1. Extëm jyënaˈanyë Matewʉ 24:9, ¿tiko kyaj mbäät xyajmonyˈijx xyajmonyjyäˈäwëm ko naxwinyëdë jäˈäy xyˈaxëkˈijxëm?

JYOBAA ojts xyajkojëm parë ntsojkëmë jäˈäy ets parë nenduˈun xytsyojkëm. Pääty mëk njäˈäwëm ko pën xyˈaxëkˈijxëm ets axtë ntsëˈkëm. Extëm nˈokpëjtakëm, Georgina, tuˈugë nmëguˈukˈäjtëm diˈib tsënaapy Europa, jyënaˈany: “Jatsë netyë njëmëjt 14 kots ja ndääk xymyëtsiptsoˈony mët kots nmëduuntsondakyë Jyobaa. Mëk mon mëk tukëts nnayjyäˈäwë ets tats nwinmääy ko waˈanëtsë nety kyaj nˈoyjyaˈayëty”. * Jatuˈugë nmëguˈukˈäjtëm diˈib xyëwˈäjtypy Danilo, tkujäˈäyë: “Kots ja soldäädëtëjk xywyojp xykyäˈtstë, xywyingäjpx xyjyëjpkäjpxtë ets axtë xyˈanmääytyëts kots xyaˈoogäˈändë mët kots nDestiigëty, tsëˈk jäˈäwëts ets axëëgëts njantsy nyayjyäˈäwë”. Tyäˈädë kyaj tiko xyajmonyˈijx xyajmonyjyäˈäwëm, pesë Jesus jyënany ko duˈunën njatäˈän ngëbatäˈänëm (käjpxë Matewʉ 24:9).

2, 3. ¿Tiko naxwinyëdë jäˈäy xyˈaxëkˈijxëm?

² ¿Tiko naxwinyëdë jäˈäy xyˈaxëkˈijxëm extëmë Jesus yaˈˈaxëkˈijxy? Yëˈko kyaj nduktëjk ndukwäˈkëm tijaty tyuundëp (Fwank 15:17-19). Nmëjˈijxëm ja kuduunktëjk, per kyaj nˈawdatäˈänëm tijaty mëj yajnäjxtëp. Yëˈëyë nˈawdatäˈänëmë Jyobaa. Ëtsäjtëm, niwäˈkpëtsëˈëmëm ja madakën diˈib myëdäjtypyë Jyobaa parë tˈanaˈamëdë naxwinyëdë jäˈäy, perë Satanás mëdë jyaˈay nibëdëˈkëp (Gén. 3:1-5, 15). Nan nˈëwäˈkx ngäjpxwäˈkxëm ko yëˈëyë Diosë yˈAnaˈam Kyutujkën diˈib yaˈoyëyaambyë naxwinyëdë jäˈäyë yˈamay jyotmay ets ko tim tsojk dyajkutëgoyaˈanyë myëtsipëty (Dan. 2:44; Diˈibʉ Jat. 19:19-21). Tyäˈädë ääw ayuk yˈoymyëdoowdëbë  jäˈäy diˈib yujy tudaˈaky, perë axëkjäˈäytyëjk kyaj tˈoymyëdowdë (Sal. 37:10, 11).

³ Ja tuk pëky tiko naxwinyëdë jäˈäy xyˈaxëkˈijxëm, yëˈë ko nmëmëdoˈowëm extëmë Dios tniˈanaˈamë njukyˈäjtëm, diˈib kyaj tyuˈugyë mët extëm yëˈëjëty jyukyˈattë. Extëm nˈokpëjtakëm, may tyamë jäˈäy kyaj wiˈix tˈixtë ko axëëk nyaymyëtˈit nyaymyëttsëënëdë, per nˈokjamyajtsëm ko päätyë Dios ojts tˈokˈyajkutëgoobyë ja jäˈäyëty diˈib Sodoma ets Gomorra mët ko axëëgë nety jyukyˈattë (Juud. 7). May tyamë jäˈäy xynyëxik xytyukxikëm ets jyënäˈändë ko wäˈätsjäˈäy ndimnayajnäjxëm, mët ko nbanëjkxëm extëmë Biiblyë tniˈanaˈamë njukyˈäjtëm (1 Peed. 4:3, 4).

