1. ¿Tijaty jotmay mbäät xyˈatsëˈkëm?

 MIN nˈokˈijxëm wiˈix yajnimaytyäˈäktë näägë nmëguˈukˈäjtëm, tim jawyiin, yëˈë Néstor mëdë kyudëjk María. * Yëˈëjëty janëjkxandëbë nety mä tuˈugë lugäär mä tyëgoyˈatyë käjpxwäˈkxpë, ets parë duˈun ttundët, tsojkëbë nety jyukyˈattët adëyë. Per jyëjptsëˈkëdë mët ko wyinmääytyë ko pën jukyˈäjttëp duˈun, kyaj agujk jotkujk yajpäädäˈändë. Jatuˈugë nmëguˈukˈäjtëm mëdiˈibë yajnimaytyäˈägäämp yëˈë Biniam, mëdiˈibë tsënaapy mä tuˈugë lugäär mä kyubokyë Diosë tyuunk. Ko tyëjkë ëxpëjkpë, ta wyinmääy ko nanduˈunë jäˈäy nyibëdëˈëgäˈänyëty ets jyëjptsëˈkë, per mëdiˈibë niˈigyë tsyëˈkë, yëˈë wiˈix ja fyamilyë wyinmaytyët ko të tyëkë ëxpëjkpë. Tim ok, yëˈë nimaytyäˈägäˈänëmë Valeria mëdiˈibë yajtukˈawäˈänë ko të nety pyaatyëtyë kanser. Kyaj tkupëkanyë neˈpyny mët ko yëˈë nety myëmëdowaambyë Diosë yˈanaˈamën. Ojts tsyiptakxëty tpäädët tuˈugë doktoor mëdiˈibë tsukëdëp ets kyaj dyajtunëdë neˈpyny, pesë Valeria kyaj nety jyaˈoogäˈäny.

2. ¿Tiko tsyokyëty nduˈunëmë mëjääw parë kyaj nnaytyukmëmadakëmë tsëˈëgë?

² ¿Të näˈä duˈunë tsëˈëgë xyˈokˈyajnäjxpë extëm të yajnimaytyäˈäktë yäˈädë nmëguˈukˈäjtëm? Waˈan duˈun të njäjtëm. Ets kyaj wyiˈixëty ko ntsëˈkëm, mëdiˈibën jotmay yëˈë ko nnaytyukmëmadakëm, pes mbäät tijaty xytyuktuˈunëm mëdiˈibë xytyukmëjagamgakëmë Jyobaa, ets yëˈëjënë Satanás tsyojkypy. Pes nyijäˈäwëp ko pën xytyuktëjkëmë tsëˈëgë mbäät kyaj nekymyëmëdoˈowëmë  Jyobaa, extëm ko xyˈanmäˈäyëm nˈëwäˈkx ngäjpxwäˈkxëm ja oybyë ayuk (Diˈibʉ Jat. 12:17). Satanás jantsy axëkjäˈäy, kyaj pyaˈˈayoy ets kumëjääw. Per ¿ti xypyudëkëyäˈänëm parë kyaj ntsëˈkëm?

3. ¿Ti xypyudëkëyäˈänëm parë kyaj ti ntsëˈk njäˈäwëm?

³ Pën ijtëm seguurë ko Jyobaa xytsyojkëm ets ko xypyudëkëyäˈänëm, Satanás kyaj xyˈatsëˈëgëyäˈänëm (Sal. 118:6). Extëm nˈokpëjktakëm, ja mëdiˈibë jyaayë Salmo 118 pyatë amay jotmay mëdiˈibë ojts yajmay yajtäjˈyëty. Mayë jäˈäy myëtsipˈäjtëdë axtë mëdiˈibë nety myëdäjttëbë kutujkën (bersikulo 9 etsë 10). Näˈäty, ojts tijaty tjantsy myëmay tjantsy myëdäjy (bersikulo 13). Ojts nanduˈun mëkë Jyobaa jyëjwijtsëmbityëty (bersikulo 18). Per oy duˈun yˈokjäjty, yëˈë jyënany: “Kyajts ntsëˈëgëyaˈany”. ¿Tiko duˈun jyënany? Yëˈko nyijäˈäwëbë nety ko Jyobaa tsojkëp oyë nety të yˈokjëjwijtsëmbityëty. Yäˈädë Diosmëduumbë, ijt seguurë ko oy wiˈix tyimjat tyimkëbatët, Jyobaa xëmë nety pyudëkëyaˈanyëty (Sal. 118:29).

