1. ¿Wiˈix nnijäˈäwëm ko Jyobaa tsyojkypy nmëwingoˈonëm?

 JYOBAA xyˈanmäˈäyëm parë niˈigyë nmëwingoˈonëm (Sant. 4:8). Yëˈë tsyojkypy parë nDiosˈäjtëm, nDeetyˈäjtëm ets parë mëët nnaymyaˈayëm. Yˈatsoowëmbijtypy ko nmënuˈkxtakëm ets xypyudëjkëm ko nbatëmë amay jotmay. Yëˈë nanduˈun yajtuumbyë nyax kyäjpn parë xyaˈëxpëjkëm ets xyˈijxˈijt xykyuentëˈäjtëm. Per ¿ti mbäät nduˈunëm parë niˈigyë Jyobaa nmëwingoˈonëm?

2. ¿Ti mbäät nduˈunëm parë niˈigyë Jyobaa nmëwingoˈonëm?

² Mbäät nmëwingoˈonëmë Jyobaa ko nmënuˈkxtakëm, ngäjpxëmë Biiblyë ets ko nbawinmäˈäyëm. Ko duˈun nduˈunëm, ta niˈigyë ntsokäˈänëm ets nmëjˈijxäˈän nmëjpëjktäˈägäˈänëm. Nmëmëdowäˈänëmë Jyobaa ets nmëjkumayäˈänëm mët ko yëˈëyë pat nitëjkëp (Diˈibʉ Jat. 4:11). Ko niˈigyë nˈixyˈäjtëmë Jyobaa, ta niˈigyë ndukˈijxpatäˈänëm ets nanduˈun ja nyax kyäjpn mëdiˈibë të ttuknipëky parë xykyuentëˈäjtëm.

3. 1) ¿Ti Satanás tyuumpy parë xytyukmastuˈudäˈänëmë Jyobaa? 2) ¿Ti tsojkëp nduˈunëm parë ninäˈä ngamastutëmë Jyobaa etsë nyax kyäjpn? (Salmo 31:13, 14).

³ Kaˈoybyë xytyukmastuˈudäˈänëmë Jyobaa, ets ja duˈun ttuny ko nbatëmë amay jotmay. ¿Wiˈix ttuny? Wanaty wanaty xyaˈˈamajtsk xyajjotmajtskëm parë kyaj nekytyukjotkujkˈäjtëmë Jyobaa etsë nyax kyäjpn. Per mbäät nmëmadakëm, pën niˈigyë nyajkëktëjkëmë mëbëjkën ets amumduˈukjot ndukˈijxpajtëmë Jyobaa. Ko duˈun nduˈunëm, ta ninäˈä Jyobaa ngamastutëm ets ja nyax kyäjpn (käjpxë Salmo 31:13, 14).

4. ¿Ti yajnimaytyäˈägäämp mä yäˈädë artikulo?

⁴ Mä yäˈädë artikulo, tëgëk pëky nˈixäˈänëmë jotmay mëdiˈibë  mbäät nwinguwäˈkëm ets wiˈixë yäˈädë amay jotmay mbäät xyaˈˈamajtsk xyajjotmajtskëm parë kyaj nekytyukjotkujkˈäjtëmë Jyobaa ets ja nyax kyäjpn. ¿Wiˈix mbäät xytyukmëjagamgakëmë Jyobaa? Ets ¿ti mbäät nduˈunëm parë kyaj xymyëmadakëmë Satanás?

5. Ko xypyäädëdë amay jotmay, ¿wiˈix mbäät myaˈˈamajtsk myajjotmajtskëty parë kyaj xynyekytyukjotkujkˈatëdë Jyobaa etsë nyax kyäjpn?