4. ¿Ti xypyudëkëyäˈänëm parë nmëmadakëm ko naxwinyëdë jäˈäy xyˈaxëkˈijxëm?

⁴ ¿Ti xypyudëkëyäˈänëm parë nmëmadakëm ko jäˈäy xyˈaxëkˈijxëm ets ko xywyingäjpx xyjyëjpkäjpxëm? Ko nmëbëjkëm ko yëˈë Jyobaa xypyudëkëyäˈänëm. Mëbëjkën duˈun tyuny extëm tuˈugë eskuudë, mbäät xypyudëjkëm parë dyaˈˈadukët “ja jëëndiˈpxn diˈibë ja kaˈoybyë nyasmäjtsëp” (Éfes. 6:16). Per nan jëjpˈam nmëdäjtëmë tsojkën. ¿Tiko? Yëˈko tsojkën, “kyaj pojënë tijaty dyajpoky”, ets ko nmëdäjtëmë tsojkën, yëˈë xypyudëkëyäˈänëm parë nmëmadaktäˈäyëm tëgokyë tijaty xyaˈˈayoˈowëm (1 Cor. 13:4-7, 13, TNM). Min nˈokˈijxëm ti mbäät xypyudëjkëm parë nmëmadakëm ko naxwinyëdë jäˈäy xyˈaxëkˈijxëm: ko ntsojkëmë Jyobaa, nmëguˈukˈäjtëm ets axtë pënaty xymyëtsipˈäjtëm.

5. ¿Ti Jesus myëmadak mët ko ttsojkyë Tyeety?

⁵ Jakumbomë netyë Jesus yaˈooganënë ja myëtsipëty, ta tˈanmääy ja yˈëxpëjkpëty: “Es tnijawëdët ja naxwinyëdë jäˈäyëty ko ëj ja nDeetyëts ntsejpyëts es nguytyiimbyëts diˈibëts yëˈë xytyukˈanaˈamp” (Fwank 14:31). Mët ko Jesus ttsojkyë Tyeety, yëˈë diˈib mëjääwmooyë parë twinguwäˈkë ja amay jotmay diˈibë nety tukmiin tukëdakëp. Ëtsäjtëm, nan yëˈë xypyudëkëyäˈänëm ko ntsojkëmë Jyobaa.

6. Extëm jyënaˈanyë Romanʉs 5:3-5, ¿wiˈix nyayjyawëdë Dios mëduumbë ko jäˈäy yˈaxëkˈixëdë?

⁶ ¿Ti xëmë pudëjkëdëbë Dios mëduumbë parë tmëmadäˈäktë ko jäˈäy nyibëdëˈëgëdë? Ko ttsoktë Dios. Extëm nˈokpëjtakëm, ko ja judiyëtëjk diˈibë nety yajkutujktëp tˈanmääytyë ja apostëlëtëjk parë kyaj nyekyˈëwäˈkx nyekykyäjpxwäˈkxtët, ja apostëlëtëjk ta yˈatsoowdë ko tsojkëp tmëmëdowdëdë Dios extëmë anaˈambë ets kyaj dyuˈunëtyë naxwinyëdë jäˈäy. ¿Tiko duˈun yˈatsoowdë? Yëˈko ttsojktë Dios (Apos. 5:29; 1 Fwank 5:3). Tyäˈädë tsojkën, nan yëˈë të pyudëkëdë mayë nmëguˈukˈäjtëm parë tmëmadäˈäktë ko nyibëdëˈëgëdë gobiernëtëjk diˈib jantsy axëkjäˈäyëty. Ko jäˈäy xyˈaxëkˈijxëm, kyaj xyaˈëxtëkëwäˈkëm, niˈigyë agujk jotkujk xyajnayjyäˈäwëm (Apos. 5:41; käjpxë Romanʉs 5:3-5).

