NIˈAMUKË nnijäˈäwëm ko Jyobaa yëˈë nyëˈëmoopy tyuˈumoobyë kyäjpn, ets myoopy tijaty yajtëgoyˈajtypy parë myëwingonëdët mä tyäˈädë “tiempë diˈib jëjpkëxanëp” (2 Tim. 3:1, TNM). Per tsojkëp niduˈuk niduˈuk nmëmëdoˈowëm. Ja israelitëty diˈib tsënääyëdijttë mä ja lugäärë äänëˈëk tëtsëˈëkpë, yëˈë ijty myëdoowgujkëdëp wixaty ja trompetë yajtukxuˈuxy ets netyë tijaty ttundët. Tyam nan tsojkëp duˈun nduˈunëm.

Jyobaa tyukˈanaˈamë Moisés parë dyaˈoyët majtskë trompetë diˈib platë. Tyäˈädë yëˈë diˈibë “jäˈäy yajtukxuxmuktëp ets nyiyoˈoybyatëttëty. Ets yëˈë duˈun myëdowdëp, ko ja tsoˈonën yˈitäˈänëty” (Núm. 10:2, MNM). Ja saserdotëty tsojkëp ijty ttukxuˈuxtët tëgatsyaty ja trompetë parë ja israelitëty tnijawëdët ti tyundëp (Núm. 10:3-8). Tyam, ninuˈun nDiosmëduˈunëm, nan wiˈixëm nmëdoˈowëm yajtukxuˈuxy ja trompetë. Min nˈokˈijxëm wiˈixën tyam tëgëk pëky yajtukxuˈuxy, duˈun extëm mä jyukyˈäjttë ja israelitëty: Ko nyajwoˈowëm mä nimay nduˈukmujkëm, mä yˈëxpëktë pënaty tuundëp mëjjäˈäy ets ko nyajtukˈawäˈänëm tijaty yajwijtstëgäjtsp mä Diosë kyäjpn.

Ko ijtyë Jyobaa ttsoky parë “tëgokyë ja jäˈäy myujktäˈädëty” mä yajnidëkën ja tabernakulo, ta ja saserdotëty ttukxuˈuxtë majtsk ja trompetë (Núm. 10:3, TNM). Ja israelitëty ja nety të nyaywyäˈkxëdë mäjtaxk pëky ets të nety tmëdoowˈyujnëdë wiˈix yajtukxuˈuxy ja trompetë ko yajˈyaxtsowdë. Waˈan ja diˈib jamyë tsënääytyëp mä ja tabernakulo, pojënë jyäˈttë, per ja diˈib jagam yajpattëp, myënëjkxypy mas niˈigyë ja tiempë ets yajnimëjääwdaktëp. Per oy wyiˈixˈatët, Jyobaa tsyojk ets niˈamukë tmëdoowˈittët tijaty nyiˈanaˈamëyaampy.

Tyam, nan yajwoˈowëm mä nimay njantsy tyuˈukmujkëm. Per kyaj nëjkxëm mä tuˈugë tabernakulo, jamën mä asamblee tëgëk xëëbë ets mä wiinkpë tuˈukmujkënë mëjjatypyë mä nˈaxäjëmë ëwij käjpxwijën ets mä nyajnëˈëmoˈoy nyajtuˈumoˈoyëm. Niˈamukë Dios mëduumbë diˈib yajpattëp abëtsemy nyaxwinyëdë nan yëˈë tyäˈädë programë myëdoowˈijttëp. Ets duˈunxyëp extëm yajpäättë tuˈugyë agujk jotkujk. Ta näägë nmëguˈukˈäjtëm diˈib kajaa jyantsy nyiyoˈoyëdëp parë nyëjkxtë. Per nipën kyawinmay ko nëgoobë ja xyëëw tiempë të dyajtuny.

