ARTIKULO DIˈIB YAˈËXPËJKP 41
Wiˈix mbäät nbudëjkëm ja diˈib nyaˈëxpëjkëm parë nyëbatët (myëduk pëky) | Diˈib yaˈëxpëjkp
“Miitsëtyë dëˈën myaˈijxëdëp ko mˈijttëp extëm tuˈugë neky diˈibë Kristë jyaay jaˈagyëjxm diˈibëts nduun mä miitsëty” (2 KOR. 3:3).
ËY 78 Nˈoktukniˈˈijxëm ja Diosë yˈAyuk
DIˈIB YAJNIMAYTYÄˈÄGÄÄMP *
Nitii duˈun xykyayajnayjyäˈäwëm agujk jotkujk ko mä nduˈukmujkëm nyëbety tuˈugë jäˈäy diˈib të tˈëxpëkyë Biiblyë ets diˈib tsojkëndëp niˈamukë nmëguˈukˈäjtëm. (Ixë parrafo 1).
1. ¿Wiˈix xypyudëjkëmë 2 Korintʉ 3:1-3 parë nˈijxëm ko nitii duˈun kyaˈoyëty ko nbudëjkëm tuˈugë jäˈäy diˈib nyaˈëxpëjkëm ets nyëbatët? (Ixë dibujë diˈib miimp mä rebistë nyiˈak).
¿WIˈIX nnayjyäˈäwëm ko mä nduˈukmujkëm nyëbety tuˈugë jäˈäy diˈib të yajmëyoˈoy? Seguurë ko jantsy jotkujk (Mat. 28:19). Per mas jotkujk nnayjyäˈäwëm pën ëtsäjtëm të nyaˈëxpëjkëm (1 Tes. 2:19, 20). Pënaty näämnëm të nyëbattë, duˈunxyëp “extëm tuˈugë neky diˈibë Kristë” të tjäˈäy mä yajnimaytyaˈaky jantsy oy ja myaˈestrë ets ja nmëguˈukˈäjtëm diˈib mëët yoˈoytyë reunyonk (käjpxë 2 Korintʉ 3:1-3).
2. 1) ¿Ti tsojkëp nnayajtëˈëwëm, ets tiko? 2) ¿Ti yˈandijpy nyaˈëxpëjkëm tuˈugë jäˈäy? (Ixë notë).
2 Jantsy jotkujk nnayjyäˈäwëm ko nuˈun të nyaxy taxk jëmëjt ja të yajnigajpxy yˈëxpëktë jäˈäy poˈoboˈo, * naa 10 miyongën abëtsemy nyaxwinyëdë. Ets nuˈun të nyaxyë tadë tiempë, duˈunxyëp extëm të nyëbattë jëmëjt jëmëjt, naxy 280 milë jäˈäy. Extëm nˈijxëm, miyonkˈamë jäˈäy yˈakwëˈëmy diˈibxyëp mbäät nyëbattë. Per ¿wiˈix mbäät nbudëjkëm? Jyobaa maˈkxtujkp ets yˈaknasˈijxëp parë jäˈäy tpanëjkxtëdë Jesus. Perë tyäˈädë tiempë këjxnëp, pääty, tsojkëp nˈaktuˈunëm nuˈun nmadakëm ets nbudëjkëmë jäˈäy parë yˈakwimbajtkojtët etsë net nyëbattët (1 Kor. 7:29a; 1 Peed. 4:7).
3. ¿Ti nˈixäˈänëm mä tyäˈädë artikulo?
3 Kom yajtukjotëgoyäämbë tyäˈädë tuunk parë nbudëjkëmë jäˈäy ets nyëbattët, pääty ja Diˈib wyoowˈyoˈoytyëbë Jyobaa tyestiigëty të dyajtëwdë mäjatyë Betel yajpääty wiˈix mbäät yajpudëkë jäˈäy parë nyëbattët. Mä tyäˈädë artikulo ets mä jatuˈukpë, yëˈë nˈixäˈänëm wiˈix mbäät xypyudëjkëm tijaty tyuundëp näägë nmëguˈukˈäjtëm diˈib tuundëp sirkuitë, misioneerë etsë prekursoorëty diˈib jeky kujk tyuunëdë (Prov. 11:14; 15:22). * Extëm tnimaytyäˈägäˈändë, yëˈë xytyukˈixäˈänëm ti mbäät ttuny ja maˈestrë ets ja jäˈäy diˈib ëxpëjkp parë mbäät pyudëkëty tijaty yajtukniˈˈijxëp. Mä tyäˈädë artikulo nˈixäˈänëm mëgoxk pëky ti mbäät ttuny ja diˈib nyaˈëxpëjkëm parë nyëbatët ets wiˈix mbäät pyudëkëty ja diˈib yaˈëxpëjkëp.
