1. ¿Wiˈix myiny mä winmäˈäny tuˈugë jäˈäy diˈib paˈˈayoop, ets ti ijxpajtën xytyukjamyajtsëm?

 KO NWINMÄˈÄYËM wiˈix jyaˈayˈaty tuˈugë jäˈäy diˈib paˈˈayoop, waˈan myiny mä winmäˈäny ko jantsy ajiiky amëguˈuk ets jantsy oyjyaˈay. Ets nan mbäät yëˈë xytyukjamyajtsëm ja ijxpajtën diˈibë Jesus ojts tmaytyaˈaky mä ja samaritanë jäˈäy. Tyäˈädë jäˈäy pyudëjkë ja judiyë diˈibë nety axëëk të tyunyëty ja maˈtspë. Ja samaritanë yajnigëxëˈkë tsojkën ets pääty “tpaˈˈayooy” ja judiyë jäˈäy ko tˈijxy pën kuentëˈatëdëp (Luk. 10:29-37). Tyäˈädë ijxpajtën diˈibë Jesus myaytyak, yëˈë xytyukˈijxëm ko Dios xypyaˈˈayoˈowëm mët ko xytsyojkëm ets wiˈixëm dyajnigëxëˈëky tuˈuk tuˈugë xëëw.

2. ¿Wiˈix ja tuk pëky mbäät dyajnigëxëˈëky tuˈugë jäˈäy ko paˈˈayoop?

² Ja tuk pëky wiˈix tuˈugë jäˈäy dyajnigëxëˈëky ko myëdäjtypyë paˈˈayoˈowën, yëˈë ko kyaj ttukumëdoy ja myëguˈuk oy jyanitëkëty. Jyobaa mëjwiin kajaa xyjantsy pyaˈˈayoˈowëm, pes extëmë Biiblyë jyënaˈany yëˈë “kyaj duˈun xytyuˈunëm extëmë nbokyˈäjtëm” (Sal. 103:10). Per näˈäty, tsojkëbë Jyobaa tjëjwijtsëmbitët tuˈugë jäˈäy diˈib të pyokytyuny.

3. ¿Tijaty nˈatsoowëmbitäˈänëm mä tyäˈädë artikulo?

³ Mä tyääbë artikulo nˈixäˈänëm wiˈixë Biiblyë tˈatsoowëmbityë tyäˈädë tëgëëkpë yajtëˈëwën: ¿tiko Jyobaa dyajnigëxëˈëgyë paˈˈayoˈowën?, ¿mbäät tuˈugë jäˈäy mëk yajjëjwijtsëmbity ets yajpaˈˈayoy? ets ¿ti mbäät xypyudëjkëm parë nyajnigëxëˈkëmë paˈˈayoˈowën?

4. ¿Tiko Jyobaa dyajnigëxëˈëky ko xypyaˈˈayoˈowëm?

⁴ Mët ko xytsyojkëm. Apostëlë Pablo duˈun tkujäˈäyë mä Biiblyë ko Dios “jantsy paˈˈayoowëp”. Diˈib yä yajmaytyäˈägäämp, yëˈë ko Dios yajnigëxëˈkypyë paˈˈayoˈowën ko ja naxwinyëdë jäˈäy dyajjukypyëkäˈäny  jam tsäjpotm oy pyokyjyaˈayˈattë (Efes. 2:4-7, TNM). Per kyaj yëˈëyë yajpaˈˈayowdë, pesë David duˈun tkujäˈäyë: “Jyobaa oyjyaˈay mët niˈamukë, etsë pyaˈˈayoˈowën nyigëxëˈëky mä tukëˈëyë tijaty tyuumpy” (Sal. 145:9). Jyobaa niˈamukë ttsokyë naxwinyëdë jäˈäy, ets xëmë tpaˈˈayoyë pën yˈijxypy ko nitëjkëp.

5. ¿Wiˈixë Jesus tjäjty ko Tyeety paˈˈayoop?

