1. ¿Wiˈixë Jesus tmaytyaky ko nbëjkëˈkëm ja oyˈäjtën jam tsäjpotm?

ËTSÄJTËM, nmëdäjtëm tijaty tsobatp mëjwiin kajaa, jeˈeyë ko kyaj nˈijxëm. Ko Jesus dyajkyë käjpxwijën mä tuˈugë kopk, jyënany ko pën nbëjkëˈkëmë ja oyˈäjtën jam tsäjpotm, yëˈë diˈib mas tsobatp ets kyaj dyuˈunëty ja meeny sentääbë. Ko dyäjktääyë tyäˈädë käjpxwijën, ta net jyënany: “Jaˈa ko mä xymyëdaty pëjkeˈeky yëˈë mˈoyˈäjtën, jamë dëˈën nandëˈën yˈity yëˈë mjot mwinmäˈänyëty” (Mat. 6:19-21). Diˈib ëtsäjtëm nyajtsobatëm mëjwiin kajaa, yëˈë diˈib ja jot korasoon yˈëxtäˈäyaampy. Mbäät nyajnipajtëm ja oyˈäjtën jam tsäjpotm ko oy nyajwëˈëmëm ja xëëw Dios windum ets ko oy mëët nˈijtëm. Jesus jyënany ko tyäˈädë oyˈäjtën nitii mbäät tkayajwindëgoy ets nipën mbäät tkatony tkameetsy.

2. 1) ¿Wiˈixë Pablo xyˈanmäˈäyëm mä 2 Korintʉ 4:17, 18? 2) ¿Ti nˈixäˈänëm mä tyäˈädë artikulo?

² Apostëlë Pablo xyˈanmäˈäyëm parë tëyë ja ijxën nyaˈijtëm “mä tijaty kyaj yaˈixy” (käjpxë 2 Korintʉ 4:17, 18). * Tuk pëky diˈib kyaj nˈijxëm, yëˈë ja kunuˈkxën diˈib nˈaxäjëyäˈänëm mä jembyë jukyˈäjtën diˈibë Diosteety të xytyukwandakëm. Mä tyäˈädë artikulo nˈixäˈänëm taxk pëkyë regalë diˈib tyam nmëdäjtëm ets kyaj nˈijxëm: ko nnaymyaˈayëm mëdë Dios, ko nnuˈkxtakëm, ko xypyudëjkëmë espiritë santë ets ko xypyudëjkëmë Jyobaa, Jesus etsë anklëstëjk mä nˈëwäˈkx ngäjpxwäˈkxëm. Nan nˈixäˈänëm wiˈix mbäät nyajnigëxëˈkëm ko nmëjjäˈäwëmë tyäˈädë regalë diˈib kyaj nˈijxëm.

3. ¿Diˈibën ja regalë tsobatp mëjwiin kajaa ets kyaj yaˈixy, ets wiˈix nbatëm?

³ Ko nnaymyaˈayëm mëdë Jyobaa, yëˈë tuˈugë regalë diˈib kyaj yaˈixy ets tsobatp mëjwiin kajaa (Sal. 25:14). Per ¿wiˈix mbäädë Dios diˈib wäˈätsjäˈäy nyaymyayëty mët tuˈugë pokyjyaˈay? Mët ko Jesus nyayäjkë “extëmë wintsëˈkën es yajpojpënitëgoyët yä naxwiiny” (Fwank 1:29). Jyobaa nyijäˈäwëbë nety ko ja yˈUˈunk mëmëdowanëp axtë mäbäät jyukyˈaty, duˈuntsoo dyaˈˈawäˈätspëtsëmët ja naxwinyëdë jäˈäy. Pääty nyaymyaayë mëdë naxwinyëdë jäˈäy diˈib jukyˈäjttë mä netyë Jesus tkakëyakynyëmë jyukyˈäjtën (Rom. 3:25).

