1, 2. Parë nyëbatët ja jäˈäy diˈib nyaˈëxpëjkëm, ¿pënaty mbäät pyudëkëdë?

AMY, diˈib tsënaapy Fiyi, jyënaˈany: “Nëgooyëtsë nety nˈoymyëdoownë tijatyëts nˈëxpëjkypy mä Biiblyë ets nnijäˈäwëbëtsë nety ko tëyˈäjtën tijatyëts yajtukniˈˈijxëp, per kyajtsë nety ndunyë mëjääw parëts nnayajtëgatsëdët. Diˈibëts xypyudëjkë parëts nnayajtëgäjtsë ets parëts nnëbejty, yëˈë kots nduˈukmujky mëdë nmëguˈukˈäjtëm”. ¿Ti xytyukniˈˈijxëmë yˈijxpajtënë Amy? Ko mbäät tuˈugë jäˈäy wyimbety mä Diosë kyäjpn ets nyëbety ko niˈamukë nbudëjkëm.

² Niˈamukë ninuˈun nˈëwäˈkx ngäjpxwäˈkxëm, mbäät nyäjkëmë naybyudëkëdë parë nimayëm mä Diosë kyäjpn (Efes. 4:16, TY). Leilani, tuˈugë prekursoora diˈib Vanuatu, jyënaˈany: “Duˈunë jäˈäy tˈayukˈattë ko parë tuˈugë uˈunk yaak pyatët, tsojkëbë nax käjpn. Ets nwinmayëts ko nenduˈun jyaty mä nbudëjkëmë jäˈäy parë Diosmëdunët. Tsojkëp nbudëjkëm niˈamukë parë tuˈugë jäˈäy tnijawët ja tëyˈäjtën”. Duˈun extëm ko tuˈugë uˈunk yeeky pyety, tsojkëp ja jyiiky myëguˈuk, ja myëtnaymyaayëbëty ets ja myaˈestrëty parë pyudëkëdët ets tyukniˈˈixëdët tijaty. Nenduˈun jyaty parë tuˈugë jäˈäy nyëbatët, tsojkëp niˈamukë nbudëjkëm, nˈëwij ngäjpxwijëm, nmëjääwmoˈoyëm ets nyäjkëmë oybyë ijxpajtën (Prov. 15:22).

3. ¿Ti xytyukniˈˈijxëm extëm jyënaˈanyë Ana, Dorín etsë Leilani?

³ Pën nyaˈëxpëjkëm tuˈugë jäˈäy, ¿tiko mbäät ngupëjkëm ets ja nmëguˈukˈäjtëm nenduˈun tpudëkëdët ja jäˈäy? Min nˈokˈijxëm wiˈix jyënaˈanyë Ana, tuˈugë prekursoora espesial diˈib tuump Moldavia, yëˈë jyënaˈany: “Ja jäˈäy diˈib nyaˈëxpëjkëm, kanäk pëky jyantsy yajpudëkëyaˈany ets tsip parë yëˈëyë ja myaˈestrë  pyudëkëdët”. Dorín, jatuˈugë prekursoor espesial diˈib tuump nenduˈun mä tyäˈädë paˈis, jyënaˈany: “Ja nmëguˈukˈäjtëm diˈib xyjamyëdäjtëm, mbäät jam ti ttukmëtmaytyaˈaky ja jäˈäy diˈib ajäˈt jotjäˈtëdëp, diˈibëts ëjts kyaj ndimwinmayët”. Leilani tnimaytyaˈaky ja tuk pëky tiko yˈoyëty ngupëjkëm etsë nmëguˈukˈäjtëm xypyudëjkëm, yëˈë jyënaˈany: “Ko ja jäˈäy tpëkëdë kuentë wiˈix ja nmëguˈukˈäjtëm tsyokëdë, mbäät yëˈë pyudëkëty parë tˈixët ko tyäˈädënë Dios kyäjpnˈäjtypy” (Fwank 13:35).

4. ¿Ti nˈixäˈänëm mä tyäˈädë artikulo?

