1. ¿Ti jotmayë nety pyattëp ja Dios mëduumbëty diˈib mä primer siiglë?

NAA ja mä jëmëjt 62 ets 64, apostëlë Pedro tnijäˈäyë pënaty tsënääytyëp mä “nyaxwinyëdë: Pontë, Galasyë, Kapadosyë, Asyë es Bitinyë” (1 Peed. 1:1). Tyäˈädë Dios mëduumbëty määyëmë nety tsyëënëdë ets yajtëgoyˈäjttëbë nety yajjotmëkmoˈoytyët ets yajnëˈëmoˈoy yajtuˈumoˈoytyët, pes yëˈë nety wyinguwäˈkëdëp tuˈugë jotmay diˈibë Pedro tyij, “ja mëk ayoˈon”, o ko nety yajpajëdittë. Nan kujotmayë nety ja tiempë diˈib tyukjukyˈäjttëp, pesë Pedro tkujäˈäyë: “Të wyingony esë jäˈäy yajpayoˈoytyët”. Duˈunë duˈun, jeˈeyë nety yˈaktëgoyˈaty naa mäjk jëmëjt parë kyutëgoyëdë Jerusalén. Pääty, ¿ti nety mbäät pyudëkëdë ja Dios mëduumbëty parë twinguwäˈägëdët ja amay jotmay? (1 Peed. 4:4, 7, 12).

2, 3. ¿Tiko Pedro tˈanmääy ja Dios mëduumbëty ets yˈoyjyaˈaytyäˈäktët? (Ixë dibujë).

² Pedro duˈun ojts tkäjpxwijy ja Dios mëduumbëty: “Naymyoˈoyëdë nixim niyam yëˈë jäjtakn esë käˈäy ukën mët winë mjot” (1 Peed. 4:9). Diˈib të yajkäjpxnaxy “naymyoˈoyëdë [...] jäjtakn esë käˈäy ukën”, mä ayuk grieegë yëˈë yˈandijpy ko “nˈoyjyaˈaytyakëm mëdë jäˈäy diˈib kyaj nˈixyˈäjtëm”. Per ko Pedro jyënany “nixim niyam”, yëˈë  myaytyäˈägan ko ja Dios mëduumbëty yˈoyjyaˈaytyäˈäktët mët pënaty yˈixyˈäjttëp. ¿Wiˈixë nety pyudëkëyäˈänëdë pën pyaduundëbë tyäˈädë käjpxwijën?

³ Pudëkëyanëdëbë nety parë tuˈugyë yˈittët. Ets ëtsäjtëm, ¿këdii kyaj njäˈäytyëgoˈoyëm ko tuˈugë nmëguˈukˈäjtëm ojts xywyoˈowëm mä tyëjk? Ets pën ëtsäjtëm ojts nwoˈowëm, ¿këdii niˈigyë ojts mëët naymyaˈaybyëjkëm? Ko nˈoyjyaˈaytyakëm mëdë nmëguˈukˈäjtëm, xypyudëjkëm parë yajxon mëët nnayˈixyˈäjtëm. Ja tiempë mä Pedro jyukyˈajty, niˈigyë nety myëjwindëkë ja amay jotmay, pääty tsojkëbë nety ja Dios mëduumbëty tuˈugyë yajpäättët. Nanduˈun tyam jyaty mä tyäˈädë “tiempë diˈib jëjpkëxanëp” (2 Tim. 3:1, TNM).

4. ¿Tijaty yaˈˈatsoowëmbitäämp mä tyäˈädë artikulo?

⁴ ¿Näˈäjaty mbäät nˈoyjyaˈaytyakëm “nixim niyam”? ¿Ti mbäät nduˈunëm parë kyaj tijaty xyyajtuˈuˈadujkëm ets nˈoyjyaˈaytyakëm? Ets pën ëtsäjtëm yajwoˈowëm, ¿wiˈix mbäät nyaˈijxëm ja oybyë jäˈäyˈäjtën?