7. ¿Ti mbäät nduˈunëm ko ja nfamilyëˈäjtëm xymyëtsiptsoˈonëm?

⁷ Tuˈugë jotmayë mëjwiin kajaabë diˈib mbäät nguˈijx ngubatëm, yëˈë ko nfamilyëˈäjtëm xymyëtsiptsoˈonëm. Pes ko tpëktë kuentë ko niˈigyë nˈixyˈatäˈänëmë Jyobaa, mbäädë net nääk wyinmaytyë ko të nyajwinˈëˈën nyajwinxäjëm o ko të nlokëjäjtëm (ijxkijpxyë mëdë Markʉs 3:21). Mbäät xytyukjotˈambëjkëm, per kyaj tiko mëjˈixy mëjmëdoy njäˈäwëm, pesë Jesus jyënany ko ja nmëtsipˈäjtëm tsyoonäˈäny jënoty tëgoty (Mat. 10:36). Ets oy wiˈix xyˈijxëm ja nfamilyëˈäjtëm, ëtsäjtëm ninäˈä ngaˈˈaxëkˈixäˈänëm. Ko niˈigyë ntsojkëmë Jyobaa, ta niˈigyë ntsokäˈänëmë wiink jäˈäy (Mat. 22:37-39). Diˈib tëy ninäˈä ngatunäˈänëm, yëˈë ngajpxykyutëjëm tijatyë Dios nyiˈanaˈamëp mä Biiblyë parë nyajjotkujkˈäjtëm tuˈugë naxwinyëdë jäˈäy.

8, 9. ¿Ti pudëjkë tuˈugë nmëguˈukˈäjtëm parë mëk tyënääy ko ja tyääk nyibëdëˈkë?

⁸ Georgina, diˈib të yajmaytyaˈaky mä parrafo 1, mëk tyënääy ko ja tyääk myëtsiptsoˈonë.  Yëˈë tnimaytyaˈaky: “Mëdëtsë ndääk ndëjkëdë ëxpëjkpë. Per kyumdëdujk poˈo kots ojts njanëjkxanë reunyonk, tats ja ndääk xymyëtsiptsoˈony. Tats nnijäˈäwë ko yëˈëdëmë nety mëët të nyayajtuˈugyëty ja apostatas, ets nenduˈunëtsë nety xymyëtkäjpx xymyëtmaytyaknë. Nan nëgooyëts ojts xywyingäjpx xyjyëjpkäjpxnë, xykyuwääywyoˈonëts, xyoˈkmëmäjtsëts, tyukëˈtsëtyaay ja ëxpëjkpajn ets tˈëxpëjktääy. Kotsë njëmëjt nyaˈˈabejty 15, tats nnëbejty. Ets parëts kyaj Jyobaa nekymyëdunët, tats ja ndääk ojts xyajnëjkxy mä nyipattë ënäˈktëjk diˈib kyaj myëdowdë. Ets tapë nety nääk diˈibë jyëˈxtëbë droogë ets jantsy axëkjäˈäyëty. Niˈigyë tsyiptaˈaky xywyinguwäˈägët tuˈugë jotmay, ko myiny mä tuˈugë jäˈäy diˈibxyëp mbäät mjatsokyëty ets mjakuentëˈatyëty”.