Per ¿wiˈix mbäät ttukˈoyˈattë pënaty tsënääytyëp nidëkë o jantsy jagam mä tyunyëtyë tyäˈädë tuˈukmujkënë mëjatypyë? Mët ko tyam mbäät netyë tijaty yaˈix ets yajmëdoy, ta nimayë tyäˈädë nmëguˈukˈäjtëm tmëdoowˈittë nanduˈun tijaty näjxp mä tyäˈädë mëjatypyë tuˈukmujkën ets nyayjyawëdë extëmxyëp mëët yajpäättë. Extëm nˈokpëjtakëm, ko ja nmëguˈukˈäjtëm diˈib tsoˈondëp mä Betel diˈib  Estados Unidos tkuˈijxëdë Betel diˈib Benín, yˈijx myëdoowdë nanduˈun ja programë ja nmëguˈukˈäjtëm diˈib Arlit (Níger), tuˈugë käjpnnuˈunk diˈib yajpatp mä ja lugäärë äänëˈëk tëˈëtspë diˈib Sahara. Ja yˈojtstë 21 nmëguˈukˈäjtëm ets abëkyë jäˈäyëty diˈib yˈoymyëdoowdëbë Diosë yˈayuk. Yëˈëjëty duˈun nyayjyäˈäwëdë extëmxyëp yajpattë mët ja 44,131 nmëguˈukˈäjtëm diˈibë nety të tyuˈukmuktë. Tuˈugë nmëguˈukˈäjtëm duˈun tkujäˈäyë: “Dyoskujuyëm kots nanduˈun të xytyukˈix të xytyukmëdowdë tyäˈädë programë. Tyäˈädë yëˈëts xytyukˈijxtëp jatëgok nuˈunëts xytsyoktë”.

Ko ijty ja saserdotëty ttukxuˈuxtë jeˈeyë tëgok ja trompetë, yëˈë yˈandijpy ko yëˈëyë yajˈyaxtsoowdëp “diˈib nyiwintsënˈäjttëp ja nidukmilbë israelitëty” parë myindët mä ja tabernakulo (Núm. 10:4). Pes jam mä netyë Moisés tyukˈawanëyäˈänëdë tijaty ets tyuˈumoˈoyäˈänëdë wiˈix mbäät tpudëkëdë ja tuktëëm tukˈäätspë jäˈäy diˈib nyikëjxmˈäjttëp. Kooxyëp mijts xynyigëbäjkˈäjty ja nidukmilbë israelitëty, ¿ti kyajxyëp xytyuunyë mëjääw parëxyëp jam myajpaty etsxyëp ojts xyˈaxäjë ja naybyudëkë?

Pënaty tyam tuundëp mëjjäˈäy mä tuˈukmujkën kyaj tniwintsënˈattë ja myëguˈuktëjk diˈibë Dios të tyuknipëkëdë parë tˈijxˈit tkuentˈatët (1 Peed. 5:1-3). Per tyuundëbë mëjääw parë tsuj yajxon tˈijxˈit tkuentˈattë. Pääty xondaˈakyˈääw xondaˈakyjyot tkupëktë ko yajwowdë mä Eskuelë parë Mëjjäˈäytyëjk ets diˈib Pudëjkëdëp. Duˈuntsoo mas niˈigyë yajtukniˈˈixëdë wiˈix dyaˈoyëdët ja jotmay diˈib pyattëp ja nmëguˈukˈäjtëm. Ets mët ko duˈun yˈëxpëktë, ta niˈamukë nmëguˈukˈäjtëm tmëwingondë Jyobaa. Axtë pënaty kyaj nyëjkxtë mä tyäˈädë eskuelë mbäät nanduˈun ttukˈoyˈattë ko ja mëjjäˈäytyëjk të yˈotstë.

Ko ijty ja saserdotëty kanäkˈoknipat ttukxuˈuxtë ja trompetë, yëˈë yˈandijpy ko Jyobaa tsyojkypy ets jatëgok tyuˈudëkëdët ja israelitëty (Núm. 10:5, 6). Ets ta net tyuˈudëjkëndë tukniwits tuknimäˈkxë, per parë duˈun ttundët yajnimëjääwdaktëp ijty. Waˈan nääk ja israelitëty tmëkjäˈäwëdë tsyoondët jatëgok. ¿Tiko?