4. Oknimaytyäˈäk nimajtsk nidëgëëgë Jyobaa myëtnaymyaayëbë diˈib jyukyˈäjttë mä netyë Jesus kyaminyëm.

⁴ Min nˈoknimaytyakëm niduˈuk nimajtskë Jyobaa myëtnaymyaayëbë diˈib jyukyˈäjttë mä netyë Jesus kyaminyëm. Niduˈuk yëˈë Abrahán diˈib mëkë mëbëjkën myëdäjt. Ko nyajxy tuk mil jëmëjt mä netyë Abrahán të yˈoˈknë, ta Jyobaa ojts tyijˈyëty “ja nmëtnaymyaayëbëts” (Is. 41:8). Extëm nˈijxëm, oy njaˈoˈk njatëgoˈoyëmbë, Jyobaa duˈunyëm xyyajnäjxëm extëmë myëtnaymyaayëbë, Jyobaa duˈunyëm dyaˈijtyë Abrahán wyinmäˈänyoty extëmxyëp jyukyˈaty (Luk. 20:37, 38). Jatuˈugë myëtnaymyaayëbë Jyobaa, yëˈë Job. Tëgok, të netyë anklës tyuˈukmujktäˈäytyë tsäjpotm ko Jyobaa jyënany ko tyukjotkujkˈäjtypyë Job. Duˈun tnimaytyaky: “Jukyˈäjtp tëyˈäjtën mëët, wäˈäts, tsyëˈkëbë Dios ets kyaj ttunyë axëkˈäjtën” (Job 1:6-8). Ets ¿wiˈixë Jyobaa wyinmääy mä Daniel diˈib mëduundë naa 80 jëmëjtën mä ja it lugäär mä jäˈäy tˈawdattë wiink dios? Mä nety të myëjjäˈäyënë, tëgëkˈokë anklës yˈanmääyë ko Dios mëjwiin kajaa yajtsobäätyëty (Dan. 9:23; 10:11, 19). Mbäät nˈijtëm seguurë ko Jyobaa nëgooyë tˈawijx tjëjpˈijxnë jyäˈtët ja tiempë mä dyajjukypyëkäˈäny ja myëtnaymyaayëbëty diˈib jyantsy tsyojkypy (Job 14:15).

5. ¿Tijaty tsojkëp nduˈunëm parë nmëtnaymyaayëbëˈäjtëmë Jyobaa?

⁵ Miyonkˈam tyamë naxwinyëdë jäˈäy nyaymyaayëdë mëdë Jyobaa, oy pokyjyaˈay yajpäättë. ¿Tiko duˈun njënäˈänëm? Yëˈko ta nimayë yetyëjk, toxytyëjk etsë ënäˈkuˈunk diˈib yajnigëxëˈktëp mä jyukyˈäjtën ko jyantsy myëtnaymyaayëbëˈatandëbë Dios. Biiblyë jyënaˈany ko Jyobaa “jantsy oy mëët nyaymyayëty diˈib tyuumbyë tëyˈäjtën” (Prov. 3:32). Mbäät nmëtnaymyaayëbëˈäjtëmë Jyobaa ko nmëbëjkëmë Jesus ko yëˈë diˈib ojts xyjyuuybyëtsëˈëmëm. Ets mët ko Jesus ojts xykyuˈoˈkëm, mbäädë net nnaywyandakëm mä Jyobaa ets nnëbajtëm. Ko duˈun nduˈunëm, ta net nbuwäˈkëm ja miyonkˈambë nmëguˈukˈäjtëm diˈib të nyaywyandäˈägëdë, të nyëbattë ets diˈib naymyaayëndëp mëdë Jyobaa.

6. ¿Wiˈix mbäät nyajnigëxëˈkëm ko nmëjjäˈäw ngunuˈkxyjyäˈäwëm ko nmëtnaymyaayëbëˈäjtëmë Jyobaa?