4. ¿Tijaty kyaj ntsëˈëgëyäˈänëm pën ijtëm seguurë ko Jyobaa xytsyojkëm?

⁴ Oy ko niduˈuk niduˈugë Diosmëduumbë yˈitët seguurë ko Jyobaa jantsy tsojkëp. Pes yëˈë pudëkëyanëp parë kyaj tii ttsëˈëgët. Mä yäˈädë artikulo yajnimaytyäˈägäˈäny tëgëk pëky mëdiˈibë mbäät xyˈatsëˈkëm: 1) ko ngamoˈoyëmë familyë tijaty yajtëgoyˈäjttëp, 2) ko ntsëˈkëmë naxwinyëdë jäˈäy ets 3) ko ntsëˈkëmë oˈkën. Ja nmëguˈukˈäjtëm mëdiˈibë të yajnimaytyäˈäktë mä parrafo 1 kyaj nyaytyukmëmadakëdë tsëˈëgë, jaˈko ijttë seguurë ko Jyobaa mëk tsyokëdë.

5. ¿Tijaty myëmääy myëdäjttëp pënaty nyigëbäjkˈäjttëbë fyamilyë? (Ixë dibujë mëdiˈibë miimp mä rebistë nyiˈak).

⁵ Pënaty nyigëbäjkˈäjttëbë fyamilyë, myëmääy myëdäjtëp wiˈix tˈokmoˈoytyët tijaty yajtëgoyˈäjttëp (1 Tim. 5:8). Waˈan ko jyaˈˈatyë yäˈädë päˈäm COVID-19, xymyëmay xymyëdäjy ko kyaj xynyekymyëdatët ja mduunk, ko xykyanekymyoˈoyëdë mfamilyë ja kyaˈay yˈukën o mä tsyëënëdët. Ets axtë mbäät mwinmay ko kyaj wiinktsoow ja mduunk xynyekypyäädäˈäny ko xyajtëgoyët. O waˈan mwinmay ko kyaj mjotkujkˈatët pën adëyë mjukyˈäjtënë xyajnaxy, duˈun extëmë Néstor mëdë María mëdiˈibë të yˈokˈyajmaytyakpëdë. Satanás duˈunën xyˈatsëˈëgëyäˈänëm ets të mayë nmëguˈukˈäjtëm ttukmëjagamgaˈaktë Jyobaa.

6. ¿Wiˈixë Satanás xyjyayajwinmayäˈänëm?

⁶ Satanás xyjyatukmëbëkäˈänëm ko Jyobaa kyaj nyaytyukjotmaytyunyëty mët ëtsäjtëm, ets ko kyaj xypyudëkëyäˈänëm parë nmoˈoyëmë familyë tijaty yajtëgoyˈäjttëp. Pën xytyukmëbëjkëm, mbäädë net nwinmäˈäyëm ko tsojkëp nduˈunëm parë nmoˈoyëmë familyë tijaty yajtëgoyˈajtypy, oy nganekymyëmëdoˈowëmë Dios.

7. ¿Wiˈix xyˈanmäˈäyëmë Jesus?