⁵ Nipën duˈun tkaˈixyˈatyë Jyobaa extëmë Jesus, yëˈë nyijäˈäwëp ko Tyeety jantsy paˈˈayoop. Pes kanäk mil jëmëjt yˈijty mëdë Tyeety jam tsäjpotm mä nety kyaminynyëm yä Naxwiiny (Prov. 8:30, 31). Kanäkˈok tˈijxyë Tyeety wiˈix tpaˈˈayoyë naxwinyëdë jäˈäy diˈib pokyjyaˈay (Sal. 78:37-42). Ko Jesus dyaˈëxpëjkyë jäˈäy, nan xëmë tpaˈˈayooy duˈun extëm Tyeety.

6. ¿Ti ijxpajtënë Jesus pyëjtak parë mbäät njaygyujkëm ko Jyobaa jantsy paˈˈayoop?

⁶ Jesus tyukniˈˈijxë jäˈäyëty wiˈixë Jyobaa dyajnigëxëˈëgyë paˈˈayoˈowën. Extëm të nˈijxëm mä jatuˈukpë artikulo ojts tmaytyaˈaky tuˈugë ijxpajtën mä ja mixy diˈib tsoˈon mä tyëjk ets “dyajkëjxtääy ja myeeny mët ja axëëkpë jyikyˈäjtën” (Luk. 15:13). Ok, ta jyodëmbijty ets tmastuty ja axëëkpë jyukyˈäjtën, yuj tudak ets jyëmbijty mä ja tyëjk. ¿Ti ja tyeety tyuun? Jesus jyënany: “Ko nety myinyëm jagam, yëˈë tyeety yˈijxë es pyaˈˈayoojë, es nyejxy oj jyëjpˈyoˈoyëty, es yˈaxäjë es myënaanë es tsyuˈxë”. Kyaj wixaty yˈanmääyë, paˈˈayoowë ja tyeety, pokymyaˈkxë ets kupëjkë jatëgok mä fyamilyë. Oyë nety të pyokytyuny mëjwiin kajaa, pokymyaˈkxë ja tyeety mët ko jyodëmbijty. Tyäˈädë uˈunkteety diˈib pyaˈˈayoow ja yˈuˈunk, yëˈë mëët yaˈijxkijpxyë Jyobaa. Ko duˈunë Jesus tpëjtaky ja ijxpajtën, yëˈë ojts xytyukˈijxëm ko Jyobaa jyantsy pyokymyaˈkxaambyën ja pokyjyaˈay diˈib jodëmbijttëp amumduˈukjot (Luk. 15:17-24).

7. Extëmë Jyobaa dyajnigëxëˈëgyë paˈˈayoˈowën, ¿wiˈix xytyukˈijxëm ko jantsy kuwijy?

⁷ Jyobaa yajnigëxëˈkypyë paˈˈayoˈowën mët ko nëgooyë wyijyˈäjnë. Biiblyë jyënaˈany ko “ja wijyˈäjtën diˈibë tsoˈomp mä Dios” myëdäjtypy “ja paˈˈayoˈon, es [tyuumpy] ja oybyë” (Sant. 3:17). Jyobaa duˈun extëm ja Uˈunkteety diˈib tsojkp ets nyijäˈäwëp ko tyukˈoyˈajtypy ja yˈuˈunk yˈënäˈk ko tpaˈˈayoy (Sal. 103:13; Is. 49:15). Ets mët ko xypyaˈˈayoˈowëm oy nbokyjyaˈayˈäjtëm, mbäädë net nˈawijx njëjpˈijxëm ja jotkujkˈäjtën. Komë Jyobaa nëgooyë wyijyˈäjnë, pääty xëmë xypyaˈˈayoˈowëm pën yˈijxypy ko xynyitëjkëm. Ets xëmë tˈixy näˈä mbäät xypyaˈˈayoˈowëm. Pes mët ko wyijˈyëty, yëˈë kyaj net ttimˈyaˈoˈktëy o kyaj net pën ttimnaˈixy ets axëëk yˈadëˈëtsët. Jyobaa xëmë tˈixy ti tyukˈoyˈatëp ja yˈuˈunk yˈënäˈk.

8. ¿Ti tsojkëp näˈäty yajtunët, ets tiko?