⁵ Näˈäty nbatëmë jotmay ko kyaj tuunk nekypyatëm o ko xymyëtsiptsoˈonëm ja jëëky mëguˈuk mët ko nˈëxpëjkëm. ¿Wiˈix mbäät xyˈaxëktuˈunëm parë kyaj nekytyukjotkujkˈäjtëmë Jyobaa etsë nyax kyäjpn? Ko näˈäty jyekyë amay jotmay, mbäät nwinmäˈäyëm ko të duˈun kyanekyˈoyë ets kyaj nekynyayjyäˈäwëm agujk jotkujk. Duˈunën ttsokyë Satanás ets nwinmäˈäyëm parë nˈamajtsk njotmajtskëm ko Jyobaa kyaj xytsyojkëm, ko yëˈë pyoky ets ja nyax kyäjpn ko duˈun njäjt ngëbajtëm. Duˈunën wyinmääytyë näägë israelitëty mëdiˈibë nety Egipto. Ko jyajtyë Moisés mëdë Aarón, ta wyinmääytyë ko yëˈë yaˈˈawäˈätspëtsëmanëdëp mä yajtuumbëˈat yajmosëˈattë (Éx. 4:29-31). Per ko niˈigyë axëëk ojts tyuunëndë faraon, yëˈë pyokyˈijxtë Moisés etsë Aarón. Duˈun tˈanmääytyë: “Miits duˈun yëˈë poky mëëtˈäjtëp ets ëëts yëˈë mëj yajkutujkpë mëët yëˈë wyintsëndëjk ëxëëk xyˈixtëty. Yäˈädë duˈun tpatnë, ta jeexyë miitsëty këˈëm të xyˈënëëmëdën ets ëëts ëxëëk xytyundëty” (Éx. 5:19-21, MNM). ¡Axëëk yˈadëtstë ja israelitëty ko yëˈë tpokyˈijxtë Moisés mëdë Aarón mëdiˈibë netyë Dios yajtuunëdëp! Pën mijts jeky kujk xymyëmadaknë amay jotmay, ¿ti mbäät xytyuny parë duˈunyëmë Jyobaa xytyukjotkujkˈatët etsë nyax kyäjpn?

6. ¿Ti xytyukniˈˈijxëm extëm nyayjyäˈäwë Habacuc? (Habacuc 3:17-19).

⁶ Yaˈˈawäˈätsë mjot mgorasoon mä Jyobaa ets tukjotkujkˈat ko yëˈë mbudëkëyanëp. Ja kugajpxy Habacuc wiˈixëmë amay jotmay tpaty. Ets ojts jyawë nanduˈun yˈamajtsk jyotmajtskë ko Jyobaa kyaj myëmääy myëdäjˈyëty. Pääty ¿ti tyuun? Ta ttukmëtmaytyaky wiˈixë nety nyayjyawëty. Duˈun tˈanmääy: “Jyobaa, ¿axtë näˈä xymyëdowäˈäny ko mijts nˈamdoy mëktaˈagyë naybyudëkë? […] ¿Tiko xynyaˈixyë naytyëytyunë?” (Hab. 1:2, 3). Jyobaa ojts tmëdoowˈity wiˈix myënuˈkxtakë Habacuc (Hab. 2:2, 3). Ets ko Habacuc tpawinmääy wiˈixë netyë Jyobaa të dyaˈˈawäˈätspëtsëmyë nyax kyäjpn, yëˈë tpudëjkë parë jatëgok agujk jotkujk nyayjyäˈäwë. Ijt seguurë ko Jyobaa jantsy mëmääy jantsy mëdäjë ets ko pudëkëyanëbë nety parë tmëmadäˈägët oytyim ti amay jotmayëty (käjpxë Habacuc 3:17-19). ¿Ti xytyukniˈˈijxëm? Ko nwinguwäˈkëmë amay jotmay, nˈokmënuˈkxtakëmë Jyobaa ets nˈokˈanmäˈäyëm wiˈix nnayjyäˈäwëm. Nˈokpawinmäˈäyëm wiˈixë Jyobaa të xypyudëjkëm. Ko duˈun nduˈunëm, ta nˈitäˈänëm seguurë ko xymyoˈoyäˈänëmë jot mëjääw parë nmëmadakëm. Ets ko nˈijxëm wiˈixë Jyobaa xypyudëjkëm, ta niˈigyë nmëbëjkënë kyëktëkëyaˈany.

7. ¿Ti jatukmëbëkanë myëgaˈaxë Shirley, per ti tpudëjkë parë niˈigyë ttukjotkujkˈäjtyë Jyobaa?