⁴ Per mbäädë net nnayajtëˈëwëm: “¿Wiˈixëts mbäät nbudëjkë ja jäˈäy pën kyajts ëjts nyaˈëxpëky?”. Mä tyäˈädë artikulo nˈixäˈänëm wiˈix mbäät nbudëjkëm ja jäˈäy ko tuˈugë nmëguˈukˈäjtëm njamyëdäjtëm, ets wiˈixë net mbäät nbudëjkëm ko yeˈeytsyondaknë reunyonk. Nan yajnimaytyäˈägäämp wiˈix mbäädë mëjjäˈäytyëjk tpudëkëdë parë nyëbatët.

5. ¿Wiˈix mbäät nbudëjkëm ja nmëguˈukˈäjtëm diˈib njamyëdäjtëm mä dyaˈëxpëkyë jäˈäy?

⁵ Mä tuˈugë jäˈäy yˈëxpëky, ¿pën diˈib patëp parë pyudëkëdët ets tjaygyukët ja Diosë yˈAyuk? Yëˈë ja diˈib yaˈëxpëjkëp. Pääty ko ja nmëguˈukˈäjtëm njamyëdäjtëm, nˈokjamyajtsëm ko jeˈeyë të nëjkxëm parë nbudëkëyäˈänëm (Ecl. 4:9, 10). Per ¿wiˈixë net nbudëjkëm ja nmëguˈukˈäjtëm?

6. ¿Wiˈix mbäät nguytyuˈunëm extëm jyënaˈanyë Proverbios 20:18 ko njamyëdäjtëm tuˈugë nmëguˈukˈäjtëm mä jäˈäy dyaˈëxpëkäˈäny?

⁶ Nˈoknijäˈäwëm jawyiin pën nëjkx nyaˈëxpëkäˈänëm. Tim jawyiin, nˈokˈyajtëˈëwëm ja nmëguˈukˈäjtëm parë xytyukmëtmaytyakëm wanaty pën nëjkx dyaˈëxpëkäˈäny (käjpxë Proverbios 20:18). * Mbäät nyajtëˈëwëm wiˈix yaˈixy yajpääty ja jäˈäy, ti yˈëxpëkandëp ets ti tsyojkypy ja nmëguˈukˈäjtëm parë ttunët ja jäˈäy. Nan mbäät nyajtëˈëwëm ti mbäät nˈëˈëw ngäjpxëm o nduˈunëm ets wiˈix mbäät nbudëjkëm ja jäˈäy parë wyimbatët. Ja nmëguˈukˈäjtëm kyaj xytyukmëtmaytyaktäˈäyäˈänëm tijaty ja jäˈäy yëˈëyë të tyukmëtmaytyaˈagyëty, per diˈib xytyukmëtmaytyakëm mbäät xypyudëjkëm. Tuˈugë misioneerë diˈib xyëwˈäjtypy Joy tyukmëtmaytyakypy ja myëguˈuk wiˈix ja jäˈäy yaˈixy yajpääty diˈib nëjkx dyaˈëxpëkäˈändë. Yëˈë jyënaˈany: “Kots ndukmëtmaytyaˈaky ja diˈibëts xyjyamyëdäjtp, yëˈë pudëjkëp parë tmëmay tmëdäjy ja jäˈäy diˈibëts nyaˈëxpëjkypy ets tnijawë ti kyäjpx myaytyäˈägëp mäts mëët nyaˈëxpëktë”.

7. ¿Tiko jyëjpˈamëty ets kontiempë nˈëxpëjkëm?

⁷ Ko njamyëdäjtëm tuˈugë nmëguˈukˈäjtëm mä nëjkxë jäˈäy dyaˈëxpëkäˈäny oy ko kontiempë nˈijxëm ti mëët tˈëxpëkäˈäny (Esd. 7:10). Dorín, diˈib të yajmaytyaˈaky mä parrafo 3, jyënaˈany: “Jantsy jotkujkëts nnayjyawëty ko ja  nmëguˈukˈäjtëm diˈibëts xyjyamyëdäjtp të tˈixy kontiempë tits mëët ja jäˈäy nˈëxpëkäˈäny ets mbäädë net tpudëkë”. Ko duˈunë nmëguˈukˈäjtëm ttundë, mbäädë net ja jäˈäy tpëkyë kuentë ko të nimajtsk yajxon yˈëxpëktë. Per pën kyaj yajxon të nˈëxpëjkëm, oy jeˈeyë tiempë nˈokjuˈutënët parë nˈijxëm ti diˈib jëjpˈam mbäät tnijawë.