 ⁸ Per nˈokpëjtakëm ko tuˈugë Dios mëduumbë këˈëm ttimtukniwinmayë ttunäˈäny ja poky kaytyey. ¿Tidaa ja mbäät yajtuny? Apostëlë Pablo jyënany: “[Duˈumbë] jäˈäyëty kyaj mëët mdaˈanmuk mwäˈkmukët” (1 Kor. 5:11). Ja diˈib kyaj jyodëmbity, ta yaˈëxkexy mä kongregasionk. Ets oy ko duˈun yajtuny parë yajkuwäˈändët ja nmëguˈukˈäjtëm diˈib oy myëduundëbë Dios ets parë nyigëxëˈëgët ko Jyobaa myëdäjtypyë yˈanaˈamën. Per ta net nääk diˈib winmääytyëp ko tuˈugë jäˈäy yaˈëxkexy, yëˈë ko Dios kyaj të pyaˈˈayoyëty. ¿Tëyˈäjtëndaa? Min nˈokˈijxëm.

9, 10. 1) Extëm jyënaˈanyë Ebreeʉsʉty 12:5, 6, ¿tiko njënäˈänëm ko yajpaˈˈayoobën tuˈugë jäˈäy ko yaˈëxkexy? 2) ¿Ti ijxpajtën mbäät xypyudëjkëm parë njaygyujkëm?

⁹ Mon tuk njantsy nyayjyäˈäwëm ko mä reunyonk yajnigajpxy ko tuˈugë nmëguˈukˈäjtëm kyaj yˈokTestiigëˈäjnë. Ets waˈanë net nnayajtëˈëwëm pën oy ko të yaˈëxkexy. ¿Jantsy yajpaˈˈayoobëdaa tuˈugë jäˈäy ko yaˈëxkexy? Duˈun, yajpaˈˈayoop. Oy ko tuˈugë jäˈäy yajjëjwijtsëmbity, pes duˈunë nety nyigëxëˈëky ko yajpaˈˈayoop ets ko yajtsojkp (Prov. 13:24). Per ko tuˈugë jäˈäy yaˈëxkexy diˈib të pyokytyuny ets kyaj jyodëmbity o kyaj dyajtëgatsy jyaˈayˈäjtën, ¿mbäädëdaa pyudëkëty ko yaˈëxkexy? Mbäät. Mayë nmëguˈukˈäjtëm diˈib pokytyuundë mëjwiin kajaa ets yaˈëxkajxtë, pyëjktë kuentë ko oy ko duˈunë mëjjäˈäytyëjk ttuundë. Pes pudëjkëdë parë ojts dyajˈyeˈeytyë ja jyot wyinmäˈäny ets dyajtëgäjtstë jyukyˈäjtën parë jatëgok tnijëmbijttë Jyobaa (käjpxë Ebreeʉsʉty 12:5, 6).

¹⁰ Nˈokwinmäˈäyëmë tyääbë ijxpajtën. Tuˈugë borreegë kuentëˈäjtpë tpëkyë kuentë ko të tuˈugë byorreeguˈunk pyäˈämbety. Yëˈë nyijäˈäwëp ko tsojkëp dyajtsoybyatët, parë duˈun ttunët, tsojkëp ttukmastuˈudët ja myëguˈuktëjk. Perë tyäˈädë borreeguˈunk kyaj tmastuˈudäˈäny ja myëguˈuktëjk diˈib oy mëk ets kyaj tˈoyjyawë ko yajtukpuwooduˈuty ja myëguˈuktëjk. Per ko ja borreegë kuentëˈäjtpë tpëjtaˈaky abëky ja borreeguˈunk parë dyajtsoybyatäˈäny, ¿yëˈëdën yˈandijpy ko yˈaxëktuumpy? Kyaj. Pes ja borreegë kuentëˈäjtpë nyijäˈäwëp ko pën kyaj abëky tpëjtaˈaky ja borreeguˈunk, mbäät ja päˈäm dyajwaˈkxy. Ets pääty abëky tpëjtaˈaky parë kyaj ttukninaxtë ja myëguˈuktëjk (ijxkijpxyë mëdë Levítico 13:3, 4).