⁹ ¿Ti pudëjkë Georgina parë myadaky? Yëˈë jyënaˈany: “Jaa xëëw mätsë ndääk xynyibëdëˈky, ja xëëwëts nenduˈun ngäjpxtääy tëgokyë Biiblyë. Ijtpëtsë nety seguurë ko tëts nbääty ja tëyˈäjtën ets wingonëtsë nety nnayjyawëty mä Jyobaa. Janääm jatsojkëts nmënuˈkxtaky ets myëdoowˈijt kots nmëgajpxy. Kots jap nˈijty mätsë netyë ndääk të xyajnëjkxy, ta tuˈugë nmëguˈukˈäjtëm xywyooyëts mä tyëjk parëts mëët nˈëxpëkëdë Biiblyë. Nuˈunë tadë tiempë nyajxy, ja nmëguˈukˈäjtëm yëˈëts diˈib xyjotmëkmooytyë. Jiiky mëguˈukpëmëts xyjäˈäwëdë. Nbëjkëtsë kuentë ko Jyobaa mas kumëjääw ets kyaj dyuˈunëtyë nmëtsipˈäjtëm”.

10. ¿Ti Jyobaa tyunaampy ko nbatëmë amay jotmay?

¹⁰ Apostëlë Pablo tkujäˈäyë ko “nitii mbäät xykyatukmastutëm ja tsyojkën ja Dios diˈibë myëdäjtypy mët ëtsäjtëm mä yëˈë Nintsënˈäjtëm Jesukristë” (Rom. 8:38, 39). Oy näˈäty nˈayoˈowëm, Jyobaa ninäˈä xykyamastuˈudäˈänëm. Xëmë xyjyotkujkmoˈoyäˈänëm ets xymyëjääwmoˈoyäˈänëm. Ets duˈun extëm të yajnimaytyaˈagyë Georgina, nan xypyudëkëyäˈänëm mët yëˈëgyëjxmë nmëguˈukˈäjtëm.

11. ¿Wiˈixë nety ja Dios mëduumbëty pyudëkëyäˈänëdë ja tsojkën diˈibë Jesus myaytyak mä Fwank 15:12, 13? Okpëjtäˈäk tuˈugë ijxpajtën.

¹¹ Jakumbomë netyë Jesus yˈooganë, ko ttukjamyejtsy ja yˈëxpëjkpëty ets nyaytsyokëdët nixim niyam (käjpxë Fwank 15:12, 13). Jesus nyijäˈäwëbë nety ko yëˈë diˈib pudëkëyanëdëp parë nyayaˈitëdët tuˈugyë ets tmëmadäˈäktët ko ja naxwinyëdë jäˈäy yˈaxëkˈixëdët. Nˈokwinmäˈäyëm ja kongregasionk diˈib Tesalónica, desde ko nyaxkëdaky, yajpajëdijttë ja nmëguˈukˈäjtëm.  Per ja Dios mëduumbëty yäjktë ja ijxpajtën ko dyaˈijxëdë tsojkën ets ko myadaktë (1 Tes. 1:3, 6, 7). Pablo yˈanmääyëdë ets “waanë niˈigyë” dyaˈixëdët ja tsojkën (1 Tes. 4:9, 10). Ja tsojkën, yëˈë nety pudëkëyanëdëp parë tmëjääwmoˈoytyët ja diˈib kumoon kudujkëdëp, ets tpudëkëdët ja diˈibë yaˈˈayow yaˈˈamäˈät yajpattëp (1 Tes. 5:14). Tyäˈädë Dios mëduumbëty jyaygyujkëdë extëmë Pablo yˈanmääyëdë. Pääty kyum jëmëjt, ta yaˈˈanmääytyë mä ja myëmajtskpë neky: “Mët ko mëjwiin kajaa yëˈë mmëbëjkënëty esë mtsojkënëty diˈibë miits mmëdäjttëp mët ja wiinkpëty” (2 Tes. 1:3-5). Ko tmëdäjttë ja tsojkën, yëˈë pudëjkëdë parë tmëmadaktë ja amay jotmay ets ko yajnibëdëˈktë.

12. ¿Wiˈixë nmëguˈukˈäjtëm dyajnigëxëˈktë tsojkën mä tuˈugë paˈis ko tyuunë tsip?

