ABËTSEMY nyaxwinyëdë nmëguˈukˈäjtëm diˈib tuundëp mëjjäˈäy, yajtsobattëp ja tuunk diˈib myëdäjttëp mä Diosë kyäjpn, ets niˈamukë ndukxondakëm ko xypyudëjkëm. Per tyää näämnëmë të yaˈˈanëëmëdë diˈib të myëjjäˈäyëndë ets tkëyaktët ja tuunk diˈib mëjwiin kajaa nyikëjxmˈäjttëp parë yëˈë ttundët ja mëjjäˈäytyëjk diˈib ënäˈkaty.

Ko duˈun të tyëgatsy, ta pënaty tuundëp sirkuitë ets pënaty yaˈëxpëjktëp mä eskuelë diˈib jaˈäjtp mä Diosë kyäjpn, kyaj duˈun yˈoktuunëdë ko dyaˈˈabattë 70 jyëmëjt. Ets pënaty tuundëp mëjjäˈäy, ko jyëmëjt tmëdäjnëdë 80, ta ttuknipëjknëdë ja tuunk diˈib nyikëjxmˈäjtypy pënaty ënäˈkaty, extëm pën yëˈë nety tyukniwijtsëp tijaty mä mëjjäˈäytyëjk o mä Komitee diˈib tuundëp mä Sukursal. ¿Wiˈixë tyäˈädë nmëguˈukˈäjtëm jyënäˈändë ko ja tyuunk të tyëgatstë? Duˈunyëm tmëduunˈadëˈëtstë Jyobaa mëdë kyäjpn.

Ken, yëˈë diˈib tyukniwijtsë tijaty mä Komitee diˈib tuundëp mä Sukursal naa 49 jëmëjt, jyënaˈany:  “Kots nnijäˈäwë wiˈixë nety të yajtukniwitsë, ninuˈunëts ojts ngajëjpkugäjpxë. Ets mä tadë jopy, tëtsë netyë Jyobaa nˈanëëmë ko nyajtëgoyˈäjttëbëtsë tuˈugë nmëguˈukˈäjtëm diˈib mas ënäˈk diˈib tyukniwitsëp tijaty”. Nimayë nmëguˈukˈäjtëm diˈib të myëjjäˈäyëndë nanduˈun wyinmaytyë extëmë Ken. Per kom jyantsy tyukxondaktëbë nety ko duˈun tyundë, pääty waˈan naa tëgatsy nyayjyäˈäwëdë ko duˈun yaˈˈanmääytyë.

Esperandio, diˈibë nety tyukniwijtsëp tijaty mä mëjjäˈäytyëjk, jyënaˈany ko naa mon tuk yˈoknayjyäˈäwë. Per nan yˈëxkäjp ko nipëjk niˈadoonënëp ets ko yajtëgoyˈajtypyë tiempë parë nyayajtsoybyatëdët. Esperandio duˈunyëm tmëduunˈadëˈëtsyë Jyobaa ets mëjwiin kajaa yajtsobäädëdë myëguˈuktëjk.

¿Ets wiˈix jyënäˈändë nmëguˈukˈäjtëm diˈibë nety jantsy jeky të tyundë sirkuitë? Allan, diˈib tuun sirkuitë 38 jëmëjt, jyënaˈany: “Duˈunyëts ojts nwëˈëmë kots duˈun nyaˈˈanmääy”. Per nan jënäämp ko oy ko ënäˈktëjk yajtuknipëktë tuunk, etsë Allan duˈunyëm tmëduunˈadëˈëtsyë Jyobaa.

Russell ja tyuuny sirkuitë ets yaˈëxpëjky mä eskuelë diˈib jaˈäjtp mä Diosë kyäjpn naa 40 jëmëjtën. Yëˈë tnimaytyaˈaky ko tim ogäˈän axëëk yˈoknayjyäˈäwë mëdë kyudëjk. Jyënaˈany: “Nyajtsobattëbëtsë nety mëjwiin kajaa kots duˈun ndundë, ets duˈunëtsë nety nnayjyawëdë ko tapnëmtsë njot nmëjääwëty parëts nduunˈadëˈëtstët”. Tyam, duˈunyëmë Russell mëdë kyudëjk dyajtundë ja wyijyˈäjtën mä ja tuˈukmujkën mä yoˈoytyë, ets jantsy jotkujk nyayjyawëdë nmëguˈukˈäjtëm.

Waˈan ëtsäjtëm kyaj duˈun të nnayjyäˈäwëm extëmë tyäˈädë nmëguˈukˈäjtëm. Per mbäät njaygyujkëm wiˈix nyayjyawëdë ko nˈëxpëjkëm tuˈugë ijxpajtën diˈib miimp mä 2 Samuel.

