ENTREBISTË | ANTONIO DELLA GATTA
Tuˈugë teety tmastuˈuty ja tsäjptëjk
ANTONIO Della Gatta, taxtujk jëmëjt yˈëxpëjky Roma ets mä jëmëjt 1969, ta tyuundëjkë extëmë teety. Ok, ta tyuuny Nápoles (Italia) mä yˈëxpëktë pënaty tunandëp teety. Ko Antonio nëˈpäät këkpäät yˈëxpëjky ets ko tpawinmääy, ta tpëjkyë kuentë ko jap tsäjptëgoty kyaj yëˈë tyukniˈˈixëdë Biiblyë. Ko yaˈentrebistaräjty, ta tnimaytyaky wiˈix ojts tnijawë ja tëyˈäjtën.
Oknimaytyäˈäk wiˈix mutskˈäjty.
Japëts nmaxuˈunkˈäjty Italia mä jëmëjt 1943. Ets japëts nyaˈk nbajttë mä tuˈugë käjpnnuˈunk mëdëtsë nmëgaˈaxëty, ja ndeetyëts kamduump ujtstuump ijty ets tsajts jëˈtp. Ja ndääk ndeetyëts xëmëts ijty xywyoownëjkxtëts tsäjptëgoty.
¿Tiko xytsyojkënyëˈajty mdunäˈäny teety?
Kots nmutskˈäjty jantsy nëjkxäämbëts ijty tsäjptëgoty. Nëgooyëts nˈoymyëdoownë wiˈix ja teety kyajpxy ets nˈoyˈijxnë tijaty tyuumpy. Päätyëts ntsojkënyëˈajty ndunäˈäny teety. Kotsë netyë njëmëjt 13, tatsë ndääk ojts xywyoownëjkxy mä nety ja ënäˈkuˈunk yˈëxpëktë mëdiˈibë tunandëp teety.
¿Ojts myajtukniˈˈixë Biiblyë mä duˈun mˈëxpëjky?
Kyaj nëgoo. Kotsë netyë njëmëjt 15, tats tuˈugë nmaˈestrë xymyooyë liibrë mä nety myinyë Evangelios mä yajnimaytyaˈaky wiˈixë Jesus jyukyˈajty ets kanäkˈokëts ojts njantsy kyajpxy. Kotsë nety njëmëjt 18, tats ojts nëjkxy Roma parëts nˈëxpëkäˈäny mä tuˈugë unibersidad mëdiˈibë nyikëjxmˈäjtypyë papa. Japëts niˈëxpëjkë latín, grieegë, historia, filosofía, psicología etsë teología. Per kyajëts nˈëxpëjktë Biiblyë, oyëtsë nety domingë domingë njakäjpxtë ja tekstë mëdiˈibëts agëbajky njäjttëp o njamëdoowˈitëts ko ja Biiblyë yajkajpxy.
¿Ojts nanduˈun xyaˈëxpëky ja ënäˈktëjk mëdiˈibë tunandëp teety ko jap mduuny?
Japëts nduuny mä tijaty yajtukniwijtsëtyaˈay, per ojtsëts nanduˈun nyaˈëxpëky ja ënäˈktëjk kots ndukniˈˈijxë Concilio Vaticano II.
¿Ti kyaj ojts xyˈoktukˈoyˈijxnë ko nety mduny tsäjptëgoty?
Taaˈäjtp tëgëk pëky: myëduˈuk, yëˈko pënaty jap tuundëp tsäjptëgoty tyuktëjk tyukwäˈkëdëbë politikë. Myëmajtsk, yëˈko kyaj wiˈix yaˈˈanëëmë pënaty axëëgë jyukyˈäjtën yajnëjkxtëp, duˈun ja teetytyëjk ets pënaty jap yeˈeytyëp. Ets myëdëgëëk, yëˈko kyajts yajxon njaygyujkë tijatyë nety jap tukniˈˈijxëdëp. Extëm nˈokpëjktakëm, kyajts njaygyujkë tiijën ko tuˈugë Dios mëdiˈibë tsojkp dyaˈˈayoy tuˈugë jäˈäy winë xëëw winë tiempë ko yˈooky. Ets pën tim jëjpˈamën nyajtuˈunëm tuˈugë rosaaryë ko ngäjpxtakëm. a
¿Ti net mduun?