⁶ ¿Wiˈix mbäät nyajnigëxëˈkëm ko nmëjjäˈäw ngunuˈkxyjyäˈäwëm ko nmëtnaymyaayëbëˈäjtëmë Jyobaa? Ko nbanëjkxëmë yˈijxpajtënë Abrahán mëdë Job, diˈib Dios mëduundë naxy tuk mëgoˈpx jëmëjt ets ninäˈä tkamastuttë. Ëtsäjtëm nan mbäät nmëduˈunˈadëtsëmë Dios mä tyäˈädë tiempë diˈib jëjpkëxanëp, oy nuˈun jeky kujk nmëduˈunënë. Nan mbäät nbanëjkxëmë yˈijxpajtënë Daniel diˈib mas niˈigyë yajtsobat ko nyaymyaayë mëdë Jyobaa ets kyaj dyuˈunëty ja jyukyˈäjtën (Dan. 6:7, 10, 16, 22). Mëdë Jyobaa nyaybyudëkë mbäät nmëmadakëm oytyim ti jotmayëty ets duˈunyëm mëët nnaymyaˈayëm (Filip. 4:13).

7. Extëm jyënaˈanyë Proverbios 15:8, ¿wiˈixë Jyobaa nyayjyawëty ko nmënuˈkxtakëm, ets wiˈix tˈatsoowëmbity?

⁷ Jatuˈugë regalë diˈib kyaj yaˈixy ets tsobatp mëjwiin kajaa, yëˈë ko mbäät nnuˈkxtakëm. Ko tuˈugë jäˈäy jyantsy nyaymyaayëdë, naytyukmëtmaytyakëdëp wiˈix wyinmaytyë ets wiˈix nyayjyawëdë. Nanduˈun jyaˈty ko nnaymyaˈayëm mëdë Jyobaa. Yëˈë xymyëgäjpxëm mët yëˈëgyëjxmë Biiblyë parë xytyuknijäˈäwëm wiˈix wyinmay ets wiˈix nyayjyawëty, ets ëtsäjtëm nmëtkäjpx nmëtmaytyakëm ko nmënuˈkxtakëm. Ko nmëgäjpxëmë Jyobaa, mbäät ndukmëtmaytyakëm wiˈix  nwinmäˈäyëm ets wiˈix nnayjyäˈäwëm. Yëˈë jyantsy tyukxondakypy ko tmëdoy wiˈix nmënuˈkxtakëm (käjpxë Proverbios 15:8). * Jyobaa yëˈë tuˈugë nmëtnaymyaayëbëˈäjtëm diˈib xytsyojkëm, pääty tˈatsoowëmbity ko nmënuˈkxtakëm. Näˈäty pojënë tˈatsoowëmbity, ets näˈäty yajnäjxypyë tiempë. Per oy wyiˈixˈatët, tsojkëp nˈijtëm seguurë ko yˈatsoowëmbitaampy näˈä yëˈë tˈixy ko nyajtëgoyˈäjtëm ets diˈib mbäät ndukˈoyˈäjtëm. Ets näˈäty, mbäät kyaj tˈatsoowëmbity extëm njatsojkëm. Extëm nˈokpëjtakëm, mbäät kyaj xytyimtukniwatsëm ja amay jotmay diˈib nwinguwäˈkëm, per mbäät xymyoˈoyëmë wijyˈäjtën etsë jot mëjääw parë nmëmadakëm (1 Cor. 10:13, TNM).

8. ¿Wiˈix mbäät nyajnigëxëˈkëm ko nmëjjäˈäw ngunuˈkxyjyäˈäwëm ko mbäädë Jyobaa nmënuˈkxtakëm?

⁸ ¿Wiˈix mbäät nyajnigëxëˈkëm ko nmëjjäˈäw ngunuˈkxyjyäˈäwëm ko mbäädë Jyobaa nmënuˈkxtakëm? Ko nbanëjkxëmë tyäˈädë käjpxwijën: “Nuˈkxtäˈäktë janääm jatsojk” (1 Tes. 5:17, TNM). Jyobaa kyaj xytyukˈaguanëˈäjtëm parë nmënuˈkxtakëm, yëˈë wyintsëˈkëp ti ëtsäjtëm ndunäˈänëm, per duˈun xyˈanmäˈäyëm: “Kyaj xymyastuˈuttët ja mgäjxtakën” (Rom. 12:12). Pääty ko nmënuˈkxtakëm janääm jatsojk, ta nyajnigëxëˈkëm ko nmëjjäˈäw ngunuˈkxyjyäˈäwëm ko mbäät nmëgäjpxëm. Per kyaj yˈoyëty njäˈäytyëgoˈoyëm nguˈëˈëw ngukäjpxëm ets nyajmëjpëtsëˈëmëm koogoo nmënuˈkxtakëm (Sal. 145:2, 3).

