“TUˈUGË nmëguˈukˈäjtëm mëdiˈibë xyëwˈäjtypy Lisa, * tnimaytyaˈaky ko mëdiˈibë yˈoyˈijx ko tnijäˈäwë ja tëyˈäjtën, yëˈë wiˈixë nmëguˈukˈäjtëm yˈoyjyaˈaytyäˈäktë. Anne nanduˈun tnimaytyaˈaky: “Kots nˈixyˈajtyë Jyobaa tyestiigëty, yëˈëts mas niˈigyë nˈoyˈijx wiˈix jyantsy yˈoyjyaˈayˈattë ets kyaj yëˈëjëty tijaty tukniˈˈijxëdëp”. Anne mëdë Lisa, agujk jotkujk tyam nyayjyawëdë ko tkäjpxtë Biiblyë ets tpawinmaytyë. Per yëˈë niˈigyë pudëjkëdë ko ja nmëguˈukˈäjtëm jyantsy yˈoyjyaˈaytyaktë ets yˈijttë ajëëky amëguˈuk.

¿Wiˈix mbäät nyajnigëxëˈkëmë oyjyaˈayˈäjtën extëm mbäät pyudëkëdë pënaty mëët nyajpatëm? Min nˈokˈijxëm majtsk pëky. Myëduˈuk, wiˈix ngäjpx nmaytyakëm ets myëmajtsk, wiˈix tijaty nduˈunëm. Ta net nˈixäˈänëm pënaty mëët nˈoyjyaˈaytyakëm ets nˈijtëm ajëëky amëguˈuk.

Mä Proverbios kapitulo 31, yajnimaytyaˈaky ja toxytyëjk mëdiˈibë jyajty nyijäˈäwëp wiˈix tijaty ttunët ets jyënaˈany ko “mä ja yˈääw yaˈan yajpäätyë ley mä yajnigajpxy ja oyjyaˈayˈäjtën” (Prov. 31:26). Yäˈädë toxytyëjk naytyukpudëjkëp ja ley parë tˈixy wiˈix kyajpxy myaytyaˈaky. Oy ko nanduˈunë uˈunktääk uˈunkteety nyaytyukpudëkëdët ja ley parë tˈixtët wiˈix kyäjpx myaytyäˈäktë. Pes nyijäˈäwëdëp ko mbäät tˈaxëktundë ja yˈuˈunk yˈënäˈk ko mëk tmëˈˈëw tmëgäjpxtët ets mbäädë net kyaj oy wyinˈix yˈatsowdë. Per pën tsuj yajxon tmëgäjpxtë ja yˈuˈunk yˈënäˈk, mbäädë net myëmëdowëdë ets tˈijxkuk tjaygyukëdë wiˈix yaˈˈanëëmëdë.

Per ¿ti mbäät xypyudëjkëm parë niˈamukë ngäjpx nmaytyakëm tsuj yajxon? Mä tsyondaˈagyë Proverbios 31:26 jyënaˈany: “Yajwaˈkxypy ja wyiin yˈääw mëdë wijyˈäjtën”. Yäˈädë yëˈë yˈandijpy ko tsojkëp yajxon nwinmäˈäyëm wiˈix njënäˈänäˈänëm. Ets mbäät xypyudëjkëm ko nnayajtëˈëwëm: “Ja ääw ayuk mëdiˈibëts yam ngäjpxpëtsëmaampy, ¿niˈigyëts ja nmëguˈuk yajjotˈambëkäˈänyëty o yajjotxaamanëp?” (Prov. 15:1). Yëˈë nety nyaˈijxëmë wijyˈäjtën ko kontiempë ndukniwinmäˈäyëm wiˈix njënäˈänäˈänëm.

Jatuˈugë käjpxwijën duˈun jyënaˈany: “Ääw ayuk mëdiˈibë kyaj yajniwinmayë duˈun kyumy extëmë espäädë” (Prov. 12:18). Pën winmäˈäyëm ko mbäät ndukˈyajtsayujtëm ja ääw ayuk tuˈugë nmëguˈukˈäjtëm, ta net nnaygyuentëˈäjtëm. Pën nguytyuˈunëm ja “ley mä yajnigajpxy ja oyjyaˈayˈäjtën”, ta kyaj nyajtunäˈänëmë ääw ayuk mëdiˈibë mëkaty ets mëdiˈibë mbäät yajtsayuty (Éfes. 4:31, 32). Pääty, oy ko nˈijtëm ajëëky amëguˈuk ets yëˈë nyajtuˈunëmë ääw ayuk mëdiˈibë mbäädë nmëguˈukˈäjtëm pyudëkëdë. Jyobaa xymyoˈoyëmë oybyë ijxpajtën, pes ko Elías jyantsy tsyëˈkë, ta tkejxyë yˈanklës ets jyotkujkmooyë ko myëgäjpxë “yuunk naxypy” (1 Rey. 19:12). Perë oyjyaˈayˈäjtën kyaj jeˈeyë nyigëxëˈëgäˈäny mëdë ääw ayuk, tsojkëbën nanduˈun nyajnigëxëˈkëm mä tijaty nduˈunëm. Min nˈokˈijxëm wiˈix.

