JESUS ojts tnaskäjpxë ko ja yˈëxpëjkpëty dyajmukäˈändë ja pëjtaˈaky mëjwiin kajaa mä kyaminyëm ja kutëgoˈoyën (Mat. 9:37; 24:14). Ets tap tyam yˈadëy Transcarpatia, (Ucrania). Mä jeˈeyë tëgëëgë käjpn, jyapˈaty 50 tuˈukmujkën ets naxy 5,400 käjpxwäˈkxpë. * Ko yajwijtspëtsëmy ninäägë jäˈäy tsyëënëdë mä tyäˈädë tëgëëkpë käjpn, ta yaˈixy ko mä nimäjtaxkpë jäˈäy, niduˈuk Testiigë.

¿Wiˈixë jäˈäy tˈaxäjëdë Diosë yˈayuk mä tyäˈädë lugäär? Tuˈugë nmëguˈukˈäjtëm diˈib xyëwˈäjtypy Vasile, jyënaˈany: “Yä jäˈäy myëjˈijxtëbë Biiblyë. Tyuundëp tijaty tëyˈäjtën myëët. Tuˈugyë mëdë fyamilyë nyayaˈitëdë ets tyuundëbë mëjääw parë xim yam nyaybyudëkëdë”. Vasile yˈakjënäˈäny: “Näˈäty, kyaj kupëktë tijaty nmëbëjkëm, per myëdoowˈijttëp ko ndukwingugäjpxëm tuˈugë tekstë”.

Per kom jantsy nimayë nmëguˈukˈäjtëm diˈib käjpxwäˈkxtëp, ta twinguwäˈägëdë jotmay diˈib kyaj nëgoo pën tpääty. Extëm nˈokpëjtakëm, mä tuˈugë tuˈukmujkën ja jyapˈaty 134 käjpxwäˈkxpë ets jeˈeyë pyäädëdë 50 tëjk mä kyäjpxwäˈkxtët. ¿Ti tyuundëp ko tpäättë duˈumbë jotmay?

Nimayë nmëguˈukˈäjtëm pyëjtaktëbë wyinmäˈäny parë nyëjkxtë käjpxwäˈkxpë mä tyëgoyˈatyë naybyudëkë. Ionash, tuˈugë nmëguˈukˈäjtëm diˈib 90 jyëmëjt, jyënaˈany: “Mäts nduˈukmuky, tuˈukpë nmëguˈukˈäjtëm ja jeˈeyë tyukäˈäyëty kyäjpxwäˈkxët majtsk tëjk. Tyam yääts ngäjpxwaˈkxy käjpnoty, per mätsë netyë nbäˈäm kyamëjtaˈakynyëm, nëjkxpëts ijty mä territooryë diˈib kyaj pën të yajtuknipëky, diˈib jagam 160 kilometrë ets ngäjpxwaˈkxyëts húngaro”. Pënaty nëjkxtëp käjpxwäˈkxpë mä tyäˈädë it lugäär, mëk dyajnimëjääwdäˈäktë. Ionash jyënaˈany: “A las 4 ijty nbëdëˈëky parëts ja tren nduktëkë, ets axtë a las 6 päädëts ngäjpxwaˈkxy, pes jaa mä tadë oorë jyëmbijnë ja tren. Duˈunëts ijty nduny majtskˈok o tëgëkˈok mä tuˈukpë sëmään”. ¿Wiˈixë tyäˈädë nmëguˈukˈäjtëm nyayjyawëty ko duˈun tpëjtaky ja jyot myëjääw? Yëˈë jyënaˈany: “Kots ijty duˈun ngäjpxwaˈkxy agujk jotkujkëts xyyajnayjyawëty. Axtë ojtsëts nbudëkë tuˈugë familyë parë tnijawëdë tëyˈäjtën diˈibë nety tsënääytyëp jantsy jagam”.

Kyaj niˈamukë tyäˈädë nmëguˈukˈäjtëm mbäät nyëjkxtë jagam, per axtë pënaty të myëjjäˈäyëndë tyuundëbë mëjääw parë tmëtmaytyäˈäktë niˈamukë jäˈäy diˈib tsënääytyëp mä tyerritooryë. ¿Wiˈix wyimbëtsëmy? Wenë, ko yajjamyejtsy ja Jesusë yˈoˈkën xëëw 2017 ja yˈojtstë jäˈäy mä tyäˈädë tëgëëkpë käjpn majtsk duˈunën extëm nyimayˈattë käjpxwäˈkxpë, jaˈa njënäˈänëm, nigujkwaˈkxyë jäˈäy diˈib jap tsënääytyëp. Extëm nˈijxëm, oy mä ntsënäˈäyëm, taaˈäjtpnëm kyayajtuny “waanë niˈigyë ja Nintsënˈäjtëmë tyuunk” (1 Kor. 15:58).