Jotkujkëts nnayjawëdë kots adëyë njukyˈattë
DANIEL MËDË MÍRIAM ja pyëjktë septiembrë mä jëmëjt 2000. Japë nety tsyëënëdë Barcelona (España) ets nitii nety tkayaˈˈamääytyäˈäktë. Daniel jyënaˈany: “Kom kajaatsë nety nganarattë, nëjkxtëbëts ijty mä oyatypyë restaurante, wiink paˈis ets oyëts nnayxyoxëdë. Nan xëmëts ijty nëjkxtë käjpxwäˈkxpë”. Per min nˈokˈijxëm tiko tˈyajtëgäjtstë jyukyˈäjtën.
Mä tuˈugë asamblee diˈib tuunë 2006, ja nyajxy tuˈugë diskursë diˈibë Daniel jotjäjtë. Ja diˈib diskursaräjt tˈyajtëëy: “¿Tuˈunëm nuˈun nmadakëm parë jäˈäy ndukniwoˈowëm ja nëˈë tuˈu diˈib mënëjkxp mä jukyˈäjtënë winë xëëwbë këdiibë yˈooktët?” (Proverbios 24:11). Yajnimaytyak ko nikëjxmˈäjtëm ngäjpxwäˈkxëm ja oybyë ayuk parë jäˈäy kyaj yˈooktët (Apostʉlʉty 20:26, 27). Daniel jyënaˈany: “Duˈunëts njäˈäwë ko ëjtsë Jyobaa xymyëgäjpxp”. Nan ojts yajnimaytyaˈaky ko mas jotkujk nnayjäˈäwëm pën niˈigyë nmëduˈunëmë Jyobaa. Daniel nyijäˈäwëbë nety ko tëyˈäjtën, pesë Míriam jantsy jotkujkë nety nyayjawëty ko tyuny prekursoora.
Daniel jyantsy yˈoymyëdoowë tyäˈädë diskursë, ta wyinmäˈäny tpëjtaky ko tˈyajtëgatsäˈäny ja jyukyˈäjtën. Tim jawyiin, pyuwijts ja tiempë nuˈunë nety tyuny, ta tyëjkë tuumbë prekursoor, ets ok, ta twinmääy ko jantsy jotkujk yajpäädäˈändë ko nyëjkxtët mä tyëgoyˈatyë käjpxwäˈkxpë.
TI MYËJOTMAYBYATTË ETS TI JOTKUJKMOOYËDË
Mayë 2007, Daniel mëdë Míriam tmastuttë ja tyuunk ets ojts nyëjkxtë Panamá, tuˈugë paˈis diˈibë nety yˈixyˈäjttëp. Ojts kyäjpxwäˈkxtë mä kanäägë naxwinyëdë diˈib yajpatp mejny itkujky, diˈib yajtijp Bocas del Toro. Nimayë jäˈäy diˈib jap tsënääytyëp yëˈë kyäjpxtëbë ngäbere. Daniel mëdë Míriam wyinmääytyë ko mbäädë nety jap yˈittë tuktujk poˈo mët ja meeny sentääbë diˈibë nety të tnikoombattë.
Ojts ttukˈyoˈoytyë tyäˈädë it lugäär barkoty ets bisikletëkëjxy. Jyamyajtstëp wiˈix tëgok ojts tyuˈuyoˈoytyë bisikletëkëjxy naa 30 kilometrë mä jyantsy wyimbety ets jyantsy yˈany. Daniel të nety jyantsy anuˈkxëtyaˈay ets kyaj tii jyot myëjjääwnë. Per ja jäˈäyëty diˈib kyäjpxtëbë ngäbere, diˈibë nety ixyˈäjtëdëp, oyjyaˈaytyaktë desde ko ogäˈän wanaty tjäjttë ngäbere. Ko waanë yˈijty, ja netyë jäˈäy tˈyaˈëxpëjknëdë 23.
Per ¿ti tuun jäjtë ko ojts kyëjxnë ja myeeny syentääbëty? Daniel jyënaˈany: “Kots nwinmääytyë jatëgok njëmbitanëdë España ojtsëts nwinnëëjukomëdë. Mëkëtsë nety njawëdë nikaˈaktët ja jäˈäy diˈibëts nyaˈëxpëjktëp”. Per ko nyajxy tuk poˈo, ta jyotkujkëtyaaytyë. Míriam jyënaˈany: “Nyaˈˈanmääytyëts ndundët prekursoor espesial. Jantsy jotkujkëts nnayjäˈäwëdë kots ojts nwëˈëmdë mätsë nety ndundë”.
DIˈIB JANTSY JOTKUJK YAJNAYJÄˈÄWËDËP
Per mët ko Diosë kyäjpn tijaty tˈyajtëgatsy, ta mä jëmëjt 2015 yaˈˈanmääytyë parë tyundët prekursoor regulaar. ¿Ti net tyuundë? Myëbëjktë extëm jyënaˈanyë Salmo 37:5: “Tuknipëkë Jyobaa mnëˈë mduˈu, tukˈijxpat yëˈë, ets yëˈë nëjkxëp ttuny diˈib mdukˈoyˈatëp”. Ojts tpäättë tyuunk diˈib mooyëdëbë tiempë parë tyundët prekursoor regulaar, ets tyam jap tyundë Veraguas (Panamá).
Daniel jyënaˈany: “Mätsë nety ngatsoondënëm España, kyajtsë nety nˈittë seguurë pën mbäädëts adëyë njukyˈattë. Tyam, adëyëts njukyˈattë ets nitiijëts ngayajtëgoyˈattë diˈib jëjpˈam tuump”. ¿Ti diˈib niˈigyë yajnayjäˈäwëdëp agujk jotkujk? Yëˈëjëty jyënäˈändë: “Nitiijëts duˈun xykyayajnayjawëdë jotkujk extëm kots nbudëkëdë jäˈäy diˈib ayoowdëp parë tˈixyˈattëdë Jyobaa”.