NUˈUNËTS nˈeskuelëˈäjty, kyajtsë njukyˈäjtën nëgoo tyim tëgäjtsy. Pes ja ënäˈkuˈunk diˈibëts mëët ndëjkëdë eskuelë nan yëˈëts mëët nyajkëjxtë. Ets mä ja käjpn ak nayˈixyˈäjtëdëbë jäˈäy.

Jam Liberty myëdäjttëbë jäˈäyë ryantsyë ets nan pyëjtaktëbë kyam tyuˈu. Kots nmaxuˈunkˈäjty, ja ndeetyëts jamë nety myëduny mä tuˈugë jäˈäyë ryantsyë. Pääty kots nyaˈkpëtsëëmy, njäjtëts nyajˈyoˈoyëdë traktoor etsëts ndunët oymyëdiˈibë tuungëty kamoty.

Ja ndeetyëts mëjˈënäˈknë nety. Kots nmaxuˈunkˈäjty ja netyë jyëmëjt 56 ets ja ndäägëts 35. Per oy dyuˈunëty, jeˈeyënëmë nety mëk, tamë nyiniˈkx kyëbäjk ets oy mëk. Jantsy tuumbë jäˈäy ijty ets tyukniˈˈijxë ja yˈuˈunk yˈënäˈk wiˈix tyundët. Ets oy ijty nëgoo tkapäätyë meeny sentääbë, tamëts ja njëën ndëjkëty ets ninäˈäts ojts xykyatëgoyˈäjtxëdë wit xox etsë käˈäy ukën. Nan xëmë yajpaty mët ëëtsëty. Jatsë ndeety yˈoˈky ko netyë jyëmëjt 93 etsëtsë ndääk 86. Kyaj tmëduundë Jyobaa. Per niduˈugëtsë nmëgaˈax tyuny mëjjäˈäy mä tuˈukmujkën desde 1972.

Ja ndäägëts jyantsy yˈookjäˈäwëp ijtyë ryelijyonk, ets domingë domingëts ijty xywoownëjkxtë  mä tyuˈukmuktë ja diˈib naytyijëdëp bautista. Kotsë netyë njëmëjt 12, tats nmëdooy yajnimaytyaˈagyë Trinidad, ets tats ja ndääk nyajtëëy: “¿Wiˈixën ko Jesus yëˈëjëty ja Uˈunk ets nanduˈun yëˈëjëty ja Teety?”. Tats xyˈatsooy: “Tsyulë, tsipë taabë yajnimaytyäˈägët, kyaj mbäät pën tjaygyukë”. Ets tëyˈäjtën, tsipëtsë nety njaygyukët, per ojtsëts nëbety kotsë netyë njëmëjt 14 mä tuˈugë mëj nëë. Tëgëkˈokëts xyyajnipaˈtstë, xyëëwgyëjxm ja Teety, xyëëwgyëjxm ja Uˈunk ets xyëëwgyëjxm ja espiritë santë.

Kotsë nety nˈëxpëky sekundaaryë, tamëtsë nety tuˈugë nmëtnaymyaayëbë diˈib boksyadoor, tats xytyukkupëjky parëts nanduˈun nboksyadoorˈatët. Tats ogäˈän nyajtukniˈˈijxë etsëts nyajkujäˈäyë mä Golden Gloves, mä jäˈäy tniˈëxpëkëdë boks. Kyajts nëgoo ndimjäjty, jeˈeyëts tëgok majtskˈok ntsiptuuny, tats nmastuty. Ok, tats nyajmäjtsy parëts nnaygyudunëdët extëmë soldäädë jap Estados Unidos ets tats ojts nyajmënëjkxy Alemania. Jap tats ja wintsëndëjk xykyajxtë mä soldäädëtëjk niˈigyë yˈëxpëktë mët kots xyˈijxtë ko mbäädëts nduny wintsën. Yëˈë nety tsyojktëp etsëts nsoldäädëˈatët, per kom kyajtsë nety yëˈë ndunäˈäny, tats nmastuty 1956 kotsë nety të nnaygyudunyëty majtsk jëmëjt.

