1. ¿Ti Isaías ojts tnaskäjpxë mä Jesus, ets tiko xyjyotkujkmoˈoyëm?

MÄ BIIBLYË duˈun tuk pëky ojts yajnaskäjpxë mä Jesus: “Yëˈë kyaj tpayoˈoyaˈany extëm jeˈeyë tˈixy, ni kyajëjwijtsëmbitäˈäny extëm jeˈeyë tmëdoy. Yëˈë tëyˈäjtën myëët tpayoˈoyaˈanyë ayoobë jäˈäy” (Is. 11:3, 4). Mëjwiin kajaa xyjotkujkmoˈoyëmë tyäˈädë ääw ayuk. ¿Tiko? Jaˈko tyamë naxwinyëdë jäˈäy pyajxtëbë jyiiky myëguˈuk. Niˈamukë ntsojkënyëˈäjtëm jyäˈtët ja tiempë mä Jesus xypyayoˈoyëm, ja Fes diˈib wäˈätsjäˈäy, diˈib ninäˈä xykyapayoˈoyäˈänëm ko jeˈeyë xyˈijxëm nikëjxy këbajky.

2. ¿Ti Jesus ojts xytyukˈanaˈamëm, ets ti nˈixäˈänëm mä tyäˈädë artikulo?

² Tuˈuk tuˈugë xëëw nyaxy, wiˈixëm nwinmäˈäyëm mä wiink jäˈäy. Per kom kyaj nwäˈätsjäˈäyˈäjtëm extëmë Jesus, mbäät näˈäty tëgatsy nwinmäˈäyëm mä nmëguˈukˈäjtëm extëm kyaj dyuˈunëty. Pes jeˈeyë ko nˈijxkojëm wiˈix kyëxëˈëky nikëjxy këbajky. Pääty ko Jesus yˈijty yä Naxwiiny duˈun ojts xytyukˈanaˈamëm: “Kyaj ti xyˈëxˈyoˈoy xypyayoˈoytyët extëm kyëxëˈëky nikëjxy këbajky. Duˈunën xypyayoˈoytyët extëm tii tyëyˈäjtënëty” (Juan 7:24, TNM). Tyäˈädë yëˈë xytyukˈijxëm  ko Jesus tsyojkypy ets nbanëjkxëmë yˈijxpajtën ets kyaj jeˈeyë nˈijxëm wiˈix pën kyëxëˈëky nikëjxy këbajky. Mä tyäˈädë artikulo tëgëk pëky yajnimaytyäˈägäˈäny ti diˈib duˈunë jäˈäy yajwinmääyëp, 1) mä tsyoony o wiˈix yˈixëty, 2) pën myëdäjtypyë meeny sentääbë o kyaj ets 3) nuˈun ja xyëëw jyëmëjt tmëdaty. Mä tuˈuk tuˈugë tyäˈädë jotmay, yajnimaytyäˈägäˈäny wiˈix mbäät nbaduˈunëm extëmë Jesus ojts xytyukˈanaˈamëm.

3, 4. 1) ¿Tiko apostëlë Pedro dyajtëgäjtsyë wyinmäˈäny mä wiˈixë nety tˈixy pënaty kyaj jyudiyëty? (Ixë dibujë mä tsyondaˈaky). 2) ¿Diˈibë jembyë tëyˈäjtënë Jyobaa tyuknijäˈäwë Pedro?

