DESDE tëëyëp, ko ijty yajˈyakyë wintsëˈkën jëjpˈam nyaxy mä yaˈˈawdatyë Jyobaa. Ja israelitëty yëˈë ijty yäjktëbë jëyujk animal extëmë wintsëˈkën, ets ëtsäjtëm wiˈix nyäjkëmë wintsëˈkën, yëˈë ko “nˈawdäjtëm ja Dios mët ja nˈääˈäjtëm”. Per ta wiinkpë wintsëˈkën diˈib tyukjotkëdakypyë Dios (Eb. 13:15, 16). Pënaty yäjktëp, jotkujk yajpäättë ets yˈaxäjëdëbë kunuˈkxën, extëm yä nˈixäˈänëm.

Ana diˈib xëmë myëduunë Dios jyapäädan tuˈugë yˈuˈunk, per kyaj nety mbäät tpääty. Ko tmënuˈkxtakyë Jyobaa, ta ttukwandaky ko pën mmooyëp tuˈugë mixyuˈunk, ta yëˈë ttukëdëkëyaˈany parë myëdunëdët “nuˈun ja xyëëw jyukyˈäjtën” (1 Sam. 1:10, 11). Ko tiempë nyajxy, ta Ana ojts wyeˈemy uˈunkmëët, ets ta tpaty tuˈugë mixyuˈunk diˈib xyëëwmooy Samuel. Ko nety kyaj yˈoktsiˈtsnë, ta ojts yajmënëjkxy mä ja tabernakulo parë jam tmëdunëdë Jyobaa, duˈun extëmë Ana twandaky. Jyobaa kyunuˈkxë Ana ko dyajkyë tyäˈädë wintsëˈkën, pes ojts tˈakpääty nimëgoxkë yˈuˈunk etsë Samuel tyuuny kugajpxy ets nan yëˈë niduˈuk jyaayë Biiblyë (1 Sam. 2:21).

Duˈun extëmë Ana etsë Samuel, nan mbäädë Jyobaa ndukëdëjkëmë jukyˈäjtën parë nmëduˈunëm. Jesus wyandak ko mëjwiin kajaa nyajkunuˈkxäˈänëm, pën nnayojxëm mä Jyobaa tyuunk (Mar. 10:28-30).

Dorcas yëˈë tuˈugë Dios mëduumbë diˈib jukyˈäjt mä primer siiglë ets yaˈixyˈajty ko jantsy oyjyaˈay “es tpudëkë ja jäˈäy diˈibë ayoodëp”, o ja tuk pëky njënäˈänëm, nnayojxë parë tpudëjkë ja myëguˈuktëjk. Per jotmaymyëët njënäˈänëm, ko ta “pyäˈämbejty” ets yˈoˈky, ets ja myëguˈuktëjk diˈibë nety mëët tyuˈukmuktë jantsy nimoon jantsy nidujkëdë. Ko tnijäˈäwëdë ko Pedro wingon yajpääty, ta tnigajxëdë mëktaˈaky. ¡Okpawinmay wiˈix agujk jotkujk nyayjäˈäwëdë ko tˈijxtë Pedro jyaˈty ets ko dyajjukypyëjkyë Dorcas! Yëˈë ja tim jawyiimbë apostëlë diˈib yajjukypyëjkë oˈkpë diˈib yajmaytyakp mä Biiblyë (Apos. 9:36-41). Dios ninäˈä tkajäˈäytyëgooy tijatyë Dorcas tukmëduunë (Eb. 6:10). Tap ojts yajkujayë mä Biiblyë ets mbäät nbanëjkxëmë yˈijxpajtën.

Apostëlë Pablo nan xymyoˈoyëmë oybyë ijxpajtën, pes yajtuunë xyëëw tiempë ets pyudëjkë wiinkpëty. Duˈun tnijäˈäyë ja Dios mëduumbëty diˈib Corinto: “Mët tuˈugë oyjyot nyajtunëdëts tëgekyë diˈibëts nmëdäjtypy, es mët tëgekyëts ja nmëjää nbudëkëdët miitsëty” (2 Kor. 12:15). Pablo nayojxë ko tpudëjkë myëguˈuktëjk, nanduˈun ëtsäjtëm, jotkujk nnayjäˈäwëm ko nbudëjkëmë nmëguˈukˈäjtëm, ets diˈib mas jëjpˈam, yëˈë ko Jyobaa xykyunuˈkxäˈänëm ets xypyudëkëyäˈänëm (Apos. 20:24, 35).

Jyobaa jantsy oy nyayjawëty ko nyajtuˈunëmë xëëw tiempë etsë jot mëjääw mä ja tyuunk ets mä nmëguˈukˈäjtëm. Per ¿jamdaa ti diˈib mbäät nˈaktuˈunëm? Tam. Kyaj jeˈeyë tsyokyëty nbudëjkëmë nmëguˈukˈäjtëm, nan mbäädë Jyobaa nbudëjkëm ko nnayäjkëmë meeny sentääbë. Ko duˈun nduˈunëm, ta yˈakˈyajtuunˈadëˈëtsëdë Diosë tyuunk abëtsemy nyaxwinyëdë. Extëm nˈokpëjtakëm, ko nnayäjkëmë meeny sentääbë, nan yëˈë yajtukpudëjkëdëbë misioneerë etsë wiinkpë Dios mëduumbë diˈib aduˈugë xyëëw tiempë yajtuundëp mä Diosë tyuunk. Tyäˈädë meeny nan yëˈë tuump parë ëxpëjkpajn kyojy, yajkäjpxnaxy ets ko pyëtsëmyë bideo, nan yëˈë tuump ko tijaty yˈayoˈonbëjtaˈaky ets parë niˈigyë yajkojˈyë tëjk mäjaty nˈëxpëjkëm. Mbäät nˈijtëm seguurë ko pën oyjyaˈaytyakëm, ta nyajkunuˈkxäˈänëm. Ets nan nëjkxëp nyajmëjpëtsëˈëmëmë Jyobaa mët tijaty nmëdäjt njaygyajpëm (Prov. 3:9; 22:9).