¿Wiˈix mbäät nbanëjkxëmë Jyobaa yˈijxpajtën? Ko tsuj yajxon ngäjpx nmaytyakëm ets nˈoyjyaˈaytyakëm (Éfes. 4:32; 5:1, 2). Lisa, mëdiˈibë të yajmaytyaˈaky mä parrafo 1, yˈijx wiˈixë Jyobaa tyestiigëty yˈoyjyaˈaytyaktë. Yëˈë jyënaˈany: “Kots ntsënääytyëgäjtstë mëdëtsë nfamilyë, ta nimajtskë kasäädë jäˈäy tˈamdoowdë permisë mä nety tyundë parëts xypyudëjkëdë  mäts nyajmujktääytyë tijatyëts nmëdäjttëp. Mä taabë tiempë kyajnëmtsë nety nˈëxpëky”. Ko duˈunë nmëguˈukˈäjtëm dyaˈijxëdë ja oyjyaˈayˈäjtën, yëˈë pudëjkë Lisa parë niˈigyë tnijawëyany ja tëyˈäjtën.

Anne mëdiˈibë të yˈokˈyajmaytyakpë, yˈijx nanduˈun wiˈix yˈoyjyaˈaytyaktë Jyobaa tyestiigëty. Yëˈë jyënaˈany: “Extëm tyam yˈixëtyë yäˈädë jukyˈäjtën, tsipëtsë nety pën ndukjotkujkˈatët”. Anne nanduˈun yˈakjënäˈäny: “Kots nˈixyˈajtyë Jyobaa tyestiigëty, kyajts ndimyˈijty seguurë pën jantsy duˈunën jyaˈayˈattë. Nnayajtëëwëts ¿tiko nëgoo tyim oyjyaˈayˈäjnëdë mët ëjts? Per ja nmëguˈukˈäjtëm mëdiˈibëtsë nety xyaˈëxpëjkp, xytyukˈijxëts ko jantsy oyjyaˈayë duˈun ets päätyëts ndukjotkujkˈäjty”. ¿Wiˈix pyudëjkë Anne? Yëˈë jyënaˈany: “Ko tiempë nyajxy, jamyëtsë njot nwinmäˈäny ojts nbëjktaknë mä tijatyëts nˈëxpëjkypy mä Biiblyë”.

Xyajmonyˈijx xyajmonyjyäˈäwëm ko Lisa mëdë Annë, yëˈë pudëjkëdë parë tyëjkëdë ëxpëjkpë ko tˈijxtë wiˈixë Jyobaa tyestiigëty yˈoyjyaˈaytyaktë ets yˈijttë ajëëky amëguˈuk. Ets yëˈë nanduˈun pudëjkëdë parë niˈigyë ttukˈijxpajttë Jyobaa etsë nyax kyäjpn.

Näägë jäˈäy kyaj tsyiptakxëdë yˈittët ajëëky amëguˈuk mët ko duˈun të yaak të pyattë o duˈun ja lugäär mä tsyoondë. Ets oy ko duˈun jyaˈayˈattë, per oy duˈun jyajäˈäyˈäjttëbë ajëëky amëguˈuk, mbäät kyaj yëˈë dyajnigëxëˈktë ja Diosë yˈoyjyaˈayˈäjtën (ijxkijpxyë mëdë Apostʉlʉty 28:2).

Ko nˈijtëm ajëëky amëguˈuk ets nˈoyjyaˈaytyakëm, duˈunën ja tuk pëky nyajnigëxëˈkëm ja jäˈäyˈäjtën mëdiˈibë yajkypyë Diosë myëjääw (Gál. 5:22, 23, TNM). Pääty pën jäˈäyˈatäˈänëm extëmë Jyobaa mëdë Jesus, tsojkëp nasˈijxëm parë xypyudëjkëm ja Diosë myëjääw mä jot winmäˈäny ets mä tijaty nduˈunëm. Ets kom yëˈë nbanëjkxëmë Jesus, päätyën nmëmäˈäy nmëdäjëmë wiink jäˈäy, mët ko ntsojkëmë Dios ets ja nmëguˈukˈäjtëm. Extëm nˈijxëm, ko nˈijtëm ajëëky amëguˈuk ets nˈoyjyaˈaytyakëm, mbäädë wiink jäˈäy pyudëkëdë ets agujk jotkujkë Jyobaa yajnayjyawëty.

Kyaj tsyiptaˈaky nˈoyjyaˈaytyakëm mëdë jäˈäy mëdiˈibë nanduˈun të yˈoyjyaˈaytyaˈaky mët ëtsäjtëm o pënaty nˈixyˈäjtëm (2 Sam. 2:6). Ets tuk pëky wiˈix duˈun nduˈunëm, yëˈko nguˈëˈëw ngukäjpxëm (Kol. 3:15). ¿Per ti net mbäät nduˈunëm pën winmäˈäyëm ko tuˈugë jäˈäy kyaj nyitëkëty mëët nˈoyjyaˈaytyakëm?