5. ¿Wiˈix mbäät nˈoyjyaˈaytyakëm mä tuˈukmujkën?

⁵ Ko nyajpatëm mä nduˈukmujkëm. Jyobaa mëdë kyäjpn yëˈë diˈib xywyoˈowëm. Ets ëtsäjtëm ntsojkëm ets oy nyayjyawëdët pënaty miindëp, ets mas pën tim jawyiinnëm myindë (Rom. 15:7). Pes yëˈë nanduˈun të wyowëdë Jyobaa, pääty tsojkëp ets oy nyajnayjyäˈäwëm, ets kyaj yëˈë nˈijxëm ja wyit xyox o wiˈix kyëxëˈëktë (Sant. 2:1-4). Pën nˈijxëm ko naytyuˈuk jam yajpääty, ¿mbäät nˈanmäˈäyëm ets mëët nˈunyaˈayëm? Seguurë ko oy nyayjyawëyaˈanyëty pën nbudëjkëm parë tpäädët tuˈugë tekstë o ndukˈijxëm ti jam yajmaytyakp. Duˈun tuk pëky nguytyuˈunëmë tyäˈädë käjpxwijën: “Axäjëdë yajxon pënëty miin jäjttëp mä mdëjk” (Rom. 12:13).

6. ¿Pënatyën jawyiinˈäjtp mbäät nwoˈowëm mä jëën tëjk?

⁶ Ko pën nwoˈowëm kaabyë o parë ti nˈuknäjxëm. Tëëyëp, myëdäjttëp ijty ja kostumbrë parë jäˈäy twowdë kaabyë mä tyëjk, ets duˈun ttukˈixtë ko oy mëët yˈitäˈändë ets ko mëët nyaymyayäˈänëdë (Gén. 18:1-8; Juec. 13:15; Luk. 24:28-30). Ets ëtsäjtëm, ¿pënatyën jawyiinˈäjtp mbäät nwoˈowëm? Yëˈë ja nmëguˈukˈäjtëm diˈib tuˈugyë mëët nˈëxpëjkëm, pes yëˈë diˈib xëmë mëët nyajpatëm. Kom niˈigyë tsyiptäˈäganë tyäˈädë tiempë, nyajtëgoyˈatäˈänëmë nmëguˈukˈäjtëm diˈib mëët oy nˈijtëm. Mä jëmëjt 2011, jap Estados Unidos ja netyë betelitë tˈëxpëktë rebistë Diˈib Xytyukˈawäˈänëm a las 6:45, per ta Diˈib wyoowˈyoˈoytyëbë Jyobaa tyestiigëty ojts twijtstëgatstë a las 6:15. ¿Tiko? Yaˈˈanmääytyë ko pääty yajwijtstëgäjtsy ja oorë parë mbäät dyajnaxtë tiempë mët ja myëbetelitëty ko yˈëxpëjktäˈäytyët. Ets mä wiinkpë Betel nanduˈun ttuundë. Duˈuntsoo niˈigyë nyayˈixyˈatëdë betelitëty ets yˈittë tuˈugyë.

7, 8. ¿Wiˈix mbäät nyaˈijxëmë oyjyaˈayˈäjtën mët pënaty miindëp diskursaräjtpë?

⁷ Oy ko nyaˈijxëmë oyjyaˈayˈäjtën parë mët ja nmëguˈukˈäjtëm diˈib miindëp diskursaräjtp ets ko myinët ja sirkuitë ets pënaty yajkajxtëp Betel (käjpxë 3 Fwank 5-8). Tuk pëky diˈib mbäät nduˈunëm, yëˈë ko nwoˈowëm kaabyë o parë ti mëët nˈuknäjxëm. ¿Tiko duˈun ngatuˈunëm ko jatëgok myindët?