NˈOKˈYAˈËXPËJKËM SËMÄÄN SËMÄÄN
Nˈokˈyajtëˈëwëm ja diˈib nyaˈëxpëjkëm pën mbäät muum mëët naxwaˈtsëm parë nnimaytyakëmë Biiblyë. (Ixë parrafo 4 axtë 6).
4. ¿Ti tsojkëp nyaˈijtëm winmäˈänyoty ko jäˈäy nyaˈëxpëjkëm jyënˈagëˈëy tyëjkˈagëˈëy?
4 Mayë nmëguˈukˈäjtëm yaˈëxpëjktëbë jäˈäy jyënˈagëˈëy tyëjkˈagëˈëy ets oy ko duˈun dyajtsondäˈäktë, per kyaj mbäät jeky duˈun mëët yˈëxpëktë ets nan kyaj mbäät duˈun yˈëxpëktë sëmään sëmään. Parë tˈakpudëkëyäˈändë, ta net nääk diˈib yˈamdoowdëbë jäˈäy ja nyumero de telefënë, ta tmëgäjpxtë o ttuknigaxtë näˈäganäˈätyë mensaje parë ttukmëtmaytyäˈäktë Biiblyë. * Per mbäädë net nyaxy poˈoˈam ets kyaj wyimbatët ja jäˈäy. Pën kyaj nëgoo nasˈijxëm ja xëëw tiempë ets ja jot mëjääw, tsip parë tyäˈädë jäˈäy nyaywyandäˈägëdët mä Jyobaa ets nyëbatët.
5. Ja ijxpajtën diˈibë Jesus myaytyak mä Lukʉs 14:28-33, ¿wiˈix mbäät nyajtuˈunëm parë nbudëjkëm ja jäˈäy diˈib nyaˈëxpëjkëm?
5 Tëgok, ojtsë Jesus tpëjtaˈaky majtskë ijxpajtën parë ttukˈixy ja diˈib panëjkxanëp ti mbäät ttuny. Yëˈë myaytyak tuˈugë jäˈäy diˈibë nety yajpëdëˈëgaampy tuˈugë mëj potsy ets tuˈugë rey diˈib nëjkxäämp tsiptuumbë. Jesus jyënany ko ja diˈib yajpëdëˈëgaampy ja mëj potsy, tsojkëbë nety nyaxwaatsët ets ttunët ja kyuentë parë tˈixët pën mbäät tkojˈabety, ets ja rey jawyiin nyaxwaatsët parë twinmayët pën madäˈägëp ja syoldäädëtëjk mä nëjkx tsyiptunäˈändë (käjpxë Lukʉs 14:28-33). Ko Jesus tmaytyakyë tyäˈädë ijxpajtën, nyijäˈäwëbë nety ko pënaty panëjkxanëp, tsojkëp yajxon twinmayët ti mbäät ttuny parë pyanëjkxëdët. Ëtsäjtëm, mbäädë jäˈäy nbudëjkëm parë duˈun ttunët ko nˈanmäˈäyëm ets sëmään sëmään yˈëxpëkët. ¿Wiˈix mbäät nbudëjkëm?
6. ¿Ti mbäät nduˈunëm parë wyimbatët ja jäˈäy diˈib nyaˈëxpëjkëm?
