NITII madakën tkamëdaty tuˈugë uˈunk diˈib apenënëm të myaxuˈunkˈaty. Ko ojts nmaxuˈunkˈäjtëm, aduˈuk ja tääk teety ojts xykyuentˈäjtëm. Ets ko ojts nˈyoˈoyëˈkëm, ak yenyatyë jäˈäy nˈijxëm, xyˈatsëˈkëm ijty ets ta pojën ja tääk teety ninëjkxëm. Per kyaj nekytsyëˈkëm ko xykyëˈëmëmäjtsëm.

Ko nmutskˈäjtëm, oy nnayjäˈäwëm ko ja tääk teety xytsyojkëm ets xypyudëjkëm, ets yëˈë diˈib seguurë xyajnayjäˈäwëm. Ko xyˈanmäˈäyëm ko jantsy oy tijaty nduˈunëm, kyaj ti njëjptsëˈkëm ets mas oy tijaty nduˈunëm.

Ko ogäˈän nyaˈkënë, ta nbatëmë nmëtnaymyaayëbë diˈib nanduˈun xypyudëjkëm parë nnayjäˈäwëm seguurë. Jantsy jotkujk nnayjäˈäwëm ko mëët nyajpatëm, ets nan yëˈë xypyudëjkëm parë kyaj ntsëˈkëm ko nëjkxëm eskuelë.

Jantsy oyxyëp ko duˈun niˈamukë ënäˈkuˈunk yaak pyattë. Per jotmaymyëët njënäˈänëm ko nääk tsiptakxëdëp tmëdattëdë myëtnaymyaayëbë, ets nimay kyaj tyääk tyeety kyuentˈatëdë extëm jyapäätyëty. Melisa jyënaˈany: “Kojëts nˈixyë jäˈäyë ryetratë mä tuk familyë tijaty ttundë, tajëts njënäˈäny: Duˈunxyëbëts nˈokmëdäjty tuˈugë nfamilyë”. * ¿Nanduˈun mnayjawëty?

Waˈan kyaj mjotkujkˈäjty ko mˈyeˈky mbejty. Mbäät mët ko kyaj pën mduunë kuentë ets ko kyaj pën mtsojkë. Nan waˈan xëmë ja mdääk teety tsyiptuundë mä nety kyanaymyastuˈudëdë ets mwinmääy ko mijtsë mboky. O waˈan mas oˈktëy të mjaty, të myajtsiiky myajkoxy ets të myajwingajpxy myajjëjpkajpxy.

¿Wiˈix wyimbëtsëmy ko duˈunë ënäˈkuˈunk yaaktë? Ko yaˈkpëtsëëmnëdë, ta net tjëˈxtë droogë ets nyayˈaˈuugëdë. Wiinkpë, ta tpuwäˈägëdë pandiyë parë tjawëyäˈändë ko yajkupëjktëp. Nan ta diˈib yˈëxtääytyëbë nyoobyë mët ko dyajtëgoyˈattë ets pën tsyokëdët, per kyaj dyajjaktë. Ets ko dyajjëjpkëxtë, niˈigyë axëëk nyayjawëdë ets kyaj nyekyˈittë seguurë.

 Ta ënäˈktëjk diˈib kyaj duˈun jyattë, per nayjäˈäwëdëp ko kyaj ti ttsooˈattë. Extëmë Ana, jyënaˈany: “Xëmëts nwinmääy ko nitiijëts oy ngatuny, pes xëmëtsë ndääk xyˈanmääy ko nitiijëts ngajaty ndunët. Ninäˈäjëtsë ndääk xykyamëjkumääy ets ni xykyatukˈijxyëts ko xytsyojkpëts”.

Per ta kanäk pëky diˈibë jäˈäy kyaj yajnayjawëty seguurë. Extëm ko yaˈˈajääywyaˈkxy, ko myëjjäˈäyënë o ko kyaj tsuj nyayˈixyëty. Per oy ti axëëk myajnayjawëdët, waˈan myajpääty mon tuk ets mtsiptakxëty mnaymyënëjkxëdët oy mëdë wiink jäˈäy. ¿Ti mbäät mbudëkëty parë kyaj axëëk mnayjawëdët?

Mbäät nˈijtëm seguurë ko kyaj naytyuˈuk nyajpatëm. Pesë Dios xyjantsy pyudëkëyäˈänëm.

Dios duˈun xytyukwandakëm extëm tkujäˈäyë ja kugajpxy Isaías: “Këdii may mdäjy, mët ko ëjts xyDiosˈäjtp. Ëjts mijts njotmëkmoˈoyaampy, duˈun, ëjts mijts nbudëkëyaampy, nwijtsˈitaampy mëdëtsë nˈaˈoygyëˈë” (Isaías 41:10, 13). Mëjwiin kajaa xyjyotkujkmoˈoyëm ko nnijäˈäwëm ko Dios xywyijtsëm mëdë yˈaˈoygyëˈë. ¡Kyaj tiko mbäät nmäˈäy ndäjëm!

