintsën tsyojkypy”. Ko net xyˈixy wiˈix ja Diosë kyäjpn yajnëˈëmoˈoy yajtuˈumoˈoy, waˈan nanduˈun mjënäˈäny extëmë apostëlë Pedro tˈanmääyë Jesus: “Wintsën, ¿pënëts nbanëjxtëp? Mij naytyiˈigyë mmëdäjtypy ja ayuk diˈibë myaytyakypy ja jikyˈäjtën diˈibë winë xëë winë tiempë” (Fwank 6:68). ¿Määxyëp tyam nyaˈijx nyajpatëm koxyëp ojts nganijäˈäwëm ja tëyˈäjtën? Jantsy oy nnayjyäˈäwëm ko nyajpatëm mä Diosë kyäjpn, pes yëˈë Jesus yajtuumpy parë xypyudëjkëm ets ninäˈä ngamastutëmë Jyobaa, xytyukniˈˈijxëm nanduˈun wiˈix mas oyë jäˈäy nyaˈëxpëjkëm. Xypyudëjkëm nanduˈun parë nyajtëgäjtsëmë jukyˈäjtën ets nyajtsondakëmë jembyë, ko duˈun nduˈunëm, ta agujk jotkujk nyajnayjyäˈäwëmë Jyobaa (Éfes. 4:24).
14. ¿Wiˈix xytyukˈoyˈaty ko myajpääty mä Diosë kyäjpn ko jyaˈˈatyë COVID-19?
14 Tyam yajxon nˈijxëm ko Jesus yëˈë xynyëˈëmoˈoy xytyuˈumoˈoyëm ko nbatëmë amay jotmay extëm ko jyaˈˈatyë COVID-19. Ko yäˈädë päˈäm tsyondaky mayë jäˈäy kyaj tnijäˈäwëdë ti tyundëp. Per ëtsäjtëm, kom yëˈë Jesus xynyëˈëmoˈoy xytyuˈumoˈoyëm ojts nyaˈˈanmäˈäyëm parë nyajtuˈunëmë kubrebokë ko muum nëjkxëm ets ko kyaj nëgoo nduˈukmujkëm mëdë mayjyaˈay. Pënaty tuundëp mëjjäˈäy ojts yaˈˈanëëmëdë tmëgäjpxtët ja myëguˈuktëjk parë tnijawëdët pën jam ti tyëgoyˈäjtxëdë ets tpudëkëdët parë kyaj Jyobaa tmëjagamgaˈaktët (Is. 32:1, 2). Mëjwiin kajaa nanduˈun xypyudëjkëm ja informë mëdiˈibë yajpëtsëëmdëp pënaty Wyoowˈyoˈoytyëbë Jyobaa tyestiigëty mä xynyëˈëmoˈoy xytyuˈumoˈoyëm.
15. ¿Wiˈix ja tuk pëky të nyajnëˈëmoˈoy nyajtuˈumoˈoyëm mä jyaˈˈatyë COVID-19, ets wiˈix wyimbëtsëmy?
15 Ko tsyondakyë COVID-19 ojts nyajnëˈëmoˈoy nyajtuˈumoˈoyëm mä wiˈix nˈëwäˈkx ngäjpxwäˈkxëm ets nreunyonkˈäjtëm. Pojënë yajtukniwijtsëtyaay parë nreunyonkˈäjtëm ets nˈasambleeˈäjtëm mä internet ets parë ngäjpxwäˈkxëm mä telefënë o njäˈäyëmë kartë. Mëjwiin kajaa Jyobaa të xykyunuˈkxëm, pes të nyimayëdë nmëguˈukˈäjtëm mëdiˈibë ëwäˈkx käjpxwäˈkxtëp, duˈun të tkaxtë informë kanäägë Betel. Mä yäˈädë tiempë mä jyaˈˈatyë päˈäm, mayë nmëguˈukˈäjtëm tmëdattë jantsy oyatyë yˈeksperiensyë ets xypyudëjkëm mëjwiin kajaa (ixë rekuäädrë “ Jyobaa xypyudëjkëm mä nˈëwäˈkx ngäjpxwäˈkxëm”).
16. ¿Tiko mbäät ndukjotkujkˈäjtëmë Jyobaa mëdë Jesus?
16 Waˈan näägë nmëguˈukˈäjtëm wyinmaytyë ko Diosë kyäjpn nëgoo mëk xytyimˈijxˈijt xytyimkuentëˈäjtënë mä jyaˈˈatyë yäˈädë päˈäm. Per të nˈijxëm kanäkˈok ko oy wyimbëtsëmy extëm nyajnëˈëmoˈoy nyajtuˈumoˈoyëm (Mat. 11:19). Pën winmäˈäyëm wiˈixë Jesus tyam xynyëˈëmoˈoy xytyuˈumoˈoyëm, mbäät nnayjyäˈäwëm seguurë ko Jyobaa mëdë yˈUˈunk ninäˈä xykyamastuˈudäˈänëm oy ti tyun jyatëdët mä tiempë myiny kyëdaˈaky (käjpxë Ebreeʉsʉty 13:5, 6).
17. ¿Wiˈix mnayjyawëty ko Jesus mnëˈëmoˈoy mduˈumoˈoyëty?
17 ¡Jantsy agujk jotkujk nnayjyäˈäwëm ko Jesus yëˈë tyam xynyëˈëmoˈoy xytyuˈumoˈoyëm! Tuˈugyë nyajpatëm mä Diosë kyäjpn, kyaj xyajnaywyäˈkxëm oy mä ntsoˈonëm, oy wiˈixëm ja kostumbrë nmëdäjtëm ets oy ti ayuk ngäjpxëm. Kyaj ti xytyëgoyˈäjtxëm, pes yajmoˈoyëm ja ëxpëjkpajn mëdiˈibë xypyudëjkëm parë njaygyujkëm ja Diosë yˈayuk ets yajtukniˈˈijxëm wiˈix nˈëwäˈkx ngäjpxwäˈkxëm. Niduˈuk niduˈuk nyajpudëjkëm parë nyajtëgäjtsëm ja jukyˈäjtën ets ntsojkëm ja nmëguˈukˈäjtëm. ¡Jantsy oy nnayjyäˈäwëm ko Jesus yëˈë xynyëˈëmoˈoy xytyuˈumoˈoyëm!
ËY 16 Nˈokmëjkumäˈäyëmë Jyobaa etsë Jesus
^ Tyam, miyonkˈamë jäˈäy tjantsy kyäjpxwäˈkxtë oybyë ayuk, duˈunë yetyëjk, toxytyëjk etsë ënäˈkuˈunk. Pën mijts mˈëwäˈkx mgäjpxwäˈkxp, yëˈë nety mbanëjkxypy extëmë Jesus mnëˈëmoˈoy mduˈumoˈoyëty. Mä yäˈädë artikulo, yëˈë nˈixäˈänëm tiko njënäˈänëm ko Jesus yëˈëdën tyam xynyëˈëmoˈoy xytyuˈumoˈoyëm mä nˈëwäˈkx ngäjpxwäˈkxëm. Ko duˈun nnijäˈäwëm, yëˈë xypyudëkëyäˈänëm parë nmëduunˈadëtsëmë Jyobaa ets nmëmëdoˈowëmë Jesus extëm xynyëˈëmoˈoy xytyuˈumoˈoyëm.