⁷ Nipën duˈun tkaˈixyˈatyë Diosteety extëmë Jesus. Pääty xyˈanmäˈäyëm: “MDeety wäˈäts tnijawë diˈibë miits mdëgoyˈäjtxëp määnëmë nety xykyaˈˈamdoy” (Mat. 6:8). Jesus nyijäˈäwëbë nety nanduˈun ko Jyobaa xëmë xymyoˈoyäˈänëm tijaty nyajtëgoyˈäjtëm. Jyobaa yëˈë xyfyamilyëˈäjtëm ets kom yëˈë xynyigëbäjkˈäjtëm, mbäät nˈijtëm seguurë ko duˈun tijaty ttunäˈäny extëm ttukˈaneˈemy niˈamukë pënaty nyigëbäjkˈäjttëbë fyamilyë mä 1 Timotee 5:8.

8. 1) ¿Ti xypyudëkëyäˈänëm ko njëjptsëˈkëm ngamoˈoyëmë familyë tijaty yajtëgoyˈäjttëp? (Matewʉ 6:31-33). 2) Extëm yaˈixy mä dibujë, ¿wiˈix mbäät nbanëjkxëmë yˈijxpajtën ja kasäädë jäˈäy mëdiˈibë jam myëmiindëbë jeˈxy pëky?

⁸ Pën njantsy myëbëjkëm ko Jyobaa xytsyojkëm mëdë nfamilyëˈäjtëm, itäˈänëm seguurë ko yëˈë xymyoˈoyäˈänëm tijaty nyajtëgoyˈäjtëm (käjpxë Matewʉ 6:31-33). Pesë Jyobaa jantsy oyjyaˈay ets kyaj wyindukëty. Ko ojts dyajkojˈyë Naxwinyëdë kyaj jeˈeyë tpëjktaky  mëdiˈibë mbäät nijukyˈäjtëm, këxy kaˈpxyën tijaty ojts dyajkojy yä Naxwiiny parë mbäät ndukxondakëm (Gén. 2:9). Nˈokkuˈëˈëw nˈokkukäjpxëm ko nmëdäjtëm tijaty nyajtëgoyˈäjtëm, oyxyëbë nety yëˈëyë nmëdäjtëm ti nixëwnäjxëm. Jyobaa xëmë xypyudëkëyäˈänëm ets xymyoˈoyäˈänëm tijaty nyajtëgoyˈäjtëm tuˈuk tuˈugë xëëw (Mat. 6:11). Oy ko xëmë njamyajtsëm ko Jyobaa mëjwiin kajaa tijaty xymyoˈoyäˈänëm mä tiempë myiny kyëdaˈaky, oy tyam ngamëdäjtëm tijaty njatsojkëm. Néstor mëdë María yˈijxtë wiˈixënë Jyobaa ojts kyunuˈkxëdë ko duˈun ttuundë (Is. 65:21, 22).

9. ¿Ti xytyukniˈˈijxëm extëm yajnimaytyäˈäktë Néstor mëdë María?

⁹ Néstor mëdë María, mëdiˈibë tsoˈondëp Colombia kyaj nety tii tyëgoyˈäjtxëdë, jantsy oyë jyëën tyëjkëty ets myëdäjttëbë tyuunk. Yëˈë duˈun tnimaytyäˈäktë: “Adëyëtsë netyë njukyˈäjtën njayajnaxäˈändë parëts niˈigyë ngäjpxwäˈkxäˈändë, per tsëˈkëdëbëtsë nety kots agujk jotkujk nganekyyajpäättët”. ¿Ti pudëjkëdë? Yëˈko twinmääytyë wixatyë netyë Jyobaa të pyudëkëdë. Ijttë seguurë ko Jyobaa xëmë yˈijxˈitäˈän kyuentëˈatäˈänëdë, pääty tmastuttë ja tyuunk mä nety tsooxë yajmëjuytyë, ttoˈktë ja tyëjk ets ta ojts nyëjkxtë wiink paˈis mä niˈigyë tyëgoyˈatyë käjpxwäˈkxpë. ¿Wiˈix nyayjyäˈäwëdë ko duˈun ttuundë? Néstor jyënaˈany: “Tëjëts nˈixtë ko jantsy tëyˈäjtën extëm jyënaˈanyë Matewʉ 6:33. Nitiits xykyatëgoyˈäjtxëdë. Ets tyam, mas agujk jotkujkëts nyajpäättë”.

