Mbäät xykyujoˈpëmë yäˈädë tekstë pën jeˈeyë nwingäjpxnäjxëm. Per nimajtskën jyaˈäjtyë duˈumbë jäˈäy mëdiˈibë xëwˈäjt Mefibóset. Mbäät tijaty xytyukniˈˈijxëm ko nnijäˈäwëm wiˈix yajnimaytyäˈäktë.

Saúl mëdiˈibë anaˈam Israel, nijëxtujkë myäänk tmëdäjty ets nimajtskë nyëëx. Ja kyaˈaxkopkˈuˈunk ja txëwˈäjty Jonatán. Ok, ta Rizpá, ja myëmajtskpë kyudëjkë Saúl, tpaty tuˈugë yˈuˈunk mëdiˈibë xyëëwmooy Mefibóset. Ets niduˈugë myäängë Jonatán nanduˈun ttukxëwˈäjty Mefibóset. Päätyën jyamˈäjty nimajtskë Mefibóset mä fyamilyë Saúl, niduˈuk yëˈë ja myäänk, ets jatuˈuk, yëˈë yˈokmäänk.

Per ¿tiko David tkëyajky niganäägë jäˈäy ets yˈooktët? Ja tiempë mä netyë Saúl yˈaneˈemy, ojts tmëtsiptsoony ja Gabaón jäˈäyëty mëdiˈibë nety tsënääytyëp mët ja israelitëty ets ojts tjayaˈoˈktäˈäyäˈändë. Ojts jyawë niganääk dyaˈooktë. Mëk axëëgën yˈadëtsyë Saúl, pes ja tiempë mä Josué jyukyˈajty të nety tkajpxyˈattë mëdë Gabaón jäˈäyëty ko tuˈugyë nyayaˈitäˈänëdë (Jos. 9:3-27).

Ja tiempë mä Saúl ojts yˈaneˈemy, duˈunyëmë nety yajwingutsëˈëgë mëdiˈibë Josué kyajpxyˈäjt mët ja Gabaón jäˈäyëty. Perë Saúl kyaj twingutsëˈkë, ojts tniˈanaˈamë parë niˈamukë yˈoˈktäˈäytyët ja Gabaón jäˈäyëty. ¿Wiˈix wyimbëtsëëmy? Saúl mëdë fyamilyë nyikëjxmˈäjttë “ja nëë neˈpyny mëdiˈibë yajpëyëˈktë” (2 Sam. 21:1). Ko David tyuundëjkë rey, ta ja Gabaón jäˈäyëty tyukmëtmaytyaktääyëdë ti nety të tyuny të jyatyëty. David ta dyajtëëy ti nety mbäät tˈoktuny parë tjäˈäytyëgoytyët ko axëëk tyuunëdë Saúl ets duˈunë Jyobaa tkunuˈkxët ja israelitëty. Yëˈëjëty kyaj tˈamdoowdë meeny sentääbë, yëˈë tsyojktë ets ja David tkëyakët ja nijëxtujkpë yˈuˈunk yˈënäˈkë Saúl mëdiˈibë ojts dyajnidukëdë parë yˈoˈktäˈäytyët ja Gabaón jäˈäyëty (Núm. 35:30, 31). Ta David tkëyajky ets yˈoˈktääytyë (2 Sam. 21:2-6).

Mä taabë tiempë kyaj nety yˈokjukyˈäjnë Saúl mëdë Jonatán, mët ko yˈoˈktë tsipoty. Per tamë nety jyukyˈatyë Mefibóset, ja myäängë Jonatán. Seguurë ko kyaj ojts ttuktëkë ja tsip mä ja tyatwelë tsyiptuuny mët ja Gabaón jäˈäyëty, pes ko myutskˈäjty ayoˈonbat ets ojts wyeˈemy tekymyäˈät. David të nety nanduˈun tkajpxyˈaty mëdë Jonatán ko xëmë mëët nyaymyayaˈanyëty ets ko tˈijxˈitäˈäny tkuentëˈatäˈäny ja fyamilyë, axtë Mefibóset (1 Sam. 18:1; 20:42). Mä Biiblyë jyënaˈany ko rey David pyaˈˈayoow ‘ja Mefibóset, Jonatán ja myäänk, Saúl yëˈë yˈuˈunk, mët ko tjamyejtsy wiˈixë ënety mëët ja Jonatán ja kajpxytyuˈunën të ttuny’ (2 Sam. 21:7, TY).

Perë David tyuun ti amdoow pëjktsoowë ja Gabaón jäˈäyëty. Kyëyäjk ja nimajtskpë yˈuˈungë Saúl, niduˈuk yëˈë Mefibóset, ets nimëgoxk ja yˈokˈënäˈk (2 Sam. 21:8, 9). Duˈun ja David dyajwatsy ja nax käjpnë xyëëw mä nety të pyëyeˈeky ja nëë neˈpyny.

Mbäät tijaty xytyukniˈˈijxëm extëm yajnimaytyaˈaky. Jyobaa kyajxyëp ojts tkupëky ets yˈoogët ja nimajtskpë myäängë Saúl ets ja nimëgoxkpë yˈokmäänk, kooxyëp tkatuktëjkëdë ja tsip mä kyutëgooytyë ja Gabaón jäˈäyëty. Pes ja Ley yajxonë nety tnigajpxy ko ja uˈunk ënäˈk kyaj mbäät tkumëdowdë tijaty ja tyääk tyeety të ttuundëgoytyë. Duˈunë nety ja ley jyënaˈany: “Ja jäˈäy mëdiˈibë ënety pokytyuumbën, yëˈë duˈun këˈëm kyëbattëp ja nyëë pyoky” (Deut. 24:16, MNM). Yäˈädë yëˈë xytyukˈijxëm ko ja nijëxtujkpë yˈuˈunk yˈokë Saúl, tyuktëjkëdë ja tsip mä jyäämˈoˈk nyääxˈoˈktë ja Gabaón jäˈäyëty. Pääty tkumëdoowdë ja pyoky kyaytyey.

¿Ti yäˈädë xytyukniˈˈijxëm? Ko nipën mbäät kyanaynyikäjpxtuˈutyëty ko ttuny mëdiˈibë kyaj yˈoyëty o jyënäˈänët ko pääty duˈun ttuny mët ko të yajtukˈaneˈemy. Seguurë ko tkumëdowët tijaty tyuumpy. Pesë Proverbios duˈun jyënaˈany: “Täjkijpxyë ja nëˈë tuˈu mä xypyëjktaˈagyë mdeky, ets tukëˈëyë mnëˈë mduˈu yˈitäˈäny seguurë. Këdii mguyeˈey mgunaxë ni aˈoytsyoow ets ni anäjnytsyoow. Jëwäˈäk mä ja axëkˈäjtën” (Prov. 4:24-27; Éfes. 5:15).