8. ¿Ti xypyudëkëyäˈänëm parë nnijäˈäwëm wiˈix meerë ninuˈkxtakëm ja jäˈäy diˈib ja nmëguˈukˈäjtëm yaˈëxpëjkypy?

⁸ Ko jäˈäy nyaˈëxpëjkëm, jëjpˈam ets nnuˈkxtakëm. Pääty, nˈokwinmäˈäyëm kontiempë wiˈix nuˈkxtäˈägäˈänëm ko nety ja nmëguˈukˈäjtëm xyˈanmäˈäyëm parë nnuˈkxtakëm. Duˈuntsoo, mbäädë net nnijäˈäwëm ti meerë nˈamdowäˈänëmë Jyobaa (Sal. 141:2). Hanae, tuˈugë nmëguˈukˈäjtëm diˈib tsënaapy Japón duˈunyëm tjamyetsy wiˈix nyuˈkxtaky tuˈugë nmëguˈukˈäjtëm diˈibë nety jamyëdäjtëp ja myaˈestrë. Yëˈë jyënaˈany: “Mä nyuˈkxtaky, nbëjkëtsë kuentë ko jantsy oyë nety yˈity mëdë Jyobaa, ets ëjts, nan itäämbëtsë nety duˈun mëët. Ets kots nmëdooy ja nxëëw tnigajpxy, jantsy oyëts nnayjyäˈäwë”.

9. Extëm jyënaˈanyë Santiago 1:19, ¿wiˈix mbäät nˈijtëm oyjyamyëët ko ja nmëguˈukˈäjtëm njamyëdäjtëm?

⁹ Nˈokpudëjkëm ja nmëguˈukˈäjtëm diˈib yaˈëxpëjkp. Omamuyovb, tuˈugë prekursoora espesial diˈib Nigeria, jyënaˈany: “Ja oyjyamyëët, yˈijxkujk jyaygyujkëp mä jam mëët ja jäˈäy nˈëxpëjkëm, tukˈëˈëw tukkäjpxëp, per kyaj net tyëjkënë maytyakpë. Pes nyijäˈäwëp ko diˈib nyikëjxmˈäjtypy parë ja jäˈäy dyaˈëxpëkët, yëˈë ja myëguˈuk”. Pääty, ¿näˈä mbäät ngäjpxëm ets ti nmaytyakëm? (Prov. 25:11). Nˈokˈijxkujk nˈokjaygyujkëm wiˈix ja nmëguˈukˈäjtëm dyaˈëxpëky ja jäˈäy ets wiˈix yˈatsoyëty (käjpxë Santiago 1:19, TNM). * Ko duˈun nduˈunëm, mbäädë net nnijäˈäwëm näˈä nbudëjkëm. Per nan tsojkëp nnaygyuentˈäjtëm parë kyaj net nëgoo ndëjkënë maytyakpë, ngajpxypyojtëm ja nmëguˈukˈäjtëm diˈib jam yaˈëxpëjkp o nmëdëjkënë ja wiink maytyaˈaky. Per mbäät jam ti ndukmëtmaytyakëm, nbëjtakëm tuˈugë ijxpajtën, nyajtëˈëwëm jam tii parë tjaygyukët yajxon ti jam yˈëxpëjkypy. Näˈäty, mbäät njäˈäwëm ko kyaj jyawë ti nduˈunëm mä ja nmëguˈukˈäjtëm njamyëdäjtëm. Per mbäät nbudëjkëm ja jäˈäy parë wyimbatët ko nmëmäˈäy nmëdäjtëm ets ko nˈanmäˈäyëm ko jantsy oy ko yˈëxpëky.