Mätsë nety nganijawënëmë tëyˈäjtën, tëtsë nety xynyinaxy extëmë jäˈäy wyinmaytyë mä pënën yajtijp “jantsy yetyëjk”, extëm pënaty näjxtëp mä pelikula. Ets duˈunëtsë nety nwinmay ko kyaj yetyëjkëty pënaty Biiblyë nyimaytyaktëp. Per tats ogäˈän nnijäˈäwë diˈibëtsë njukyˈäjtën yajtëgäjts. Tëgok, jamëtsë nety naxy käjpnoty mätsë ntsapts karrë diˈib atoodë, kots nimajtskë toˈoxyˈënäˈk ojts xykyäjpxpoˈkxtë diˈib Testiigëty. Nˈixyˈäjttëbëtsë nety, pes yëˈëtsë njëyë myëgaˈaxëty. Tëtsë nety xyˈokmooytyëbë rebistë Diˈib Xytyukˈawäˈänëm etsë ¡Despertad!, per jantsy tsipëtsë nety nˈixy yajjaygyukëdë Diˈib Xytyukˈawäˈänëm. Ja toˈoxyˈënäˈkëty, tats xywyoowdë mä Estuudyë de Liibrë diˈib tuunëp mä tyëjk, mä niwaanë jäˈäy tˈëxpëktë Biiblyë ets kyomentarattë. Tats nˈanmääy ko waˈanëts alokë nëjkxët. Tats xymyëtxiktë etsëts xyyajtëëwdë: “¿Tëyˈäjtën mjënäˈäny?”. Tats nˈatsooy: “Tëyˈäjtën”.

Kyajxyëbëts duˈun njënany, pes duˈunëts ok njäˈäwë ko kuanëts nëjkxët. Per tats nˈojtsy, ets diˈibëts niˈigyë mëjˈixy njäˈäwë, yëˈë ko ja ënäˈkuˈunk nëgooyë tnijäˈäwëndë Biiblyë. Ets ëjts, kyajtsë nety ti nëgoo nnijawë oyëtsë nety të njayoˈoy domingë domingë mä ja templë mëdëtsë ndääk. Tats njënany kots niˈigyë nˈaknijawëyaˈany etsëts ngupëjky parëts pën xyyaˈëxpëkët. Diˈibëts tim jawyiin nnijäˈäwë, yëˈë ko Dios diˈib tukëˈëyë mëjääw myëdäjtypy, txëwˈaty Jyobaa. Tamë netyë tiempë nyëjkxnë mätsë ndääk nyajtëëy pënën Jyobaa tyestiigëty, ets duˈunëts xyˈatsooy: “Aa, yëˈë yˈawdäjttëp tuˈugë mëjjäˈäy yetyëjk diˈib xyëwˈäjtypy Jyobaa”. Per kots nnijäˈäwë pënën Jyobaa, tats njäˈäwë extëmëts pën xywyimbaˈanduˈuty.

Pojënëts nwimbejty, pes tëtsë nety nbääty ja tëyˈäjtën. Jats nnëbejty marsë 1957, jeˈeyë nety të nyaxy taxtujk poˈo mäts ogäˈän nˈojtsy reunyonk. Tëtsë nety ja njot nwinmäˈäny tyëgatsy, ets jantsy jotkujkëts nnayjyäˈäwë kots nnijäˈäwë mä Biiblyë wiˈix jyaˈayˈaty tuˈugë jäˈäy diˈib jantsy yetyëjk. Extëmë Jesus, wäˈäts jäˈäy ijty, kumëjääw, ets jantsy mëk extëm nipën duˈun, per ninäˈä ojts kyatsiptuny, niˈigyë tnasˈijxë parë “yajtëytyunët” extëmë  nety të yajnaskäjpxë (Is. 53:2, 7). Njäjtëts ko pënaty jyantsy pyanëjkxtëbë Jesus, “niˈigyë yˈoyjyaˈayˈatët oypyënëty mëët” (2 Tim. 2:24).

