¿Nanduˈun mwinmay? Mbäät niˈamukë nbatëmë jotmay mä kyaj nnijäˈäwëm pën nnigäjpxëm tëyˈäjtën o pën andakëm. Per ja nyigëxëˈëgäˈäny wiˈix njäˈäyˈäjtëm ko nbatëmë jotmay diˈib mbäät xyaˈˈandakëm. Extëm ko ngawëˈëmäˈänëm axëëk jäˈäy wyindum, mbäät nwinmäˈäyëm ko tsojkëp nˈandakëm parë oy nwëˈëmëm. Per ko nyigëxëˈëky ja tëyˈäjtën, ta net ngumëdoˈowëm. Min nˈokˈijxëm wiˈix axëëk wyimbëtsëmy.

Netë jäˈäy oy yˈittë pën naytyukjotkujkˈäjtëdëp, pes seguurë nyayjawëdë, per myënëjkxypyë tiempë. Pes tsojkëp tuˈugyë tiempë dyajnaxtët, kyaj ti tkuyuˈutstët mä kyäjpx myaytyäˈäktë ets kyaj këˈëm nyaymyëmay nyaymyëdäjëdët. Jotmaymyëët njënäˈänëm ko mbäät kyaj nyekyyajtukjotkujkˈaty tuˈugë jäˈäy mët jeˈeyë ko tëgok yˈandäˈägët o jam wiˈixtsoo wyinˈëënët. Ets ko pën duˈun wyinˈëëny, tsip jatëgok yajtukjotkujkˈatët.

¿Të näˈä mˈokwinˈëˈënëbë tuˈugë jäˈäy diˈib jantsy oy mëët mˈity? Seguurë ko axëëk mnayjäˈäwë, o axtë xyjäˈäwë ko të mëdëgoyëty, ets kyaj wyiˈixëty ko duˈun mnayjawëty. Extëm nˈijxëm, ko jäˈäy yˈandaˈaky, mbäät jyëjptëgoy ja naymyayë.

Robert Innes, tuˈugë profesoor diˈib tukniˈˈijxëbë economía mä Universidad diˈib California, tˈëxpëjkpëtsëëmy ko “ninäjxp ko jäˈäy yˈandaˈaky”. Duˈun extëm tuˈugë päˈäm diˈib ninäjxp: ko jeky ja mxëë mdiempë xyajnaxët mët ja jäˈäy diˈib andakp, mbäät nanduˈun mdukninaxyëty ets mˈandäˈägët.

¿Ti mbäät nduˈunëm parë kyaj xynyinäjxëm? Biiblyë mbäät xypyudëjkëm. Min nˈokˈijxëm tuˈuk majtskë kyäjpxwijën.