Nˈokmoˈoyëm dyoskujuyëmë Jyobaa mä tijaty xymyoˈoyëm
“Mmoˈoytyë dyoskujuyëmë Jyobaa, mët ko yëˈë oyjyaˈay.” (SALMO 106:1)
1. ¿Tiko mbäät nmoˈoyëmë dyoskujuyëmë Jyobaa?
“TËGEKYË oybyë esë tsujpë” yëˈë Jyobaa të xymyoˈoyëm (Santya̱ˈa̱gʉ 1:17). Duˈun extëm tuˈugë borreegë kuentˈäjtpë tsuj yajxon tkuentˈatyë byorreegë, nanduˈunë Jyobaa xymyoˈoyëm tijaty nyajtëgoyˈäjtëm (Salmo 23:1-3). Ets ko nbatëmë amay jotmay, xykyuentˈäjtëm ets xymyëjämoˈoyëm (Salmo 46:1). Ko nwinmäˈäyëm tukëˈëyë diˈib xytyukmëduˈunëm, ta njënäˈänëm extëm niduˈuk diˈib jyaayë Salmo: “Mmoˈoytyë dyoskujuyëmë Jyobaa, mët ko yëˈë oyjyaˈay”. Nanduˈun tkujäˈäyë ko Dios xëmë yˈity oyjyaˈay (Salmo 106:1). Extëm nˈijxëm, Dios nitëjkëp ets nmoˈoyëmë dyoskujuyëm.
Tekstë diˈib mä tyäˈädë jëmëjt 2015 yëˈë Salmo 106:1:“Mmoˈoytyë dyoskujuyëmë Jyobaa, mët ko yëˈë oyjyaˈay”
2, 3. 1)Pën kyaj tii nekymyëjjäˈäwëm, ¿ti nëjkx tyuny jyatyëty? 2)¿Diˈibë majtskë yajtëˈëwën yaˈˈatsoojëmbitäämp?
2 ¿Tiko yˈoyëty nmoˈoyëm dyoskujuyëmë Jyobaa? Yëˈko ojts yajnaskäjpxë mä Biiblyë ko mä tyäˈädë tiempë kyaj ti jäˈäy tnekymyëjjawëyaˈany, ets duˈun tyam tyuny jyatyëty (2 Timotee 3:2). Mayë jäˈäy kyaj tmëjjawëdë tijatyë Jyobaa të tyukmëdunëdë. Miyonkˈam yëˈëyë myëmääy myëdäjtëp tijaty jyuyan kyëbatandëp oy tkayajtëgoyˈattë, ets ko net tjuytyë, duˈunyëm kyaj jyotkujkˈattë. Pën kyaj tii nekymyëjjäˈäwëm, mbäät duˈun njäjtëm extëm ja israelitëty. Mbäät kyaj nekyyajtsobatëm tijatyë Jyobaa xytyukmëduˈunëm ets kyaj mëët oy nekyˈijtëm (Salmo 106:7, 11-13).
3 Pën kyaj ti nmëjjäˈäwëm, nan nëjkxëp niˈigyë xytsyiptakxëm nwinguwäˈkëmë amay jotmay. ¿Tiko? Yëˈko yëˈëyë nëjkx nmëmäˈäy nmëdäjëm ja njotmayˈäjtëm ets kyaj nekyˈijxëm tijatyë Jyobaa xytyukmëduˈunëm (Salmo 116:3). Mä tyäˈädë artikulo yaˈˈatsoojëmbitäˈäny majtskë yajtëˈëwën: ¿Ti mbäät nduˈunëm parë xëmë tijaty ngukäjpxëm? ¿Ets ti mbäät xypyudëjkëm ko nbatëmë amay jotmay?
MËJWIIN KAJAA TIJATYË JYOBAA TË XYTYUKMËDUˈUNËM
4. ¿Ti tsojkëp nduˈunëm parë ngukäjpxëm tijatyë Jyobaa të xytyukmëduˈunëm?