10. ¿Tiko jäˈäy ttsëˈëgë myënaxwinyëdë jäˈäy?

¹⁰ Nuˈun kujkë tiempë nyaxy, nëgooyë jäˈäy nyayˈaxëktuunëndë nixim niyam (Ecl. 8:9). Extëm nˈokpëjktakëm, ta jäˈäy mëdiˈibë kyaj oy dyajtundë kyutujkën, ta mëdiˈibë yaˈoˈk yajtëgooytyëbë myëguˈuk, ta mëdiˈibë wyingäjpx jyëjpkäjpxtëp ets yˈatsëˈk yˈajäˈäwëdëp ja myëˈeskuelëˈˈënäˈk ets ta net nääk mëdiˈibë axëëk tyuundëbë fyamilyë. Päätyënë naxwinyëdë jäˈäy ttsëˈëgë myënaxwinyëdë jäˈäy. ¿Wiˈixë netë Satanás dyajtunyë yäˈädë tsëˈëgë?

11, 12. ¿Wiˈixë Satanás xytyukˈatsëˈëgëyäˈänëmë naxwinyëdë jäˈäy?

¹¹ Satanás yëˈë yajtuumbyë naxwinyëdë jäˈäy parë xyˈatsëˈkëm ets kyaj nekyˈëwäˈkx nekykyäjpxwäˈkxëm o parë kyaj nekytyuˈunëm tijatyë Jyobaa xytyukˈanaˈamëm. Të dyajtuny näägë gobiernëtëjk parë dyajkubokyë Diosë tyuunk ets xytyuknibëdëˈkëm (Luk. 21:12; Diˈibʉ Jat. 2:10). Mä tyamë Satanás yˈaneˈemy, mayë jäˈäy tniwäämbattë Jyobaa tyestiigëty ets dyajwäˈkxtë informasion mëdiˈibë kyaj  tyëyˈäjtënëty. Pënaty myëbëjktëp, mbäädë net xynyixik xytyukxikëm o axtë xytsyiˈk xykyojxëm (Mat. 10:36). Kyaj mëjˈixy mëjmëdoy njäˈäwëm ko duˈunë Satanás xynyibëdëˈkëm, pes nanduˈun ojts yajnibëdëˈëktë nmëguˈukˈäjtëm mä primer siiglë (Apos. 5:27, 28, 40).

¹² Satanás kyaj yëˈëyë xytyukˈatsëˈëgëyäˈänëm ko ja gobiernëtëjk xynyibëdëˈkëm. Yëˈë nanduˈun xytyukˈatsëˈëgëyäˈänëm ko wiˈix ja familyë jyënäˈändët ko të ndëjkëm ëxpëjkpë. Ets nimay yëˈë naytyukˈatsëˈkëdëp, këdiinëm ko axëëk yajtundët. Kom tsyojktëp ja fyamilyë ets jyatukmëtsojktëp parë nanduˈun tˈixyˈattëdë Jyobaa ets ttsoktët, pääty mëk tjawëdë ko tˈëbäät tkäjpxpäättë Jyobaa ets pënaty mëduunëp. Näˈäty ja jëëky mëguˈuk mëdiˈibë nety xytyukmëtsipˈäjtëm, mbäät ok tyëkë ëxpëjkpë. Per ¿ti net ndunäˈänëm ko niduˈuk xyˈanmäˈäyëm ko kyaj xynyekyˈixäˈänëm?

13. ¿Tiko mbäät nˈijtëm seguurë ko Jyobaa xytsyojkëm oy ja jëëky mëguˈuk xymyastutëm? (Salmo 27:10).