11. 1) ¿Tiko yaˈijxkijpxyë tuˈugë jäˈäy diˈib yaˈëxkajxp mët tuˈugë borreeguˈunk diˈib pëjk ijxëp? 2) ¿Tijaty naybyudëkë yˈaxäjëdëp pënaty të yaˈëxkaxtë?

¹¹ Ko tuˈugë nmëguˈukˈäjtëm yaˈëxkexy, mbäät mëët yaˈijxkijpxyë tuˈugë borreeguˈunk diˈib pëjk ijxëp. Kom ja nmëguˈukˈäjtëm kyaj oy nyekyˈity mëdë Jyobaa, duˈunxyëp extëm yajpääty yuumëët päˈämmëët (Sant. 5:14). Ets duˈun extëm näägë päˈäm nyinaxy, nan mbäät ja nmëguˈukˈäjtëm diˈib të tmastuˈuttë Jyobaa, tˈaxëktundë ja myëguˈuktëjk diˈib mä kongregasionk. Pääty, kyaj mbäät tuˈugyë nyekyyajpääty mët ja myëguˈuktëjk. Ko duˈun yajjëjwijtsëmbity, ta Jyobaa dyajnigëxëˈëky ko tsyojkypy niˈamukë ja nmëguˈukˈäjtëm diˈib kyaj myastuˈutyëty ets mbäädë net ja pokyjyaˈay pyudëkëty parë jyodëmbitët. Per oy ja nmëguˈukˈäjtëm të jyayaˈëxkexy, mbäät duˈunyëm yeˈey reunyonk ets duˈunyëm tˈaxäjët ja käˈäy ukën diˈibë Dios yajkypy parë dyajkëktëkët jatëgokë myëbëjkën. Nan mbäät duˈunyëm yajmoˈoy ja ëxpëjkpajn diˈib mbäät dyajtuny ets tˈixëdë JW Broadcasting^®. Ets ko ja mëjjäˈäytyëjk tˈixtët ko tam ëgäˈäny dyajtëgatsy ja jyukyˈäjtën, mbäät pyudëkëdë parë jatëgokë jyëmbitët mä Diosë nyax kyäjpn. *

12. Ko tuˈugë jäˈäy kyajodëmbity, ¿ti tyuundëp ja mëjjäˈäytyëjk mët ko ttsoktë ets tpaˈˈayowdë ja myëguˈuktëjk?

¹² Oy ko njamyajtsëm ko yëˈëyë yaˈëxkajxp ja pokyjyaˈay diˈib kyaj jyodëmbity. Ja mëjjäˈäytyëjk nyijäˈäwëdëp ko tsojkëp yajxon twinmaytyët mä kyajnëm tˈixtë pën yaˈëxkajxp ja nmëguˈukˈäjtëm o kyaj. Ets nan nnijäˈäwëm ko Jyobaa  jyëjwijtsëmbijtypy tuˈugë jäˈäy mäbäät nyitëkëty (Jer. 30:11). Pënaty tuundëp mëjjäˈäy, tsyojktëbë myëguˈuktëjk ets nitii tkatunäˈändë diˈib mbäät ja myëguˈuktëjk tyukmëjagamgaˈagëdë Jyobaa. Per, näˈäty mët ko ttsoktë ja myëguˈuktëjk ets tpaˈˈayowdë, ta tˈixtë ko tsojkëp yaˈëxkaxët mä kongregasionk ja diˈib të pyokytyuny.

13. ¿Tiko yaˈëxkejxy tuˈugë Dios mëduumbë diˈib Corinto?