¹² Min nˈokˈijxëm wiˈix jyajtyë Danilo mëdë kyudëjk, diˈib të yˈokˈyajmaytyakpë mä parrafo 1. Ko pyëdëˈky ja tsip mä nety tsyëënëdë, yëˈë duˈunyëm ojts nyëjkxtë reunyonk, ëwäˈkx käjpxwäˈkxpë ets dyajwäˈkxtë ja jeˈxy pëky diˈibë nety myëdäjttëp mët ja myëguˈuktëjk. Per tëgok, ta jyäjttë soldäädëtëjk ak tujnmëët mä Danilo tyëjk. Yëˈë tnimaytyaˈaky: “Tats xyˈanmääytyë parëts njënäˈänët ko kyajts nekytyestiigëˈatäˈäny. Kots ngakupëjky, tats xytsyiˈk xykyojxtë ets nyaybyëjtakëdë extëmxyëbëts xykyutujjëˈëgäˈändë, per jaayë ja tujnbäjk nyajxy. Tats nenduˈun xyˈanmääytyë ko jyëmbitäˈändë parë tˈaguanëˈatäˈändëts ja ngudëjk. Netyëts ja nmëguˈukˈäjtëm xykyajxtë trengoty wiink siudad. Ninäˈäts ngajäˈäytyëgoyët wiˈix ja tsojkën dyajnigëxëˈktë. Kots njäjttë, tats ja nmëguˈukˈäjtëm xymyooytyë ja käˈäy ukën ets xypyudëjkëdëts parëts nbäättëdë nduunk ets tuˈugë tëjk mäts ntsëënëdët. Ko tiempë nyajxy, nenduˈunëts ojts nˈagëˈë nˈaxäjëdë nmëguˈukˈäjtëm diˈibë nety kyugaktëbë tsip”. ¿Ti xytyukˈijxëmë tyäˈädë eksperiensyë? Ko mbäät nmëmadakëm ko jäˈäy xyˈaxëkˈijxëm, ko ja nmëguˈukˈäjtëm dyajnigëxëˈëktë ja tsojkën.

13. ¿Wiˈix xypyudëjkëmë espiritë santë parë nmëduunˈadëtsëmë Jyobaa ko jäˈäy xyˈaxëkˈijxëm?

¹³ Jesus jyënany ko jëjpˈam ntsojkëmë nmëtsipˈäjtëm (Mat. 5:44, 45). Tsiptäˈägäämp, per mbäät duˈun nduˈunëm ko xytyukpudëjkëmë Diosë yˈespiritë santë. Pes ja tëëm diˈibë yajkypyë tyäˈädë espiritë, yëˈë ja tsojkën, maˈkxtujkën, ajiikyˈat amëguˈukˈat, yuunkˈat naxypyˈat ets ko nnayjyëjpkuwijtsëm këˈëm, tëgokyë tyäˈädë yëˈë xypyudëkëyäˈänëm parë nmëmadakëm ko  nyaˈˈaxëkˈijxëm (Gál. 5:22, 23, TNM). ¿Ti mayë jäˈäy të pyudëkëdë parë kyaj tnekyˈaxëkˈixtë ja kyujëën kyudëjk, ja myëmëjjäˈäy, ja yˈuˈunk yˈënäˈk o ja myëjjëmbäˈä myëdëjkpäˈä diˈib ëxpëjktëp? Yëˈko të tˈixtë wiˈixë nmëguˈukˈäjtëm dyajnigëxëˈëktë tyäˈädë jäˈäyˈäjtën. May axtë të tyëkëdë ëxpëjkpë. Pääty, pën nëgooyë xytsyiptakxënë ntsojkëm pënaty xyˈaxëkˈijxëm, nˈokˈamdoˈowëmë Jyobaa parë xytyukpudëjkëm ja yˈespiritë santë (Luk. 11:13). Ijtëm seguurë ko pën nduˈunëm tijaty extëmë Dios tniˈanaˈamë, xëmë yˈoybyëtsëmäˈäny (Prov. 3:5-7).

