¿TI NDUˈUNËM ko nnijawëyäˈänëm ti oorë tyam? Waˈan nˈijxëm ja relooj, ets nˈijxëm ko ta a la 1:45. Ets wiˈixë net nˈatsoˈowëm ko pën xyyajtëˈëwëm: “¿Ti oorë tyam?”.

Wenë, wiˈixëmë jäˈäy dyaktë oorë mä tuˈuk tuˈugë lugäär. Ta mä yˈatsowdë: “A la 1:45”, o “ja mäjmokx minutë yˈaktëgoyˈaty parë a las 2”. Nan ta lugäär mä jäˈäy yˈatsowdë: “Ta a las 13:45”, pën 24 oorë myaytsyowdë.

Per ¿wiˈixëdaa Biiblyë tmaytyaˈaky ijtyë jäˈäy tmaytsyowdë tiempë? Kanäk pëky ijty jyaˈˈaty wiˈix tmaytsyowdë extëm ëtsäjtëm tyam. Mä Escrituras Hebreas, yajmaytyakpë “jopyëp”, “kujkxyëëw”, “jyäjmoonë” ets “tsuˈujënëp” (Gén. 8:11; 19:27; 43:16; Juec. 19:9). Per näˈäty tyim nigajpxypy näˈä tii tmaytyaˈaky.

Nan tamˈäjtp ijty pënaty kyuentˈäjttëp ja käjpn, ets mas niˈigyë koots. Ja israelitëty tëgëk pëky ijty dyajnaywyäˈkxëdë ja tsuˈum, diˈib tyijtë tsuˈumˈat kootsˈat (Sal. 63:6). Mä Jueces 7:19, myaytyakypyë kujkwaˈkxy tsyuˈum. Ets ja tiempë mä Jesus jyukyˈajty, ja judiyëtëjk yëˈë nety pyanëjkxtëp extëm ja jäˈäyëty diˈib Roma ets Grecia të dyajnaywyäˈkxëdë taxk pëky ja kootsˈat.

Mä Evangelios yajmaytyakp kanäkˈok wiˈix nyaywyaˈkxyëty ja kootsˈat. Extëm nˈokpëjtakëm, jyënaˈany ko “monyëmë” nety ko Jesus ojts tyuˈuyoˈoy mejny wingëjxy parë tmëwingoony ja barkë mä nyëjkxtë ja yˈëxpëjkpëty (Mat. 14:25). Ets tëgok, duˈunë Jesus jyënany: “Koxyëp tuˈugë kudëjk tnijawë ti oorë mä ja kootsˈat myinäˈäny ja maˈtspë, wijyxyëp yˈity es kyajxyëp tnaˈixy es ja maˈtspë yaˈˈawatsxëdët ja tyëjk es myaatsëdët” (Mat. 24:43).

Jesus yˈanmääy ja yˈëxpëjkpëty: “Nˈanëëmëdë miitsëty, wëˈëmdë wijy, mët ko kyaj xynyijawëdë näˈä jyëmbitäˈäny ja mWintsën, pën të tsyuˈujënë, pën tsuˈpën, mä yˈëy ja tëgaak o mä xyëënyë” (Mar. 13:35). Yä nˈijxëm ko taxk pëky nyaywyaˈkxyëty ja kootsˈat. Tuk pëky, mä “të tsyuˈujënë”, ja tmaytyaˈaky ko ja Xëëw të kyëdaknë axtë naa las 9. Myëmajtsk pëky, “tsuˈpën” o tsuˈumgujk, ja tmaytyaˈaky naa a las 9 axtë a las 12. Myëdëgëk pëky, mä “yˈëy ja tëgaak”, desde tsuˈumgujk axtë naa a las 3 de la manyanë. Waˈan mä ttukˈyoˈoyë tyäˈädë oorë, yˈëëy ja tëgaak ja koots mä Jesus yajmäjtsy (Mar. 14:72). Ets myëmäjtaxk pëky, yëˈë “mä xyëënyë”, ja ttukˈyoˈoy naa a las 3 de la manyanë axtë ko ja Xëëw pyëtsëmy.

Extëm nˈijxëm, oy tëëyëbë jäˈäy tkamëdäjttë relooj extëm tyam, nyijäˈäwëdëp ijty wiˈix tmaytsyowdët ja tiempë.