¹³ Min nˈokˈijxëm ti tyuunë apostëlë Pablo ko tuˈugë pokyjyaˈay kyajodëmbijty mä primer siiglë. Tyäˈädë Dios mëduumbë diˈib Corinto mëk axëëgë nety jyukyˈaty, pes yëˈë nety myëttsënaapy ja tyeetyë kyudëjk. Pablo nyijäˈäwëbë nety ko Jyobaa tˈanmääy ja israelitëty: “Pën myëëtkoˈknääyëp ja tyeety ja tyoˈoxytyëjk, wintsëˈkënyëdën yajtëgooby mä ja tyeetyën. Pääty taabë jäˈäy nëjkxëp duˈun yˈooky, mëët ja toˈoxytyëjk” (Lev. 20:11, MNM). Apostëlë Pablo kyaj nety mbäät tˈanëëmëdë ja myëguˈuktëjk diˈib Corinto ets ttimˈyaˈooktët ja pokyjyaˈay, per yˈanmääy parë tˈëxkaxtët. Kom mëk axëëgë nety jyukyˈaty, pes yˈaxëktuumbyë nety nimay ja myëguˈuktëjk. Axtë tam nääk diˈib winmääytyë ko kyaj nety tyimpokytyuny mëjwiin kajaa (1 Kor. 5:1, 2, 13).

14. ¿Wiˈixë Pablo dyajnigëxëˈky ko pyaˈˈayoobyë nety ja pokyjyaˈay diˈib yaˈëxkajx Corinto, ets tiko? (2 Korintʉ 2:5-8, 11).

¹⁴ Ko tiempë nyajxy, ta apostëlë Pablo tnijäˈäwë ko ja pokyjyaˈay të nety dyajtëgatsyë jyukyˈäjtën ets ko nety jyantsy jyodëmbity. Oyë nety të tjayajnibaxëtëkë ja kongregasionk, Pablo duˈun tˈanmääy ja mëjjäˈäytyëjk ko kyaj mëk ttimjëjpwijtsëmbittët ja pokyjyaˈay. Ta net tˈakˈanmääytyë: “Diˈibë mbatëdëp es xytyundët, jaˈa es xymyaˈxnët es xyajjotkujkëdët”. Ta net ttukmëtmaytyaky tiko mbäät duˈun ttundë: “Jaˈa ko pën nˈakˈyajjotmayˈoˈkëm, tsojk nëjx tkanakymyëduny ja Dios”. Pablo pyaˈˈayoowë tyäˈädë jäˈäy mët ko të nety jyantsy jyodëmbity. Ets kyaj ttsojky parë yëˈëyë ttimmëmay ttimmëdäjët ja pyoky kyaytyey etsë net yëˈë yajtuˈuˈadukëdët parë kyaj tnekynyijëmbitëdë Jyobaa (käjpxë 2 Korintʉ 2:5-8, 11).

15. ¿Wiˈixë mëjjäˈäytyëjk dyajnigëxëˈëktë paˈˈayoˈowën per nenduˈun tjëjwijtsëmbittë ja pokyjyaˈay?

¹⁵ Ko ja mëjjäˈäytyëjk dyajnigëxëˈëktë paˈˈayoˈowën, yëˈë pyanëjkxëbë Jyobaa yˈijxpajtën. Yëˈëjëty jyëjwijtsëmbittëp ja pokyjyaˈay pën nitëjkëp, per nan pyaˈˈayoowdëp pën yˈijxtëp ko të jyodëmbity. Pën kyaj tjëjwijtsëmbittë kyaj nety dyajnigëxëˈëktë paˈˈayoˈowën, duˈunxyëbë nety extëm tnaˈixtë waˈan ttundë ti tyimtunandëp. Per ¿yëˈëyëdaa mëjjäˈäytyëjk diˈib mbäät dyajnigëxëˈëktë paˈˈayoˈowën?