Nipën duˈun tkayaˈixyëtyë oyjyot oywyinmäˈäny extëmë Jyobaa, pes oyjyaˈaytyakp mët pënaty kyaj jyapäät jyanitëkëdë. Mä Biiblyë yajnigäjpxp tiko mbäät nyajnigëxëˈkëmë oyjyaˈayˈäjtën, pes mä Escrituras Griegas Cristianas kanäkˈok jap myinyë yäˈädë ayuk, ja oyjyaˈayˈäjtën mëdiˈibë kyaj xyjyapat xyjanitëjkëm. ¿Wiˈixënë Jyobaa dyajnigëxëˈëky?

Okpawinmay wiˈixë Jyobaa yˈoyjyaˈaytyaˈaky mët miyonkˈamë jäˈäy ko tmoˈoy tijaty nyijukyˈäjttëp (Mat. 5:45). Jyobaa duˈunyëmë nety xytyukˈijxëm ja yˈoyjyot yˈoywyinmäˈäny mä nety kyajnëm nˈixyˈäjtëm (Éfes. 2:4, 5, 8). Extëm nˈokpëjktakëm, ojts tkexy ja tyuˈukˈUˈunk mëdiˈibë nety nëgooyë ttsojknë parë ojts tkuˈoogë naxwinyëdë jäˈäy. Apostëlë Pablo jyënany: “Mët ko Dios xytsyojkëm niˈigyë, pääty oj xyajtsokëm”. Yäˈädë yëˈë xytyukˈijxëm ko Jyobaa mëjwiin kajaa jyantsy yˈoyjyaˈayëty (Éfes. 1:7). Jyobaa duˈunyëm xytyuˈumoˈoyëm, oy nbokytyuˈunëm ets axëëk nyajnayjyäˈäwëm. Tijaty xytyukniˈˈijxëm ets ja yˈääw yˈayuk, duˈun xyajnayjyäˈäwëm “extëmë tuuyëm kyaˈay mä ja ääy ujts” (Deut. 32:2). Jyobaa nëgooyë yˈoyjyaˈayˈäjnë mët ëtsäjtëm ets ninäˈä mbäät ngayajjëmbijtëm. Nnijäˈäwëm ko pënë Jyobaa kyaj xytyukˈijxëm ja yˈoyjyot yˈoywyinmäˈäny, kyaj mbäät nˈëwxijt njëjpˈijxëm ja jembyë jukyˈäjtën (ijxkijpxyë mëdë 1 Peedrʉ 1:13).

Ko nˈijxëm wiˈixë Jyobaa jyantsy yˈoyjyaˈayëty, yëˈë xypyudëjkëm parë nmëwingoˈonëm ets nˈoyjyaˈaytyakëm. Pääty, oy ko nˈoyjyaˈaytyakëm mët niˈamukë jäˈäy ets nˈijtëm ajëëky amëguˈuk. Tsojkëp tuˈuk tuˈugë xëëw duˈun njäˈäyˈäjtëm extëmë Jyobaa (1 Tes. 5:15). Pën xëmë nˈoyjyaˈaytyakëm, ta oy nyajnayjyawëyäˈänëm ja nmëguˈukˈäjtëm, duˈun extëm ko ja jëën nyajmëjëm parë nayˈajokxëm. Oy nanduˈun nyajnayjyawëyäˈänëm ja jëëky mëguˈuk, pënaty mëët nˈyeˈeyëm reunyonk, nduˈunëm, nˈeskuelëˈäjtëm ets ja mëjënbäˈä mëdëjkpäˈä.

¿Jamë mjëëky mmëguˈuk o tuˈugë nmëguˈukˈäjtëm mä kongregasionk mëdiˈibë mbäät mëët mˈoyjyaˈaytyaˈaky o xyajnayjyawëdët oy mët ja mˈääw mˈayuk? Waˈan jam tuˈugë nmëguˈukˈäjtëm mëdiˈibë yajpudëkëyäämp jyënoty tyëgoty o jyënwiiny tyëjkwiiny, yajjuyaˈany tijaty yajtëgoyˈajtypy o jam muum yajmënëjkxäˈäny. ¿Ets wiˈix mbäät nˈoyjyaˈaytyakëm mëdë jäˈäy mëdiˈibë ndukmëtmaytyakëmë Diosë yˈayuk? Ko nbudëjkëm mä dyajtëgoyˈattë.

Nˈokpanëjkxëmë Jyobaa yˈijxpajtën mä wiˈix ngäjpx nmaytyakëm ets nˈoktuˈunëm tijaty extëm xytyukniˈˈijxëm ja “ley mä yajnigajpxy ja oyjyaˈayˈäjtën”.