TSIP tyam njukyˈäjtëm agujk jotkujk mët ko oymyääjëty jyaˈˈatyë amay jotmay. Ets oy näˈäty njajotkujkˈäjtëm, kyaj jyekyë tyäˈädë jotkujkˈäjtën. ¿Ti käjpxwijënë mbäät xypyudëjkëm diˈibë Biiblyë yajkypy parë nmëdäjtëm ja jaantsypyë jotkujkˈäjtën ets kyaj nyajtëgoˈoyëm? ¿Ets wiˈix mbäät nbudëjkëmë wiink jäˈäy parë nanduˈun yˈittët jotkujk?

Parë nmëdäjtëm ja jaantsypyë jotkujkˈäjtën, jëjpˈam nnayjyäˈäwëm seguurë ets oy. Nan jëjpˈam ets nmëdäjtëmë oybyë mëtnaymyaayëbë. Per diˈib mas jëjpˈam, yëˈë ets naymyaˈaybyëjkëm yajxon mëdë Jyobaa parë xëmë nyajpatëm jotkujk. Min nˈokˈijxëm ti mbäät nduˈunëm.

Ko nmëmëdoˈowëmë Jyobaa yˈanaˈamën etsë kyäjpxwijën, ta nyajnigëxëˈkëm ko yëˈë ndukjotkujkˈäjtëm ets ko oy mëët nˈitäˈänëm (Jer. 17:7, 8; Sant. 2:22, 23). Ta Jyobaa xymyëwingoˈonëm, xykyunuˈkxëm ets xymyoˈoyëm ja jotkujkˈäjtën. Biiblyë jyënaˈany: “Ja oypyë ja näynyipayeˈeyën nëjkxëp tyajjääˈaty ja jotkujkˈajtën, xeemyajtën ets oyajtën xëmëkyëjxmëpë” (Is. 32:17, TY). Duˈunë duˈun, pën nmëmëdoˈowëmë Jyobaa amumduˈukjot, nëjkxëm nnayjyäˈäwëm agujk jotkujk (Is. 48:18, 19).

Parë jyakëdë tyäˈädë jotkujkˈäjtën, ta ja tuk pëkyë naybyudëkë diˈibë Jyobaa xymyoˈoyëm: ja espiritë santë (Apos. 9:31).

Ko Pablo ojts tnasmaytsyowë ja “tëëmp diˈib yajkypyë Diosë myëjääw”, diˈib myëdëgëk pëky ojts tnigajpxy yëˈë ja “jotkujkˈäjtën” (Gál. 5:22, 23, TNM). Pääty pën nbäädäˈänëm ja jaantsypyë jotkujkˈäjtën, tsojkëp nasˈijxëm ets ja espiritë santë tyunët mä ëtsäjtëm. Min nˈokˈijxëm majtsk pëky ti mbäät nduˈunëm parë xypyudëjkëm.

Myëduˈuk, tsojkëp nmëdäjtëm ja kostumbrë ets ngäjpxëmë Diosë yˈAyuk (Sal. 1:2, 3).  Ko nbawinmäˈäyëm tijatyë Biiblyë myaytyakypy, ta ja espiritë santë xypyudëjkëm ets njaygyujkëm wiˈix tijatyë Jyobaa tˈixy. Extëm nˈokpëjtakëm, mbäät nnijäˈäwëm ti tyuumbyë Jyobaa parë dyajjaˈˈatyë jotkujkˈäjtën ets tiko jëjpˈam tpëjtaˈaky. Pääty ko nbaduˈunëm tijaty njäjtëm mä yˈAyuk, ta nˈijtëm mas jotkujk (Prov. 3:1, 2).

Myëmajtsk, tsojkëp nmënuˈkxtakëmë Jyobaa parë xymyoˈoyëm ja yˈespiritë santë (Luk. 11:13). Jyobaa tyukwandakypy ko pënaty amdoowëbë naybyudëkë myoˈoyaampy ja “yˈagujkˈäjt jyotkujkˈäjtën, diˈibë waanë niˈigë myëjëty këdiinëm diˈibë jäˈäy mbäät tjaygyukë. Esë tyäˈädë agujkˈäjt jotkujkˈäjtën kyuwäˈänëp ja [jot winmäˈäny] tiˈigyë mët ja Jesukristë” (Filip. 4:6, 7). Pën nˈamdoˈowëmë Jyobaa janääm jatsojk ets xymyoˈoyëmë myëjääw, ta mëjwiin kajaa xymyoˈoyäˈänëm ja jotkujkˈäjtën diˈib myoopy yëˈëyë ja myëtnaymyaayëbëty (Rom. 15:13).