9. ¿Wiˈix tuˈugë nmëguˈukˈäjtëm nyayjyawëty ko tmënuˈkxtaˈagyë Jyobaa, ets wiˈix mijts mnayjyawëty?

⁹ Ko mas jeky nmëduˈunënë Jyobaa ets ko nˈijxëm wiˈix tˈatsoowëmbityë nnuˈkxtakënˈäjtëm, ta niˈigyë nmëjjäˈäw ngunuˈkxyjyäˈäwëm ko mbäät nmënuˈkxtakëm. Min nˈokˈijxëm wiˈix jyënanyë Chris, tuˈugë nmëguˈukˈäjtëm diˈib 47 jëmëjt aduˈugë xyëëw tiempë të dyajtuny mä Jyobaa tyuunk, duˈun jyënaˈany: “Njantsy tsyojkënyëˈajtypyëts nbëdëˈëgäˈäny tsojk parëts nmëtmaytyäˈägäˈänyë Jyobaa mä kyaj ti naynyaˈamë. ¡Nëgooyë yˈoyˈäjnë nmëtmaytyakëmë Jyobaa mientrës ja Xëëw tyëˈkxëˈëky jyäjjëˈëky! Kots duˈun nˈixy, yëˈëts diˈib ja nˈääw njot yajjënaampy parëts nmoˈoyëdë dyoskujuyëmë Jyobaa mä tukëˈëyë oyˈäjtën diˈibëts xymyoopy ets ko tnasˈixë parëts nmënuˈkxtäˈägët. Kots uxëp nmënuˈkxtaktäˈäyë Jyobaa, mbäädëtsë net nëjkxnë määbë poˈkxpë agujk jotkujk”.

10. ¿Tiko tsyokyëty nyajtsobatëm ja espiritë santë mëjwiin kajaa?

¹⁰ Jatuˈugë regalë diˈib kyaj yaˈixy ets tsobatp mëjwiin kajaa, yëˈë espiritë santë. Jesus xyˈanmäˈäyëm parë mëktaˈaky nˈamdoˈowëmë Diosë myëjääw (Luk. 11:9, 13). Jyobaa yëˈë yajtuumbyë tyäˈädë espiritë santë parë xymyoˈoyëm ja “mëkˈäjtën” diˈib mëjwiin kajaa (2 Kor. 4:7; Apos. 1:8). Ets mët ko xytyukpudëjkëm, mbäädë net nmëmadakëm oy ti amay jotmay xytyukmiˈinëm.

11. ¿Wiˈix mbäät xypyudëjkëmë espiritë santë?

¹¹ Espiritë santë xypyudëjkëm parë nduˈunëm yajxon ja tuunk diˈib të nyajtuknipëjkëm mä Diosë kyäjpn. Nan mbäät niˈigyë xymyoˈoyëm ja wijyˈäjt kejyˈäjtën. Ëtsäjtëm nnijäˈäwëm ko pën kyaj xypyudëjkëmë espiritë santë, kyaj mbäät yˈoybyëtsëmy tijaty nduˈunëm mä Diosë tyuunk.

12. Extëm jyënaˈanyë Salmo 139:23, 24, ¿ti mbäät nˈamdoˈowëm mä nnuˈkxtakëm?

¹² Ja tuk pëky wiˈix mbäät nyajnigëxëˈkëm ko nmëjjäˈäw ngunuˈkxyjyäˈäwëm ja espiritë santë, yëˈë ko nˈamdoˈowëmë Jyobaa parë xytyukˈijxëm pën të tyëkë mä jot winmääy ets mä jot korasoon diˈib kyaj yˈoyëty (käjpxë Salmo 139:23, 24). * ¿Wiˈixë netë Jyobaa tˈatsoowëmbitäˈäny? Xytyukˈixäˈänëm mët yëˈëgyëjxmë yˈespiritë santë ti të tyëkë mä jot korasoon ets mä jot winmäˈäny. Ets ko nety duˈun të xytyukˈijxëm, ta mas niˈigyë nˈamdoˈowëmë yˈespiritë santë parë xymyoˈoyëmë jot mëjääw ets nyajpëtsëˈëmëm ti nety të tyëkë mä jot winmäˈäny ets mä jot korasoon. Duˈuntsoo nëjkx ndukˈijxëmë Jyobaa ko kyaj ti ndunäˈänëm diˈib mbäät yajnëˈëˈaduky yajtuˈuˈadukyëty parë xypyudëjkëˈadëtsëm mëdë myëjääw (Éfes. 4:30).