10. ¿Wiˈix mbäät ja jäˈäy pyudëkëty ko ndukmëtmaytyakëmë nˈeksperiensyëˈäjtëm?

¹⁰ Nˈoktukmëtmaytyakëm ja nˈeksperiensyëˈäjtëm. Pën mbäät, nˈoktukmëtmaytyakëm wanaty ja jäˈäy wiˈix ojts nnijäˈäwëm ja tëyˈäjtën, wiˈix ojts nmëmadakëm tuˈugë jotmay ets wiˈixë Jyobaa xypyudëjkëm (Sal. 78:4, 7). Pes waˈanë duˈumbë ääw ayuk dyajtëgoyˈaty. Mbäät pyudëkëty parë kyëktëkët ja myëbëjkën, myëjääwmoˈoyëty parë nyëbatët o pyudëkëdët parë twinguwäˈägët tuˈugë jotmay (1 Peed. 5:9). Gabriel, tuˈugë prekursoor diˈib tsënaapy Brasil, tnimaytyaˈaky ti diˈib pudëjkë ko tyëjkë  ëxpëjkpë, jyënaˈany: “Tijatyëts ja nmëguˈukˈäjtëm xytyukmëtmaytyaktë, yëˈëts xytyukniˈˈijxë ko Jyobaa nyijäˈäwëp yajxon ja nˈamayˈäjt njotmayˈäjtëm, ets pën yëˈëjëty myëmadaktë, ëjts nan mbäädëts nmëmadaˈaky”.

11, 12. ¿Tiko yˈoyëty tsuj yajxon nˈagëˈë nˈaxäjëm ja jäˈäy diˈib tim jawyiin miindëp reunyonk?

¹¹ Parë mbäät tuˈugë jäˈäy nyëbety, tsojkëp jëjwitsë nyëjkxët reunyonk ets nyaytyukpudëkëdët tijaty jap yˈijxy myëdoopy (Eb. 10:24, 25). Waˈan tuˈugë jäˈäy jyaˈty reunyonk mët ko të wyoyëty ja myaˈestrë. Pääty niˈamukë mbäät nbudëjkëm parë yeˈeyˈadëˈëtsët. ¿Wiˈixë net mbäät nbudëjkëm?

¹² Nˈokˈagëˈë nˈokˈaxäjëm tsuj yajxon ko myinët reunyonk (Rom. 15:7). Mbäädë jäˈäy yeˈeyˈadëˈëtsy reunyonk ko tsuj yajxon nˈagëˈë nˈaxäjëm. Pääty, nˈokˈijtëm ajiiky amëguˈuk ko nˈëboˈkx ngäjpxpoˈkxëm ets nˈoktukˈixyˈäjtëmë nmëguˈukˈäjtëm, per kyaj net axëëk nyajnayjyäˈäwëm. Ets nan kyaj yˈoyëty nwinmäˈäyëm ko diˈib patëp tsuj yajxon tˈagëˈë tˈaxäjët, yëˈë ja myaˈestrë, pes waˈan ja nmëguˈukˈäjtëm jap tijaty tjantsy tyuny. Nˈokˈijxkujk nˈokjaygyujkëm wiˈix ja jäˈäy jyënaˈany ets nˈokmëmäˈäy nˈokmëdäjëm. ¿Wiˈix pyudëkëyaˈanyëty ko duˈun nduˈunëm? Min nˈokˈijxëm wiˈixë Dimitri tnimaytyaˈaky ko tim jawyiin yˈojtsy reunyonk, yëˈë tyää näämnëm të nyëbety ets tyuny ministerial, jyënaˈany: “Tëjkˈagëˈëyëts ndënääy ets jantsy tsëˈkëbëtsë nety. Tats tuˈugë nmëguˈukˈäjtëm xyˈijxy ets tsuj yajxonëts xykyuwoˈowë mä salonk. Monyˈijx monyjäˈäwëts kots nimay xynyimiindë etsëts ojts xyˈëboˈkx xykyäjpxpoˈkxtë. Jantsy oyëts nnayjyäˈäwë, axtë jënanëts ko oyxyëp ko jyaˈˈatyë reunyonk bom bom. Ninäˈänëmtsë nety duˈun nganayjyawëty”.