³ Nˈokpawinmäˈäyëm wiˈixëdaa apostëlë Pedro wyinmääy ko yaˈˈanmääy ets nyëjkxët jam Cesarea, mä tyëjkë Cornelio diˈib kyaj jyudiyëty (Apos. 10:17-29). Pedro nanduˈunë nety të yeeky të pyety extëm niˈamukë ja judiyëtëjk, diˈib xyëkˈäjttëp ja jäˈäy diˈib kyaj jyudiyëty. Per ta tyuun jyäjtë diˈibë Pedro yajwinmääytyëgäjtsë (Apos. 10:9-16). Yëˈë Dios tukˈijxë tuˈugë mëj wit, diˈib duˈun extëm tuˈugë sääbënë mä kyëxëˈëgyë jëyujk animal diˈib kyaj wyäˈätsëty ets tmëdooy tuˈugë ayuk tsäjpotm diˈib anmääyë parë dyaˈoogët ets ttsuˈutsët. Pedro ta jyënany ko kyaj ttsuˈutsäˈäny, per ta yaˈˈanmääy: “Diˈibë Dios të dyajwäˈätsy, katë mij xyˈandijy diˈibë yaˈˈaxëˈkëp o yajpekykyäˈäp”. Ko duˈunë Pedro tˈijxy, kyaj tjaygyujkë ti tuun jäjtëp ets ti tukjaygyukëyanëp. Tamë nety duˈun të yaˈˈanmääytyaˈay, ko jyäjttë jäˈäy diˈibë Cornelio kajxëdë. Ta Pedro ojts yajwoownëjkxy mä tyëjkë Cornelio mët ko duˈun tyuˈumooyë ja espiritë santë.

⁴ Ja judiyëtëjk ninäˈä ijty tkakuˈix tkakugäjpxëdë pënaty kyaj jyudiyëty. Päätyë Pedro ninäˈäxyëp kyatëjkë mä Cornelio tyëjk, koxyëp yëˈëyë tˈijxy diˈib nikëjxy këbajky. ¿Per tiko ojts nyijkxy? Jaˈko Dios tijaty tyukˈaˈijxnäjxë ets mët ko tyuˈumooyë ja espiritë santë. Ko Pedro tmëdoowˈijtääy wiˈix ja Cornelio myëtmaytyakë, ta jyënany: “Tyamëts njaygyukë ko tëyˈäjtën ja Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty diˈibë wintsëˈkëdëp es [mëduunëp]” (Apos. 10:34, 35). Tyäˈädë jembyë tëyˈäjtën diˈibë Pedro jyaygyujkë, nan pudëkëyanëbë nety niˈamukë ja Dios mëduumbë. ¿Wiˈix?

5. 1) ¿Ti Jyobaa tsyojkypy njaygyujkëm niˈamukë? 2) Oy njanijäˈäwëm ko Dios tsyojktaabyë jäˈäy, ¿wiˈix näˈäty nwinmäˈäyëm?

⁵ Jyobaa yëˈë yajtuunë Pedro parë niˈamukë ja Dios mëduumbë tjaygyujkëdë ko yëˈë kyaj ttsokyë jäˈäy winˈixy wingexy. Pesë Dios kyaj yëˈë tˈixy mä pën tsyoony o wiˈix yˈixëty, ti ayuk kyajpxypy o wiˈix ja kostumbrë tmëdaty. Yëˈë kyupëjktaapy niˈamukë yetyëjk etsë toxytyëjk diˈib wingutsëˈkëp ets diˈib tyuumbyë oybyë (Gal. 3:26-28; Diˈibʉ Jat. 7:9, 10). Niˈamukë Dios mëduumbë nnijäˈäwëm ko tëyˈäjtënë tyäˈädë ets jënäˈänëm ko ntsojktäˈäyëm niˈamukë nmëguˈukˈäjtëm. Per pën jam të nyaˈk të nbajtëm mä jäˈäy tpexyë jiiky myëguˈuk o duˈun ja familyë jyaˈayˈaty, nan mbäät jap muum nyuˈtsëmë duˈumbë jäˈäyˈäjtën. Pes axtë Pedro jäjt duˈun, yëˈë të nety tjapudëkë ja myëguˈuktëjk parë tˈixtët ko Dios tsyojktaabyë jäˈäy, per ok, yajnigëxëˈk ko tapnëm tˈakmëdatyë duˈumbë jäˈäyˈäjtën (Gal. 2:11-14). Pääty, ¿wiˈix mbäät nbaduˈunëm extëmë Jesus ojts xytyukˈanaˈamëm ets kyaj jeˈeyë nˈijxëm ja nmëguˈukˈäjtëm wiˈix kyëxëˈëky nikëjxy këbajky?