4 Tsojkëp nduˈunëmë mëjää parë ngukäjpxëm tijatyë Jyobaa të xytyukmëduˈunëm. Pääty oy ko nbawinmäˈäyëm niduˈuk niduˈuk tijaty të xytyukmëduˈunëm. Etsë net nwinmäˈäyëm wiˈix dyaˈixyëty ko mëk xytsyojkëm. Duˈun ttuuny niduˈuk diˈib jyaayë Biiblyë. ¿Wiˈix wyimbëtsëëmy? Duˈunyë ojts wyëˈëmë ko twinmääy tukëˈëyë diˈibë netyë Jyobaa të tyukmëdunyëty (käjpxë Salmo 40:5 * etsë 107:43). *
5. ¿Ti tsojkëp nduˈunëm parë tijaty nmëjjäˈäwëm extëmë Pablo?
5 Mbäät xypyudëjkëmë apostëlë Pablo yˈijxpajtën parë tijaty ngukäjpxëm. Yëˈë jantsy kanäkˈok twinmääy tijatyë netyë Jyobaa të tyukmëdunyëty. ¿Wiˈix nnijäˈäwëm? Yëˈko xëmë Jyobaa tmooyë dyoskujuyëm. Nan yˈëxkäjp ko mëj këjxmë nety nyayjawëty ets ko yˈawäˈänëty, pes të nety tpajëdityë Dios mëduumbëty ets tniwäämbety. Pääty tmooyë dyoskujuyëmë Dios ko pyokymyaˈkxë ets ko tyuunkmooyë parë jäˈäy ttuknijawët ja tëyˈäjtën (käjpxë 1 Timotee 1:12-14). Nan myooyë dyoskujuyëmë Dios ko ja myëguˈuktëjk yˈoyjyaˈayˈattë ets ko xëmë Dios mëdundë (Filipʉs 1:3-5, 7; 1 Tesalónikʉ 1:2, 3). Nan myooyë dyoskujuyëmë Jyobaa ko ja myëguˈuktëjk pyudëjkë ko tpaty ja amay jotmay (Apostʉlʉty 28:15; 2 Korintʉ 7:5-7). Päätyë Pablo tˈanmääy ja Dios mëduumbëty ets tmoˈoytyëdë dyoskujuyëmë Jyobaa ets nyaymyëjämoˈoyëdët nixim niyam ko tkuyˈëwdët ets tmëjkumaytyëdë Dios (Kolosʉ 3:15-17).
¿TI MBÄÄT XYPYUDËJKËM PARË TIJATY NMËJJÄˈÄWËM?
6. ¿Tijatyë Jyobaa mijts të mdukmëdunyëty parë xykyukäjpxët?
6 Ëtsäjtëm nan mbäät nwinmäˈäyëm tukëˈëyë tijatyë Jyobaa të xytyukmëduˈunëm extëmë Pablo (Salmo 116:12). Nˈoknayajtëˈëwëm: “¿Tijatyëtsë Jyobaa të xytyukmëduny parëts nmoˈoyëdë dyoskujuyëm?”. Nˈokwinmäˈäyëm wiˈix mëët oy nˈijtëm ets wiˈix të xykyuˈoˈkëmë yˈUˈunk parë yajmaˈkxëdë nbokyˈäjtëm. Nan mbäät nwinmäˈäyëm wiˈixë nmëguˈukˈäjtëm të xypyudëjkëm ko nbatëmë amay jotmay. Ets pën të nbëjk nˈukëm ets jamë uˈunk ënäˈk, mbäät mëjwiin kajaa nmëjjäˈäwëm ko nmëdäjtëmë familyë. Taaˈäjtp kanäk pëky tiko mbäät nmoˈoyëmë dyoskujuyëmë Jyobaa. Pääty, nˈokwinmäˈäyëm wiˈix të xypyudëjkëm, ta net ngukäjpxëm tuˈuk tuˈugë xëë (käjpxë Salmo 92:1, 2). *
Nˈokmoˈoyëmë dyoskujuyëmë Jyobaa ko tijaty xymyoˈoyëm extëm ttuunyë Ana mëdë Ezequías
7. 1)¿Tiko yˈoyëty etsë Jyobaa nmënuˈkxtakëm parë nmoˈoyëmë dyoskujuyëm? 2)¿Wiˈix ndukˈoyˈäjtëm ko Jyobaa nmoˈoyëmë dyoskujuyëm?