14, 15. ¿Wiˈixë Romanʉs 12:17-21 tpudëjkë tuˈugë nmëguˈukˈäjtëm parë ttsojky ja myëmëjjäˈäy oyë nety axëëk tyunyëty?

¹⁴ Minë net nˈokˈijxëmë yˈijxpajtënë Yasmín. Ko nyëbejty, ta ja myëmëjjäˈäy wyinmääy ko të nety yajwinˈëëny yajwinxäjy ets ta jyatukmastuˈudanë Dios ko wyingäjpx jyëjpkäjpxë. Nan ojts yajniˈanuˈkxë mä jyiiky myëguˈuk, mä ja diˈib nyiwintsënˈäjtypyë relijyonk ets mä tuˈugë brujë, parë yaˈˈatsëˈëgëdë Yasmín ets yajniwäämbatët ko yëˈë yajnaywyäˈkxëbë fyamilyë. Tëgok, axtë jäjtë ja myëmëjjäˈäy mä reunyonk ets ojts tjantsy myëyaˈaxy tjantsy myëjoky ja nmëguˈukˈäjtëm diˈibë nety jap yajpattëp. Yasmín kanäkˈok jyantsy jyëëy jyantsy yaxy mët ko axëëk jyantsy yajtuny.

¹⁵ Mä reunyonk, jap ja nmëguˈukˈäjtëm jyotkujkmooyëdë ets myëjääwmooyëdë. Ets yˈanmääyëdë ja mëjjäˈäytyëjk wiˈix mbäät tkuytyuny extëm jyënaˈanyë Romanʉs 12:17-21 (käjpx). Yasmín jyënaˈany: “Ojtsëts xytsyiptakxë ndunët extëmë Biiblyë jyënaˈany, per nˈamdoowëtsë naybyudëkë Jyobaa ets nduunëtsë mëjääw. Pääty kots ijty ja nmëmëjjäˈäy nyaxy nijot ets dyaˈˈaxëëgë ja pisë, tats nyajwäˈätsy; kots xywyingajpxy xyjyëjpkajpxy kyajts njotˈambëky ets ko yubety pyäˈämbety, tats nˈijxˈity nguentˈaty”.

16, 17. ¿Ti mdukniˈˈijxëbë yˈijxpajtënë Yasmín?

¹⁶ Yasmín tnimaytyaˈaky ko oy wyimbëtsëëmy ko dyajnigëxëˈky oyjyot oywyinmäˈäny mëdë myëmëjjäˈäy. Yëˈë jyënaˈany: “Mas niˈigyëts xytyukjotkujkˈäjty, pes nyijäˈäwëbë nety ko kyajts nwinˈëëny. Nan myëdoowˈijt wintsëˈkën myëët kots ndukmëtmaytyaky tijatyëts njäjtypy ets xyˈanmääyëts ko kyajts wiˈix xynyekytyunäˈäny. Tyam, axtë xykyajxpëts nëjkxët reunyonk. Mas oyëts mëët nnaymyënëjkxyëty, nan oyëts nˈittë ets agujk jotkujkëts ntsëënëdë. Nˈawijxy njëjpˈijxypyëts ets ja näˈä tyëkët ëxpëjkpë parëts mëët nDiosmëdunët”.

¹⁷ Yˈijxpajtënë Yasmín, yëˈë xytyukˈijxëm ko ja tsojkën kyuˈayoˈowëp winë, tëgokyë tˈawixy  tjëjpˈixy ets tëgokyë tmëmadaˈaky (1 Kor. 13:4, 7). Nayˈaxëkˈixë kyaj duˈunë mëkˈäjtënë ttimmëdaty extëmë tsojkën, nan mbäät yajtsayuty, per ja tsojkënë gyanaräjtypyë wiink jäˈäy. Ko nyaˈijxëmë tsojkën, ta mas jotkujk nyajnayjyäˈäwëmë Jyobaa. Per oy duˈunyëm xyˈaxëkˈijxëmë jäˈäy, mbäät duˈunyëm nyajpatëm agujk jotkujk. Min nˈokˈijxëm wiˈix.