Nmëjëëy nmëyaxëtsë Dios etsëts xypyudëkët, tats njuuyë Biblia de Jerusalén mëdiˈibë nety të pyëtsëmy italiano, ets tats ngäjpxtsondaky. Tëgok domingë jopy, yëˈëtsë nety ja nwit nbëjkëˈkypy mëdiˈibëts ojts të nmëmisëtuny ko myiindë nimajtskë Jyobaa tyestiigëty. Naa tuk oorën naxyën mëët nimaytyaktëtsë Biiblyë ets wiˈixëts mbäät nˈëxkapy ja relijyongë tëyˈäjtënbë.
¿Ti mˈoyˈijx mä ja Testiigëty?
Yëˈëts nˈoyˈijx ko jyantsy myëbëjktëp tijaty nyigäjpx nyimaytyaktëp ets ko nëgooyë pojën tpatnëdë tekstë mä Biiblyë mëdiˈibë katolikë. Ok, tats xymyëyeˈeytsyondakyë Mario, nëgooyëts ojts xymyëmaˈkxtujknë ets xëmëts sääbëdë sääbëdë xynyimiiny a las 9 oy nuˈun tyuˈuy pyojy.
¿Ets wiˈix jyënandë ja wiinkpë teetytyëjk ko tˈijxtë myajniminy?
Nwoowëts parëts xyjyamyëdattët mätsë nety nˈëxpëkyë Biiblyë, per yëˈëjëty kyaj tmëˈijx tmëjpëjktaktë. Ëjts nëgooyëtsë nety nˈoymyëdoownë, pes mëjwiin kajaajëts tijaty njäjty. Extëm nˈokpëjktakëm, tiko Dios tnasˈixë parë jyaˈˈatëdë axëkˈäjtën etsë ayoˈon jotmay, pes kyajëtsë nety yajxon njaygyukë.
¿Ojts niduˈuk mˈanëˈëmxëty ja teetywyintsën parë kyaj xynyekyˈëxpëkëdë Biiblyë?
Mä jëmëjt 1975, tats ojts nëjkxy kanäkˈok Roma parëts jap nimaytyäˈägäˈäny tijatyëtsë nety të njaty mä Biiblyë. Ja teetywyintsënëty xyjyatukmëbëkandëts ko kyaj tyëyˈäjtënëty tijatyëts njäjtypy, per kyaj dyajtuundë Biiblyë. Pääty mä jëmëjt 1976 taxtujk äämbë eneerë, njääyëts tuˈugë neky mäts nnigajpxy ko kyajëts nekykyatolikëˈatäˈäny ets tats ngejxy Roma. Kyum majtsk xëëw, tats ntsoˈony mä ja teetytyëjk yaˈëxpëktë, tats ojts tim mëˈˈëgäˈäny nëjkxy mä tyuˈukmuktë Jyobaa tyestiigëty ets yëˈëdëmë nety tyuundëbë asamblee. ¡Njantsy yˈoyˈijxëts extëm yˈëxpëktë! Pes këktuˈuk ja Byiiblyë tmëdattë ets yˈëxtääytyëp ko tuˈuk tuˈuk ja tekstë yajkäjpxäˈäny.
¿Wiˈix jyënandë ja mfamilyë?
Nimay xytyukjotˈambëjktëts. Per tats nnijäˈäwë ko niduˈuk ja nmëgaˈaxëts mëdiˈibë tsënaapy Lombardía, jap Italia. Të nety nanduˈun tyëkë ëxpëjkpë mëdë Jyobaa tyestiigëty, tats ojts nguˈixë. Ja Testiigëty mëdiˈibë nety jap tsënääytyëp, yëˈëts mëdiˈibë xypyudëjkëdë parëts nbaty ja nduunk ets tˈijxtë mäts mbäät ntsëënë. Mä taabë jëmëjt, tats nnëbejty.
Tyamnëmëts njawë ko tëts nmëwingonyë Dios
¿Wiˈix tyam mnayjyawëty ko mdëjkë ëxpëjkpë?
¡Jantsy agujk jotkujkëts nnayjyawëty! Tyamnëmëts njawë ko tëts nmëwingonyë Dios, tëts nˈixyˈaty pënën yëˈë extëm yajnimaytyaˈaky mä Biiblyë ets kyaj extëmë katolikëtëjk tijaty tyukniˈˈixëdë. Tyam, mbäädëtsë net ja jäˈäy agujk jotkujk nmëtmaytyaˈaky mët ko nnijäˈäwëbëts ko yëˈëts ndukniˈˈixëyaampy ja tëyˈäjtën.