⁸ Tuˈugë nmëguˈukˈäjtëm diˈib Estados Unidos duˈun tjamyetsy: “Nuˈun kujkë xëëw jëmëjt nyaxy, nwoowdëbëts mëdëtsë nmëmëjjäˈäy mätsë ndëjk pënaty miindëp diskursaräjtp mëdë kyudëjk. Ets xëmëts jantsy oy nyajnaxtë, nˈit nxondëts, per diˈib mas jëjpˈam, yëˈë kots nnaymyëjääwmoˈoyëdë. Ninäˈäts ngamëkjawëdë kots duˈun nˈoyjyaˈaytyäˈäktë”.

9, 10. 1) ¿Pënaty mbäät tuk tiempë dyajtëgoyˈattë jyäjtakn? 2) ¿Mbäät yˈoyjyaˈaytyäˈäktë pënaty mutskë jyëën tyëjk ets oy nëgoo kyaˈoyëty? Pëjtäˈäk tuˈugë ijxpajtën.

⁹ Ko nyajjäjtakëm tuk tiempë. Ja Dios mëduumbëty yajjäjtaktëp ijtyë jäˈäy mä jyëën tyëjk, ets tyam nan tsojkëp duˈun nduˈunëm (Job 31: 32; Filem. 22). Extëm nˈokpëjtakëm, ko sirkuitë xykyuˈijxëm, tsojkëp yajmoˈoyëdë jyäjtakn. Nan tsojkëp nmoˈoyëmë jyäjtakn pënaty jäjttëp mä eskuelë diˈib yajkypyë Diosë kyäjpn ets pënaty tuundëp mä jëën tëjk yajkojy. Ko tijaty yˈayoˈonbëjtaˈaky, ta näägë familyë wyëˈëmdë winwäˈätstuuy ets tsojkëp nˈagëˈë nˈaxäjëm axtë koonëm yaˈˈagojëdë jyëën tyëjk. Kyaj mbäät nwinmäˈäyëm ko yëˈëyë mbäät dyakyë jäjtakn ja diˈib mëjë jyëën tyëjk ets oy. Pesë tyäˈädë nmëguˈukˈäjtëm waˈan jantsy kanäkˈok kujk dyäjknë jäjtakn. ¿Mbäädë net ëtsäjtëm nˈawäˈänëm ja jëën tëjk oy myutskëty ets oy nëgoo kyaˈoyëty?

¹⁰ Tuˈugë nmëguˈukˈäjtëm diˈib Corea del Sur, jyamyejtsypy ko ijty dyajjäjtaˈaky pënaty pyäädandëbë eskuelë diˈib yajkypyë Diosë kyäjpn. Yëˈë jyënaˈany: “Tim ogäˈän, naa jëjptsëˈkëts, jaˈko näämnëmtsë nety nbëktë ets naa mutskëts ja ndëjk. Per jantsy jotkujkëts nnayjyäˈäwë kots nyajjäjtaktë. Ojtsëts nˈixtë wiˈixë kasäädë jäˈäy agujk jotkujk yajpäättë ko tuˈugyë tmëdundë Jyobaa ets ko nimajtsk tpëjtäˈäktë wyinmäˈäny parë dyajmëjwindëkëdë Diosë tyuunk”.

11. ¿Tiko tsyokyëty nˈoyjyaˈaytyakëm parë mëdë nmëguˈukˈäjtëm diˈib tunandëp mä nduˈukmujkëm?

¹¹ Ko jyäˈttë nmëguˈukˈäjtëm diˈib tunandëp mä nduˈukmujkëm. Mbäät mä ja nax käjpn jyäˈttë nmëguˈukˈäjtëm diˈib käjpxwäˈkxandëp o prekursoorëty diˈib të yajkaxtë mä nduˈukmujkëm. Tim ogäˈän, mbäät tsyiptakxëdë tˈijxwëˈëmdët ja nax käjpn, ja tuˈukmujkën ets axtë yëˈëbäät ja ayuk o ja kostumbrë. Per ko nwoˈowëm kaabyë o parë ti mëët nˈuknäjxëm o muum mëët nnëjkxëm, yëˈë pudëkëyanëdëp parë mëët naymyaˈaybyëjkëm ets tˈijxwëˈëmdët ja jukyˈäjtën.