16. Extëm jyënaˈanyë Proverbios 21:13, ¿wiˈixë Jyobaa jyaˈayˈaty mët pënaty kyaj dyajnigëxëˈëktë paˈˈayoˈowën?

¹⁶ Tsojkëp niˈamukë nyajnigëxëˈkëmë paˈˈayoˈowën duˈun extëmë Jyobaa. ¿Tiko? Tuk pëky, yëˈë ko Jyobaa kyaj tmëdoowˈitäˈäny ja nuˈkxtakën pën kyaj nbaˈˈayoˈowëm ja nmëguˈukˈäjtëm (käjpxë Proverbios 21:13, TY). * Kom ntsojkëm etsë Jyobaa tmëdoowˈitët ja nuˈkxtakën, pääty nnaygyuentëˈäjtëm parë kyaj axëëk nduˈunëm ja nmëguˈukˈäjtëm. Tsojkëp nˈijxkujk njaygyujkëm ko “ëyoopëjäˈäy” tˈamdowëdë naybyudëkë, xëmë mbäät nbudëjkëm ja nmëguˈukˈäjtëm diˈib myënäjxy yajnäjxypyë ayoˈon jotmay. Nan oy ko njaygyujkëm extëmë Biiblyë xyˈanmäˈäyëm: “Diˈibë kyaj të tmëdaty ja paˈˈayoˈon mët ja wiingatypyë, nandëˈën kyajpë Dios pyaˈˈayowäˈänyëty” (Sant. 2:13). Pën ijtëm yujy tudaˈaky ets njamyajtsëm ko yajpaˈˈayowäˈänëm, ta niˈigyë ja nmëguˈukˈäjtëm nbaˈˈayowäˈänëm. Ets mas pën ja pokyjyaˈay të jyëmbity mä kongregasionk.

17. ¿Wiˈixë rey David tjantsy yajnigëxëˈkyë paˈˈayoˈowën?

¹⁷ Mä Biiblyë miimbë ijxpajtën diˈib mbäät xypyudëjkëm parë nyajnigëxëˈkëmë paˈˈayoˈowën ets kyaj axëëk nduˈunëm ja nmëguˈukˈäjtëm. Extëm nˈokpëjtakëmë rey David, yëˈë janääm jatsojk dyajnigëxëˈkyë paˈˈayoˈowën. Oy ja rey Saúl jyayaˈooganë, David pyaˈˈayoow mët ko nyijäˈäwëbë nety ko Saúl, yëˈë diˈibë Dios winˈijxë ets ninäˈä tkayajjëmbitany axëëk extëm nety të yajtuny (1 Sam. 24:9-12, 18, 19).

18, 19. Oknigäjpx majtsk pëky mä David kyaj ojts dyajnigëxëˈëgyë paˈˈayoˈowën.

¹⁸ Perë David kyaj xëmë ojts dyajnigëxëˈëgyë paˈˈayoˈowën. Extëm nˈokpëjtakëm, ko tëgokë Nabal, tuˈugë yetyëjk diˈib jantsy awäˈän, ojts wixaty yˈanëˈëmxëty ets kyaj ojts yajmoˈoyaˈany ja käˈäy ukën mët ja tyuumbëtëjk. David ta jyantsy jyotˈambëky ets jyënany ko nëjkx dyaˈoogäˈänyë Nabal mët niˈamukë pënaty yajpattëp mä jyëën tyëjk. Per mët ko Abigaíl, ja kyudëjkë Nabal, yˈoyjyaˈaytyaky, myaˈkxtujky ets pojën tmëtsoˈony ja käˈäy ukën, ta David kyaj tnikëjxmˈäjty ja nëë neˈpyny diˈibë nety tamäämp yokäämp (1 Sam. 25:9-22, 32-35).

¹⁹ Tëgok, ja kugajpxy Natán ojts ttukmëtmaytyaˈagyë David mä tuˈugë mëkjäˈäy diˈibë ojts tpëjkë tuˈugë ayoobë jäˈäy ja byorreeguˈunk diˈibë nety mëk tsyojkypy. David ta jyantsy jyotˈambëjky ets jyënany: “¡Duˈun extëm tyëyˈäjtënëty ko Jyobaa jyukyˈaty, ja yetyëjk diˈib duˈun të yˈadëˈëtsy nitëjkëp ets yˈoogët!” (2 Sam. 12:1-6). David, nyijäˈäwëbë nety wiˈix jyënaˈany ja Ley diˈibë Moisés yajmooy, ko pën ja jäˈäy wyijtskekypy tuˈugë borreegë, tsojkëbë nety tkëbatët mët nimäjtaxk ja borreegë (Éx. 22:1). Perë David tyimˈyaˈˈaniˈigyë ko jyënany ko nitëjkëbë nety ets ja jäˈäy yˈoogët. Natán jeˈeyë tpëjtaky ja ijxpajtën parë ttukjaygyukëyanyë David ko mas kajaa nety të pyokytyuny. Etsë Jyobaa mëjwiin kajaa nety të pyaˈˈayoyëty, perë David kyaj nety të tpaˈˈayoy ja yetyëjk diˈibë Natán myaytyak (2 Sam. 12:7-13).