Waˈan nääk wyinmääytyë ko janääm jatsojk yajtukxuxnë ja trompetë parë tsyoondët ets ko ajotkumonë duˈun ttuunëdë. Biiblyë jyënaˈany ko näˈäty ja “yoots” jeˈeyë tsyunaxy, ets ja “komjëbom taats pyëdëˈëkkojnë”. Ets näˈäty ja yˈity “kanääkxëëw, tuˈkpoˈo, ëgë tukjëmëjt”, ta jatëgok pyëdëˈëky (Núm. 9:21, 22, MNM). ¿Näkˈok ja israelitëty tsyënääytyëgäjtstë? Mä Números kapitulo 33 yajnigajpxy naa 40 lugäär mäjaty ojts nyaynyikojëdë.

Mä ja lugäärë äänëˈëk tëtsëˈëkpë, waˈan nääk ja israelitëty tpattë it lugäärë xeemybyojtsnëbë (Deut. 1:19). Ets waˈan wyinmääytyë ko jantsy oy ja lugäär diˈib të päättë ets kyaj tiko tsyoondët.

Niˈamukë ijty ja israelitëty tmëdoowdäˈäytyë ko kanäkˈok yajtukxuˈuxy ja trompetë, per kyaj tuktonyë tsyoˈondäˈäytyë. Tamë nety diˈib kuanë ko myaˈkxtuktët axtë koonëm tyukjäˈtëdët. Ko ogäˈän yajtukxuˈuxy ja trompetë, yëˈë parë tyuˈudëkëdët ja tyëëm yˈäätsë Judá, Isacar etsë Zabulón (Núm. 2:3-7; 10:5, 6). Ko nety të nyëjkxtäˈäytyë, ta jatëgok ja saserdotëty ttukxuˈuxtë ja trompetë, ta net tyuˈudëkëdë ja tëgëëkpë tëëm ääts diˈib wëˈëmdëp abatkëˈëytsyoow. Ets duˈun kanäkˈok ja saserdotë ttukxuxtë ja trompetë axtë koonëm tsyoˈondäˈäytyë ja israelitëty.

Waˈan të xytsyiptakxëm ngupëjkëm ko tijaty të yajwijtstëgatsy mä Diosë kyäjpn. Nan waˈan nwinmäˈäyëm ko nëgooyë tijaty të yajwijtstëgäjtsnë. O të nmëyujjënë wiˈix tijaty nduˈunëm ets kyaj njatsojkëm parë tyëgatsët. Ets waˈan ojts xytsyiptakxëm nyaˈijxëmë maˈkxtujkën mientrës nˈijxwëˈëmëm diˈibë nety të tyëgatsy. Per nnijäˈäwëm ko tsojkëp duˈun nduˈunëm. Pën nduˈunëmë mëjääw, mbäät nˈijtëm seguurë ko Jyobaa xykyunuˈkxäˈänëm.

Jyobaa nyëˈëmooy tyuˈumooy miyonkˈamë yetyëjk, toxytyëjk etsë ënäˈkuˈunk mä ja lugäärë äänëˈëk tëëtsëˈëkpë. Koxyëp kyakuentˈäjtëdë ets kyanëˈëmooy kyatuˈumooyëdë, jamyëxyëp yˈoˈktääytyë ja israelitëty. Mä tyäˈädë tiempë diˈib jëjpkëxanëp, Jyobaa nan xynyëˈëmoˈoy xytyuˈumoˈoyëm ets xypyudëjkëm parë niˈigyë kyëktëkët ja mëbëjkën ets nmëwingoˈonëm. Pääty, nˈoktuˈunëmë mëjääw parë nmëdoowgujkëm wixaty ja trompetë yajtukxuˈuxy, duˈun extëm ttuundë ja israelitëty.