7 Ko nwinmäˈäyëm tijaty oyˈäjtënë nmëdäjtëm, ta nmënuˈkxtakëmë Jyobaa parë nmoˈoyëmë dyoskujuyëm (Salmo 95:2; 100:4, 5). Näägë jäˈäy jeˈeyë nyuˈkxtäˈäktë parë tijaty tˈamdowdë. Perë Dios nan tsyejpy parë nmoˈoyëmë dyoskujuyëm ko tijaty nmëdäjtëm. Duˈun ttuundë nimayë jäˈäy diˈib yajmaytyaktëp mä Biiblyë, extëmë Ana mëdë Ezequías (1 Samuel 2:1-10; Isaías 38:9-20). Ëtsäjtëm nan mbäät nmoˈoyëmë dyoskujuyëmë Jyobaa mä tukëˈëyë diˈib xytyukmëduˈunëm (1 Tesalónikʉ 5:17, 18). Ko duˈun nduˈunëm, ta nëjkx jotkujk nnayjäˈäwëm, ntsojkëm niˈigyë Dios ets oy mët nˈijtëm (Santya̱ˈa̱gʉ 4:8).
¿Tijatyë Jyobaa të mdukmëdunyëty parë xymyoˈoyëdë dyoskujuyëm? (Ixë parrafo 6 etsë 7)
8. ¿Tijaty mbäät xyajtuˈuˈadujkëm parë kyaj ti nekymyëjjäˈäwëm?
8 Pën kyaj nnaygyuentˈäjtëm, mbäät kyaj nekymyëjjäˈäwëm tijatyë Jyobaa xynyamoˈoyëm. Taaˈäjtp majtsk pëky diˈib mbäät xyajtuˈudujkëm. Myëduˈuk, yëˈko pokyjyaˈay nyajpatëm etsë Adán mëdë Eva yëˈë ojts xytyukmëwëˈëmëmë duˈumbë jäˈäyˈäjtën parë kyaj ti nmëjjäˈäwëm. Ko Dios ojts yajkojëdë, ojts myoˈoyëdë tukëˈëyë. Mbäädë nety jyukyˈattë winë xëë ets agujk jotkujk mä ja lugäärë tsujpë (Génesis 1:28). Per kyaj tmëjjäˈäwëdë tijatyë Dios mooyëdë, niˈigyë tˈaktimtsojktë, ets ok, ta dyajtëgooytyaaytyë tijatyë nety të yajmoˈoytyë (Génesis 3:6, 7, 17-19). Myëmajtsk, yëˈko mä tyäˈädë tiempë diˈib ndukjukyˈäjtëm kyaj jäˈäy tii tnekymyëjjawëdë. Duˈumbë jäˈäyˈäjtën mbäät xynyinäjxëm ets kyaj nekymyëjjäˈäwëm tijaty nmëdäjtëm, extëm ko mëdë Jyobaa nnaymyaˈayëm ets ko ndukˈijtëmë kyäjpn (1 Fwank 2:15-17). ¿Wiˈix mbäät njëjpkudijëmë duˈumbë jäˈäyˈäjtën? Ko xëmë nwinmäˈäyëm tijatyë Jyobaa të xytyukmëduˈunëm ets ko nmënuˈkxtakëm, ta nmoˈoyëmë dyoskujuyëm (käjpxë Salmo 27:4). *
Pën nwinmäˈäyëm tijaty oyˈäjtënë Jyobaa xymyoˈoyëm, yëˈë xyjotkujkmoˈoyäˈänëm ets xymyëjämoˈoyäˈänëm parë nmëmadakëm ja jotmay