Jats nduuntsondaky prekursoor mä jëmëjt 1958. Per ko waanë yˈijty, tats nmastuty tuk tiempë mët ko pëkäämbëtsë nety. Yëˈëts nbëjkë Gloria, niduˈuk ja kiixy diˈibëts ojts xywyoy reunyonk. Ninäˈäts ngajënäˈäny tikots Gloria yëˈë ojts nˈokpëjkpë, mëjwiin kajaats nyajtsobääty extëm oorë axtë tyambäät. Niˈigyëts nyajtsobääty ets kyaj dyuˈunëty tuˈugë diamante diˈib jantsy tsooxë, ets jantsy jotkujkëts nnayjawëty kots yëˈë mëët nbëjky. Per waˈanë netë Gloria tˈoknimaytyaˈaky waanë jyukyˈäjtën:

“Jats ndukkaˈaxˈattë 17, ja ndäägëts Testiigë ijty, ets ja yˈoˈky kotsë netyë njëmëjt 14. Ko duˈun jyajty, tats ja ndeety tyëjkë ëxpëjkpë. Kom tëëtsë nety ja ndääk yˈoˈknë, tats ja ndeety tmëtmaytyaky ja direktoor mätsë nˈeskuelë ets dyajtëëy pën mbäädëts ja ntsëˈë, diˈibë nety yajkäˈpxanëbë sekundaaryë, nyijkxy tuk xëëw eskuelë ets tuk xëëw ëjts. Duˈuntsoo ja diˈib wëˈëmp, tkuentˈatëdë yˈutsyˈënäˈk ets dyaˈoyëdë kaaky tojkx kots ja ndeety jyäˈtët tuumbë. Ja direktoor kyupëjk, ets duˈunëts nˈeskuelëˈäjttë axtë kots ja ntsëˈë dyajkejxyë sekundaaryë. Majtskëtsë familyë xytyukniˈˈijxëdë Biiblyë, ets nimäjkëtsë nmëgaˈax jyäjttë Testiigë. Jantsy käjpxwäˈkxäämbëts ijty oyëts nwintsoytyuˈunëty. Perë Sam yëˈëts diˈib xypyudëjkëp nuˈun kujkë tiempë nyaxy”.

Jats nbëjky mëdë Gloria febreerë 1959. Agujk jotkujkëtsë nety ndundë prekursoor. Ets julië poˈo mä tadë jëmëjt, tats nyajtëëwdë pën mbäädëts nëjkxtë Betel, pes jantsy tunandëbëtsë nety jam. Ja nmëguˈukˈäjtëm diˈibëts xymyëtmaytyaktë yëˈë Simon Kraker. Xyˈanmääytyëts ko mä tadë tiempë kyaj nety yajkupëkyë kasäädë jäˈäy. Duˈunyëmëts ntsojkënyëˈäjttë ndunäˈändë Betel, per jekyë tiempë nyajxy parëts ojts nyajwowdë.

Tats ngajxtë tuˈugë neky Betel parëts nyajtëëwdë mäts mbäät nëjkxtë tuumbë. Jeˈeyëts nyaˈˈawäˈänëdë tuˈugë lugäär: Pine Bluff, Arkansas. Majtskë nety jap ja tuˈukmujkën, tuˈuk parë nmëguˈukˈäjtëm diˈib yëk, ets ja tuˈuk parë weerë. Japëts nyajkajxtë mä tyuˈukmuktë nmëguˈukˈäjtëm diˈib yëk, mä nety jeˈeyë jyapˈaty 14 käjpxwäˈkxpë.

Waˈan mnayajtëwëdë tiko nety ja nmëguˈukˈäjtëm abëkyaty tyuˈukmuktë diˈib weerë ets ja diˈib yëk. Wenë, mä tadë tiempë kyaj nety mbäät ti nyekyyajtuny jaˈko yajkubojkypyë ja ley ko jäˈäy tyuˈukmuktë diˈib tëgatsyatyë kyoloor, ets mbäädë nety axëëk jyat kyëbattë. Mä kanäägë it lugäär, tsëˈk jäˈäwëdëbë nety ja nmëguˈukˈäjtëm ko ja jäˈäy dyajwindëgoytyëdë jëën tëjk mä të tyuˈukmuktë yëkpë etsë weerëbë, pes të nety wiinktsoo duˈun yˈoktuun yˈokjäjtëbë. Ja polisiyëty nan mbäädë nety tmatstë ja nmëguˈukˈäjtëm diˈib yëk ets ttundë axëëk ko kyäjpxwäˈkxtët mä tsyëënëdë jäˈäy diˈib weerë. Pääty, parëts mbäät ngäjpxwäˈkxtë, yëˈëtsë nety nmëmëdoowdëp ja ley mientrës yˈoyë ja jotmay.