Mä Biiblyë yajmaytyakpë Dios mëduumbëty diˈib nanduˈun axëëk nnayjäˈäwëdë, per myëbëjktë ko Dios pudëkëyanëdëp ets nyasˈijxëdë parë wyijtsˈyoˈoyëdët. Extëmë Ana, mä nety tkayajmaxuˈunkˈatynyëmë Samuel, duˈun wyinmääy ko tëdën ninäˈä tkapäätyë yˈuˈunk yˈënäˈk. Ets yajnëxik yajtukxik ko kyaj mbäät yˈuˈunkpääty. Ta ijty jyëˈëy yaˈaxy ets kyaj kyay (1 Samuel 1:6, 8). Per ko ttukmëtmaytyaktääyë Dios wiˈix nyayjawëty, ta ojts jyotkujkë (1 Samuel 1:18).

David nan ojts kanäkˈok axëëk nyayjawëty. Pes kanäk jëmëjt pyajëdijtë ja rey Saúl parë yaˈoogäˈänyëty. Ets oy kyaj wiˈix jyajty, kanäkˈok nyayjäˈäwë ko kyaj tnekymyëmadäˈägäˈäny ja amay jotmay (Salmo 55:3-5; 69:1). Per duˈun tkujäˈäyë: “Agujk jotkujkëts naygyoˈogäˈänyëty ets nmäˈäjäˈänyëts, mët ko mijts Jyobaa xyaˈijtpëts seguurë” (Salmo 4:8).

Ana mëdë David ojts tˈamdowdë Diosë nyaybyudëkë parë tmëmadäˈäktët ja ayoˈon jotmay ets ja jäj jëmuˈumën, etsë Dios pudëjkëdë (Salmo 55:22). ¿Mbäät nanduˈun nduˈunëm?

1. Ixë Jyobaa extëmë mDeety

Jesukristë ojts xyˈanmäˈäyëm parë nˈixyˈäjtëmë Tyeety, yëˈë tukpäjkpë Dios diˈib tëyˈäjtën (Fwank 17:3). Apostëlë Pablo nanduˈun xyˈanmäˈäyëm ko “kyaj jagam yˈity ja Dios. Taa jaˈa mä ëtsäjtëm niduˈuk niduˈuk” (Apostʉlʉty 17:27). Päätyë Santiago tkujäˈäyë: “Mëwingondë Dios, es yëˈë nandëˈën mmëwingonëdëp miitsëty” (Santya̱ˈa̱gʉ 4:8).

Ko nnijäˈäwëm ko nmëdäjtëm tuˈugë nDeetyˈäjtëm jam tsäjpotm diˈib xytsyojkëm ets xymyëmäˈäy xymyëdäjëm, yëˈë xypyudëjkëm parë kyaj ngëjx ndujkëm. Tiempë naxäämp parë duˈunë Dios nmëbëjkëm, per të nimayë jäˈäy tˈixtë wiˈix pyudëkëdë. Extëmë Carolina jyënaˈany: “Kojëts ogäˈän nmëbëjkyë Jyobaa, taanëmëts njäˈäwë ko nmëdäjtypyëts tuˈugë nDeety diˈibëts mbäät ndukmëtmaytyaktäˈäy wiˈixëts nnayjawëty. Tyäˈädë yëˈë diˈibëts jotkujk xyajnayjäˈäwë”.

Raquel jyënaˈany: “Jyobaa yëˈëjëts xypyudëjkë parëts jotkujk nnayjäˈäwë kojëts ja ndääk ndeety xynyikaktë. Nmëtmaytyakëts ets nˈamdoowëtsë nyaybyudëkë kojëts nbatyë jotmay. Ets xëmëts xypyudëjkë”. *

2. Ëxtäˈäyë naybyudëkë mä Dios mëduumbëty

Jesus tˈanmääy ja yˈëxpëjkpëty: “Miits mdukkaˈaxˈäjttëp nidëgekyë” (Matewʉ 23:8). Jesus yˈawijxypyë nety ets ja yˈëxpëjkpëty nyaytsyokëdët nixim niyam ets nyayaˈitëdët extëm tuˈugë familyë diˈib myëduundëbë Dios (Matewʉ 12:48-50; Fwank 13:35).

Jyobaa tyestiigëty yäjktëbë naybyudëkë nuˈun myadäˈäktë parë tjotkujkmoˈoytyë jäˈäy diˈib yajtëgoyˈäjttëp ets duˈun ttsoktë myëguˈuktëjk extëmxyëp yëˈë tfamilyëˈattë (Ebreeʉsʉty 10:24, 25). Nimayë jäˈäy të tˈixtë ko mä yˈëxpëktë duˈun yajnayjawëdë extëmxyëp yajtukjääxtë pomäädë mäjaty të tsyayuttë.