6. 1) ¿Ti mbäät xypyudëjkëm parë nyajjëgakëm mä jot korasoon ko nbajxëmë nmëguˈukˈäjtëm? 2) ¿Ti yajnigëxëˈk ja nmëguˈukˈäjtëm diˈib kyajx tuˈugë neky Betel?

⁶ Parë nnijäˈäwëm pën jap nˈakmëdäjtëmë duˈumbë jäˈäyˈäjtën ko nbajxëmë jäˈäy, tsojkëp nnayˈijxëm mä Diosë yˈAyuk (Sal. 119:105). Nan oy ko nyajtëˈëwëm tuˈugë mëtnaymyaayëbë pën të tˈixy ko nbajxëmë nmëguˈukˈäjtëm  (Gal. 2:11, 14). Pes waˈanë duˈumbë jäˈäyˈäjtën të tpëjtaknë tyikts yˈääts mä jot korasoon ets kyaj nbëjkëmë kuentë. Min nˈokˈijxëm tuˈugë ijxpajtën, tuˈugë nmëguˈukˈäjtëm diˈibë nety tuump mëjjäˈäy ojts tkexy tuˈugë neky Betel. Mä ja neky yëˈë nyimaytyak tuˈugë kasäädë jäˈäy diˈib kajaa xyëëw tiempë yajtuundëp mä Diosë tyuunk. Ja yetyëjk kasäädë jamë nety tsyoony mä tuˈugë lugäär diˈib nimayë jäˈäy pyajxtëp. Ets ja mëjjäˈäy diˈib kyajx ja neky Betel, kyajtëmë nety tpëky kuentë ko yëˈë nan pyejxypytyëmë duˈumbë jäˈäy. Mä ja neky oy tnimaytyaky ja yetyëjk kasäädë, per mä ojts dyajjëjpkëjxnë duˈun tkujäˈäyë: “Oy përoobë tsyoony [mä tadë lugäär], extëm jyaˈayˈaty ets jyukyˈaty tyukˈijxypyë myëguˈuktëjk parë tjaygyukëdët ko oy tsyoondë [mä tadë lugäär], kyaj yëˈë tˈandijy ko kyaj wäˈäts tsyëënëdë o ko ayoobë jäˈäyëty, extëm nimay tkostumbrëˈattë duˈumbë jäˈäy”. ¿Ti tyäˈädë xytyukniˈˈijxëm? Ko oy njanikëjxmˈäjtëmë tuunk mä Diosë kyäjpn, tsojkëp nayˈijx naytyuˈunëm wiˈix nyajpatëm, ets ngupëjkëm ko nyajtukˈijxëm ko tapnëm nˈakmëdäjtëmë duˈumbë jäˈäyˈäjtën. ¿Tijaty mbäät nˈaktuˈunëm?

7. ¿Wiˈix mbäät nyajnigëxëˈkëm ko nyaˈˈawatsëm ja jot korasoon mëjwiin kajaa?

⁷ Pën nyaˈˈawatsëm ja jot korasoon mëjwiin kajaa parë ntsojkëm ja nmëguˈukˈäjtëm, ta kyaj nbajxëm (2 Kor. 6:11-13). ¿Yëˈëyë xëmë mëët nyajpajtëm pënaty mëët tyuˈugyë ja ääw ayuk, ja nax käjpn, ja rasë ets ja kostumbrë? Pën duˈun, oy ko nanduˈun mëët nduˈukmujkëm ja nmëguˈukˈäjtëm diˈib wiˈixëm të yaak të pyattë. ¿Tiko ngawoˈojëm käjpxwäˈkxpë, kaabyë o mëët tuk ratë nyajpatëm? (Apos. 16:14, 15). Ko duˈun nduˈunëm, ta niˈigyë myëjwindëkët ja tsojkën ets kyaj nlugäärmoˈoyëm parë nbajxëm ja nmëguˈukˈäjtëm. Per ta ja tuk pëky, pën ja nmëguˈukˈäjtëm myëdäjtypyë meeny sentääbë o ayoop, mbäädë net jeˈeyë nˈijxëm nikëjxy këbajky.