Nˈokjamyajtsëm ja tiempë mä Absalón tnibëdëˈkyë tyeety, ja rey David. David ta kyeky jam Jerusalén ets ojts nyijkxy Mahanaim, Jordán mëj nëë awinm. Jam kyëjxtääytyë kyaˈay yˈukënë diˈib nyijukyˈäjtˈadëˈëtstëp. ¿Ti net tuun jäjtë?

Ta yˈoyjyaˈaytyaktë nidëgëëgë yetyëjk ets tmëmiindë käˈäy ukën, abëjk aduˈunën etsë wëëty mabajn, niduˈuk yëˈë Barzilai (2 Sam. 17:27-29). Ko xyeˈemy ja tsip mëdë Absalón, ta David jyëmbijty Jerusalén, etsë Barzilai yëˈë jamyëdäjtë axtë mä Jordán. Ta David wyoowë jam Jerusalén ets yˈanmääyë ko yëˈë yajkayan yaˈuuganëp, Barzilai kyaj nety dyajtëgoyˈaty, pes kumeenyjyaˈay (2 Sam. 19:31-33). Waˈanë David wyoowë mët ko tmëdatyë oybyë jäˈäyˈäjtën etsë ëwij käjpxwijën, pes nyijäˈäwëbë nety wiˈix yˈixëtyë jukyˈäjtën. Jantsy oyë nety parë Barzilai nyëjkxët Jerusalén ets tyunët mä ja reyë kyutujktakn.

Perë Barzilai kyaj nyaymyëjpëjtakë ets kyupëjk wiˈixë nety yaˈixy yajpääty. Pääty tˈanmääyë David ko kyaj nety tnekyˈëxkapy ti oy ets ti axëëk,  pes 80 netyë jyëmëjtnë. ¿Ti myaytyäˈägan? Ko tamë nety diˈib kyaj tnekymyëmadaˈaky mët ko të myëjjäˈäyënë. Axtë jënan ko kyaj nety oy yˈokmëdoonë ets tˈokjäˈäwënë tijaty (Ecl. 12:4, 5). Barzilai mbäädë nety tˈakˈyakyë ëwij käjpxwijën extëm ok ja mëjjäˈäytyëjk ojts tˈëwij tkäjpxwijtë ja Rehoboam (1 Rey. 12:6, 7; Sal. 92:12-14; Prov. 16:31). Pääty tˈanmääyë David ets yëˈë tmënëjkxëdë Kimham, tuˈugë mixy diˈib waˈan yëˈë tˈuˈungëty (2 Sam. 19:35-40).

Barzilai kyaj tpanëjkxanyë David mët ko të nety myëjjäˈäyënë, duˈun dyajnigëxëˈky ko kyupëjkypyë nety wiˈix yaˈixy yajpääty. Tyam, nan pääty të tyëgatsy extëm të yajnigajpxy mä tsyondaˈagyë tyäˈädë artikulo. Kyaj jeˈeyë yajkuentëpëjtaˈaky ti tyukˈoyˈatëp tuˈugë jäˈäy extëm ja Barzilai. Yëˈë yajwinmaapy ti tyukˈoyˈattëp nimayë mëjjäˈäytyëjk diˈib jaˈäjtp abëtsemy nyaxwinyëdë.

Tyäˈädë nmëguˈukˈäjtëm diˈib të myëjjäˈäyëndë, yujy tudaˈaky të yˈittë ets netyë të tjaygyukëdë wiˈix yajtukˈoyˈatäˈäny diˈib të tyëgatsy. Pën tyukmëwëˈëmëdëp ja ënäˈktëjk tijaty nyikëjxmˈäjttëp, ta mbäädë Diosë kyäjpn yajkuentˈaty yajxon ko nyimayëˈadëˈëtsët. Nimayë tyäˈädë mëjjäˈäytyëjk të ttukniˈˈixëdë ja ënäˈktëjk wiˈix tyundët, duˈun extëm ja apostëlë Pablo tpudëjkë Timoteo o waˈan nanduˈunë Barzilai tpudëjkë ja yˈuˈunk (1 Kor. 4:17; Filip. 2:20-22). Tyäˈädë ënäˈktëjk diˈib tuundëp mëjjäˈäy, të dyajnigëxëˈëktë ko yëˈë ja yetyëjkëty diˈib të yajnayaktë ets ko mbäät “yajxon tmëdunët diˈibë tiˈigyë ijttëp mët ja Kristë” (Éfes. 4:8-12; ix nanduˈunë Números 11:16, 17, 29).

Abëtsemy nyaxwinyëdë, të nimayë nmëguˈukˈäjtëm nyaytyukniwäˈätsëdë ja tuunk diˈibë nety nyikëjxmˈäjttëp, duˈuntsoo mas niˈigyë tmëdattë tiempë parë tmëdundë Jyobaa.

Marco, diˈib tuun sirkuitë 19 jëmëjt, jyënaˈany: “Kots kyaj duˈun ja tuunk nˈoknikëjxmˈäjnë, tats nmëdatyë tiempë parëts mbäät nbudëkë ja nmëguˈukˈäjtëmë myëmëjjäˈäy diˈib kyaj yˈëxpëky”.