6 Tuk pëky wiˈix mbäät nbudëjkëm, yëˈë ko nyajjajkëm mä mëët nˈëxpëjkëm jyënˈagëˈëy tyëjkˈagëˈëy. Extëm nˈokpëjtakëm, tëgok tëgok ninëjkxëm, oy ko kyaj jeˈeyë ndukmëtmaytyakëm tuˈugë tekstë. Ets ko nety të tˈijxwëˈëmnë ko jajkëm, ta net nyajtëˈëwëm pën mbäät muum mëët naxwaˈtsëm parë nˈakmaytyakëm. Extëm xyˈatsoˈowëm, ta nbëkäˈänëmë kuentë pën myëjpëjtakypy ko tˈëxpëkyë Biiblyë. Ets ok, mbäädë net nyajtëˈëwëm pën ëxpëkäämp naa majtskˈokën tuˈukpë sëmään, tyäˈädë yëˈë pudëkëyanëp parë pojën wyimbatët. Per min nˈokˈijxëm tijaty mbäät tˈaktuny.
JAWYIIN YˈËXPËKËT JA MAˈESTRË TËGOK TËGOK MËDË JÄˈÄY YˈËXPËKÄˈÄNËT
Nˈokˈëxpëjkëm yajxon ti mët ja jäˈäy nˈëxpëkäˈänëm ets nˈoktukniˈˈijxëm parë nanduˈun ttunët. (Ixë parrafo 7 axtë 9).
7. ¿Wiˈix mbäät jawyiin yˈëxpëky ja maˈestrë tëgok tëgok mët ja jäˈäy yˈëxpëkäˈänët?
7 Tëgok tëgok mëdë jäˈäy nˈëxpëkäˈänëm, jëjpˈam ets ja maˈestrë jawyiin yˈëxpëkët. ¿Wiˈix? Ko tkäjpxët ti mëët ja jäˈäy tˈëxpëkäˈäny ets tˈijxtäˈäyët ja tekstë. Nan tsojkëp ttukwijtstuˈudët diˈib mas jëjpˈam yajmaytyäˈägäämp. Tˈixët ja titulo, subtitulo, ja yajtëˈëwën ets ja tekstë diˈib jënäämp “käjpxë”. Nan oy ko tˈixët ja dibujë etsë bideo diˈib mbäät pyudëkëty parë tnimaytyäˈägët ti mëët ja jäˈäy tˈëxpëkäˈäny. Ta net twinmayët wiˈix yaˈixy yajpääty ja jäˈäy ets wiˈix mbäät ttukmëtmaytyaˈaky wingëjxy parë tjaygyukët etsë net tkuytyunët (Neh. 8:8; Prov. 15:28a).
8. Extëmë Pablo jyënany mä Kolosʉ 1:9, 10, ¿wiˈix mbäät ninuˈkxtakëm ja jäˈäy diˈib nyaˈëxpëjkëm?
8 Ja tuk pëky diˈib mbäät nduˈunëm, yëˈë ko ndukmëtmaytyakëmë Jyobaa wiˈix yaˈixy yajpääty ja jäˈäy diˈib nyaˈëxpëjkëm. Nˈokˈamdoˈowëm parë xypyudëjkëm ets nyajtuˈunëmë Biiblyë extëm mbäät yˈajäˈt jyotjäˈtëty (käjpxë Kolosʉ 1:9, 10). * Nˈokwinmäˈäyëm pën jam ti diˈib mbäät tsyiptakxëty tjaygyukët o tkupëkët. Nˈokˈyaˈijtëm winmäˈänyoty ko päätyë tyäˈädë jäˈäy nbudëkëyäˈänëm parë nyëbatët.
9. ¿Wiˈix mbäät nbudëjkëm ja jäˈäy parë kontiempë yˈëxpëkët?