⁷ Duˈunyëm tuunˈadëts tijaty mbäät mbudëkëty parë niˈigyë Jyobaa xymyëwingonët. Duˈunën ttuunyë Shirley tuˈugë nmëguˈukˈäjtëm mëdiˈibë tsënaapy Papúa Nueva Guinea ko tpatyë amay jotmay. b Jantsy ayoowdëbë nety mëdë fyamilyë, ets näˈäty, ojts tsyiptakxëdë tpäättët ja kyaˈay yˈukën. Tëgok ojts yˈamajtsk jyotmajtskë extëm ja myëgaˈax yˈanmääyë: “Mijts mjënäˈäny ko yëˈë mbudëjkëbë Diosë yˈespiritë santë. Per ¿wiˈixën mbudëkëty? Duˈunyëmëts mˈayowdë. Nëgoobë mxëëw mdiempë xyajtëgoy mä mˈëwaˈkxy mgäjpxwaˈkxy”. Shirley jyënaˈany ko ta wyinmääy pënë Jyobaa jantsy mëmääy mëdäjëbë netyë mëdë fyamilyë. Yëˈë, tnimaytyaˈaky: “Tëtsë nety nmënuˈkxtaˈagyë Jyobaa etsëts të  ndukmëtmaytyaˈaky wiˈixëtsë nety nnayjyawëty. Duˈunyëmëts ojts ngajpxyë Biiblyë ets ja ëxpëjkpajn, duˈunyëmëts ojts nanduˈun nˈëwaˈkxy ngäjpxwaˈkxy ets kyajts ndëgoyˈajty nituˈugë reunyonk”. Ok, ta Shirley tpëjkyë kuentë ko Jyobaa yëˈë nety ijxˈijt kuentëˈäjtëp mëdë fyamilyë, pes kyaj yˈayuuˈäjttë nituk xëëw ets duˈunyëm yajpattë agujk jotkujk. Yëˈë tnimaytyaˈaky: “Nˈijxëts wiˈixë Jyobaa tˈatsoowëmbijtyëtsë nuˈkxtakën” (1 Tim. 6:6-8). Pën mijts duˈunyëm xytyuunˈadëˈëtsy tijaty mbudëjkëp parë niˈigyë Jyobaa xymyëwingony, yëˈë mbudëkëyanëp parë kyaj xymyëjagamgaˈagëdë Jyobaa ko nety xypyaatyë amay jotmay o ko pën myaˈˈamajtsk myajjotmajtskëdët.

8. ¿Wiˈix nääk jyattë nmëguˈukˈäjtëm mëdiˈibë yajnëjkxtëbë jëjpˈamˈäjtën mä Diosë kyäjpn?

⁸ Näˈäty, mä raadyë, telebisionk o mä internet xynyiwäämbajtëmë nmëtsipˈäjtëm o yajniwäämbajttëbë nmëguˈukˈäjtëm mëdiˈibë yajnëjkxtëbë jëjpˈamˈäjtën mä Diosë kyäjpn (Sal. 31:13). Të nanduˈun näägë nmëguˈukˈäjtëm yajtsum yajmatstë ets yajniwäämbattë ko yajjäˈäyˈoˈktëp. Mä primer siiglë nanduˈunë apostëlë Pablo yajniwäämbejty ets yajtsuumy yajmäjtsy, oyë nety nitii të tkatuundëgoy. Per ¿ti tyuundë ja Diosmëduumbë mä taabë tiempë?

9. ¿Ti tyuundë näägë Diosmëduumbë ko apostëlë Pablo yajtsuumy yajmäjtsy?

⁹ Nääk ja Diosmëduumbëty nyikaktë apostëlë Pablo ko yˈijty tsumy jam Roma (2 Tim. 1:8, 15). ¿Yëˈëdaa ko ttuktsoytyuundë mët ko Pablo duˈunë jäˈäy yajnäjxë extëm tuˈugë yajjäˈäyˈoˈkpë? (2 Tim. 2:8, 9). ¿O waˈandaa mët ko ttsëˈkëdë jäˈäy këdiibë nanduˈun nyibëdëˈëgëdët? Kyaj oytyim yajnijawë, per seguurë ko Pablo axëëk jyantsy nyayjyäˈäwë. Pes yëˈë të nety tmëmadaˈagyë amay jotmay mëdë myëguˈuktëjk ets axtë të netyë jyukyˈäjtënë tpëjktaˈaky oˈkën jëjpˈam (Apos. 20:18-21; 2 Kor. 1:8). Oy ko ninäˈä duˈun ngaˈˈadëtsëm extëmë yäˈädë Diosmëduumbëty mëdiˈibë myastuttë apostëlë Pablo ko dyajtëgoyˈajtyë naybyudëkë. ¿Ti tsojkëp njamyajtsëm ko yajnibëdëˈëgëdë nmëguˈukˈäjtëm mëdiˈibë yajnëjkxtëbë jëjpˈamˈäjtën mä Diosë kyäjpn?