13. ¿Wiˈix mbäät pyudëkëty ja jäˈäy diˈib ëxpëjkp ko tˈixët wiˈix njukyˈäjtëm?

¹³ Nˈokˈyäjkëmë oybyë ijxpajtën. Ko ja jäˈäy tˈixët wiˈix njukyˈäjtëm, mbäädë net jyënaˈany ko të tjantsy pyaaty ja tëyˈäjtën (Mat. 5:16). Vitali, tuˈugë prekursoor diˈib Moldavia, jyënaˈany: “Kots nˈijxy wiˈix ja nmëguˈukˈäjtëm jyukyˈattë, wiˈix wyinmaytyë ets wiˈix tijaty ttundë, tats njënany ko Jyobaa tyestiigëty, yëˈë jyantsy tyukˈijtëdëbë relijyongë tëyˈäjtënbë”.

14. ¿Wiˈix mbäät pyudëkëty ja jäˈäy diˈib ëxpëjkp tijaty nduˈunëm?

¹⁴ Mä tuˈugë jäˈäy kyanëbetynyëm, jëjpˈam tkuytyunët tijaty yˈëxpëjkypy. Seguurë ko tsiptäˈäganxëp, per ko tˈixtët wiˈix ndukˈoyˈäjtëm ko nguytyuˈunëm ja käjpxwijën diˈib yajpatp mä Biiblyë, mbäädë net nenduˈun ttunäˈändët (1 Kor. 11:1). Min nˈokˈijxëmë yˈijxpajtënë Hanae diˈib të nˈokmaytyakëmbë mä parrafo 8. Yëˈë jyënaˈany: “Extëmtsë nety nˈëxpëky, duˈunë nety meerë ja nmëguˈukˈäjtëm jyukyˈattë. Kots nˈijxy wiˈix jyaˈayˈattë, tats nenduˈun njäjty nbudëkëdë wiink jäˈäy, nbokymyaˈkxëdëts etsëts nyaˈixëdët ja tsojkën. Xëmë nety oy tnigäjpx tnimaytyäˈäktë ja myëguˈuktëjk, ets ëjts, nenduˈuntsë nety njäˈäyˈatäˈäny”.

15. Extëm jyënaˈanyë Proverbios 27:17, ¿tiko yˈoyëty nnaymyaaybyëjkëm mët jäˈäy diˈib të yeˈeytsyondäˈäktë reunyonk?

 ¹⁵ Nˈoknaymyaaybyëjkëm mëët. Tëgok tëgokë jäˈäy myinët reunyonk, nˈoktukˈijxëm ko nmëmäˈäy nmëdäjëm (Filip. 2:4). Parë mas niˈigyë nˈixyˈäjtëm, mbäät nyajtëˈëwëm ja fyamilyë, ja tyuunk ets wiˈix yˈëxpëky mët ja nmëguˈukˈäjtëm, per kyaj nduktëjkëm ja jyukyˈäjtën. Ets pën nˈijxëm ko tam kujk dyajtëgatsy ja jyukyˈäjtën, nˈokˈanmäˈäyëm ko jantsy oy duˈun ttuny. Ko duˈun nduˈunëm, ta mas niˈigyë nnaymyaaybyëjkëm mët ja jäˈäy ets nbudëjkëm parë nyëbatët (käjpxë Proverbios 27:17). * Hanae, diˈib tyam tuump prekursoora regulaar, tnimaytyaˈaky wiˈix nyayjyäˈäwë ko yeˈeytsyondaky reunyonk, yëˈë jyënaˈany: “Extëmëts nëjkxanë reunyonk kots naymyaaybyëjkë mët ja nmëguˈukˈäjtëm. Kyajtsë nety ndëgoyˈatäˈäny oyëts nuˈun njaˈˈanuˈkxë. Jantsy yajpäädäämbëtsë nety mët ja nmëguˈukˈäjtëm diˈibëts mëët të naymyaaybyëkëdë. Tyäˈädë yëˈëts xypyudëjkë parëts nmastuty ja diˈib kyaj Diosmëdundë. Kom niˈigyëtsë nety nmëwingonäˈänyë Jyobaa ets ja nmëguˈukˈäjtëm, tats nduknibëjtakë parëts nëbatäˈäny”.