Nbattëbëts ijtyë jotmay mäts ngäjpxwäˈkxtë. Pes kots nëjkxtë mä tsyëënëdë jäˈäy diˈib yëk, ta näˈäty pyëtsëmy ja jäˈäy diˈib weerë. Tats ijty netyë nwinmaytyë tits ndundëp, nmëtmaytyäˈäktëbëts waanë o nˈamdowdëbëts ja maˈkxën ets njëmbittëdëts. Duˈun ijty ja jotmay mä tadë tiempë.

Mëkëts ijty ndundë parëts nnayˈixëdë. Ets mäjatyëts nmëdundë, jantsy waanëts ijty nyajmëjuytyë mä tuˈukpë xëëw. Gloria, yëˈë ijty yajwatsëbë jäˈäyë jyëën tyëjk. Mä tuˈugë tëjk, kyupëjk ja jäˈäy parëts nëjkx nbudëkë etsëts tukkujkxyëëw nyajkëxtët ja tuunk. Ets kots ntsoˈonëdë, tats jawyiin xyyajkaytyë. Sëmään sëmään ijtyë Gloria tnitsayë tuˈugë familyë ets ëjts nyajwatsëts ja pyëjy yˈujts, ja byentanë ets nˈaktunyëts tiigatiity. Mä tuˈugë tëjk yëˈë nety jam tsënääytyëp tuˈugë familyë diˈib weerë, jamëts nduundë, Gloria dyajwäˈätsy ja bentanë tëgotytsyoow ets ëjts tëjäˈptsoow. Kom xëëbäätyëts ndundë, jamëts ijty ja jäˈäy xyyajkaytyë. Gloria jap ijty ja jäˈäy abëky yajkayëty tëgoty, ets ëjts japëts ngay mä karrë yˈity. Per kyajts nguentëty nëgokë ja tojkx jyantsy xyuˈkxëty. Ja familyë jantsy oyjyaˈay ijty, jeˈeyë ko të nety nyinaxëdë extëmë naxwinyëdë jäˈäy jyaˈayˈattë. Njamyejtsypyëts tëgok, kotsë nety nyajtëkëdë gasolinë, tats ja jäˈäy nyajtëëy pën mbäädë Gloria nyaxy banyë. Tats jantsy awäˈän xyˈatsooy: “¡Aduky jap!”.

Per nan ojtsëts agujk jotkujk nyajnaxtë tiempë mëdë nmëguˈukˈäjtëm. ¡Ets njantsy tsyojkënyëˈäjttëbëts ijty ngäjpxwäˈkxäˈändë! Kots ndimjäjttë Pine Bluff, jamëts njäjtaktë mä ja nmëguˈukˈäjtëm diˈib tuump mëjjäˈäy, diˈib ijty yajtijp siervo de congregación. Ja kyudëjk kyaj nety Tyestiigëty, per ta mëdë Gloria tˈëxpëjktsondakyë Biiblyë. Mä tadë tiempë, tats nyaˈëxpëjktsondaky ja nyëëx mëdë myëmëjjäˈäy. Tyäˈädë kiixy mët ja tyääk, ta tpëjtaktë wyinmäˈäny tmëdunäˈändë Jyobaa ets ta nyëbajttë.

Nan nmëdäjttëbëtsë nety ja nmëtnaymyaayëbëty diˈib weerë. Xywyoowdëbëts ijty aˈuxˈäjtpë, per kootsëts ijty nëjkxtë parëts kyaj pën xyˈixtët. Mä tadë tiempë, mëkë nety tyunyë organisasion diˈib xyëwˈäjtypy Ku Klux Klan, diˈib yajmëjwindëjkëp etsë jäˈäy nyayˈaxëkˈixëdët diˈib wiink rasë ets nyaynyibëdëˈëgëdët. Njamyejtsypyëts tëgok, wiˈix tuˈugë yetyëjk yˈuˈunyë tyëjkwiiny, të nyayxyoxyëty poop ets të nyaywyinjiitsyëty extëm nyayxyoxëdë Ku Klux Klan. Per ja nmëguˈukˈäjtëm duˈunyëmë nety dyaˈixëdë ja yˈoyjyot yˈoywyinmäˈäny. Tëgok, kyajtsë nety ti nmeenyëty ets asambleeˈäjtpëts nëjkxäˈändë, tats ndukmëdoˈktë ngarrë tuˈugë nmëguˈukˈäjtëm. Kyumduk poˈo, jantsy anuˈkxëbëtsë nety njäˈttë mäts ojts të ngäjpxwäˈkxtë ets të nyaˈëxpëktëtsë jäˈäy, ¡kots nˈijxpattë ja ngarrë të yajnaswiidë tëjkwinm! Tamë net të yajpëjtaˈaky tuˈugë neky diˈib jënäämp: “Tyäts nyajjëmbity ja mgarrë, namooytyëp. Yëˈë mëguˈuk...”.