8. Extëm jyënaˈanyë Levítico 19:15, ¿ti mbäät tëgatsy xyyajwinmäˈäyëm mä ja nmëguˈukˈäjtëm?

⁸ Ja tuk pëky diˈib mbäät tëgatsy xyyajwinmäˈäyëm mä wiˈix nˈijxëm ja nmëguˈukˈäjtëm, yëˈë pën myëdäjtypyë meeny sentääbë o ayoop. Yëˈë tyäˈädë yajmaytyakp mä Levítico 19:15, ko jyënaˈany: “Kyaj mbäät xypyexyë ayoobë jäˈäy o yëˈëyë xytsyokëdë mëkjäˈäy. Tsojkëp tëyˈäjtën myëët xypyayoˈoyëdë mmëguˈuk”. ¿Wiˈix nwinmäˈäyëm mä tuˈugë jäˈäy diˈib kumeenyjyaˈay o ayoobë jäˈäy?

9. ¿Ti tëyˈäjtën kyujäˈäyë Salomón, ets ti xytyukniˈˈijxëm?

⁹ Jotmaymyëët njënäˈänëm ko naxwinyëdë jäˈäy duˈun yajpääty extëm tkujäˈäyë Salomón: “Yë ëyoopëjaˈay, yëˈëpaat yë jiiky myëkuˈuk yˈëxëëkˈixyë [...] E tuˈuk yë kumeenyjyäˈäy nëkooyë nimay tmëëtˈajnë mëtiˈipë [oyjyäˈäwëbën]” (Prov. 14:20, TY). ¿Ti xytyukniˈˈijxëmë tyäˈädë tekstë? Ko pën kyaj nnaygyuentˈäjtëm, mbäät yëˈëyë mëët nnaymyaˈayëmë nmëguˈukˈäjtëm diˈib myëdäjttëbë meeny sentääbë ets kyaj mët pënaty ayoowdëp. ¿Tiko kyujotmayëty ko jeˈeyë nˈijx nduˈunëm ja nmëguˈukˈäjtëm pën kumeenyjyaˈay o ayoobë jäˈäy?

10. ¿Ti jotmayë Santiago nyimaytyak?

¹⁰ Pën jeˈeyë nˈijx nduˈunëm pën kumeenyjyaˈay o ayoobë jäˈäy, mbäädë net nyajnaywyäˈkxëm ja nmëguˈukˈäjtëm. Duˈun jyajty mä primer siiglë, Santiago jyënany ko tyäˈädë jotmay tamë nety dyajnaywyäˈkxënë kanääk ja tuˈukmujkën (käjpxë Santya̱ˈa̱gʉ 2:1-4). Kyaj mbäät nasˈijxëm ets duˈun tyun jyatëdët mä nduˈukmujkëm. ¿Ti mbäät nduˈunëm parë kyaj duˈumbë jäˈäyˈäjtën nyajnigëxëˈkëm?