Geraldo, diˈib të tyuny sirkuitë 28 jëmëjt, jyënaˈany: “Tëts mëdë ngudëjk nduknibëjtäägëdë tijatyëts ndunandëp, extëm nbudëkëyäˈändëts pënaty të tmëjagamgaˈaktë Diosë kyäjpn ets nyaˈëxpëkäˈändëts niganäägë jäˈäy”. Tyäˈädë nmëguˈukˈäjtëm jyënaˈany ko 15 tyamë jäˈäy dyaˈëxpëky ets ko niganääk nyëjkxnëdë reunyonk diˈibë nety të tmëjagamgaˈaktë Diosë kyäjpn.

Allan, diˈib të yˈokˈyajnimaytyakpë, jyënaˈany: “Tyam mbäädëts aduˈugë njot nwinmäˈäny nbëjtäˈäktë mäts ngäjpxwäˈkxtë. Jantsy käjpxwäˈkxandëbëts mä mayjyaˈay yajpääty, mä negosyë ets mätsë nmëdëjkpäˈäjëty. Ets tëts ogäˈän xyjamyëdattë nimajtskëtsë nmëdëjkpäˈä mä reunyonk”.

¿Mijts niduˈuk diˈib jeky të xywyindanë Diosë tyuunk ets tyam të tyëgatsy? Pën duˈun, tuk pëky wiˈix mbäät mëdë Jyobaa mduunmuky, yëˈë ko xytyukniˈˈixët tijaty mjäjty mnijäˈäwëp ja nmëguˈukˈäjtëm diˈib mas ënäˈk. Russell, diˈib të yˈokˈyajmaytyakpë, jyënaˈany: “Jyobaa yëˈë tyam tyukniˈˈijxëp ets yajtuumbyë nmëguˈukˈäjtëm diˈib mas ënäˈkaty ets diˈib jantsy oy tuundëp. Mëjwiin kajaa nmëguˈukˈäjtëm ttukˈoyˈattë wiˈix yëˈëjëty tyukniˈˈixëdë ets wiˈix twop tkaptë ja borreeguˈunk” (ixë rekuäädrë “ Pudëkë ja yetyëjkë mas ënäˈkatypyë parë mas oy tyundët”).

Pën të näämnëmë mduunk tyëgatsy, oy ko kyaj axëëk mwinmayët. Të mayë jäˈäy pyudëkëdë tijaty të xytyuny amumduˈukjot, ets mbäät duˈunyëm mduunˈadëˈëtsy. Mijts tuˈugë jäˈäy diˈib myajtsojkp ets duˈunyëm myajtsokäˈäny.

Ets diˈib mas jëjpˈam, yëˈë ko tijaty të xytyuny të wyeˈemy mä Jyobaa jyot kyorasoon. Yëˈë twandaˈaky mä yˈAyuk: “Kyaj tjäˈäytyëgoyaˈany diˈibë miitsëty oy mduundëp. Dios jyamyatsëp ko miits xyyaˈijxëdë mtsojkën mët ja jyaˈayëty, mët ko xypyudëjkëdë es dëˈënyëm xyˈaktimpudëkëdë” (Eb. 6:10). Extëm yä jyënaˈany, yëˈë xytyukˈijxëm  ko Dios kyaj yëˈëyë tjamyetsy tijaty të nduˈunëm. Kom mëjwiin kajaa xyyajtsobatëm, kyaj tjäˈäytyëgoy tijaty të nduˈunëm ets tijaty nduunˈadëtsëm parë xytyukjotkëdakëm.

¿Ets pën kyaj ëtsäjtëm të tyëgatsyë nduunkˈäjtëm? Wenë, nan mbäät xypyudëjkëm ti yä yajnigäjpxp. ¿Wiˈix?

Pën yaˈijx yajpatëm mëdë tyäˈädë nmëguˈukˈäjtëm diˈib të tyëgatsyë tyuunk, mbäät nnaytyukpudëjkëm ja wijyˈäjtën diˈib myëdäjtypy ets tijaty jyajty nyijäˈäwëp. Nˈokˈamdoˈowëmë ëwij käjpxwijën ets nˈokˈyajtëˈëwëm wiˈix mbäät tijaty nduˈunëm. Nan nˈokˈijx nˈoktuˈunëm wiˈix dyajtuunkpääty tijaty jyajty nyijäˈäwëp mä tyam tyuny.

Pääty, pën mijts ja mëjjäˈäy diˈib të tyëgatsy ja tyuunk, o mijts niduˈuk diˈib mbäät mnaytyukpudëkëtyë tyäˈädë nmëguˈukˈäjtëmë wyijyˈäjtën diˈib jeky të tyuny, nˈokjamyajtsëm ko Jyobaa yajtsobatypy pënaty jeky të myëdunëdë ets duˈunyëm myëduunˈadëˈëtsëdë.