20. ¿Ti xytyukniˈˈijxëmë yˈijxpajtënë David?

²⁰ Extëm nˈijxëm, David naytyukmëmadakë yˈakë ko jyënany ko Nabal mëët ja jyaˈayëty  nitëjkëdëbë nety yˈooktët. Ets ko ja Natán tyukmëtmaytyakë ja ijxpajtën, netyë jyënany ko ja yetyëjk nitëjkëbë nety yˈoogët. Mä tyäˈädë myëmajtskpë ijxpajtën, mbäädë net nnayajtëˈëwëm. ¿Tiko David kyaj ttimpaˈˈayooy ja jäˈäy ets pën yëˈë jantsy oyjyaˈayë nety? Nˈokwinmäˈäyëm wiˈixë nety yaˈixy yajpäätyë David. Yëˈë të nety pyokytyuny mëjwiin kajaa ets axëëk ja jyot wyinmäˈäny tjawë. Ko tuˈugë jäˈäy ttimˈyaˈoˈktëy mä tpayeˈey ja myëguˈugë jyotmay, yëˈë yˈandijpy ko kyaj oy nyekyˈity mëdë Jyobaa. Etsë Jesus duˈun ojts dyakyë tyäˈädë käjpxtëˈëwën: “Katë miits xypyayoˈoytyë nëgoo yëˈë wiinkpëty, këdiibë Dios mbekymyoˈoyëdët. Mët ko extëm miits xypyayoˈoytyë ja wiinkpëty, Dios nandëˈën mbayoˈoyëdëp miitsëty” (Mat. 7:1, 2). Pääty, oy ko kyaj nˈëbat ngäjpxpatëmë nmëguˈukˈäjtëm ets nˈokpaˈˈayoˈowëm extëmë Jyobaa ttuny.

21, 22. ¿Wixaty mbäät nyajnigëxëˈkëmë paˈˈayoˈowën?

²¹ Ko tijaty ndukmëduˈunëm ja nmëguˈukˈäjtëm, duˈunë nety nyajnigëxëˈkëm ko njantsy pyaˈˈayoˈowëm. Nˈokwinmäˈäyëm wixaty mbäät nbudëjkëm, extëm mä familyë, mä kongregasionk o mä ja it lugäär mä nˈëwäˈkx ngäjpxwäˈkxëm. Taaˈäjtpë kanäk pëky wiˈix mbäät nyajnigëxëˈkëmë paˈˈayoˈowën. Extëm nˈokpëjtakëm, ¿jam pën nnijäˈäwëm diˈib yajjotkujkmoˈoyäämp? ¿Mbäät nmënëjkxëmë kyaˈay yˈukën o jam wiˈixtsoo nbudëjkëm? ¿Jam tuˈugë nmëguˈukˈäjtëm diˈib të tnijëmbityë Jyobaa dyajtëgoyˈajtyë myëtnaymyaayëbë diˈib jotkujkmoˈoyëdëp? ¿Mbäät ndukninëjkxëmë oybyë ääw ayuk pënaty yajjotkujkmoˈoyandëp? Duˈunën mbäät nyajnigëxëˈkëm ko nbaˈˈayoˈowëm pënaty mëët nyajpatëm (Job 29:12, 13; Rom. 10:14, 15; Sant. 1:27).

²² Mbäät wiˈixëm nyajnigëxëˈkëm ja paˈˈayoˈowën ko nbëjkëmë kuentë wiˈix yaˈix yajpäättë pënaty mëët nyajpatëm. Pën nyajnigëxëˈkëmë paˈˈayoˈowën, ta jantsy agujk jotkujk nyayjyawëyaˈanyëtyë Jyobaa, ja nDeetyˈäjtëmë tsäjpotmëdë “diˈib jantsy paˈˈayoop” (Efes. 2:4, TNM).