Nipën tyam yajxon tkanijawë wiˈix ijty yˈixëtyë Pablo. Extëm të yajnijääytyuˈuty mä ëxpëjkpajn, yëˈë diˈib këˈëm të yajdibujaraty, kyaj yëˈëjëty diˈibë ëxpëkyjyaˈaytyëjk të ttäjpäättë.

Per ta diˈib xytyuknijäˈäwëm naa wiˈix yˈixˈäjtyë apostëlë Pablo. Extëm nˈokpëjtakëm, mä Diˈib Xytyukˈawäˈänëm 1 äämbë marsë 1902, tmaytyaky tuˈugë ëxpëjkpajn diˈib xyëwˈäjtypy Hechos de Pablo y Tecla diˈib yajjääy naa ja mä jëmëjt 150. Extëmë tyäˈädë ëxpëjkpajn tnimaytyaˈaky wiˈix yˈixˈäjtyë Pablo, waˈan yëˈëjëty diˈib mas oy nyimaytyakypy ets diˈib mayë jäˈäy nyijäˈäwëdëp. Duˈun tnimaytyaˈaky: “Naa mutsk tyanë, tajtpak, kutëˈkx, jantsy mëk, ayoonmujkpë wyinsejë [o wyinkxëwääy] ets naa mëjë jyëjp”.

Tuˈugë diksionaaryë jyënaˈany ko Hechos de Pablo y Tecla tëyˈäjtën myëët tnimaytyaˈaky tijaty tëëyëp tuun jäjtë (The Oxford Dictionary of the Christian Church [diˈib pëtsëëm 1997]). Ko nyajxy majtsk o tëgëk mëgoˈpx jëmëjt mä yajjääyë tyäˈädë ëxpëjkpajn, duˈunyëmë netyë jäˈäy dyaˈijttë mëj. Ets tyäˈädë tëyˈäjtën, pes tyam yajpatp 80 diˈib këˈam yajjääy mä ayuk grieegë ets nan miimp mä wiinkpë ayuk. Pääty extëmë Pablo yajdibujaraty, tuˈugyëp mët extëm yajnigajpxy wiˈix ijty yˈixëty.

Oy ko nmëdäjtëm winmäˈänyoty ko ta diˈib mas jëjpˈam diˈibë Pablo tyuun ets kyaj dyuˈunëty wiˈix yˈixˈäjty. Näägë jäˈäy duˈun yˈëbat kyäjpxpatë ko Dios mëduuny: “Tyäˈädë Pablo nekykyëjxyë dëˈën jeˈeyë xymyëgäjxëm mëk, per ko mët naywyinguwäˈkëm, yuunk naxypyëp ets nitii tkatsooty ja yˈayuk” (2 Kor. 10:10). Per nˈokjamyajtsëm ko pääty tyëjkë Dios mëduumbë mët ko Jesus nyayajnigëxëˈkë mëjˈäjtëngyëjxm. Nan oy ko nbawinmäˈäyëm tijaty tyuun ko yajwinˈijxy parë tmënëjkxëdë Jesusë xyëëw “mä wiinkpë naxwinyëdë” (Apos. 9:3-5, 15; 22:6-8). Ets tsojkëp nwinmäˈäyëm nuˈunën ndukˈoyˈäjtëm ja liibrë diˈibaty jyaayë apostëlë Pablo mët ko Dios wyinmäˈänymyooyë.

Pablo ninäˈä tkamaytyaky wiˈix yˈixëty ets nan kyaj nyayajmëjpëtsëëmë mä tijaty tyuuny mä nety kyaDiosmëdunynyëm (Apos. 26:4, 5; Filip. 3:4-6). Yëˈë jyënany: “Ëjtsë dëˈën extëm tim ëxˈokpë mä yëˈë tadë apostëlëty, es ni jeˈeyëts xykyanitëkë esëts xyˈanëëmët apostëlë” (1 Kor. 15:9). Ok, ta tkujäˈäyë: “Es oyëts ëj nitii ngatsooˈäjtpë mët oytyim pënëty diˈibë pyanëjxtëp ja Kristë, Diosëts të xytyukkëdëkë esëts ngäjxwäˈxët mä yëˈë diˈibë kyaj yˈisraelitëty, ja diˈibë nipën mbäät tkanijäˈätyaˈay” (Éfes. 3:8). Duˈunë duˈun, diˈibë Pablo kyäjpxwäˈkx niˈigyë jyëjpˈamëty ets kyaj dyuˈunëty wiˈix yˈixˈäjty.