11. Parë tuˈugë jäˈäy nyaymyayëdët mëdë Jyobaa, ¿yëˈë yaˈijxp nuˈun tijaty tmëdaty tjaygyepy?

¹¹ Tsojkëp nˈijxëm ja nmëguˈukˈäjtëm extëmë Jyobaa yˈixëdë. Yëˈë kyaj mas ttsoky ja diˈib myëdäjtypyë meeny sentääbë o ja diˈib ayoop. Parë  oy nˈijtëm mëdë Jyobaa, kyaj yëˈë tˈixäˈäny nuˈun tijaty nmëdäjt njaygyajpëm. Jantsy tëyˈäjtën ko Jesus jyënany ko “nyiˈigyë nyimëjääty es tuˈugë mëkjäˈäy tyëkët mä ja tsäjpotmëdë kutujkën”, per kyaj jyënany ko niwiˈixtsoo mbäät kyatëkë (Mat. 19:23). Jesus nan ojts jyënaˈany: “[Jotkujk] miitsëty diˈibë ayoodëp, pes mˈittëp mä Diosë kyutujkën” (Luk. 6:20). Per kyaj yëˈë dyajjaygyukëyanë ko niˈamukë ayoobë jäˈäy tmëdowäˈändë ti yëˈë myaytyakypy ets tˈaxäjëyäˈändë kunuˈkxën. Pes nimay ja ayoobë jäˈäy ninäˈä ojts kyapanëjkxëdë. Pääty kyaj mbäät njënäˈänëm ko extëm tijatyë jäˈäy tmëdaty tjaygyepy, duˈun nyaymyayëdët mëdë Jyobaa o kyaj.

12. ¿Wiˈixë Biiblyë tˈanëëmë kumeenyjyaˈay etsë ayoobë jäˈäy?

¹² Mä Diosë kyäjpn jantsy nimayë nmëguˈukˈäjtëm yajpäättë, duˈunë yetyëjk etsë toxytyëjk diˈibë Jyobaa tsyojktëp ets myëduundëp amumduˈukjot. Tap diˈib myëdäjtypyë meeny sentääbë ets tap diˈib kyaj. Mä Biiblyë yajtukˈanaˈambë kumeenyjyaˈay ets “kyaj jeˈeyë tjotmoˈoyët ja mëkjäˈäyˈat, mët ko këjx näjxpëˈë. Waˈan niˈigyë tpëjtaˈaky ja wyinmäˈäny mä Dios” (käjpxë 1 Timotee 6:17-19). Biiblyë nan yˈanmaapy niˈamukë Dios mëduumbë, oy tmëdattë meeny sentääbë o kyaj, ko kujotmay ko jäˈäy tpaˈoˈktëyë meeny sentääbë (1 Tim. 6:9, 10). Pääty pën nˈijxwäˈkxëm yajxon ets duˈun nˈijxëmë nmëguˈukˈäjtëm extëmë Jyobaa, ta kyaj jeˈeyë nˈijxëm pën myëdäjt jyaygyajptëp tijaty o kyaj. Per ta ja tuk pëky, ¿oyëdaa ko jeˈeyë nˈijx nduˈunëm nuˈun ja xyëëw jyëmëjt tmëdaty? Min nˈokˈijxëm.

13. ¿Wiˈixë Biiblyë jyënaˈany nˈijxëm ja mëjjäˈäytyëjk?

¹³ Biiblyë xytyukˈanaˈamëm kanäkˈok ets nwingutsëˈkëm ja mëjjäˈäytyëjk extëm pyaaty nyitëkëty. Extëm tuk pëky jyënaˈany: “Ko yëˈë mëjjäˈäytyëjk xyˈixëty, mwäˈägëˈëgëp ënetyë ets xykyäjpxpoˈkxëty. Myajˈixëdëp yëˈë neywyingutsëˈëgë, mët ko jyaajëty yëˈë Dios” (Lev. 19:32, MNM). Ets mä Proverbios 16:31 jyënaˈany: “Kupoˈoˈat yëˈë tuˈugë koronë diˈib jantsy tsuj ko yajpääty mä nëˈë tuˈu diˈib tëyˈäjtën”. Ets ja apostëlë Pablo ojts tˈanëëmë ja Timoteo ko kyaj tˈooj dyäˈäxët ja mëjjäˈäytyëjk, niˈigyë tkäjpxwijët “extëmxyëp yëˈë teetyëty” (1 Tim. 5:1, 2). Timoteo myëdäjtypyë nety ja kutujkën mä mëjjäˈäytyëjk oy myutsknëmëty, per tsojkëbë nety twingutsëˈëgët ets tpaˈˈayowët.

14. ¿Näˈä mbäät yajmoˈoyë käjpxwijën ja diˈib të myëjjäˈäyënë?