13. ¿Wiˈix mbäät mas niˈigyë nmëjjäˈäw ngunuˈkxyjyäˈäwëm ja espiritë santë?

¹³ ¿Wiˈix mbäät mas niˈigyë nmëjjäˈäw ngunuˈkxyjyäˈäwëm ja espiritë santë? Ko nbawinmäˈäyëm wiˈix tyam xypyudëjkëm. Mä netyë Jesus kyanëjkxynyëm tsäjpotm, ta tˈanmääy ja yˈëxpëjkpëty: “Ko ja espiritë santë mniminëdët, mmoˈoyëdëp miitsëty ja mëkˈäjtën es net miits xypyëjtäˈäktët ja tëyˈäjtën ëjtskyëjxm” mä “tëgekyë naxwinyëdë”  (Apos. 1:8). ¡Ets duˈunën tyam tyuny jyatyëty! Mët ko xypyudëjkëmë espiritë santë, ta abëtsemy nyaxwinyëdë, naxy tuktujk miyonk jakujkmë jäˈäy të tpëjtäˈäktë wyinmäˈäny parë tmëdunäˈändë Jyobaa. Tyamë Diosë kyäjpn nan tuˈugyë nyayaˈitëdë ets agujk jotkujk mët ko pyudëkëdë espiritë santë. ¿Wiˈix pyudëkëdë? Parë tmëdattëdë oybyë jäˈäyˈäjtën extëmë tsojkën, xondakën, jotkujkˈäjtën, maˈkxtujkën, oyjyaˈayˈäjtën, ajiikyˈat amëguˈukˈat, mëbëjkën, yuunkˈat naxypyˈat ets ko nyayjyëjpkuwitsëdë këˈëm. Tukëˈëyë tyäˈädë jäˈäyˈäjtën yëˈë ja “tëëm diˈib yajkypyë Diosë myëjääw” (Gál. 5:22, 23, TNM). Extëm nˈijxëm, espiritë santë yëˈë tuˈugë regalë diˈib mbäät nyajtsobatëm mëjwiin kajaa.

14. ¿Wiˈix ja tuk pëky nyajpudëjkëm mä nˈëwäˈkx ngäjpxwäˈkxëm?

¹⁴ Taaˈäjtp jatuˈugë regalë diˈib të nˈaxäjëm ets kyaj yaˈixy, yëˈë ko tuˈugyë nduˈunëm mëdë Jyobaa, Jesus etsë anklëstëjk (2 Kor. 6:1). Tëgok tëgok nëjkxëm ëwäˈkx käjpxwäˈkxpë yëˈë diˈib xypyudëjkëm. Ko apostëlë Pablo ojts yˈëwäˈkx kyäjpxwäˈkxtë mëdë myëguˈuktëjk, duˈun tˈanmääytyë: “Yëˈë mëët nduunmujkëmë Dios” (1 Cor. 3:9, TNM). Nanduˈun ëtsäjtëm, ko nëjkxëm ëwäˈkx käjpxwäˈkxpë yëˈë mëët nduunmujkëmë Jesus. Ko netyë Jesus të ttukˈanaˈamdäˈäy ja yˈëxpëjkpëty: “Nëjx yaˈëxpëktë jäˈäyëty mä tëgekyë naxwinyëdë”, ta net tˈakˈanmääy, yajpäädäämbëts “mët miitsëty” (Mat. 28:19, 20). ¿Ets wiˈix xypyudëjkëmë anklëstëjk? Mëjwiin kajaa nmëjjäˈäwëm ko yëˈë diˈib xynyëˈëmoˈoy xytyuˈumoˈoyëm mä nnigäjpx nimaytyakëm “ja oybyë ayuk diˈibë winë xëë winë tiempë [...] mä tëgekyë nax käjpn” (Diˈibʉ Jat. 14:6).