10. ¿Ti tsojkëp njamyajtsëm ko yajnibëdëˈëktëdë nmëguˈukˈäjtëm mëdiˈibë yajnëjkxtëbë jëjpˈamˈäjtën mä Diosë kyäjpn?

 ¹⁰ Jamyats tiko nyajnibëdëˈkëm ets pënën duˈun xytyuˈunëm. Mä 2 Timotee 3:12 jyënaˈany: “Nidëgekyë diˈibaty jikyˈatandëp wäˈäts mä Jesukristë, yajpajëditandëp”. Satanás yëˈë duˈun nyibëdëˈkypy ja nmëguˈukˈäjtëm mëdiˈibë yajnëjkxtëbë jëjpˈamˈäjtën. Ets yëˈë jyatsojkypy parë yäˈädë nmëguˈukˈäjtëm tmastuˈuttëdë Jyobaa ets nanduˈun xyˈatsëˈëgëyäˈänëm (1 Peed. 5:8).

11. ¿Ti xytyukniˈˈijxëm extëm tijaty ttuunyë Onesíforo? (2 Timotee 1:16-18).

¹¹ Pudëkëdë duˈunyëm ja mmëguˈuktëjk mëdiˈibë yajnëjkxtëbë jëjpˈamˈäjtën mä Diosë kyäjpn (käjpxë 2 Timotee 1:16-18). Mä primer siiglë Onesíforo pyudëjkë Pablo ko yˈijty tsumy matsy. Duˈunë Pablo nyimaytyakë: “Kyaj tsyoytyuuny oyëts njaˈijty tsimy”. Onesíforo yˈëxtääyë apostëlë Pablo, ets ko tpaty, ta tmooy tijatyë nety yajtëgoyˈajtypy. ¡Onesíforo pyëjktakë jyukyˈäjtën oˈkën jëjpˈam! ¿Ti xytyukniˈˈijxëm? Ko kyaj mbäät ntsëˈëk njäˈäwëm, nˈokpudëjkëm ja nmëguˈukˈäjtëm mëdiˈibë yajnibëdëˈktëp. Nˈoktuˈunëmë mëjääw parë ntsiptuˈunëm ets nbudëjkëm (Prov. 17:17). Ja nmëguˈukˈäjtëm yajtëgoyˈäjttëbë naybyudëkë ets tsojkëp ndukˈijxëm ko ntsojkëm.

12. ¿Ti xytyukniˈˈijxëm ja nmëguˈukˈäjtëm mëdiˈibë Rusia?

¹² Nˈokwinmäˈäyëm ti tyuundëp ja nmëguˈukˈäjtëm mëdiˈibë Rusia ko yajtsumdë ja myëguˈuktëjk mëdiˈibë mëët tuˈugyë Diosmëdundë. Ko ja jyotmay yaˈixäˈändë, ta ja nmëguˈukˈäjtëm jap jyäˈttë parë tpudëkëdë myëguˈuktëjk. ¿Ti xytyukniˈˈijxëm? Ko kyaj tiko ntsëˈk njäˈäwëm ko ja nmëguˈukˈäjtëm mëdiˈibë yajnëjkxtëbë jëjpˈamˈäjtën mä Diosë kyäjpn, yajnibëdëˈëktët, yajniwäämbattët o yajtsum yajmatstët. Nˈokninuˈkxtakëm ets nˈokkuentëˈäjtëm ja fyamilyëty. Nˈokˈëxtäˈäyëm ja winmäˈäny wiˈix mbäät nbudëjkëm (Apos. 12:5; 2 Kor. 1:10, 11).

13. ¿Wiˈix mbäät xytyukmëjagamgakëmë Jyobaa ets ja nyax kyäjpn ko jäˈäy xynyëxik xytyukxikëm?