Eva jyënaˈany: “Mä ja tuˈukmujkën nmëdäjtëts tuˈugë oybyë nmëtnaymyaayëbë diˈib jyaygyujkë wiˈixëts nnayjawëty. Myëdoowˈijt wiˈixëts nˈanmääy, ojts xytyukwingugäjpxë Biiblyë ets nuˈkxtak mët ëjts. Kyaj tnaˈijxy parëts naytyuˈuk nyajpäädët. Ets xypyudëjkëts parëts nyajpëtsëëmdäˈäyët wiˈixëts nnayjawëty, tajëts ogäˈän nnayjäˈäwë seguurë”. Raquel nanduˈun jyënaˈany: “Mä ja tuˈukmujkën japëts nbatyë ndääk ndeety. Xytsyojktëbëtsë nmëguˈuktëjk ets oyëts xyajnayjawëdë”.

3. It ajiiky amëguˈuk ets oyjyaˈay

Ko nˈijtëm ajiiky amëguˈuk, ta kyëktëkë naymyayë. Jesus jyënany: “Niˈigë njotkujkˈäjtëm ko  wiink jäˈäy nbudëjkëm es kyaj ko wiink jäˈäy xypyudëjkëm” (Apostʉlʉty 20:35). Nëjkxëp nˈijxëm ko pën ntsojkëm ja nmëguˈukˈäjtëm, ta niˈigyë nëjkx xytsyojkëm. Jesus duˈun tˈanmääy ja yˈëxpëjkpëty: “Mmoˈoy ja wiinkpë, es ja Dios mmoˈoyëdët nandëˈën” (Lukʉs 6:38).

Ko ntsojkëmë nmëguˈukˈäjtëm ets ko nanduˈun xytsyojkëm, yëˈë xyajnayjäˈäwëm seguurë. Biiblyë jyënaˈany: “Yëˈë tsojkën ninäˈä kyakugëxët” (1 Korintʉ 13:8). María jyënaˈany: “Nnijäˈäwëbëts ko kyaj tyëyˈäjtënëty extëmëts näˈäty axëëk naybyawinmayëty. Kojëts nbudëkë wiinkpë, tajëts kyaj duˈun nekywyinmay, duˈunëts njäˈäytyëgoy tijatyëts njëjptsëˈkëp. Jotkujkëts nnayjawëty kojëtsë nmëguˈukˈäjtëm ti ndukpudëkë”.

Ko xytyunët extëm të yajnigajpxy tëgëk pëky kyaj yëˈë tˈandijy ko mjäˈäytyëgooytyaˈayëp ja mˈamay mjotmay, per mbäät mbudëkëty mëjwiin kajaa. Carolina jyënaˈany: “Näˈäty, duˈunyëmëts kyaj nnayjawëty seguurë, per kyajts nëgoo nˈokwinmäänyë ko kyajts ti ntsoojëty. Nnijäˈäwëbëts ko Jyobaa naytyukjotmaytyuunëp mët ëjts ets ko nimayëtsë nmëtnaymyaayëbë diˈibëts xyajnayjäˈäwëp seguurë”. Raquel naduˈundëkë jyënaˈany: “Näˈäganäˈäty mon tukëts nnayjawëty. Per nmëdäjtypyëts nimayë nmëguˈukˈäjtëm diˈibëts mbäät nˈamdoyë käjpxwijën, xëmëts xypyudëkëdë parëts oy nwinmayët. Ets diˈib mas oy, yëˈë ko nmëdäjtypyëts tuˈugë nDeety diˈibëts mbäät bom bom nmëtmaytyaˈaky. Tyäˈädë yëˈë diˈibëts oy xyajnayjäˈäwëp”.

Per oyëyäämbë tyäˈädë jotmay. Biiblyë jyënaˈany ko tim tsojkë tyäˈädë Naxwinyëdë jyëmbitäˈäny extëm tuˈugë lugäärë tsujpë mä niˈamukë nnayjawëyäˈänëm seguurë. Duˈun twandaˈaky: “Yˈuˈunyëyäˈändë niduˈuk niduˈuk mä yˈuubës päˈtk ets mä yˈiigë päˈtk, ets kyaj nyekyjamˈatäˈäny pën atsëˈëgëdëp” (Miqueas 4:4). Mä tadë tiempë, nipën nëjkx xykyaˈˈaxëktunäˈänëm ets xykyaˈˈatsëˈëgëyäˈänëm. Tukëˈëyë njäˈäytyëgoyäˈänëm wixaty të njäjt të ngëbajtëm (Isaías 65:17, 25). Dios mëdë yˈUˈunk, Jesukristë, yëˈë yajnaxkëdäˈägandëbë tëyˈäjtën. Taanëm jyaˈˈatäˈäny ja jotkujkˈäjtën ets nnayjawëyäˈänëm seguurë winë xëë (Isaías 32:17).