¹⁴ Per ¿ti mbäät yajtuny ko tuˈugë nmëguˈukˈäjtëm diˈib të myëjjäˈäyënë pyokytyunët o ttunët tii diˈibë Dios yˈaxëkˈijxypy? Jyobaa kyaj yëˈë tˈixäˈäny ko të myëjjäˈäyënë parë kyaj ttukumëdowët. Pes ja käjpxwijën diˈib yajpatp mä Isaías 65:20, jyënaˈany: “Ets ja diˈib pokytyuumpy, yajkäjpxpokäämp oyë nety tjamëdaty tuk mëgoˈpxë jyëmëjt”. Nan nbatëmë duˈumbë käjpxwijën mä Ezequiel 9:5 axtë 7. Pääty diˈib mbäät jëjpˈam nbëjtakëm, yëˈë ko xëmë nwingutsëˈkëmë Jyobaa, ja “Mëjjäˈäy diˈib tamyëm jyukyˈäjnë” (Dan. 7:9, 10, 13, 14). Net kyaj ntsëˈkëm ets ngäjpxwijëm ja nmëguˈukˈäjtëm diˈib yajtëgoyˈajtypy, oy nuˈun ja xyëëw jyëmëjt tmëdatët (Gal. 6:1).

15. ¿Ti xytyukniˈˈijxëmë yˈijxpajtënë Pablo mä wiˈix mbäät nˈijxëmë ënäˈktëjk?

¹⁵ ¿Ets wiˈix mbäät nˈijxëmë ënäˈktëjk? Min nˈokˈijxëmë Timoteo yˈijxpajtën. Apostëlë Pablo duˈun myooyë käjpxwijën: “Exkëm pën mdukxiˈigëdë mët ko mwimbuˈutsëtynyëm; jaˈa dëˈën myakëp ja ijxpajtën mët ja diˈibaty myëbëjktëp ja Jesukristë, extëm mij ja mˈayuk, extëm mnayyaˈityëty mët ja tsojkën, extëm mnayyaˈityëty mä ja mëbëjkën, es extëm ja mjikyˈaty wäˈäts” (1 Tim. 4:12). Ko Timoteo duˈun yajnijäˈäyë, waˈanë netyë jyëmëjt të nyäjxnë 30, per të netyë Pablo tyuknipëkyëtyë tuunk diˈib mëjwiin kajaa. ¿Ti tyäˈädë xytyukniˈˈijxëm? Ko kyaj yëˈëyë nˈijxëm nuˈunën ja ënäˈktëjk tmëdattë  ja xyëëw jyëmëjt. Pes nˈokjamyajtsëmë Jesus, yëˈë ja ttuuntsondaky ja Tyeetyë tyuunk ko netyë jyëmëjt të nyäjxnë 30.

16, 17. 1) ¿Wiˈixë mëjjäˈäytyëjk tnijawëdë pën tuˈugë mixy mbäät tyuny mëjjäˈäy o pyudëjkëbë mëjjäˈäy? 2) ¿Wiˈix mbäät nyaywyinguwopëty ja Diosë yˈAyuk mët ja kostumbrë o ja këˈëm winmäˈäny?

¹⁶ Mä mayë it lugäär, kyaj ënäˈktëjk yajmëjpëjtäˈäktë. Pën duˈun jyaty mä ntsënäˈäyëm, waˈan ja mëjjäˈäytyëjk kyaj tkupëkäˈändë parë yajtuunkmoˈoytyët ja ënäˈktëjk extëmë mëjjäˈäy o pyudëjkëbë mëjjäˈäy, oy mbäät duˈun jyatuunëdë. Pënaty tuundëp mëjjäˈäy, oy ko tjamyatstët ko mä Biiblyë kyaj yajnigajpxy nuˈun mbäät ja ënäˈktëjk tmëdattë ja xyëëw jyëmëjt parë yajtuunkmoˈoytyët (1 Tim. 3:1-10, 12, 13; Titʉ 1:5-9). Pääty pën tuˈugë mëjjäˈäy yëˈë pyanëjkxypy ja winmäˈäny diˈibë jäˈäy myëdäjttëp mä ja it lugäär, kyaj nety tijaty ttuny extëmë Biiblyë tniˈanaˈamë. Yëˈë mëjjäˈäytyëjk duˈun mbäät ja ënäˈktëjk tˈixtë extëm jyënaˈanyë Diosë yˈAyuk, ets kyaj extëm wyinmaytyë o extëm ja kostumbrë tmëdattë (2 Tim. 3:16, 17).