12. ¿Ti ijxpajtën xytyukˈijxëm ko parë nˈoyjyaˈaytyakëm kyaj tyimtsokyëty nyaˈoˈoyëmë kaaky tojkx diˈib yajniduungëp?

¹² Parë nˈoyjyaˈaytyakëm kyaj tyimtsokyëty nyaˈoˈoyëmë kaaky tojkx diˈib yajniduungëp (käjpxë Lukʉs 10:41, 42). Tuˈugë nmëguˈukˈäjtëm tnimaytyaˈaky wiˈix jyäjttë mëdë kyudëjk ko tyuuntsondaktë misioneerë, ënäˈkˈäjttëbë nety ets jyantsy jyamyajtstëp tijaty të tnikaˈaktë. Jyënaˈany: “Mä tuˈugë tsuu, jantsy määy täjpëtsë netyë ngudëjk mët ko tjantsy jyamyetsy tijaty të tnikeˈeky, ets kyajts nekynyijäˈäwë wiˈixëts njotkujkmoˈoyët. Ta naa a las 7:30 yajkojxyë tëjkˈääw. Yëˈë nety miimp tuˈugë toxytyëjk diˈib apenënëm yˈëxpëjkypyë Biiblyë ets tmëminy tëgëëgë narankë parëts xyˈagëˈëjëyäˈän xyˈaxäjëyäˈändë. Tats nyajnäjxtë, nmooytyëts tuk basë nëë, ets tats nyaˈoˈoyëdë tee etsë tsyokolatë. Ëëtsëty kyajnëmtsë nety ngäjpxtë suajili ets ja toxytyëjk nan kyaj nety tjaty wiˈixëts ngäjpxtë. Desde jaa, tats mëët nnaymyaaybyëjkëdë nmëguˈukˈäjtëm diˈib tsënääytyëp mä tyäˈädë paˈis ets mas jotkujkëts nayjyäˈäwëdë”.

13. ¿Tiko yˈoyëty nˈoyjyaˈaytyakëm?

¹³ ¿Mtsiptakxëp mˈoyjyaˈaytyäˈägët? Pën duˈun, waˈan kanäkˈok kyaj të myajpääty mëdë nmëguˈukˈäjtëm parë mxiˈik mxondët ets xypyäädëdë mëtnaymyaayëbë diˈib jakëp winë xëëw. Ko nˈoyjyaˈaytyakëm, mbäät xypyudëjkëm parë kyaj nnayjyäˈäwëm naytyuˈuk. Per ¿tidaa ko tuˈugë jäˈäy kyaj yˈoyjyaˈaytyaˈaky? Min nˈokˈijxëm.

14. ¿Ti mbäät nduˈunëm pën xytyëgoyˈäjtxëmë tiempë etsë jot mëjääw parë nwoˈowëmë nmëguˈukˈäjtëm o ngupëjkëm ko xywyoˈowëm?

¹⁴ Tiempë etsë jot mëjääw. Mëk njantsy tyuˈunëm ninuˈun nmëduˈunëmë Jyobaa ets kanäk pëkyë tuunk nikëjxmˈäjtëm. Pääty, mbäät nääk wyinmaytyë ko kyaj ti tiempë ets ni jot mëjääw parë yˈoyjyaˈaytyäˈäktët. Pën duˈun nwinmäˈäyëm, tsojkëp ndukniwijtsëmë tiempë parë nwoˈowëm ja nmëguˈukˈäjtëm o ngupëjkëm ko nyajwoˈowëm. Jëjpˈam ets duˈun nduˈunëm, pesë Biiblyë xytyukˈanaˈamëm parë nˈijtëm oyjyaˈay (Eb. 13:2). Ko njuˈtëmë tiempë parë nyajpatëm mëdë nmëguˈukˈäjtëm, yëˈë duˈun  diˈib mbäät nduˈunëm. Ets näˈäty, tsojkëp njuˈtëmë tiempë mä nduˈunëm diˈib kyaj tyim jëjpˈamëty.