9 ¿Ti ntsojkëm ttunët ja jäˈäy diˈib jëjwitsë nyaˈëxpëjkëm? Dyajtsobäädët tijatyë Jyobaa mëdë Jesus të tyukmëdunëdë ets tˈaknijawëyäˈänët mas niˈigyë (Mat. 5:3, 6, TNM). Ja jäˈäy diˈib nyaˈëxpëjkëm, tsojkëp jamyë ja jyot wyinmäˈäny tpëjtäˈägët mä tijaty yajtukniˈˈijxëp parë mbäät pyudëkëty. Parë duˈun ttunët, jëjpˈam ndukjamyajtsëm ko tëgok tëgok mëët nˈëxpëkäˈänëm, tsojkëp kontiempë yˈëxpëkët ets twinmayët wiˈix mbäät tkuytyuny. Mbäät nimajtsk mëët nˈëxpëjkëm parë ndukniˈˈijxëm wiˈixën këˈëm yˈëxpëkët. * Nˈoktukniˈˈijxëm wiˈix tpäädët mä yaˈˈatsoowëmbity ets waˈan tˈageetsy tuˈuk majtskë ayuk diˈib pudëkëyanëp parë tjamyatsët wiˈix yaˈˈatsoowëmbitäˈäny. Ta net nˈanmäˈäyëm parë tnimaytyäˈägët mëdë kyëˈëm ääw kyëˈëm ayuk, net nˈijxëm pën të tjaygyukë diˈib mëët të nˈëxpëjkëm. Per min nˈokˈijxëm ja myëdëgëk pëkypyë ti mbäät ttuny ja jäˈäy diˈib nyaˈëxpëjkëm parë nyëbatët.
NˈOKTUKNIˈˈIJXËM PARË BOM BOM TMËNUˈKXTÄˈÄGËDË JYOBAA
Nˈoktukniˈˈijxëm ja jäˈäy parë tmënuˈkxtäˈägëdë Jyobaa. (Ixë parrafo 10 etsë 11).
10. ¿Tiko jyëjpˈamëty ets ja jäˈäy diˈib nyaˈëxpëjkëm tkäjpxët bom bomë Biiblyë, ets ti mbäät ttuny parë pyudëkëdët?
10 Kyaj jeˈeyë tsyokyëty ets ja jäˈäy yˈëxpëkët sëmään sëmään, ta ja tuk pëky diˈib mbäät këˈëm ttuny tuˈuk tuˈugë xëëw. ¿Ti? Tsojkëp tmënuˈkxtäˈägëdë Jyobaa ets tmëdoowˈitët wiˈix myëgajpxyëty. Ko tkäjpxëdë Biiblyë bom bom, duˈunë nety tmëdoy wiˈixë Jyobaa yˈanëˈëmxëty (Jos. 1:8; Sal. 1:1-3). Nˈoktukniˈˈijxëm wiˈix mbäät tpanëjkxyë Programë mä yajkajpxyë Biiblyë diˈib miimp mä jw.org, tyäˈädë programë mbäät nyajpëtsëˈëmëm. * Ets parë tyäˈädë jäˈäy pyudëkëdët mas niˈigyë tijaty kyajpxypy mä Biiblyë, oy ko nˈanmäˈäyëm ets tpawinmayët ti tukniˈˈijxëp mä Jyobaa ets wiˈix mbäät tkuytyuny mä jyukyˈäjtën (Apos. 17:11; Sant. 1:25).
11. ¿Wiˈix mbäät tjaty nyuˈkxtäˈägët ja jäˈäy diˈib nyaˈëxpëjkëm, ets tiko jyëjpˈamëty parë xëmë duˈun ttunët?
11 Nˈoktukniˈˈijxëm ja jäˈäy diˈib nyaˈëxpëjkëm parë bom bom tmënuˈkxtäˈägëdë Jyobaa. ¿Wiˈix? Ko winë ääw winë jot ninuˈkxtakëm mä mëët ngaˈëxpëjktsondakëm ets ko nety nyajkëjxënë. Ko duˈun tmëdowët, ta nanduˈun tmënuˈkxtäˈägäˈänyë Jyobaa winë ääw winë jot xyëëwgyëjxmë Jesukristë (Mat. 6:9; Fwank 15:16). Nˈokpawinmäˈäyëm nuˈunën tmëwingonäˈänyë Jyobaa ko tmënuˈkxtäˈägët ets ko tkäjpxët bom bomë Biiblyë, pes jap tmëdowäˈäny wiˈix myëgajpxyëty (Sant. 4:8). Ko duˈun tkostumbrëpëkët, yëˈë pudëkëyanëp parë nyaywyandäˈägëdët mä Jyobaa etsë net nyëbatët. Min nˈokˈijxëm ti ak pudëkëyanëp parë duˈun ttunët.
