¿Mjamyejtsypyë?
¿Të xyyajwëˈëmy tijaty näämnëm të xykyajpxy mä rebistë Diˈib Xytyukˈawäˈänëm? Pën tëë, ix pën mbäädë net xyˈatsoowëmbijtäˈäyë tyäˈädë yajtëˈëwën:
¿Wiˈixë Jesus tpudëjkë ja jäˈäyëty parë kyaj tëgatsy tˈixtëdë myëguˈuktëjk?
Ja tiempë mä jyukyˈajty, nimay ja judiyëtëjk tëgatsy tˈijxtë myëguˈuktëjk. Perë Jesus nyimaytyak ko jëjpˈam nˈijtëm yujy tudaˈaky ets ko kyaj yˈoyëty nwinmäˈäyëm ko niˈigyë yˈoyëty ja rasë. Yˈanmääy ja yˈëxpëjkpëty ko tsojkëp nyayˈixëdët tukaˈaxpëm (w18.06, paj. 9, 10).
Ko Dios kyaj tnasˈijxë ets ja Moisés tyëkët mä ja Nax diˈib Yajtukwandaktë, ¿ti xytyukniˈˈijxëm?
Moisés jantsy oy nyaymyaayë mëdë Jyobaa (Deut. 34:10). Ko nety ja israelitëty dyaˈˈabajnëdë 40 jëmëjt mä ja lugäärë äänëˈëk tëtsëˈëkpë, ta myëmajtskˈok tyëjkëdë abajt kutujkpë mët ko kyaj ti nëë. Dios ta ojts ttukˈaneˈemyë Moisés ets tmëgäjpxët ja kaats, perë Moisés kyaj ojts tmëgajpxy, wyojp ja kaats. Jyobaa ta jyantsy tyukjotˈambëjkë. ¿Tiko? Waˈan mët ko kyaj tpaduuny extëm yˈanmääyë, ets mët ko kyaj dyajmëjpëtsëëmy ko yëˈë diˈib tyuun ja miläägrë (Núm. 20:6-12). Tyäˈädë yëˈë xytyukˈijxëm ko jëjpˈam nmëmëdoˈowëmë Jyobaa ets nyajmëjpëtsëˈëmëm (w18.07, paj. 13, 14).
¿Wiˈix mbäät pojënë ndëgoˈoyëm ko jeˈeyë nˈëxˈyoˈoy nbayoˈoyëm extëm kyëxëˈëky tuˈugë jäˈäy nikëjxy këbajky?
Taaˈäjtp tëgëk pëky diˈibë jäˈäy yajwinmääyëp tëgatsy mä ja myëguˈuk, 1) mä tsyoony o wiˈix yˈixëty, 2) pën myëdäjtypyë meeny sentääbë o kyaj ets 3) nuˈun ja xyëëw jyëmëjt tmëdaty. Per Jëjpˈam njäjtëm ets kyaj nbajxëme nmëguˈukˈäjtëm oy mä tsyoondët, ets nˈijxëm extëmë Jyobaa tˈixy (Apos. 10:34, 35) (w18.08, paj. 8-12).
¿Wixaty tyam tpudëkëdë ja tuˈukmujkënë pënaty të myëjjäˈäyëndë?
Ja nmëguˈukˈäjtëm diˈib të myëjjäˈäyënë ets kyaj mbäät tˈoktuunë ja tuunk diˈibë nety nyikëjxmˈäjtypy, duˈunyëmë Dios yajtsobäätyëty mëjwiin kajaa ets mbäät kajaa tpudëkë ja myëguˈuktëjk. Mbäät mas oy tpudëkë ja yetyëjk diˈib kyaj yˈëxpëky, pënaty të tmëjagamgaˈaktë Diosë kyäjpn, dyaˈëxpëkëdë jäˈäy ets nan mbäät wiˈixëm ttuunë Diosë tyuunk (w18.09, paj. 8-11).
¿Tijaty tuumbajn jaˈäjtp parë jäˈäy nyaˈëxpëjkëm?
Tuk pëky, yëˈë tarjetë parë jäˈäy tyëkët mä jw etsë inbitasyonk, tuktujkë trataadë diˈib jantsy oyaty miimp etsë rebistë. Nan nmëdäjtëmë foyetë ets majtskë liibrë diˈib nyajtuˈunëm parë jäˈäy nyaˈëxpëjkëm, ets taxkë bideo, extëm ¿Tiko xyˈëxpëkëdë Biiblyë? (w18.10, paj. 16).
Extëm jyënaˈanyë Proverbios 23:23, ¿ti tsojkëp ttunët tuˈugë Dios mëduumbë parë tjuyët ja tëyˈäjtën?
Kyaj tsyokyëtyë meeny sentääbë parë njuˈuyëm ja tëyˈäjtën. Per tsojkëp njuˈtëmë tiempë ets nbëjtakëmë jot mëjääw parë nbatëm (w18.11, paj. 4).
¿Ti xytyukniˈˈijxëm mä wiˈixë Oseas jyaˈayˈajty mët ja kyudëjk, Gómer?
Gómer kanäkˈok tmëttsënääyë wiink yetyëjk. Perë Oseas pokymyaˈkxë ets kyaj myastutë. Pën tuˈugë Dios mëduumbë mëdëgooyëp ja kyudëjk o ja myëmëjjäˈäy, mbäät tpokymyeˈkxy. Pën ijt tsënaapy jatëgok mëët, Biiblyë kyaj tnekyyajnigutukë parë mëët yaˈˈajääywyäˈkxët (w18.12, paj. 13).