KO NBATËMË AMAY JOTMAY
9. Ko nbatëmë mëjwiimbë jotmay, ¿tiko yˈoyëty nwinmäˈäyëm tijaty oyˈäjtënë Jyobaa xytyukmëduˈunëm?
9 Ko tijaty nmëjjäˈäwëm nan xypyudëjkëm kajaa ko nbatëmë mëjwiimbë jotmay. Extëm ko näˈäty ajotkumonë tyëgatsyë jukyˈäjtën, kyaj nnijäˈäwëm ti nduˈunëm. Mbäät ja nyaˈayˈäjtëm o ja nnëdoˈoxyˈäjtëm nyaywyinˈëënyëty mëdë wiinkpë, xypyatëm tuˈugë mëk päˈäm, yˈoogët pën diˈib mëk ntsojkëm o nguˈayoˈojëm ko tijaty yˈayoˈonbëjtaˈaky. Per pën nwinmäˈäyëm tijaty oyˈäjtënë Jyobaa xymyoˈoyëm, yëˈë xyjotkujkmoˈoyäˈänëm ets xymyëjämoˈoyäˈänëm parë nmëmadakëm ja jotmay. Min nˈokˈijxëm wiˈix näägë nmëguˈukˈäjtëm të pyudëkëdë.
10. ¿Wiˈixë Irina pyudëkëty ko twinmay wiˈixë Jyobaa kyunuˈkxyëty?
10 Irina * yëˈë tuˈugë prekursoora regulaar diˈib tsënaapy Estados Unidos. (Ixë notë.) Yëˈë nyaˈay ja nety tyuny mëjjäˈäy mä naymyujkën, per ta nyaywyinˈëˈënë mëdë wiinkpë ets ta yajnikeky mëdë yˈuˈunk yˈënäˈk. ¿Ti pudëjkë parë tmëduunˈadëtsyë Jyobaa? Irina jyënaˈany: “Ngukäjpxëbëtsë Jyobaa kojëts xykyuentˈaty ets ko nyaytyukjotmaytyunyëty mët ëjts. Kojëts nwinmay wiˈixëts tuˈuk tuˈugë xëë xykyunuˈkxy, tajëts nbëkyë kuentë ko kyaj pën duˈun extëm ëjts kojëts nmëdaty tuˈugë nDeety diˈibëts xyˈixyˈäjtp ets xykyuentˈäjtp. Nnijäˈäwëbëts ko yëˈë ninäˈäjëts xykyamastuˈudäˈäny”. Ko duˈunë Irina wyinmay, yëˈë të pyudëkëty parë të tmëmadaˈagyë mëjwiimbë jotmay ets nanduˈun tpudëkë wiinkpë.
11. ¿Ti pudëjkëp tuˈugë nmëguˈukˈäjtëm diˈib Asia parë tmëmadaˈaky tuˈugë mëk päˈäm?
11 Kyung-sook jap tsyëënë Asia. Ja nety kujk tyuny prekursoor regulaar mëdë nyaˈay naxy 20 jëmëjt. Per mä tuˈugë xëë, ta doktoortëjk yˈanmääyë ko yëˈë myëdäjtypyë kanser mä pyulmonk ets ko jeˈeyë yˈakjukyˈatäˈäny ja tëgëk poˈo o ja tëdujk poˈo. Yëˈë mëdë nyaˈay ninäˈänëmë nety tkamëdattë tuˈugë mëk päˈäm. Kyung-sook jyënaˈany: “Mëkëts njantsy jäˈäwë. Duˈunëts njäˈäwë ko kyajëts tii nnekymyëdaty ets mëkëts ntsëˈkë”. ¿Ti pudëjkëp parë tmëmadaˈaky? Yëˈë jyënaˈany: “Koogoojëts nmanaxanë, tajëts nbety tëjknikëjxm parëts nmëgajpxyë Jyobaa. Ets tajëts mëgoxk pëky nnigajpxy diˈibëts ngukäjpxëp mä tadë xëë”. Ko duˈun ttuny, ta jotkujk nyayjawëty ets pyudëkëty parë ttsokëdë Jyobaa. Ets ta tpëkyë kuentë ko Jyobaa xëmë xypyudëjkëm ko nyajnäjxëmë mëkpë jotmay ets ko mä jukyˈäjtën taaˈäjtp kanäk pëkyë oyˈäjtën, kyaj yëˈëyëtyë amay jotmay.
