MATEO tkujäˈäyë: “Oknëm ja Jesús tyëjkë mëj tsäjptëjk nyabotsoty es dyajpëtseemy nidëgekyë diˈibë naty jap juuy toˈktëp, es dyajjëmbijty ja myeesëty diˈibë naty jap wyingugoondëp ja meeny [...], es nandëˈën dyajjëmbijty ja syiyëty diˈibë tyoˈktëp ja pak. Ta ja Jesús jyënany: Dëˈën ja Diosë jyaaybyajtën jyënaˈany: Yëˈë ndëjkëts yëˈë dëˈën mä jäˈäy kyäjxtaˈaky, per miitsëty të xyyajwäˈändë maˈtspë äänk” (Mat. 21:12, 13).

Të yaˈëxpëjkpëtsëmy ko pënaty ijty toˈktëp mä ja templë, jantsy tsooxë tijaty ttooktë. Extëm mä liibrë diˈib xyëwˈäjtypy Misná (Keritot 1:7), jyënaˈany ko mä primer siiglë axtë ojts tuk tiempë tsyobääty majtskë palomë tuk denaaryë diˈib oorë. Tyäˈädë ja ijty tuˈugë jäˈäy tniduny 25 xëëw. Ja Ley yajnigutujkëp ijty etsë ayoobë jäˈäy tˈyaktët extëmë wintsëˈkën ja palomë o muuxy, per kom jantsy tsooxë nety, kyaj mbäät tnekyjyuuytyë (Lev. 1:14; 5:7; 12:6-8). Tuˈugë judiyë wintsën diˈib xëwˈäjt Simeón ben Gamaliel yajjotˈambëjkë tyäˈädë, ta jyënany parë kyaj ja wintsëˈkën nyekyyajˈyakët extëmë nety nyigutukyëty, pääty nuˈunë nety tsyobääty majtskë palomë, mëgoˈpx duˈunën kyujënajky.

Extëm nˈijxëm, mbäät njaygyujkëm tiko Jesus ojts ttijy “maˈtspë” pënaty juuy toˈktë mä ja templë, pes nëgooyë netyë jäˈäy tmaˈtsnëdë ets tˈatsojknëdë meeny.