15. Oknimaytyäˈäk mët tuˈugë ijxpajtën wiˈixë Jyobaa tmëjwoyë jäˈäy mä nˈëwäˈkx ngäjpxwäˈkxëm.

¹⁵ ¿Tijatyën tyam nduˈunëm mët ko xypyudëjkëmë Jyobaa, Jesus etsë anklëstëjk? Mä nnipëm ja tëëm, ta nääk kyaˈay mä oybyë jot korasoon ets yëˈë diˈibë net mujxp (Mat. 13:18, 23). Per ¿pën yajˈyoompy yajpejtypy ets yajtëëmˈäjtypy? Jesus jyënany: “Kaˈap tjëkyepy pën xynyiminëtyës pën kaˈap ja Tios Teety wyoowminyë” (Juan 6:44, TY). Mä Biiblyë miimp tuˈugë ijxpajtën diˈib xytyukˈijxëm ko jantsy duˈun. Tëgok, apostëlë Pablo myëtmaytyak ja toxytyëjk jäˈäyëty diˈibë nety yajpattëp käjpnbëˈääy jam Filipos. Biiblyë duˈun tnimaytyaˈagyë Lidia, niduˈuk ja toxytyëjk diˈibë nety jam yajpatp, jyënaˈany: “Ko tmëdooˈity diˈibë Pääblë kyajxypy, Dios tukmëbëjkë”, o ja tuk pëky njënäˈänëm, Jyobaa yaˈˈawatsë jyot kyorasoon (Apos. 16:13-15). Duˈun extëmë Jyobaa tmëjwooyë Lidia, nanduˈunën tyam tmëjwoy miyonkˈamë jäˈäy mä nyax kyäjpn.

16. ¿Pën mbäät yajmëjkuˈëw yajmëjkugäjpxë ko yˈoybyëtsëmët tijaty nduˈunëm mä Diosë tyuunk?

¹⁶ ¿Pën mbäät yajmëjkuˈëw yajmëjkugäjpxë ko yˈoybyëtsëmët tijaty nduˈunëm mä Diosë tyuunk? Pablo yˈatsoowëmbijtë tyäˈädë yajtëˈëwën ko tnijäˈäyë ja Dios mëduumbëty diˈib Corinto: “Ëjts nnip ja tëëmt, Apolës tyäˈx [yajxoˈk], perë Diosë dëˈën diˈibë yajmujx ja tëëmt es yajˈyaˈk yajpajt. Diˈibë nip es diˈibë täˈxp, ni ti yëˈëjëty, Diosë dëˈën tëgekyë, mët ko yëˈë yajˈyeempy yajpejtypy ja diˈibë yajnip” (1 Kor. 3:6, 7). Extëm nˈijxëm, Jyobaa yëˈë diˈib pat nitëjkëp yajmëjkuˈëw yajmëjkugäjpxët koogoo yˈoybyëtsëmët tijaty nduˈunëm mä tyuunk.

17. Ko nduunmujkëm mëdë Jyobaa, Jesus etsë anklëstëjk, ¿wiˈix mbäät nyajnigëxëˈkëm ko nmëjjäˈäwëm?

¹⁷ Ko nduunmujkëm mëdë Jyobaa, Jesus etsë anklëstëjk, ¿wiˈix mbäät nyajnigëxëˈkëm ko nmëjjäˈäwëm? Ko nˈëxtäˈäyëmë winmäˈäny wiˈix mbäädë jäˈäy ndukmëtmaytyakëmë oybyë ayuk ninuˈun ndimpatëm. Ets mbäät duˈun nduˈunëm kanäk pëky, extëm ko nˈëwäˈkx ngäjpxwäˈkxëm “winjëën wintëjk ets mä ja mayjyäˈäyën” yajpäättën (Hech. 20:20, TY). Nimayë nmëguˈukˈäjtëm jantsy käjpxwäˈkxandëp oytyim näˈäjëty. ¿Wiˈix ttundë? Ko tpäättë jäˈäy diˈib kyaj tˈixyˈattë, ta tsuj yajxon tˈëboˈkx tkäjpxpoˈkxtë ets ta net ttundë mëjääw parë dyajtsondäˈäktë ja maytyaˈaky. Pën ja jäˈäy käjpxäämp maytyäˈägäämp, ta net tˈëxtäˈäytyë  winmääy wiˈix ttukmëtmaytyäˈäktëdë Diosë yˈayuk.

