ESTEBAN të yajtukwinguwowë tuk grupë yetyëjk diˈib jantsy axëkˈijxëdëp, diˈib tuundëp mä ja judiyëtëjk tmëdattë kutujktakn, ja nyiwinëˈattë 71. Tyäˈädë jäˈäyëty yëˈë diˈib mas kumëjääw ijttëp. Yëˈë të wyoowmukëdë ja teety wyintsën diˈib xyëwˈäjtypy Caifás, diˈib myajtsk poˈo tyëgëk poˈojëp ojts tpayoˈoyë Jesus ets dyajnigutujkë parë yˈoogët (Mat. 26:57, 59; Apos. 6:8-12). Yajnäjxtë kanäägë testiigë parë tniwäämbajttë Esteban, per ja diˈib tuundëp mä ja judiyëtëjk yajkutuktë, nmonyˈijx monyjyäˈäwëdë ko tˈijxtë ja wyiin jyëjp kyëxëˈëky “extëm tuˈugë anklës” (Apos. 6:13-15).

¿Ti pudëjkë Esteban parë kyaj tsyëˈk jyäˈäwë ko nyibëdëˈkëdë ja myëtsip? Mä kyayajmënëjkxynyëm aguanë mä ja kutujktakn, Esteban mëkë nety tyuny mä ja tuˈukmujkën mët ko pyudëkëtyë Diosë myëjääw (Apos. 6:3-7). Ets mä jyustisëpaty, nan yëˈë Diosë myëjääw jotkujkmooyë ets yaˈˈawatsë ja jyot winmäˈäny (Fwank 14:16). Mä nety jam nyaynyitsiptunyëty extëm jyënaˈanyë Apostʉlʉty kapitulo 7, nan yëˈë pudëjkë tyäˈädë mëjääw parë tjamyatsët naa 20 tekstë diˈib yajpatp mä Escrituras Hebreas (Fwank 14:26). Perë Esteban mas niˈigyë kyëktëjkë myëbëjkën ko tˈijxyë Jesus tyanë Dios pyëˈääy (Apos. 7:54-56, 59, 60).

Ëtsäjtëm nan mbäät näˈä nyajnibëdëˈkëm ets nyaˈatsëˈk nyaˈajäˈäwëm (Fwank 15:20). Per pën xëmë nˈëxpëjkëmë Diosë yˈAyuk ets jam ja jot winmäˈäny nbëjtakëm mä tyuunk, ta nëjkxë Diosë myëjääw xypyudëjkëm. Nan nëjkxëp xymyëjääwmoˈoyëm parë nmëmadakëm ko nyajnibëdëˈkëm ets nyajpatëm jotkujk (1 Peed. 4:12-14).