15. ¿Tidaa ko näˈäty nwinmäˈäyëm ko kyaj mbäät nˈoyjyaˈaytyakëm?

¹⁵ Ko këˈëm nnayajtuˈuˈadujkëm. ¿Të näˈä njaˈoyjyaˈaytyäˈägäˈänëm, per ta të nnayjyäˈäwëm ko kyaj mbäät duˈun nduˈunëm? Waˈan nwintsoytyuˈunˈäjtëm o kyaj nnijäˈäwëm ti nˈoknimaytyakëm ets nwinmäˈäyëm ko tsipkaˈaxäämp pënaty të nwoˈowëm. O waˈan kyaj nëgoo meeny sentääbë nmëdäjtëm ets nwinmäˈäyëm ko ninäˈä mbäät ngayäjkëm diˈibë wiinkpë yäjktëp. Per oy ko njamyajtsëm ko kyaj tyimtsokyëty nmëdäjtëm tuˈugë oybyë tsujpë tëjk, diˈibën jëjpˈam yëˈë ko nyaˈijtëm wäˈäts ets nguwijts ngugëˈëyëm, ets ko oy nyajnayjyäˈäwëm pënaty të nwoˈowëm.

16, 17. ¿Ti xypyudëkëyäˈänëm pën xyjotmaytyuˈunëm ko të nwoˈowëmë jäˈäy?

¹⁶ Pën xyjotmaytyuˈunëm ko të nwoˈowëmë jäˈäy, kyaj ëtsäjtëm jeˈeyë duˈun njäjtëm. Tuˈugë nmëguˈukˈäjtëm diˈib tuump mëjjäˈäy jap Gran Bretaña, jyënaˈany: “Mbäät wanaty xytyuktëjkëmë tsëˈëgë ko njëjpˈijxëm pënaty të nwoˈowëm. Per extëm jyaty mä oytyim diˈibëtyë Jyobaa tyuunk, tim jawyiin nˈokjëjptsëˈk nˈokjëjpjäˈäwëm, per ko net nduˈunënë, ta mas oy nnayjyäˈäwënë ets nˈaxäjëmë kunuˈkxën. Jantsy jotkujkëts nyajnaxtë mëdëtsë nmëguˈuktëjk oyëts jeˈeyë ngafeeˈuuktë etsëts ngäjpx nmaytyäˈäktë”. Nˈokjamyajtsëm ko diˈib jëjpˈam, yëˈë ko oy nyajnayjyäˈäwëm pënaty të nwoˈowëm (Filip. 2:4). Mayë jäˈäy nyimaytyäˈägandëbë jyukyˈäjtën, ets ja yˈoyëty nmëdoowˈijtëm ko mëdë tiempë nyajnäjxëm. Jatuˈugë nmëguˈukˈäjtëm diˈib tuump mëjjäˈäy, jyënaˈany: “Kots mä ndëjk yajpäättë nmëguˈukˈäjtëm, xypyudëjkëbëts parëts nˈixy wiˈix yaˈix yajpäättë ets parëts niˈigyë nˈixyˈattë, extëm wiˈix tnijäˈäwëdë tëyˈäjtën”. Pën naytyukjotmaytyuˈunëm parë oy nyayjyawëdët pënaty të nwoˈowëm, ta nëjkx niˈamukë jotkujk nnayjyäˈäwëm.