18, 19. 1) ¿Wiˈix mbäät nyajxoˈkëm ja tëëm diˈib të nnipëm mä jäˈäyë kyorasoon? 2) ¿Wiˈixë Jyobaa tpudëjkë tuˈugë jäˈäy diˈibë nety yˈëxpëjkypyë Biiblyë?

¹⁸ Mä “mëët nduunmujkëmë Dios”, kyaj jeˈeyë tsyokyëty nnipëm ja tëëm nan tsojkëbën nyajxoˈkëm. Ko tuˈugë jäˈäy tjantsy tˈoymyëdowëdë Diosë yˈayuk, tsojkëp nduˈunëmë mëjääw parë jatëgok nnijëmbijtëm o nduknipëjkëm tuˈugë nmëguˈukˈäjtëm parë dyaˈëxpëjktsondäˈägët. Ko wyimbety tuˈugë jäˈäy diˈib nyaˈëxpëjkëm, agujk jotkujk nnayjyäˈäwëm ko nˈijxëm wiˈixë Jyobaa pyudëkëty parë dyajtëgatsy ja jyot wyinmäˈäny ets ja jyukyˈäjtën.

¹⁹ Min nˈoknimaytyakëmë yˈijxpajtën tuˈugë yetyëjk diˈib Sudáfrica. Yëˈë brujë nety ets yaˈˈaybyajt yajtsoybyajtp, ets nëgooyë nety tˈoymyëdoownë tijaty jyajtypy mä Biiblyë. Per ojts tsyiptakxëty tkupëkët ko ojts tkajpxy mä Biiblyë ko kyaj yˈoyëty yajmëtmaytyäˈägëdë oˈkpë (Deut. 18:10-12). Tyäˈädë yetyëjk wanaty wanaty tnasˈijxë parë Jyobaa yajtëgäjtsxëdët ja jyot wyinmäˈäny. Ko tiempë nyajxy, ta tˈëxmäjtsy diˈibë nety tyuunkˈäjtypy, oyë nety jam ja myeeny sentääbë tpääty. Tyäˈädë nmëguˈukˈäjtëm ja tyamë jyëmëjt 60, yëˈë jyënaˈany: “Mëjwiin kajaats nmëjjawë kotsë Jyobaa tyestiigëty të xypyudëkëdë kanäk pëky, extëm kots të nbääty ja nduunk. Per diˈibëts mas niˈigyë nmoobyë dyoskujuyëm, yëˈë Jyobaa, pes yëˈëts të xypyudëkëdë parëts të nyajtëgatsyë njukyˈäjtën, ets tyam, mbäädëts nëjkxy ëwäˈkx käjpxwäˈkxpë extëmë Jyobaa tyestiigë”.

20. ¿Ti të nduknibëjtakëm ndunäˈänëm?

²⁰ Mä tyäˈädë artikulo të nˈijxëm taxk pëkyë regalë diˈib kyaj nˈijxëm. Per diˈib mas niˈigyë tsobatp, yëˈë ko mbäät jantsy oy nnaymyaˈayëm mëdë Jyobaa. Ets ko net mëët nnaymyaˈayëm, mbäädë net nmënuˈkxtakëm, nˈaxäjëm ja naybyudëkë diˈib yajkypyë espiritë santë, nduunmujkëm mëdë Jyobaa, Jesus etsë anklëstëjk. ¿Ti net ndunäˈänëm? Nyajtsobäädäˈänëm mas niˈigyë ja regalë diˈib kyaj yaˈixy ets xëmë nguˈëwëyäˈän ngukäjpxëyäˈänëm ko Jyobaa nmëtnaymyaayëbëˈäjtëm.