Biiblyë të nimayë jäˈäy dyajtëgäjtsë jyukyˈäjtën parë këˈëm nyayjyawëdët jotkujk, yˈittët oy mëdë Jyobaa ets mëdë myëguˈuktëjk. Min nˈokˈijxëm majtskë ijxpajtën.

Mä Diosë kyäjpn taaˈäjtpë jäˈäy diˈib ijty jantsy pojënë jotˈambëjkp, per të jyukyˈäjtënë dyajtëgatstë, maˈkxtujktëp, yuunk naxypy yajpäättë ets ajiiky amëguˈugëty * (Prov. 29:22). Min nˈokˈijxëm nimajtskë nmëguˈukˈäjtëmë yˈijxpajtën, diˈib yˈaxäjëdë naybyudëkë parë dyaˈoˈoyëdë jyaˈayˈäjtën ets nan jyäjttë wiˈix oy nyaymyënëjkxëdët mëdë wiinkpë.

David, awäˈänë nety jyaˈayˈaty ets pääty kyaj yˈoyëty ja yˈääw yˈayuk. Mä kyanëbetynyëm, jeˈeyë ijty tˈëbääty tkäjpxpäätyë jäˈäy ets dyajtëgoyë mayˈäjt wintsëˈkën mä fyamilyë. Tëgok, ta tpëjkyë kuentë ko tsojkëp nyayajtëgatsëdët. ¿Ti pudëjkë parë kyaj tsyipjäˈäyˈatët? Yëˈë jyënaˈany: “Yëˈëts nbaduuntsondakë Biiblyë kyäjpxwijën. Ets kots duˈun nduuny, tats niˈigyë nnaywyingutsëˈkëdë mëdëtsë nfamilyë”.

Rachel, duˈunë nety jyaˈayˈaty extëm ja fyamilyë yajˈyaˈk yajpajtë. Yëˈë jyënaˈany: “Tyambäät nduumbyëtsë mëjääw parëts kyaj nˈawäˈändäˈägët,  pes nˈyeˈky nbejtyëts mä tuˈugë familyë diˈib xënaxy tsiptuundëp”. ¿Ti të ttuny parë kyaj tsyipjäˈäyˈatët? Yëˈë jyënaˈany: “Xëmëtsë Jyobaa nyaybyudëkë nˈamdoy”.

Yˈijxpajtënë David mëdë Rachel, yëˈë xytyukˈijxëm ko pën nbaduˈunëmë Biiblyë kyäjpxwijën ets pën nˈamdoˈowëmë Jyobaa myëjääw, oy wyimbëtsëmy. Ets oy tyam njukyˈäjtëm mä jyaˈˈatyë axëkjäˈäytyëjk, mbäät nnayjyäˈäwëm agujk jotkujk ets nyajjaˈäjtëmë tuˈugyëˈäjtën mä familyë ets mä nduˈukmujkëm. Jyobaa xyˈanmäˈäyëm ets nˈijtëm “tiˈigyë mët nidëgekyë jäˈäyëty” (Rom. 12:18). ¿Wiˈix mbäät duˈun nˈijtëm? ¿Ets wiˈix ndukˈoyˈatäˈänëm ko nduˈunëmë mëjääw parë nyajjaˈäjtëmë jotkujkˈäjtën?

Ko ngäjpxwäˈkxëm, ta jäˈäy ndukˈawäˈänëm mä yajnimaytyaˈaky ja Diosë yˈAnaˈam Kyutujkën (Is. 9:6, 7; Mat. 24:14). Ets jotkujk xyyajnayjyäˈäwëm ko nimay tkupëktë tyäˈädë jotkujkˈäjtën. Duˈuntsoo dyaˈixëdë maˈkxtujkën ets kyaj nyekyjyotˈambëktë oy ti tˈixtë tyuny jyatyëty. Pes yˈawijx jyëjpˈijxtëp ja kunuˈkxën ets myëmëdowdëbë tyäˈädë käjpxwijën: “Ixtaˈa akujkajtën jotkujkˈajtën ets yëˈë panëjkx” (Sal. 34:14, TY).