¹³ ¡Xyjyotkujkmoˈoyëm extëm jyënaˈanyë Salmo 27:10! (Käjpx). * Pën xëmë nyaˈijtëm winmäˈänyoty ko mëkë Jyobaa xytsyojkëm, ta kyaj ntsëˈëgëyäˈänëm oy ti tyun jyatëdët ets oyë jëëky mëguˈuk xymyastutëm, pes ijtëm seguurë ko xykyunuˈkxäˈänëm pën madakëm. Jyobaa xymyoˈoyäˈänëm tijaty mbäät nijukyˈäjtëm, xyjyotkujkmoˈoyäˈänëm ets xypyudëkëyäˈänëm parë niˈigyë nmëwingoˈonëm, nipën duˈun xykyakuentëˈatäˈänëm extëmë Jyobaa. Ets duˈunën tˈijxyë Biniam, mëdiˈibë të yajnimaytyaˈaky mä parrafo 1.

14. ¿Ti xytyukniˈˈijxëm extëm yajmaytyaˈagyë Biniam?

¹⁴ Biniam tëjkë ëxpëjkpë oyë nety tjanijawë ko mä pyaˈis, ja gobiernë nyibëdëˈktëbë Jyobaa tyestiigëty. Yëˈë jyënaˈany: “Ja gobiernëtëjk axëëgë nety tjantsy tyundë ja Testiigëty, per kyajts yëˈë ntsëˈkë, mëdiˈibëts niˈigyë ntsëˈkë, yëˈë kots xynyibëdëˈëgët ja nfamilyë. Ntsëˈkëts nanduˈun kots ja ndeety axëëk nyajnayjyawëdët ets kots ja nfamilyë kyaj xyˈokmëjˈijx xyˈokmëjpëjktaknët mët kots të ndëkë ëxpëjkpë”. ¿Ti pudëjkë Biniam parë kyaj nyaytyukmëmadakë tsëˈëgë? Yëˈko tjamyetsy ko Jyobaa tsojkëp ets ko xëmë tˈijxˈity tkuentëˈaty pënaty nanduˈun tsojkëp. Biniam duˈun tnimaytyaˈaky: “Mëdiˈibëts xypyudëjkë, yëˈkots nwinmääy wixatyë Jyobaa të tpudëkë pënaty të dyaˈˈamääytyäˈäktë myeeny syentääbë, pënaty axëëk të yajtundë o të yajnibëdëˈëktë. Nnijäˈäwëbëtsë nety ko pën ndukˈijxpejtypyëtsë  Jyobaa amumduˈukjot, yëˈë xykyunuˈkxäämbëts. Kanäkˈokëts nyajtsuumy nyajmäjtsy etsëts nyajtëytyuuny, kots duˈun axëëk njäjty ngëbejty, ndimyˈijxëts wiˈixënë Jyobaa mëjwiin kajaa xypyudëjkëm pën kyaj nmastutëm”. Biniam yˈijxë Jyobaa extëmë tyeety ets ja nmëguˈukˈäjtëm extëmë fyamilyë.

15. ¿Tiko kyaj wyiˈixëty ko ntsëˈkëmë oˈkën?

¹⁵ Biiblyë jyënaˈany ko oˈkën yëˈë tuˈugë mëtsip (1 Kor. 15:25, 26). Pën ëtsäjtëm pëjk ijxëm o ja jëëky mëguˈuk, xytyuktëjkëmë moˈon tujkën ko nwinmäˈäyëm ja oˈkën. ¿Tiko ntsëˈkëmë oˈkën? Yëˈko Jyobaa ojts xyajkojëm parë njukyˈäjtëm xëmëkyëjxm (Ecl. 3:11). Kyaj wyiˈixëty ko ntsëˈkëmë oˈkën, pes mbäät xypyudëjkëm parë nguentëˈäjtëm ja jukyˈäjtën. Extëm nˈokpëjktakëm, xypyudëjkëm parë kyaj nëgoo njëˈxëm tijaty mbäät xyˈaxëktuˈunëm, parë nduˈunëmë ejersisyë, nëjkxëm mä doktoor, njëˈxëm ja tsooy ko nyubajt nbäˈämbajtëm ets nguentëˈäjtëm ja jukyˈäjtën parë kyaj nbëjktakëm jotmayjëjpˈam.