NˈOKPUDËJKËM PARË NYAYMYAAYBYËKËDËT MËDË JYOBAA
12. ¿Wiˈix mbäät nbudëjkëm ja jäˈäy diˈib nyaˈëxpëjkëm parë nyaymyaaybyëkëdët mëdë Jyobaa?
12 Tijatyë jäˈäy ndukniˈˈijxëm kyaj mbäät jeˈeyë jyaˈty mä jyot wyinmäˈäny, tsojkëbën jyäˈtët mä jyot kyorasoon. ¿Tiko? Yëˈko ja korasoon, jaˈa njënäˈänëm, tijaty njäˈäwëm, tijaty ndunäˈänëm ets tijaty ntsojkënyëˈäjtëm, yëˈë diˈib tijaty xytyuktunäˈänëm. Jesus may tijatyë jäˈäy ttukniˈˈijxë ets yëˈëjëty jyantsy yˈoymyëdoowdë. Per kyaj ojts pyanëjkxëdë mët ko tˈoymyëdoowdë, yëˈë duˈun ko tˈajäjt tjotjäjtë (Luk. 24:15, 27, 32). Ja jäˈäy diˈib nyaˈëxpëjkëm, tsojkëp tˈixëdë Dios extëm tuˈugë jäˈäy diˈib jantsy tamˈäjtp, diˈib mbäät tjawë extëmë Tyeety, extëmë Dyios ets extëmë Myëtnaymyaayëbë (Sal. 25:4, 5). Mä jam nyaˈëxpëjkëm, nˈoktukmëtmaytyakëm wiˈix jantsy oy jantsy tsuj jyaˈayˈatyë Dios (Éx. 34:5, 6; 1 Peed. 5:6, 7). Ets oyë nety ti mëët nˈëxpëjkëm, nˈoktukˈijxëm wiˈixënë Jyobaa jyaˈayˈaty. Nˈokpudëjkëm parë dyajtsobäädët nuˈunënë Jyobaa xytsyojkëm, yˈoyjyaˈayëty ets xypyaˈˈayoˈowëm. Jesus jyënany: “Tsokë Jyobaa mDios amumduˈukjot” mët ko “tyäˈädë yëˈë duˈun ja anaˈamënë mas mëjpë ets ja tim jawyiimbë” (Mat. 22:37, 38, TNM). Nˈokpudëjkëm ja jäˈäy diˈib nyaˈëxpëjkëm parë mas niˈigyë ttsokëdë Jyobaa.
13. Oknimaytyäˈäk mët tuˈugë ijxpajtën wiˈix mbäät nbudëjkëm ja jäˈäy diˈib nyaˈëxpëjkëm parë tnijawët wiˈixë Jyobaa jyaˈayˈaty.
13 Mä ngäjpx nmaytyakëm mët ja jäˈäy diˈib nyaˈëxpëjkëm, nˈoktukmëtmaytyakëm tiko ntsojkëmë Jyobaa. Tyäˈädë mbäät pyudëkëty parë tˈixët ko nan tsojkëp nyaymyaaybyëkëdët mëdë Jyobaa ets nanduˈun ttsokët (Sal. 73:28). Extëm nˈokpëjtakëm, ¿të xyˈajäjt xyjotjäjtëm diˈib të ngäjpxëm mä tuˈugë ëxpëjkpajn o mä tuˈugë tekstë diˈib nyimaytyakypyë Jyobaa jyaˈayˈäjtën, extëmë tsojkën, wijyˈäjtën, mëkˈäjtën ets wiˈix tijaty ttuny tëyˈäjtën mëët? Pën të, nˈoktukmëtmaytyakëm ja jäˈäy diˈib nyaˈëxpëjkëm ets nˈokˈanmäˈäyëm ko päätyën mëk ntsojkëmë Jyobaa Dios. Minë net nˈokˈijxëm ja myëmëgoxk pëkypyë ti mbäät tuny ja jäˈäy diˈib nyaˈëxpëjkëm parë nyëbatët.
NˈOKWOˈOWËM PARË NYËJKXËT REUNYONK
Nˈokwoˈow ja jäˈäy parë netyë nyëjkxët reunyonk. (Ixë parrafo 14 etsë 15).