Kyaj niˈamukë jäˈäy tkupëkyë Diosë yˈayuk ko tim ogäˈän nmëtmaytyakëm (Fwank 3:19). Perë espiritë santë, yëˈë xypyudëjkëm parë nmëtmaytyakëm wintsëˈkën myëët ets yuunk naxypy. Ko duˈun nduˈunëm, yëˈë nety nbanëjkxëm extëm Jesus ojts tniˈanaˈamë ngäjpxwäˈkxëm: “Ko mdëkëdët tëgoty, käjpxpoˈkxtë ja jäˈäy. Ets pën ja tëjk nitëjkëp, waˈan ja jotkujkˈäjtën jam twëˈëmy diˈib miitsëty mdukmëtsojktëp; per pën kyaj nyitëkëty, ta ja jotkujkˈäjtënë xymyëjëmbittët” (Mat. 10:11-13, TNM). Ko nbaduˈunëm extëmë Jesus jyënany, yëˈë xypyudëjkëm ets ntsoˈonëm mä ja jäˈäyë tyëjk agujk jotkujk, ets waˈan ok, ko ja tiempë nyaxët nëjkx nbudëjkëm.

Dios mëduumbëty nan yˈëxtääytyëbë jotkujkˈäjtën ko mëdë mayˈäjt wintsëˈkën tmëtmaytyäˈäktë gobiernë tyuumbë, axtë diˈib myëtsipˈäjttëbë Diosë kyäjpn. Min nˈokˈijxëm tuˈugë ijxpajtën. Mä tuˈugë paˈis diˈib África, ja gobiernë tëgatsyë nety tˈixyë Diosë kyäjpn ets kyaj nety dyakäˈänyë permisë parë yajkojëdë Tëjk mä nˈëxpëjkëm. Parë yˈoyëdë tyäˈädë jotmay, ta yajkexy tuˈugë nmëguˈukˈäjtëm diˈibë nety të tyuny misioneerë jap África, ets nëjkx tmëtmaytyaˈaky tsuj yajxon ja gobiernë tyuumbë, diˈibë nety kyudënaapy ja pyaˈis jap Londres (Inglaterra). ¿Ti tuun jäjtë?

Tyäˈädë nmëguˈukˈäjtëm tnimaytyaˈaky: “Kots jap njäjty, tats nˈijxy ko ja toxytyëjk diˈibë jäˈäy yˈagëˈë yˈaxäjëp, duˈunë nety të nyayxyoxyëty extëm pënaty kyäjpxtëp tuˈugë ayuk diˈibëtsë nety të njaty. Tats ojts ngäjpxpoˈkxy extëm nyaygyäjpxpoˈkxëdë. Mëjˈixy tjäˈäwë, tats xyyajtëëy titsë nety jam të ninëjkxy. Tats nˈanmääy mëdë mayˈäjt wintsëˈkën ko yëˈëtsë nety njamëtmaytyäˈägaampy ja gobiernë tyuumbë. Ta ojts tmëgajpxy mä telefënë, ets ko ja yetyëjk pyëtsëëmy, tats ojts xykyäjpxpoˈkxy mä yˈayuk. Tsuj yajxon tmëdoowˈijty kots ndukmëtmaytyaky tijaty tyuundëbë Jyobaa tyestiigëty”.

Ko tyäˈädë nmëguˈukˈäjtëm ojts tmëtmaytyaˈaky ja yetyëjk mëdë mayˈäjt wintsëˈkën, ta kyaj nëgoo tëgatsy nyekywyinmääy mä Testiigëty. Ets ko ja tiempë nyajxy, ta ja gobiernë ogäˈän dyajkyë permisë parë yajkojëdë Tëjk mä nˈëxpëjkëm. ¡Jyantsy tyukxondaktë ja nmëguˈukˈäjtëm! Extëm nˈijxëm, ko nyajnigëxëˈkëmë mayˈäjt wintsëˈkën oy wyimbëtsëmy ets yajmiimbyë jotkujkˈäjtën.

Tyamë Dios kyäjpn myëdäjtypyë tuˈugyëˈäjtën etsë jotkujkˈäjtën. Ets mbäät nyajmëjwindëjkëm pën nyaˈijxëm ja oybyë jäˈäyˈäjtën diˈib yajkypyë Diosë myëjääw. Per diˈib mas jëjpˈam, yëˈë ko nëjkxëbë Jyobaa xykyunuˈkxëm ets nëjkxëp mëjwiin kajaa xymyoˈoyëm ja jotkujkˈäjtën mä ja jembyë jukyˈäjtën diˈib itäämp winë xëëw (2 Peed. 3:13, 14).