16. ¿Wiˈixë Satanás dyajtuny ko ntsëˈkëmë oˈkën?

¹⁶ Satanás nyijäˈäwëp ko nyajtsobatëm ja jukyˈäjtën, pääty wyinmay ko mbäät oytyim tiijëty nduˈunëm parë kyaj nˈoˈkëm ets axtë mbäät nmëjagamgakëmë Jyobaa (Job 2:4, 5). ¡Per kyaj tyëyˈäjtënëty extëm jyënaˈany! Komë Satanás yëˈë “diˈibë yajjäˈäyˈoˈkp”, yëˈë yajtuumpy parë ntsëˈkëmë oˈkën ets nmastutëmë Jyobaa (Eb. 2:14, 15). Satanás yëˈë näˈäty yajtuumbyë jäˈäy parë xyˈatsëˈkëm o xyˈanmäˈäyëm ko xyaˈoogäˈänëm pën kyaj nmastutëmë Jyobaa. O mbäät ajotkumonë nbäˈämbajtëm etsë net nyajmënëjkxëm mä hospital ets mëktaˈaky xyˈanmäˈäyëmë doktoor o ja familyë mëdiˈibë kyaj Tyestiigëty parë ngupëjkëm ja neˈpyny mëdiˈibë nnijäˈäwëm ko yajkubojkypyë Dios. O waˈanë net pën mëktaˈaky xyˈanmäˈäyëm parë nyajtuˈunëmë ääy tsooy mëdiˈibë Dios yajkubojkypy.

17. Extëm jyënaˈanyë Romanʉs 8:37-39, ¿tiko kyaj mbäät ntsëˈkëmë oˈkën?

¹⁷ Nipën kyaˈoogäˈäny, per nnijäˈäwëm ko Jyobaa duˈunyëm xytsyokäˈänëm oyxyëp njaˈoˈk njatëgoˈoyëmbë (käjpxë Romanʉs 8:37-39). Ko yˈoogyë Jyobaa myëtnaymyaayëbë ninäˈä tkajäˈäytyëgoy, pes duˈun tˈixy extëmxyëp jyukyˈattë (Luk. 20:37, 38). Yëˈë jyantsy yajjukypyëkaambyën jatëgok pënaty të yˈook të tyëgoytyë (Job 14:15). Jyobaa kyëyäjkë yˈUˈunk parë mbäät nbatëm ja jukyˈäjtënë xëmëkyëjxmbë (Fwank 3:16). Nnijäˈäwëm ko Jyobaa mëkën xytsyojkëm ets xyˈijxˈijt xykyuentëˈäjtëm. Pääty ninäˈä mbäät ngamastutëm, oy nbëjk nˈijxëm ets oy ja jukyˈäjtënë yˈity oˈkën jëjpˈam. Niˈigyën mbäät nˈaˈoˈkëmë Jyobaa parë yëˈë xymyoˈoyëm ja jotkujkˈäjtën, ja wijyˈäjtën ets ja jot mëjääw. Duˈunën ttuunyë Valeria mëdë myëmëjjäˈäy (Sal. 41:3).

18. ¿Ti xytyukniˈˈijxëm extëm yajmaytyaˈagyë Valeria?

