JA LEY diˈibë Moisés yajmooy, jënäämp ijty ko mbäät näˈätyë jäˈäy ttukkäjpxpetyë Dios ko ti twandäˈägët. Per ja tiempë mä Jesus jyukyˈajty yä Naxwiiny, të nety mayë judiyëtëjk tkostumbrëpëktë parë ttukkäjpxpattë Dios mä oytyim tiijëty. Duˈun ijty dyajtëyˈäjtëndëkëdë ja yˈayuk. Perë Jesus majtskˈok jyënany ko kyaj yˈoyëtyë tyäˈädë kostumbrë. Ets ta net jyënany: “Ko mjënäˈänët Oy, yëˈë yˈandijpy ko Oy, ko mjënäˈänët Kyaj, yëˈë yˈandijpy ko Kyaj” (Mat. 5:33-37, TNM; Mat. 23:16-22).

Tuˈugë diksionaaryë diˈib yajniwij yajnikejpyë Biiblyë, jyënany ko mä ja Talmud miimp kanäk pëky diˈib xytyukˈijxëm ko ja judiyëtëjk xëmë ijty ttukkäjpxpattë Dios. Mä tyäˈädë Talmud yajxon tnigajpxy diˈibë wandakën mbäät yajkuytyuny ets diˈibë kyaj nyekyjëjpˈamëty.

Per kyaj yëˈëyë Jesus duˈun jyënany ko kyaj yˈoyëty ndukkäjpxpajtëmë Dios ko ti nwandakëm. Pesë Flavio Josefo, ja judiyë diˈib ijty tijaty kyujäˈäyëp, duˈun tnimaytyaky tuk grupë judiyë diˈib tyukˈijtëdëp tuˈugë relijyonk: “Kyaj ttukkäjpxpattë Dios ko ti twandäˈäktë, pes wyinmaytyë ko mas axëëk ets kyaj yˈokduˈunˈäjnë ko jäˈäy yˈandaˈaky. Wyinmaytyë ko niˈamukë pënaty tyukkäjpxpajttëbë Dios parë jäˈäy tmëbëktët wiˈix jyënäˈändë, yëˈë mët ko yˈandäˈäktë”. Ets tuˈugë judiyëtëjkë lyiibrë diˈib xyëwˈäjtypy Eclesiástico o Sabiduría de Jesús Ben Sirá, naduˈundëkë jyënaˈany: “Tadë jäˈäy diˈib xëmë tyukkäjpxpejtypyë Dios ko ti twandaˈaky, të tsyäˈämënë axëkˈäjtën” (23:11). Pääty diˈibë Jesus myaytyäˈägan, yëˈë ko kyaj yˈoyëty ndukkäjpxpajtëmë Dios mä diˈib kyaj tyim jëjpˈamëty. Pën xëmë nmaytyakëm tëyˈäjtën, kyaj tyim tsokyëty ndukkäjpxpajtëmë Dios parë jäˈäy tmëbëkët wiˈix nˈanmäˈäyëm.