¹⁷ Pën ja mëjjäˈäytyëjk yëˈë pyanëjkxtëp extëm ja kostumbrë yajmëdaty ets kyaj extëmë Biiblyë jyënaˈany, mbäädë net kyaj tkupëktë ets yajtuunkmoˈoytyët mëjjäˈäy o pyudëjkëbë mëjjäˈäy, pënaty mbäät duˈun jyatuunëdë. Duˈun jyajty mä tuˈugë paˈis, tamë nety tuˈugë nmëguˈukˈäjtëm diˈib tuump pyudëjkëbë mëjjäˈäy ets tnikëjxmˈaty tuˈuk majtskë tuunk diˈib jëjpˈam mä tuˈukmujkën. Oy ja mëjjäˈäytyëjk tjaˈijxtë ko tyäˈädë nmëguˈukˈäjtëm kyuytyuumpy extëmë Biiblyë jyënaˈany parë tyunët mëjjäˈäy, kyaj ttuunkmooytyë. Niduˈuk nimajtsk ja mëjjäˈäytyëjk diˈib tamë xyëëw jyëmëjtnë, mëktaˈaky jyënandë ko mutsknëm parë tyunët mëjjäˈäy. Jotmaymyëët njënäˈänëm ko tyäˈädë nmëguˈukˈäjtëm kyaj yajtuunkmooy mët ko mutsknëm kyëxëˈëky. Tyäˈädë yëˈë jeˈeyë tuˈugë ijxpajtën, per oymyääjëty duˈun nimayë mëjjäˈäytyëjk wyinmaytyë. Päätyën jyëjpˈamëty ets yëˈë ndukwäˈkpajtëm wiˈixë Biiblyë jyënaˈany ets kyaj yëˈëjëty ja këˈëm nwinmäˈäny o wiˈix ja kostumbrë yajmëdaty. Net nmëmëdoˈowëm ko Jesus jyënany: “Kyaj ti xyˈëxˈyoˈoy xypyayoˈoytyët extëm kyëxëˈëky nikëjxy këbajky”.

18, 19. ¿Ti mbäät nduˈunëm parë nˈijxëmë nmëguˈukˈäjtëm extëmë Jyobaa yˈixëdë?

¹⁸ Oy nbokyjyaˈayˈäjtëm, mbäät njäjtëm ets kyaj nbajxëme nmëguˈukˈäjtëm oy mä tsyoondët, ets nˈijxëm extëm Jyobaa tˈixy (Apos. 10:34, 35). Per parë duˈun nduˈunëm, tsojkëp tuˈuk tuˈugë xëëw nduˈunëmë mëjääw parë nbanëjkxëmë Biiblyë kyäjpxwijën. Duˈuntsoo nmëmëdoˈowëm extëmë Jesus ojts xytyukˈanaˈamëm ko jyënany: “Kyaj ti xyˈëxˈyoˈoy xypyayoˈoytyët extëm kyëxëˈëky nikëjxy këbajky” (Juan 7:24, TNM).

¹⁹ Tim tsojkë Jesus diˈib nReyˈäjtëm tpayoˈoyaˈanyë naxwinyëdë jäˈäy tëyˈäjtën myëët, kyaj tpayoˈoyaˈany extëm jeˈeyë tˈixy, o extëm jeˈeyë tmëdoyˈaty (Is. 11:3, 4). ¡Jantsy oy diˈibë Jesus tyunaampy!