Ojtsëts jatëgok xyyajmonyˈix xyyajmonyjyawëdë wiˈix ja nmëguˈukˈäjtëm yˈoyjyaˈayˈattë. Mä jëmëjt 1962, nyajwooyëts mä Eskuelë parë mëjjäˈäytyëjk jap South Lansing, Nueva York. Tuk poˈo nety jyakäˈäny mä yˈëxpëkäˈändë pënaty tuundëp sirkuitë, distritë ets pënaty yajnëjkxtëbë jëjpˈamˈäjtën mäjatyë tuˈukmujkën. Per kots nyajwooy, kyajtsë nety ti nduunk ets ni nmeenyëts. Tëtsë nety ojts nnayˈawanëty parëts ndunäˈäny mä tuˈugë kompaniyë diˈib mä telefënë. Ets pën yajkupëjkpëts, ëjtsë nety ja tim jawyiimbë yëkjäˈäy diˈib jap tunäämp. Ok, tats nyaˈˈanmääy ko mbäädëts jam nduny, tatsë net nwinmääy tits nˈoktunëp. Kyajtsë nety ti nmeeny parëts nnëjkxët Nueva York. Tats nwinmääy ko oyëts ja tuunk ngupëkët ets kyajts nnëjkxët mä ja eskuelë. Tamëtsë nety ndimjäˈäyanë tuˈugë neky mäts nnigäjpxäˈäny ko kyajts nnëjkxäˈäny, ko tyuun jyäjtë diˈibëts ninäˈä ngajäˈäytyëgoyët.

Mä tuˈugë jopy, myiiny mätsë ndëjk tuˈugë nmëguˈukˈäjtëm diˈibë myëmëjjäˈäy kyaj Tyestiigëty, tats xymyooy tuk soobrë meeny. Jantsy tsojk tsojkë nety të pyëdëˈëky mët ja yˈuˈunk yˈënäˈk parë tniduundë tyäˈädë meeny mä tkuyuˈudë pixyny. Ets wyinmääytyë ko mëdë tyäˈädë meeny mbäädëts nëjkxy Nueva York. Yëˈë xyˈanmääyëts: “Nëjkx mä tadë eskuelë ets xyjantsy jatët tijaty, ets ko mjëmbitët, tats xytyukniˈˈixëdët tijaty ojts të xyjaty”. Kom të nety ja jäˈäy tkupëky etsëts ndunët mä ja kompaniyë diˈib mä telefënë, tats nyajtëëy pën mbäädëts jaanëm nduundëkë kyum mëgoxk sëmään,  per tats xyˈatsoowdë ko kyaj mbäät. Kyajts wiˈix nnayjyäˈäwë mët ko tëtsë nety nwinˈixy tits ndunaampy. Ets jantsy jotkujkëts nnayjyawëty kots kyaj ojts ngupëkyë tadë tuunk.

Tyamë netë Gloria tnimaytyäˈägäˈäny tijaty jyamyejtsypy jap Pine Bluff: “Njantsy yˈoyˈijxëts ja territooryë. Jatsë nety jäˈäy nyaˈëxpëky naa 15 o 20. Jopy jopyëts ijty nëjkxtë käjpxwäˈkxpë tëjkmdëjkm, ets nuˈun ja xëëw yˈaknaxy yëˈëtsë jäˈäy nyaˈëxpëjktëp. Näˈäty, jats ijty nyajkëxtë axtë a las 11. ¡Jantsy jotkujkëts ijty nnayjyawëdë kots ngäjpxwäˈkxtë! Ets tim tëyˈäjtën ko kyajts njamastuˈudanyë tyäˈädë nˈasignasyonk kots nyaˈˈanmääytyë ndundët sirkuitë. Per tëgatsyë nety diˈibë Jyobaa tyukniwinmäˈäyëp”. ¡Ets jantsy duˈunë duˈun!