¹⁷ Tuˈugë prekursoora diˈib ijty yajjäjtakypy pënaty pyäädandëbë eskuelë, jyënany: “Tim ogäˈän, nmëmääy nmëdäjëts, jaˈko ndëjkëts jantsy adëyë ets yëˈëts nyajtuumbyë siyë meesë diˈibë jäˈäy të tˈokˈyajtuumbë. Per tats xyjotkujkmooy ja nmëguˈukˈäjtëmë kyudëjk diˈibë nety yaˈëxpëkäämp. Xyˈanmääyëts ko diˈib mas oy yajnayjäˈäwëp mëdë myëmëjjäˈäy mä tyundë sirkuitë, yëˈë ko dyajnaxtë ja xëëw sëmään mëdë jäˈäy diˈib tsyojkypyë Dios oy mëjwiin kajaa ti tkamëdattë extëm yëˈëjëty, per jëjpˈam tpëjtäˈäktë Diosë tyuunk ets adëyë jyukyˈattë. Tats njamyejtsy wiˈixëts ijty xyˈanëëmëdë ndääk kots nmutskˈäjttë: “Mas oy tuk texyë ujtskëˈëw mä jyamˈatyë tsojkën” (Prov. 15:17). Extëm nˈijxëm, kyaj tiko nëgoo nmëmäˈäy nmëdäjëm, pes diˈib mas jëjpˈam, yëˈë ko nyajnigëxëˈkëmë tsojkën mä ja nmëguˈukˈäjtëm diˈib të nwoˈowëm.

18, 19. ¿Wiˈix xypyudëjkëm ko nˈoyjyaˈaytyakëm parë oy nnaymyënëjkxëm mëdë nmëguˈukˈäjtëm?

¹⁸ Extëm nˈijxëm ja nmëguˈukˈäjtëm. ¿Jam tuˈugë nmëguˈukˈäjtëm diˈib kyaj mëët oy nnayjyäˈäwëm? Waˈan kyaj nwowäˈänëm mä tëjk mët ko kyaj ndukjotkëdakëm wiˈix jyaˈayˈaty, o mët ko ojts tëgok wiˈix xytyuˈunëm diˈib kyaj njäˈäytyëgoˈoyëm. Per pën kyaj ti nduˈunëm, duˈunyëm nˈixäˈänëm ja nmëguˈukˈäjtëm.

¹⁹ Biiblyë jyënaˈany ko pën oyjyaˈaytyakëm, yëˈë xypyudëkëyäˈänëm ets oy nnaymyënëjkxëm mët ja nmëguˈukˈäjtëm, axtë mët ja nmëtsipˈäjtëm (käjpxë Romanʉs 12:20). Ko nwoˈowëm mä tëjk, yëˈë xypyudëkëyäˈänëm parë kyaj axëëk nekynyayjäˈäwëm, ets oy mëët nˈijtëm. Nan mbäädë net nˈijxëm ja oybyë jyaˈayˈäjtën diˈibë Jyobaa yˈijx ko myëjwoowë mä kyäjpn (Fwank 6:44). Ko tsojkëngyëjxm nwoˈowëm ja nmëguˈukˈäjtëm diˈib kyaj oy mëët nnayjyäˈäwëm, mbäädë net mëët nnaymyaaytsyondakëm. ¿Wiˈix mbäät nnijäˈäwëm pën kyaj wingëˈëy agëˈëy ja tsojkën nyajnigëxëˈkëm? Tuk pëky yëˈë ko nbanëjkxëm ja käjpxwijën diˈib  mä Filipʉs 2:3, mä jyënaˈany: “Naybyëjtäˈägëdë yuunk naxypy, es xyjawët ko myëjjëty ja wiingatypyë es këdiinëm miitsëty”. Niˈamukë nmëguˈukˈäjtëm tam muum mä xywyinäjxëm, extëm mä tmëdattë mëbëjkën, madakën, jotmëkˈäjtën o jam tmëdattë tuˈugë oybyë jäˈäyˈäjtën. Pën nbëjkëmë kuentë mä ja nmëguˈukˈäjtëm xywyinäjxëm, ta niˈigyë ntsokäˈänëm ets kyaj xytsyiptäˈägäˈänxëm nˈoyjyaˈaytyakëm mët yëˈë.