18. ¿Tiko nnayjyäˈäwëm agujk jotkujk oy nyaˈˈaxëkˈijxëm?

¹⁸ Jesus jyënany: “Akujk jotkujk miitsëty myajpaattëty ko ja jäˈäy mˈëxëëkˈixëtëty” (Luc. 6:22, TY). Ëtsäjtëm kyaj ndukxondakëm ko jäˈäy xyˈaxëkˈijxëm mët ko nDiosmëduˈunëm. Per, ¿tiko mbäät nnayjyäˈäwëm agujk jotkujk oyë jäˈäy xyˈaxëkˈijxëm? Min nˈokˈijxëm tëgëk pëky. Myëduˈuk, ko nmëmadakëm, ta xykyupëjkëmë Dios (1 Peed. 4:13, 14). Myëmajtsk, niˈigyë kyëktëkë ja nmëbëjkënyëˈäjtëm (1 Peed. 1:7). Ets myëdëgëëk, nˈaxäjëyäˈänëm ja jukyˈäjtënë winë xëëbë (Rom. 2:6, 7).

19. ¿Tiko agujk jotkujk nyayjyäˈäwëdë ja apostëlëtëjk oyë nety të yajwojp të yajkäˈätstë?

¹⁹ Waanë nety jeˈeyë ja tiempë të nyaxy mä Jesus jyukypyejky ko ja apostëlëtëjk tjäˈäwëdë ja xondakën diˈibë nety të tyukmëtmaytyäˈägëdë. Oy nuˈun yajwojp yajkäˈtstë ets oy yaˈˈanmääytyë parë kyaj nyekyˈëwäˈkx nyekykyäjpxwäˈkxtët, duˈunyëm nyayjyäˈäwëdë agujk jotkujk “ko yˈayoodë es tsyoytyuundë Jesuskyëjxm” (Apos. 5:40-42). Mas niˈigyë ttsojktë ja Wyintsën, pääty kyaj ttsëˈkëdë ja myëtsipëty. Ets yaˈijxëdë tyäˈädë tsojkën ko duˈunyëm ojts yˈëwäˈkx kyäjpxwäˈkxtë. Mä tyäˈädë tiempë, mayë nmëguˈukˈäjtëm duˈunyëm tmëduunˈadëˈëtstë Jyobaa, oy tpäättë amay jotmay. Pes nyijäˈäwëdëp ko Jyobaa kyaj tjäˈäytyëgoyaˈany tëgokyë tijaty tyam tyuundëp (Eb. 6:10).

20. ¿Ti nˈixäˈänëm mä jatuˈukpë artikulo?

²⁰ Ëtsäjtëm, duˈunyëm nyaˈˈaxëkˈixäˈänëm mientrës jyaˈˈatyë tyäˈädë jukyˈäjtën (Fwank 15:19). Per kyaj tiko ntsëˈk njäˈäwëm, pes extëm nˈixäˈänëm mä jatuˈukpë artikulo, Jyobaa myëjääwmoˈoyaampy ets kyuwäˈänaampy pënaty kyaj myastuˈutyëty (2 Tes. 3:3). Pääty, nˈoktsojkëm duˈunyëmë Jyobaa, ja nmëguˈukˈäjtëm ets axtë ja nmëtsipˈäjtëm. Ko duˈun nduˈunëm, ta nëjkx nˈijtëm tuˈugyë ets niˈigyë nyajkëktëjkëm ja mëbëjkën. Nenduˈun nëjkx nyajmëjpëtsëˈëmëmë Jyobaa ets nyajnigëxëˈkëm ko ja tsojkën mas niˈigyë ja mëkˈäjtënë tmëdaty, këdiinëm ko nyaˈˈaxëkˈijxëm.