Kotsë nety ndundë prekursoor jap Pine Bluff, tats nˈamdoowdë ndunäˈändë prekursoor espesial. Ijttëbëtsë nety seguurë ko mbäädëts duˈun nduundë, mët ko ja distritë jamëtsë nety xykyaxäˈändë Texas extëmë prekursoor espesial. Jantsy tunandëbëtsë nety duˈun. Tats jeky nˈawijxtë aber näˈäjëts nˈokˈyaˈˈatsoowëmbittë, per kyajts ti neky xynyijäjttë. Oknëmëts tuˈugë neky xynyijäjttë, eneerë 1965. ¡Sirkuitëtsë nety nyajkaxtë! Nan jaa yaˈˈanmääyë Leon Weaver parë tyunët sirkuitë, diˈib tyam tijaty tyukniwijtsëp mä Komitee diˈib mä Sukursal, jap Estados Unidos.

Tsëˈkëts kots nwinmääy ndunäˈäny sirkuitë. Të nety tyukjëmëjtëp tˈixy wiˈixëts nduny tuˈugë sirkuitë diˈib xyëwˈäjtypy James Thompson. Ets yëˈë ojtsëts xyˈanëëmë mäjatyëts mbäät nnayaˈoyëty ets wiˈix mbäät jyaˈayˈaty tuˈugë oybyë sirkuitë. Kotsë nety waanënëm nduny sirkuitë, tats nbëjkyë kuentë ko kajaadëmtsë nety xypyudëkëyaˈany ja kyäjpxwijën. James yëˈëts tim ogäˈän xykyuˈijxëdë kotsë nety nduunëdë sirkuitë ets yëˈë distritë. Mëjwiin kajaats tijaty xytyukniˈˈijxë tyäˈädë nmëguˈukˈäjtëm.

Mä tadë tiempë, kyaj nety nëgoo tijaty yajtukniˈˈixëdë pënaty tuundëp sirkuitë. Tëgok, tuk sëmäänëts ojts nˈixy nduny wiˈix tuˈugë sirkuitë tkuˈixë ja tuˈukmujkën, ets ja tuksëmään, tatsë net yëˈë ojts xyˈixy xytyuny ets xymyooyëts tuˈuk majtskë käjpxwijën. Ok, tats yëˈëyë mëdë Gloria ojts nwëˈëmnëdë. Njamyejtsypyëts kots nˈanmääy: “¿Ti xyjantsy nyikakëmë?”. Ko nyajxyë tiempë, tats nbëjkyë kuentë ko xëmë jyaˈˈatäˈänyë nmëguˈukˈäjtëm diˈib xypyudëkëyäˈänëm, per net pën nnayäjkëm. Tyambäädëts njamyetsy wiˈixëts nääk xypyudëjkëdë, extëmë James Brown, diˈibë nety tuump sirkuitë etsë Fred Rusk diˈibë nety tuump Betel.

 Mä tadë tiempë, të nety yˈamëktaˈaky ja jotmay mä jäˈäy nyayˈaxëkˈixëdë diˈib yëk ets diˈib weerë. Tëgok, jamëtsë nety nguˈixëdë nmëguˈukˈäjtëm Tennessee, ko ja organisasion Ku Klux Klan myartsyë tuundë. Jatëgok, käjpxwäˈkxpëtsë nety të nˈotstë mët tuk grupë nmëguˈukˈäjtëm kots näjxtë kaabyë mä kaakytyoˈk tojkxtoˈkpë. Ets kots näjxy banyë, tats xypyamiiny tuˈugë jäˈäy diˈib tëgatsy këxëˈkp ets nitsäˈäy kutsäˈäy. Per tats xypyatsoˈony tuˈugë nmëguˈukˈäjtëm diˈib weerë, mas mëj ets mëk këdiinëm ja jäˈäy. Tats xyyajtëëy: “¿Ja ti jotmay mëguˈuk Herd?”. Ta ja yetyëjk ojts pojënë pyëtsëmy ets ni jeˈeyë kyanekytyëjkë banyë. Nuˈun kujkë tiempë nyaxy, tëts nnijawë tiko jäˈäy tˈaxëkˈixyë myëguˈuk diˈib wiink koloor, yëˈko të xynyinäjxëm ja poky kaytyey diˈibë Adán ojts xytyukmëwëˈëmëm. Nan tëts njaty ko oy wyiˈixëtyë kyoloor tuˈugë nmëguˈukˈäjtëm, nmëguˈukˈäjtëmë duˈun ets kyëyakëbë jyukyˈäjtënë ëtsäjtëmgyëjxm.