¹³ Mbäädë jëëky mëguˈuk mëdiˈibë kyaj yˈëxpëktë etsë nmëguˈukˈäjtëm mëdiˈibë mëët nduˈunëm o nˈeskuelëˈäjtëm, xynyëxik xytyukxikëm mët ko nmëmëdoˈowëm ja Diosë yˈanaˈamën o ko nˈëwäˈkx ngäjpxwäˈkxëm (1 Peed. 4:4). Waˈan xyˈanmäˈäyëm: “Jantsy oy mjäˈäyˈaty, perë mrelijyonk nëgoo tijaty ttimyyajkubojknë ets näˈäbë tsyondaknë”. Mbäät nanduˈun näägë jäˈäy xyˈëbat xykyäjpxpatëm mët ko kyaj nˈëboˈkx ngäjpxpoˈkxëm ja nmëguˈukˈäjtëm mëdiˈibë kyaj yˈokTestiigëˈäjnë ets xyˈanmäˈäyëm: “¿Wiˈixën ko mjënäˈändë ko mtsojktëbë jäˈäy?”. Ko pën duˈun xyˈanmäˈäyëm, mbäädë net xyaˈˈamajtsk xyajjotmajtskëm ets nnayajtëˈëwëm: “¿Nëgoodaa Jyobaa tijaty ttimyyaˈoˈktëy? Ets ¿nëgoodaa nyax kyäjpn tijaty ttimyyajkuboky?”. Pën mˈamajtsk mjotmajtskëp, ¿ti mbäät xytyuny parë kyaj xymyëjagamgaˈagëdë Jyobaa etsë nyax kyäjpn?

14. ¿Ti mbäät nduˈunëm ko jäˈäy xynyëxik xytyukxikëm ko nmëmëdoˈowëmë Diosë yˈanaˈamën? (Salmo 119:50-52).

¹⁴ Nˈoktuˈunëm tijatyë Jyobaa xytyukˈanaˈamëm. Job myëmëdoowë Diosë yˈanaˈamën, oyë jäˈäy nyëxik tyukxikë. Niduˈuk mëdiˈibë nayajnäjxë extëmë myëtnaymyaayëbë ojts jyatukmëbëkäˈänyëty ko Dios kyaj tkuentëty pënë Job tyuumpy ti oy o ti kaˈoy (Job 4:17, 18; 22:3). Perë Job kyaj tmëbëjky. Yëˈë nyijäˈäwëbë nety ko tyukˈoyˈajtypy ko tmëmëdoyë Jyobaa yˈanaˈamën mä tnigajpxy ti oy ets ti kaˈoy, päätyën tmëmëdooy. Kyaj tnasˈijxë ets pën tyukmastuˈudëdë Jyobaa (Job 27:5, 6). ¿Ti xytyukniˈˈijxëm? Kyaj nasˈijxëm etsë jäˈäy mëdiˈibë xynyëxik xytyukxikëm xyaˈˈamajtsk xyajjotmajtskëm pën oy ko nmëmëdoˈowëm ja Diosë yˈanaˈamën  o kyaj. Nˈokwinmäˈäyëm wiˈixën ndukˈoyˈäjtëm ko nmëmëdoˈowëmë Diosë yˈanaˈamën, pes të nˈijxëm kanäkˈok wiˈixën xypyudëjkëm. Nˈokpëjktakëmë winmäˈäny parë ninäˈä ngamastutëmë Jyobaa kyäjpn mëdiˈibë tijaty tyuumpy extëm yëˈë tniˈanaˈamë. Pääty, ninäˈä mbäät ngamëjagamgakëmë Jyobaa oy nuˈunë jäˈäy xynyëxik xytyukxikëm (käjpxë Salmo 119:50-52).

15. ¿Ti pudëjkë Brizit parë tmëmadaky ko nyëxik tyukxikëdë ja jyëëky myëguˈuk?

¹⁵ Min nˈokˈijxëm wiˈix jyajty kyëbejtyë Brizit, tuˈugë nmëguˈukˈäjtëm mëdiˈibë tsënaapy India. Yëˈë nëxik tukxikëdë ja jyëëky myëguˈuk mët ko Tyestiigëty. Ja nyëbejty 1997, ko waanë tiempë nyajxy, ta ja myëmëjjäˈäy mëdiˈibë kyaj Tyestiigëty dyajtëgooyë tyuunk. Pääty jyënany ja myëmëjjäˈäy ko nyëjkxäˈäny tsënaabyë mä ja tyääk tyeety yˈittë. Per ko Brizit jam jyäjttë, duˈunyëm tmëdäjttë jotmay, pes ja myëmëjjäˈäy kyaj tpatyë tyuunk, pääty yëˈë tyëjkë tuumbë sëmään abety parë tˈixyë fyamilyë. Jantsy jagam ojts wyëˈëmxëty ja tuˈukmujkën, ja naa 350 kilometrë. Ja myëmëjjäˈäyë jyëëky myëguˈuk tukjotˈambëjkëdë ko yëˈë Tyestiigëty, jantsy axëëk yajtuunyë Brizit, pääty jatëgok jyëmbijttë mä tyëjk mëdë fyamilyë. Per ta ajotkumonë yˈoˈky ja myëmëjjäˈäy, ets ok, ta niduˈugë nyëëx mëdiˈibë mäjmajtskë jyëmëjt pyatë kanser. Brizit mëjwiin kajaa tpatyë amay jotmay, yaˈˈanmääy ko pääty axëëk jyat kyëbattë mët ko Tyestiigëty. Per yëˈë duˈunyëm ttukˈijxpejtyë Jyobaa etsë nyax kyäjpn.