¹⁸ Ko netyë Valeria jyëmëjt 35, ta yaˈˈanmääy ko yëˈë myëdäjtypyë kanser mëdiˈibë kyaj nëgoo pën duˈun tmëdaty. Min nˈokˈijxëm wiˈix pyudëjkë ko ttsokyë Jyobaa parë kyaj tsyëˈëgët oy tyimˈoogët. Yëˈë jyënaˈany: “Kots nyaˈˈanmääy ko yëˈëtsë nety të xypyaatyë kanser, tim tëgäjtsëtsë njukyˈäjtën, tsojkëbëtsë nety nyajtsukët parëts nˈagëdäˈägët. Tats nˈëxtääy kanäägë doktoor, per nipënëts xykyatsukany mët ko kyajts ngupëkanyë neˈpyny. Tsëˈkëts, per yëˈëtsë nety nmëmëdowaambyë Dios, pääty niwiˈixtsoowëtsë neˈpyny ngakupëkany. Nuˈunëts kujk njukyˈaty, tëtsë Jyobaa xytyukˈixy ko mëkëts xytsyoky ets tsojkëbëtsë nety nyajnigëxëˈëgët ko ntsojkypyëts. Tëgok tëgokëts nyaˈˈanmääy ko mëjtakpëts, niˈigyëtsë jot mëjääw nbëjktaky parëts nyajnigëxëˈëgäˈäny ko Satanás kyaj mbäät ttukpëtsëmyë wyinmäˈäny. Nyajnayjyawëyanëtsë Jyobaa agujk jotkujk,  ok, tats nyajtsujky ets kyaj tyëjkë neˈpyny. Duˈunyëmëts nmëdaty ja päˈäm, perë Jyobaa xëmëts xymyoˈoytyë tijatyëts nyajtëgoyˈäjttëp. Extëm nˈokpëjktakëm, mä taabë sëmään mätsë nety nganijawënëm ko nmëdäjtypyëtsë kanser, yëˈë nety të yaˈëxpëky mä reunyonk wiˈix mbäät amëk jotmëk nwinguwäˈkëmë amay jotmay. * Mëjwiin kajaats xypyudëjkëdë yäˈädë artikulo ets kanäkˈokëts ojts ngäjpxtë. Ko duˈumbë artikulo pyëtsëmy ets kots duˈunyëm nˈëwäˈkx ngäjpxwäˈkxtë etsëts nëjkxtë reunyonk, yëˈëts xypyudëjkëdë parëts oy tijaty nduundë”.

19. ¿Ti tunan jatanëp tim tsojk?

¹⁹ Abëtsëmy nyaxwinyëdë, taaˈäjtpë nmëguˈukˈäjtëm mëdiˈibë të tmëmadäˈäktë amay jotmayë mëjwiin kajaabë ets të tjëjpkuwäˈägëdë Satanás mët ko Jyobaa të pyudëkëdë (1 Peed. 5:8, 9). Mijts, mbäät nanduˈun xytyuny. Tim tsojkë Jyobaa tˈanëëmëyaˈanyë Jesus ets pënaty mëët yˈanaˈamäˈändë parë dyajkutëgoytyët tukëˈëyë tijaty tyuumpy “ja mëjkuˈugopk” (1 Fwank 3:8). Ko nety duˈun të ttundë, ta ja Diosmëduumbëty tˈixäˈändë wiˈix yˈadëyë yäˈädë wandakën: “Nitii mgaˈˈatsëˈëgëyaˈanyëty ets kyaj tiko mtsëˈëk mjawët” (Is. 54:14; Miq. 4:4). Mientrës jyaˈtyë yäˈädë tiempë, nˈoktuˈunëmë mëjääw parë kyaj nnaytyukmëmadakëmë tsëˈëgë.

20. ¿Ti xypyudëkëyäˈänëm parë kyaj xymyëmadakëm ja tsëˈëgë?

²⁰ Tsojkëp nˈijtëm seguurë ko Jyobaa xytsyojkëm ets ko kyuwaampy pënaty mëduunëp. ¿Ti xypyudëkëyäˈänëm parë duˈun nduˈunëm? Yëˈko nwinmäˈäyëm wiˈixë Jyobaa të tˈijxˈity të tkuentëˈaty pënaty mëduunëdëp ets ndukmëtmaytyakëmë wiink jäˈäy. Oy ko nanduˈun njamyajtsëm wiˈixë Jyobaa të xypyudëjkëm ko të nbatëmë amay jotmay mëdiˈibë të xyajmäˈäy të xyajtäjëm. Extëm të nˈijxëm, mbäät nmëmadakëmë tsëˈëgë mëdë Jyobaa nyaybyudëkë (Sal. 34:4).