Jats nduundë sirkuitë 12 jëmëjt ets 21 jëmëjt distritë. Nuˈunëts duˈun nduundë, mëjwiin kajaatsë kunuˈkxën ojts nˈaxäjëdë, nmëdäjttëtsë oyatypyë eksperiensyë ets agujk jotkujkëts nyajnäjxtë. Per tamëtsë nety ja tuˈugë kunuˈkxënë nˈaxäjëyäˈändë. Agostë poˈo mä 1997, tyuun jyäjtë diˈibëtsë nety jeky të nˈawixtë. ¡Nyajwoowdëts Betel diˈib Estados Unidos! Tats kyumduk poˈo nduundëjkëdë Betel, ja nety të nyaxy 38 jëmëjt mäts tim jawyiin nˈamdoowdë jam ndunäˈändë. Duˈunëts nwinmääy ko jeˈeyëtsë ndijy tuk tiempë ja nmëguˈukˈäjtëm dyajtëgoyˈattë naybyudëkë, per kyajtëmë nety dyuˈunëty.

Jamëts ogäˈän nduuny mä Departamento de Servicio. Mëjwiin kajaats tijaty njäjty, pes yëˈë yaˈˈatsoowëmbijtp tijaty ja mëjjäˈäytyëjk yajtëëwdëp o ja sirkuitëty diˈib tuundëp mä ja paˈis, näˈäty jantsy tsip ets yëˈë jotmayë mëjwiin kajaabë. Mëjwiin kajaats nmëjjawë kots xypyudëjkëdë ets kots xytyukniˈˈijxëdë maˈkxtujkëny myëët. Koxyëbëts tyam jatëgok nˈokˈyajkexy mä tyäˈädë departamentë, ëxˈäjpëts jatëgok ntsondäˈägäˈäny.

Mëdë Gloria, njantsy yˈoyjyäˈäwëdëbëtsë jukyˈäjtënë Betel. Xëmëts nbëdëˈëktë monyëm, ets oy ko duˈun nbëdëˈkëm pën Betel nduˈunëm. Ko nyajxy naa tuk jëmëjtën, tats nduundëjkë mëdë Komitee diˈib yˈijxypy wiˈix ngäjpxwäˈkxëm, diˈib pyudëjkëbë Diˈib Wyoowˈyoˈoytyë Jyobaa tyestiigëty, ets 1999, tats nyajtuunkmooy parëts ndunët mä Diˈib Wyoowˈyoˈoytyë Jyobaa tyestiigëty. Diˈibëts të xytyukniˈˈixë tyäˈädë tuunk, yëˈë ko Jesukristë tyuˈumoobyë Diosë kyäjpn, ets kyaj yëˈëjëty tuˈugë jäˈäy.

Kots njamyetsy wiˈixëts të njukyˈaty, duˈunëts nnayjyawëty extëm ja kugajpxy Amós. Jyobaa ojts twinˈixyë tyäˈädë borreegë kuentˈäjtpë diˈibë nety përoobë myëtuunkˈäjtypyë iigë kuumk, diˈib jyëˈxtëbë ayoobë jäˈäy. Perë Dios tyuunkmooyë kugajpxy ets ojts tˈaxäjë mëjwiin kajaa kunuˈkxën (Amós 7:14, 15). Nanduˈunëtsë Jyobaa xynyiˈˈijxkëdaky, tuˈugë ayoobë jäˈäy yˈuˈunk diˈib kamduump jap Liberty, të xykyunuˈkxyëts mëjwiin kajaa ets tsipëts nasmaytsyoˈowëtyaˈayët (Prov. 10:22). Oyëts nmaxuˈunkˈäjty ayoobë jäˈäy, tëts nmëkjäˈäytyaˈaky Dios windum extëmëts ninäˈä duˈun ngawinmääy.