16. ¿Wiˈixë Brizit të yajkunuˈkxy ko kyaj të tmastuˈutyë Jyobaa ets ja nyax kyäjpn?

¹⁶ Komë Brizit jantsy jagamë nety wyëˈëmxëty ja kyongregasionk. Ta ja sirkuitë yˈanmääyë ko mbäät jamyë yˈëwaˈkxy kyäjpxwaˈkxy mä tsyëënë ets jamyë mä tyëjk ryeunyonkˈattët. Brizit ta wyinmääy ko tsiptäˈäganxëp, per ta duˈun ttuuny extëm ja sirkuitë yˈanmääyë. Ta tyëjkë ëwäˈkx käjpxwäˈkxpë, ttuuntsondaky ja reunyonk mä tyëjk ets yˈëxpëjktë tuk familyë mët ja nyëëxëty. ¿Wiˈix wyimbëtsëëmy? Brizit, jantsy nimayë jäˈäy tpaty mëdiˈibë ëxpëkandëp, ets nimay nyëbajttë mëdiˈibë nety yaˈëxpëjktëp. Mä jëmëjt 2005, ta tyuuntsondaky prekursoora  regulaar. Mëjwiin kajaa ojts yajkunuˈkxy ko ttukjotkujkˈäjtyë Jyobaa ets ja nyax kyäjpn. Tyam, ja nyëëxëty jantsy oy Diosmëdundë ets mä ja yˈit lyugäär tap majtskë kongregasionk. Brizit ijtpën seguurë ko Jyobaa yëˈëjën mëdiˈibë të myoˈoyëtyë jot mëjääw parë tmëmadaˈaky ja amay jotmay ets ko ja jyëëky myëguˈuk nyëxiˈik tyukxiˈigëdë.

17. ¿Wiˈix tyamë jot winmäˈäny të nbëjktakëm?

¹⁷ Satanás duˈun xyajwinmayäˈänëm ko Jyobaa xymyastutëm ko nbatëmë amay jotmay ets ko kyaj njotkujkˈäjtëm ko ndukˈijtëmë nyax kyäjpn. Ko ja nmëguˈukˈäjtëm mëdiˈibë yajnëjkxtëbë jëjpˈamˈäjtën mä Diosë kyäjpn yajnibëdëˈëktë, yajniwäämbattë o yajtsum yajmatstë, Satanás tsyojkypy parë xytyuktëjkëmë tsëˈëgë. Ja tuk pëky mëdiˈibë Satanás yajtuumpy, yëˈë ko jäˈäy xynyëxik xytyukxikëm parë nˈamajtsk njotmajtskëm ko kyaj yˈoyëty tijatyë Jyobaa xytyukˈanaˈamëm ets ja nyax kyäjpn. Per ëtsäjtëm, nnijäˈäwëm tijatyënë Satanás yajtuumpy ets oy ko kyaj nasˈijxëm parë xywyinˈëˈën xywyinxäjëm (2 Kor. 2:11). Nˈokpëjktakëmë jot winmäˈäny parë kyaj xywyinˈëˈën xywyinxäjëmë Satanás ets kyaj nmastutëmë Jyobaa mët ja nyax kyäjpn. Nˈokjamyajtsëm ko yëˈë ninäˈä xykyamastudäˈänëm (Sal. 28:7). Pääty ¡kyaj nasˈijxëm ets nitii Jyobaa xykyatukmastutëm! (Rom. 8:35-39).

18. ¿Ti nˈixäˈänëm mä jatuˈukpë artikulo?

¹⁸ Mä yäˈädë artikulo të nˈijxëm tijaty jotmay mbäät nwinguwäˈkëm, ets wiˈix mbäät xyaˈˈamajtsk xyajjotmajtskëm parë kyaj nekytyukjotkujkˈäjtëmë Jyobaa etsë nyax kyäjpn. Per mä jatuˈukpë artikulo, yëˈë nˈixäˈänëm wiˈix mbäät nwinguwäˈkëmë amay jotmay mëdiˈibë këxëˈkp mä kongregasionk.