TËËYËP, ja mëduumbë diˈib yajtukmënikakëp tijaty, yëˈë ijty myëwëˈëmëp ja jëën tëjk ets ja jäˈäyë nyax kyam.

Ko José, ja myäängë Jacob ojts yajtuumbëˈaty yajmosëˈaty Egipto, ja wyintsën ojts tyukmënikaagëty ja jyëën tyëjk. Tyäˈädë wintsën tyuknipëjktääyë José tukëˈëyë diˈibë nety myëdäjtypy (Gén. 39:2-6). Ok, ko nanduˈunë José tmëdäjtyë kutujkën jap Egipto, nan myëdäjt ja tyuumbë diˈib tyukmënikakëtyaay ja jyëën tyëjk (Gén. 44:4).

Ja tiempë mä Jesus jyukyˈajty, ja jäˈäy diˈib kunax kugam jam ijty tsyëënë siudääjoty. Pääty ijty twinˈixy ja tyuumbëtëjk diˈib tyukmënikakëtyaapy tijaty ja tuumbëtëjk tyundëp tuˈuk tuˈugë xëëw.

¿Pën ijty mbäät yajwinˈixy parë yajtukmënikakëtyaˈayët tijaty? Columela, diˈib tijaty kyujäˈäyë jam Roma, ja tiempë mä apostëlëtëjk jyukyˈäjttë, jyënany ko yëˈë “ja diˈib yajxon të tjaty wiˈix yajtunäˈäny ja tuunk”. Tyäˈädë jäˈäy tsojkëbë nety tˈijxtäˈäyët ets ja tuumbëtëjk ttundët yajxon ja tuunk, per kyaj ttëytyunët ja tuumbë mosë. Nanduˈun yˈakjënany “ko diˈib mas tsobatp mä ja tuumbë diˈib yajtukmënikakëtyaapy ja jëën tëjk, yëˈë ko kyaj wyinmayët ko nyijäˈäwëtyaapy tijaty ets ko xëmë tjatäˈänët diˈib kyaj tnijawë”.

Ko Biiblyë tnimaytyaˈaky tuk pëky majtsk pëky tijaty yajtuump mä Diosë kyäjpn, yëˈë mëët tˈijxkijpxyë ja mëduumbë diˈib yajtukmënikakëtyaapy tijaty. Extëm nˈokpëjtakëm, apostëlë Pedro xyˈanmäˈäyëm wiˈix mbäät nyajtuˈunëm ja madakën diˈibë Dios të xymyoˈoyëm, jyënany: “Yajtundë ko mnaytyukpudëkëdët nixim niyam extëmë oybyë mëduumbë diˈib yajtukjotkujkˈäjtp, diˈib të tˈaxäjëdë ja Diosë pyaˈˈayoˈowën” (1 Ped. 4:10, TNM).

Jesus nan yajtuunë ijxpajtën mä ja mëduumbë diˈib yajtukmënikakë ja tëjk ko tmaytyaky ja ijxpajtën diˈib mä Lukʉs 16:1-8. Ets ko ojts tnaskäjpxë tijaty yajtukˈijxwëˈëmäämp ko nety tyuunë Rey, ta ttukwandaky ja yˈëxpëjkpëty ko ttuunkmoˈoyaˈany ja “tyuumbë diˈibë kuwijy es tyiimpy ti wyintsën tsyejpy” o diˈib tyukmënikaagëyaampy tijaty. Tyäˈädë tuumbë, yëˈë nety myoˈoyaampy ja kyaˈay yˈukënë Dios mëduumbëty mä ja tiempë jyëjpkëxanë (Mat. 24:45-47; Luk. 12:42). Nmëjjäˈäwëm ko nˈaxäjëmë ëxpëjkpajn diˈibë tyäˈädë tuumbë yajpëtsëëmpy ets yajwaˈkxypy abëtsemy nyaxwinyëdë parë dyajkëktëkë nmëbëjkënyëˈäjtëm.