16. ¿Tijaty mbäät nˈaktuˈunëm parë jäˈäy kyaj nyayjyawëdët jagam ëxkëˈëm?

¹⁶ Ko tuˈugë jäˈäy wyimbety, kyaj yˈoyëty nyajnayjyäˈäwëm jagam ëxkëˈëm. Ets parë kyaj duˈun nyayjyawëdët, nˈokˈoyjyaˈaytyakëm mëët (Eb. 13:2). Min nˈokˈijxëm wiˈix jyënaˈanyë Denís, tuˈugë nmëguˈukˈäjtëm diˈib tuump Moldavia ko nety tˈëxpëkyë Biiblyë, yëˈë jyënaˈany: “Kanäkˈokëts ja nmëguˈukˈäjtëm xywyoowdë mëdëtsë ngudëjk parëts nëjkx mëët tuk ratë nyajpäättë. Xymyëjääwmooytyëbëts ijty kots xytyukmëtmaytyäˈäktë wiˈixë Jyobaa pyudëjkëdë. Kots duˈun mëët nyajpattë, yëˈëts xypyudëjkëdë parëts nˈijttë seguurë ko nmëdunandëbëtsë netyë Jyobaa ets ko nˈawijx njëjpˈijxtëbëtsë nety tuˈugë jukyˈäjtënë oybyë”. Ko ja jäˈäy nyaxy publikadoor, mbäädë net nwoˈowëm parë mëët nëjkxëm ëwäˈkx käjpxwäˈkxpë. Diego, tuˈugë nmëguˈukˈäjtëm diˈib Brasil, jyënaˈany: “Kots nimay ja nmëguˈukˈäjtëm xywyoowdë ëwäˈkx käjpxwäˈkxpë, tats niˈigyë nˈixyˈäjttë. Mëjwiin kajaajëts nenduˈun tijaty xytyukniˈˈijxëdë ets mas niˈigyëts nmëwingoonyë Jyobaa etsë Jesus”.

17. ¿Wiˈix mbäädë mëjjäˈäytyëjk tpudëkëdë ja jäˈäy diˈib ëxpëjktëp?

¹⁷ Ko tjuuttëdë tiempë. Pënaty tuundëp mëjjäˈäy, nan mbäät tpudëkëdë ja jäˈäy parë nyëbatët, ko tmëmay tmëdäjtët ets ko ttsoktët. ¿Mbäät xynyasˈixëdë waanë mdiempë tëgok tëgokë reunyonk tyunëdët parë mëët myajpäättët? Ko xyjamyatstët ti txëwˈattë, ta tpëkäˈändë kuentë ko mnaytyukjotmaytyuunëdëp, ets mas  niˈigyë ko kyomentaräjnëdë. ¿Mbäät xytyukniwitsëdë mdiempë parë xyjamyëdattët ja nmëguˈukˈäjtëm diˈib yaˈëxpëjkypy ja jäˈäy? Ko duˈun xytyundët, mbäät mëjwiin kajaa pyudëkëty ja jäˈäy diˈib ëxpëjkp. Jackie, tuˈugë prekursoora diˈib tsënaapy Nigeria, jyënaˈany: “Mayë jäˈäy monyˈijx monyjäˈäwëdëp ko tnijawëdë ko yëˈëdëm tuˈugë nmëguˈukˈäjtëm diˈib tuump mëjjäˈäy diˈibëts të xyjamyëdaty parëts mëët ojts të nyaˈëxpëktë. Tuˈugë jäˈäy diˈibëts nyaˈëxpëjkypy, duˈunëts xyˈanmääy: ‘Nbastoorëts, ninäˈä duˈun tkatunët. Yëˈëyë nyinëjkxypyë mëkjäˈäytyëjk ets net pën yajmëjuupy’”. Tyäˈädë jäˈäy diˈib duˈun jënan, yeˈeynyëp reunyonk.