20. Pën të ngupëjkëm nëjkxäˈänëm mä të nyajwoˈowëm, ¿ti mbäät nduˈunëm, ets tiko?

²⁰ David, diˈib nanduˈun jyaayë Salmo, ojts dyajtëyë Jyobaa wiˈix mbäät jyaˈayˈaty pënaty yëˈë wyoopy wyijtsypy (Sal. 15:1). Tuk pëky, yëˈë ko tkuytyunët ja yˈayuk oy tsyiptakxëdët (Sal. 15:4). Pääty, pën të ngupëjkëm nëjkxäˈänëm mä të nyajwoˈowëm, kyaj yˈoyëty ndukäjpxëm tijaty kyaj tyimjëjpˈamëty parë kyaj nekynyëjkxëm. Pes ko duˈun nˈadëtsëm, nanëgoobë nety të jyaty të yˈooky ja jäˈäy diˈib të xywyoˈowëm (Mat. 5:37). Nan ta nmëguˈukˈäjtëm diˈib yˈokkupëjktëp nyëjkxäˈändë mä yajwowdë, per kyaj yˈoknëjkxnëdë ko net yajwowdë mä niˈigyë tˈoymyëdowdë. ¿Këdii kyaj nety dyajnigëxëˈëktë tsojkën ets ni wingutsëˈkën? Niˈigyë mbäät nmëjjäˈäwëm ko ja nmëguˈukˈäjtëm yˈoyjyaˈaytyäˈäktë (Luk. 10:7). Ets pën kyaj ndimmadäˈägäˈänëm, nˈokˈanmäˈäyëm kontiempë ja diˈib të xywyoˈowëm. Duˈuntsoo nyajnigëxëˈkëmë tsojkën ets ko nmëjjäˈäwëm.

21. ¿Tijaty kostumbrë wyintsëˈkëdëp pënaty yajwoowdëp diˈib yaˈijxëdëbë oybyë jäˈäyˈäjtën?

²¹ Nan oy ko nwintsëˈkëm ja kostumbrë diˈibë jäˈäy myëdäjttëp. Ta it lugäär mä kyaj wyiˈixëty ko pën jyaˈty mä tëjk ets kyaj të tnigajpxy, per ta lugäär mä tsyokyëty ets jawyiin yajnigäjpxët. Nan ta lugäär mä abëky yaˈoytyunyë kyaˈay yˈukënë pënaty yajwoowdëp, myentrës mä wiinkpë lugäär tuˈugyë ja käˈäy ukënë yajniˈˈixë. Nan ta net mä jäˈäyë kostumbrë tmëdattë ets pënaty yajwoowdëp tmënëjkxtët tii, myentrës mä wiinkpë lugäär kyaj tyim jëjpˈamëty. Ta it lugäär mä oy yaˈixy ko jäˈäy tëgok majtskˈok tjëjpkugäjpxë ko yajwoy, myentrës mä wiinkpë lugäär duˈun yaˈixy ko kyaj tmëjjawë. Per oy wiˈixëm ja kostumbrë yajmëdatët, oy ko nduˈunëmë mëjääw parë jotkujk nyajnayjyäˈäwëm ja diˈib të xywyoˈowëm.

22. ¿Tiko jyëjpˈamëty nˈijtëm oyjyaˈay nixim niyam?

²² Tyam, niˈigyë tyëyˈäjtëndëkë extëmë Pedro jyënany: “Të wyingony esë jäˈäy yajpayoˈoytyët” (1 Peed. 4:7). Yëˈë nwinguwäˈägëyäˈänëm ja mëk ayoˈon diˈib ninäˈänëm duˈun kyatuny kyajatyëty. Ets myentrës yˈoˈktëyë tyäˈädë tiempë, niˈigyë nyajtëgoyˈatäˈänëm ets nnaytsyojkëm amumduˈukjot. Pääty, jëjpˈam ets nbanëjkxëmë tyäˈädë käjpxwijën diˈibë Pedro yäjk: “Naymyoˈoyëdë nixim niyam yëˈë jäjtakn esë käˈäy ukën mët winë mjot” (1 Peed. 4:9). Duˈunë duˈun, xëmë tsyokäˈänyëty nˈijtëm oyjyaˈay, duˈun tyam ets winë xëëw winë tiempë.