14. Extëm jyënaˈanyë Ebreeʉsʉty 10:24, 25, ¿ti pudëkëyanëp ja diˈib nyaˈëxpëjkëm parë wyimbatët?
14 Niˈamukë njatsojkëm parë nyëbatët ja jäˈäy diˈib nyaˈëxpëjkëm. Tuk pëky wiˈix mbäät nbudëjkëm, yëˈë ko nwoˈowëm parë nyëjkxët reunyonk. Nmëguˈukˈäjtëm diˈib nëgooyë tjäjnëdë wiˈixë jäˈäy dyaˈëxpëktët, jyënäˈändë ko mbäät pojˈam wyimbety tuˈugë jäˈäy diˈib netyë nëjkxp reunyonk (Sal. 111:1). Näägë tyäˈädë nmëguˈukˈäjtëm tyukmëtmaytyaktëp ja jäˈäy diˈib yaˈëxpëjktëp ko jeˈeyë waanë tijaty tjatäˈändë ko yˈëxpëktët sëmään sëmään, per ko nyëjkxtët reunyonk mas kajaa tijaty tjatäˈändë. Nˈoktukwingugäjpxëmë Ebreeʉsʉty 10:24, 25 (käjpx) ets nˈoktukmëtmaytyakëm wiˈix pyudëkëyaˈanyëty ko nyëjkxët reunyonk. Nan mbäät ndukˈijxëmë Bideo ¿Ti yajtuump mä tyuˈukmuktë Jyobaa tyestiigëty? * Nˈokpudëjkëm ja diˈib nyaˈëxpëjkëm parë tpëjtäˈägëdë wyinmäˈäny ets jëjwitsë yoˈoyët reunyonk.
15. ¿Wiˈix mbäät nbudëjkëm ja jäˈäy diˈib nyaˈëxpëjkëm parë xëmë nyëjkxët reunyonk?
15 ¿Ti mbäät nduˈunëm pën ja jäˈäy diˈib nyaˈëxpëjkëm kyaj tyimnëjkxynyëm reunyonk o nëjkxp näˈäganäˈäty? Ko ndukmëtmaytyakëm tijaty näämnëm të nyaxy reunyonk ets ko njantsy nyiˈˈijt njantsy nyixoˈonëm. Ko duˈun nduˈunëm, mas niˈigyë pyudëkëyaˈanyëty ets kyaj ko jeˈeyë nwoˈowëm. Nˈokmoˈoyëm ja rebistë diˈibë nety yaˈëxpëjkp o Wiˈix njukyˈäjtëm ets nDiosmëduˈunëm. Nˈoktukˈijxëm ti yaˈëxpëkäämp ja tuk sëmään ets nˈokˈyajtëˈëwëm ti diˈib mas yˈoymyëdoopy. Tijaty yˈixaampy myëdowaampy ko nyëjkxët reunyonk, mas niˈigyë tˈoymyëdowäˈäny këdiinëm diˈib të tˈixy të tmëdoy mä wiinkpë relijyonk (1 Kor. 14:24, 25). Tyäˈädë jäˈäy yˈixyˈataambyë nmëguˈukˈäjtëm diˈib moˈoyanëdëbë oybyë ijxpajtën ets diˈib pudëkëyanëdëp parë nyëbatët.
16. 1) ¿Tijaty mbäät nduˈunëm parë nyëbatët ja jäˈäy diˈib nyaˈëxpëjkëm? 2) ¿Ti nˈixäˈänëm mä jatuˈukpë artikulo?
16 Extëm të nˈijxëm mä tyäˈädë artikulo, ¿tijatyë net mbäät nduˈunëm parë nyëbatët ja jäˈäy diˈib nyaˈëxpëjkëm? Nbudëjkëm ets tˈixët nuˈunën jyëjpˈamëty yˈëxpëkët, pääty oy ko nˈanmäˈäyëm parë sëmään sëmään mëët nˈëxpëjkëm ets tˈagäjpxët kontiempë tëgok tëgok mëët nˈëxpëkäˈänëm. Nˈoktukniˈˈijxëm parë bom bom tmënuˈkxtäˈägëdë Jyobaa ets nyaymyaaybyëkëdët mëët. Nan nˈokwoˈow nˈokwijtsëm parë nyëjkxët reunyonk. (Ixë rekuäädrë “ Ti mbäät ttuny ja diˈib nyaˈëxpëjkëm”). Mä jatuˈukpë artikulo nˈixäˈänëm mëgoxk pëky tijaty mbäät nduˈunëm parë nyëbatët ja jäˈäy diˈib nyaˈëxpëjkëm.
