David tkujäˈäyë: “Ojtsëts nˈënäˈkˈaty ets tyam tëjëts nmëjjäˈäyënë, per kyajnëmëts nˈixy nituˈugë oyjyaˈay yajjäˈäytyëgoy, ni ja yˈuˈunk yˈënäˈk tˈëxtäˈäytyëdë tsäjpkaaky” (Sal. 37:25). David yëˈë nety myaytyakypy wiˈix të jyukyˈaty: Të nety tˈixy ko Jyobaa xëmë të kyuentˈatyëty. Kyaj nety yëˈë tmaytyaˈaky ko nituˈuknëmë Dios mëduumbë tkayajnaxynyëmë yuu.

David ojts näˈäty dyajnaxyë mëk ayoˈon, extëm ko nety tkugeˈegyë Saúl. Tëgok ojts yˈagëxë ja kyaˈay yˈukën ets ta tˈanmääy ja tyuumbëty parë nëjkx tˈamdowdë (1 Sam. 21:1-6). Tyäˈädë yëˈë xytyukˈijxëm ko David ojts tˈëxtäˈäyë tsäjpkaaky. Per mä Biiblyë kyaj mää tnigajpxy ko David jyëdijnë ets tˈamdoownë ti yˈokjëˈxëp. David yˈijx ko Jyobaa ninäˈä kyajäˈäytyëgooyë.

Jesus ojts twandaˈaky ko Dios seguurë xymyoˈoyäˈänëm tijaty nyajtëgoyˈäjtëm pën nbëjtakëm jëjpˈamë yˈAnaˈam Kyutujkën. Jyënany: “Ëxtääyˈadëˈëtstë jawyiin ja Anaˈam Kutujkën ets ja tyëyˈäjtën, ets tukëˈëyë tyäˈädë tijaty [extëmë käˈäy ukën etsë wit nijam] mˈakˈyajmoˈoytyëp” (Mateo 6:33, Traducción del Nuevo Mundo [TNM]). Per tëgok nan ojts jyënaˈany ko ja myëguˈuktëjk yajnaxandëbë yuu ko yajpajëdittët (Mat. 25:35, 37, 40). Duˈun jyajtyë apostëlë Pablo; yëˈë yajnäjx näˈätyë yuu etsë tëëtsë (2 Kor. 11:27).

Jyobaa xyˈanmäˈäyëm ko wiˈixëmë jäˈäy xypyajëditäˈänëm. Mbäät tnasˈixë ets tijaty nyajtëgoyˈäjtëm mientrës nbuwäˈkëm ets nyaˈijxëm ko kyaj tyëyˈäjtënëty extëmë Mëjkuˈu xynyiwäämbajtëm (Job 2:3-5). Extëm ko nwinmäˈäyëm wiˈix ja nmëguˈukˈäjtëm yˈayoodë ko ja nasis pyëjtakëdë pujxndëgoty. Tuk pëky diˈibë Mëjkuˈu yajtuun parë tmastuˈuttëdë Jyobaa, yëˈë ko tyëgoyˈajty ja käˈäy ukën. Per yëˈëjëty xëmë tmëmëdoodë Jyobaa, ets yëˈë kyaj myastutëdë. Jyobaa nyasˈijxë ets dyajnaxtëdë tyäˈädë jotmay, duˈun extëm tnasˈixë ets niˈamukë pënaty mëduunëp twinguwäˈägëdët kanäk pëkyë ayoˈon. Per mbäät nˈijtëm seguurë ko niˈamukë pënaty kyuˈayoˈowëdëp ja tëyˈäjtën, Jyobaa pudëkëyanëdëp parë tmëmadäˈäktët (1 Cor. 10:13, TNM). Nˈokjamyajtsëm extëm jyënaˈanyë Filipʉs 1:29: “Pes mët yëˈëgyëjxm ja Kristë Dios të mmoˈoyëdë ja mayˈäjtën kyaj jyeˈeyëty ko xymyëbeky ja Kristë, nandëˈën mˈayoy mët yëˈëgyëjxm”.

Jyobaa të twandaˈaky ko kyaj tmastuˈudäˈäny pënaty mëduunëp. Extëm jyënaˈany mä Isaías 54:17: “Oy diˈibë tujn pujxn myajtuknibëdëˈëgët kyaj myadäˈägäˈäny”. Extëm yä twandaˈaky ets mä wiinkpë tekstë, yëˈë xytyukˈijxëm ko Diosë kyäjpn kyaj wiˈix yajtunäˈäny. Per mbäät naytyuˈugaty tpäättë ayoˈon jotmay axtë yˈooktët.