18. ¿Wiˈix mbäädë mëjjäˈäytyëjk tkuytyundë extëm jyënaˈanyë Apostʉlʉty 20:28?

¹⁸ Tukniˈˈixëdë ets mëjääwmoˈoytyë ja nmëguˈukˈäjtëm diˈibë jäˈäy yaˈëxpëjktëp. Mëjjäˈäytyëjkëty, mijtsën mnikëjxmˈäjttëp parë xypyudëkëdët ja nmëguˈukˈäjtëm ets yajxon yˈëwäˈkx kyäjpxwäˈkxtët ets dyaˈëxpëktëdë jäˈäy (käjpxë Apostʉlʉty 20:28). Ko xyjamyëdattët tuˈugë nmëguˈukˈäjtëm mä ja jäˈäy dyaˈëxpëky, ets pën mbëjktëbë kuentë ko tsëˈkëdëp, nayˈawanëdë parë mijts xyaˈëxpëkët. Jackie, diˈib të yˈokˈyajmaytyakpë, jyënaˈany: “Xëmëtsë mëjjäˈäytyëjk xyajtëwdë wiˈix yaˈix yajpäättë ja jäˈäy diˈibëts nyaˈëxpëjkypy. Ets kots nmëdaty tuˈugë jotmay, tats xymyoˈoytyë ëwij käjpxwijën”. Mëjjäˈäytyëjk, mbäät mëjwiin kajaa tpudëkëdë ja nmëguˈukˈäjtëm diˈib yaˈëxpëjktëbë jäˈäy parë kyaj yˈëxtëkëwäˈäktët (1 Tes. 5:11). Jackie yˈakjënaˈany: “Jantsy oyëts nnayjyawëty kotsë mëjjäˈäytyëjk xymyëjääwmoˈoytyë ets kots xyˈanëëmëdë ko yajtsobattëp tijatyëts nduumpy. Yˈääw yˈayukëty, duˈun extëm tuk basë tëtykynyëë mä meerë jyantsy yˈany. Extëmëts xyˈanëëmëdë, xyajnayjyäˈäwëbëts ko oy diˈibëts nduumpy mätsë jäˈäy nyaˈëxpëky ets mas jotkujkëts xyajnayjyawëty” (Prov. 25:25).

19. ¿Wiˈix niˈamukë nnayjyawëyäˈänëm?

¹⁹ Pën tyam kyaj nyaˈëxpëjkëm tuˈugë jäˈäy, mbäät nbudëjkëm ja diˈibë nmëguˈukˈäjtëm yaˈëxpëjkypy parë Diosmëdunët. Extëm nˈokpëjtakëm, ko njamyëdäjtëm tuˈugë nmëguˈukˈäjtëm mä nëjkxë jäˈäy dyaˈëxpëkäˈäny, mbäät yajxon niwinmäˈäyëm wiˈix ja jäˈäy nmëtmaytyäˈägäˈänëm tukˈääw majtskˈääw. Nˈoknaymyaaybyëjkëm mët ja jäˈäy ko jyäˈtët mä salonk ets nˈokmoˈoyëmë oybyë ijxpajtën. Ets pënaty tuundëp mëjjäˈäy, nan mbäät tmëjääwmoˈoytyë, ko tjuudëdë tiempë parë mëët yajpäättët. Ets ¿wiˈix mbäät tpudëkëdë ja nmëguˈukˈäjtëm diˈibë jäˈäy yaˈëxpëjktëp? Ko ttukniˈˈixëdët wiˈixë tyäˈädë tuunk yajtunäˈäny ets ko tˈanëëmëdët ko jantsy oy duˈun tyundë. Nitii duˈun xykyamoˈoyëmë xondakën extëm ko nbudëjkëm tuˈugë jäˈäy, oy yiˈin waanë parë ttsokëdë Jyobaa ets tmëdunët.