Ko ngäjpxëm diˈibë Pablo jawyiin myaytyak mä tkatukjäˈtynyëmë tyäˈädë bersikulo, ta njaygyujkëm ko “ja Diosë yˈayuk”, yëˈë yˈandijaampy tijatyë Dios tyuknibëjtakëp, extëm të nnijäˈäwëm mä Biiblyë.

Mä ëxpëjkpajn xëmë myinyë Ebreeʉsʉty 4:12 parë tnimaytyaˈaky ko Biiblyë myëdäjtypyë mëkˈäjtën etsë jäˈäyë jyukyˈäjtën dyajtëgäjtsë. Ets jantsy tëyˈäjtën. Per nan oy ko njaygyujkëm ti netyë Pablo myaytyakypy ko tjääyë tyäˈädë bersikulo. Yëˈë nety yˈanmaapy ja Dios mëduumbëty parë tpudëkëdët ja Dios mä tijaty tyuknibëjtakëp, diˈib nety yajnigäjpxp kanäk pëky mä ja Diosë jyaaybyajtën. Pablo yëˈë pyëjtak extëmë ijxpajtën ja israelitëty ko Dios yaˈˈawäˈätspëtsëëmëdë Egipto. Ets jamë nety tyëkëyäˈändë mä ja nax diˈibë Dios tukwandakëdë mä jyamˈatyë “letsyë etsë seerë päˈäk”, ets mä tpäädäˈändë ja jaantsypyë poˈkxtakn (Éxodo 3:8; Deuteronomio 12:9, 10).

Duˈun diˈibë netyë Jyobaa tyuknibëjtakëp. Per ja israelitëty kyaj myëbëjkëdë ets kyaj myëmëdoowdë, pääty kyaj nimay tyëjkëdë mä ja Diosë pyoˈkxtakn (Números 14:30; Josué 14:6-10). Per oy duˈun yˈokjäjty, Pablo ojts tnigajpxy ko “tyambäädë Dios xywyandakëm es mbäät ndëjkëm mä yëˈë pyoˈxtakn” (Ebreeʉsʉty 3:16-19; 4:1). Tyäˈädë wandakën, yëˈë tuk pëky diˈibë Dios tyuknibëjtakëp. Pääty tsojkëp nnijäˈäwëm etsë net mëët nduunmujkëm, extëm ttuundë ja Dios mëduumbëty diˈib kyäjpxtë ebreo. Pablo yaˈijxë ko tyäˈädë wandakën miimp mä Diosë jyaaybyajtën, pääty ojts tnigajpxyë Génesis 2:2 etsë Salmo 95:11.

Jotkujk nnayjäˈäwëm ko “tyambäädë Dios xywyandakëm es mbäät ndëjkëm mä yëˈë pyoˈxtakn”. Ijtëm seguurë ko mbäät ndëjkëm extëm mä Biiblyë jyënaˈany, pääty nduˈunëmë mëjääw. ¿Wiˈix? Ko xondaˈakyˈääw xondaˈakyjyot nbudëjkëmë Dios parë yˈadëwët tijaty tyuknibëjtakëp ets nduunˈadëtsëm mët ko nmëdäjtëm ja mëbëjkën. Kyaj mët ko nbanëjkxëm ja ley diˈibë Moisés yajmooy o mët ko nduˈunëm diˈib oy parë Dios xykyupëjkëm. Milˈamë jäˈäy kujk tˈëxpëjktsondäˈäktë Biiblyë abëtsemy nyaxwinyëdë parë tnijawëyäˈändë tijatyë Dios tyuknibëjtakëp. Yëˈë diˈib nimay të pyudëkëdë parë dyajtëgatstëdë jyukyˈäjtën, dyaˈixëdët ja mëbëjkën etsë net nyëbattët. Tyäˈädë yëˈë yajxon xytyukˈijxëm ko “Dios ja yˈayuk myëdäjtypy ja mëkˈäjtën” ets juugyëˈë. Tijatyë Dios tyuknibëjtakëp diˈib yajnigäjpxp mä Biiblyë, myëdäjtypyë mëkˈäjtën parë dyajtëgatsëdë njukyˈäjtënˈäjtëm ets duˈunyëm tmëdatäˈäny.