ËY 76 Tukmëtmaytyakëts wiˈix mnayjawëty
^ parr. 5 Ko ndukniˈˈijxëm tuˈugë jäˈäy, yëˈë yˈandijpy ko nbudëjkëm parë tyëgatsët ja wyinmäˈäny, tyëgatsët tijaty jyäˈäwëp ets tijaty tyuumpy. Etsë tekstë diˈib tuump mä tyäˈädë jëmëjt 2020, Matewʉ 28:19, xytyukjamyajtsëm ko jëjpˈam nyaˈëxpëjkëmë jäˈäy ets ndukniˈˈijxëm ti mbäät ttundë parë nyëbattët ets duˈun tpanëjkxtëdë Jesus. Mä tyäˈädë artikulo ets mä jatuˈukpë nnijawëyäˈänëm wiˈix mbäät mas oy nduˈunëmë tyäˈädë tuunk diˈib jantsy jëjpˈam yajtuump.
^ parr. 2 ¿TI YˈANDIJPY? Pën xëmë tuˈugë jäˈäy ndukmëtmaytyakëmë Biiblyë ets nyajtuˈunëm tuˈugë ëxpëjkpajn o jap nyajpëtsëˈëmëm diˈib ndukmëtmaytyakëm, nyaˈëxpëjkënë netyë tyäˈädë jäˈäy. Ets ¿näˈä mbäät ngujäˈäyëm mä informë? Ko nety majtskˈok mëët të nˈëxpëjkënë mä juˈunëm të ndukmëtmaytyakëm wiˈixë jäˈäy nyaˈëxpëjkëm ets ko nˈijxëm pën ëxpëjkˈadëˈëtsäämp.
^ parr. 3 Mä tyäˈädë artikulo ets mä jatuˈukpë nˈixäˈänëm tijaty myëmiinë Nuestro Ministerio del Reino, diˈib julië 2004 axtë mayë 2005 mä yajnimaytyakyë “Dirijamos estudios bíblicos progresivos”.
^ parr. 4 Ko ja jäˈäy diˈib nyaˈëxpëjkëm o mä nˈëwäˈkx ngäjpxwäˈkxëm xymyoˈoyëmë xyëëw, dyireksion etsë nyumero, tsojkëp niˈamukë nwingutsëˈkëm ja ley diˈib kuwanëp.
^ parr. 8 Colosenses 1:10, TNM: “Parë mnëˈëyoˈoy mduˈuyoˈoytyët wintsëˈkën myëët extëmë Jyobaa ttukjotkëdaˈaky, mientrës xymyënëjkxtë ja tëëm mä tukëˈëyë oybyë tuunk ets xyyajmëjwindëkët ja ëxpëjkënë tëyˈäjtënbë diˈibë Dios jyaˈäjtypy”.
^ parr. 9 Ixë bideo diˈib jajkp taxk minutë Nˈoktukniˈˈijxëm ja diˈib nyaˈëxpëjkëm parë kontiempë yˈëxpëktët. Mä JW Library®, tëkë mä jyënaˈany MULTIMEDIA, ta net NUESTRAS REUNIONES Y MINISTERIO ets ta net MEJORE SUS HABILIDADES EN EL MINISTERIO.
^ parr. 10 Tëkë mä jyënaˈany ËXPËJKPAJN, ta net LIIBRË ETSË FOYETË ets ta net PROGRAMË MÄ YAJKAJPXYË BIIBLYË.
^ parr. 14 Mä JW Library®, tëkë mä jyënaˈany MULTIMEDIA, ta net NUESTRAS REUNIONES Y MINISTERIO ets ta net AYUDAS PARA LA PREDICACIÓN.