“Mä jukyˈäjtën taaˈäjtp kanäk pëkyë oyˈäjtën, kyaj yëˈëyëtyë amay jotmay.” (Kyung-sook)
Sheryl mëdë John, tuˈugë myëgaˈax diˈib tsokwëˈëm (Ixë parrafo 13)
12. ¿Ti Jason pudëjkë ko yˈoˈky ja nyëdoˈoxy?
12 Jason jap tyuny Betel diˈib África. Ja kujk aduˈugë xyëë tiempë dyajtuny mä Diosë tyuunk, naxy 30 jëmëjt. Per jyëxtujk jëmëjtëbë nyëdoˈoxy yaˈoˈkë kanser. Jantsy axëëgë nety nyayjawëty ko tjamyetsy wiˈix ja nyëdoˈoxy yˈayooy. ¿Ti pudëjkë ko tpatyë tyäˈädë jotmay? Mä tuˈugë xëë, ta tjamyejtsy wiˈix tëgok mëdë nyëdoˈoxy jantsy jotkujk nyayjäˈäwëdë, ets ta tmooyë dyoskujuyëmë Jyobaa ko duˈun tjamyejtsy. Jantsy jotkujk ojts nyayjawëty, pääty koogoo net tii tjamyetsy, ta tkukäjpxë mä Jyobaa. Ko tijaty tmëjjawë, yëˈë pudëjkëp parë twinmay diˈib oy ets jotkujk nyayjawëty, oy duˈunyëm mëk tjawë ko ja nyëdoˈoxy yˈoˈky. Mëjwiin kajaa pyudëkëty ko tkukäjpxë mä Jyobaa ko agujk jotkujk ojts kyasäädëˈaty ets ko tmëduuny mët tuˈugë nyëdoˈoxy diˈib mëk tsyejpyë Jyobaa.
“Nmëjjäˈäwëbëts kojëts yëˈë Jyobaa nDiosˈaty.”(Sheryl)
13. ¿Ti Sheryl pudëjkëp parë kyaj myëmadaˈagyëtyë moˈon tujkën?
13 Sheryl ja netyë jyëmëjt mäjk tëgëëk ko yˈayoˈonbëjtaky tuˈugë tifón jap Filipinas mä jëmëjt 2013. Ko ja tifón yˈayoˈonbëjtaky, ta kyutëgooy ja tyëjk ets yˈoˈky ja tyääk tyeety ets nidëgëëgë myëgaˈax. ¿Ti Sheryl pudëjkëp parë tmëmadaˈaky ko dyajtëgooy ja fyamilyë? Ko twinmay tukëˈëyë diˈib myëdäjtypy, ets ko tmoˈoyë dyoskujuyëmë Dios. Nan yˈijx wiˈix yajpudëkëdë ets yajmëjämoˈoytyë diˈib yajtëgoyˈäjttëp. Ets nyijäˈäwëbë nety ko abëtsemy nyaxwinyëdë myëguˈuktëjk nyinuˈkxtäägëdë. Sheryl jyënaˈany: “Nmëjjäˈäwëbëts kojëts yëˈë Jyobaa nDiosˈaty. Yëˈë xëmë xymyoˈoyëm tijaty nyajtëgoyˈäjtëm”. Duˈunë duˈun, ko ngukäjpxëm tijaty nmëdäjtëm, yëˈë xypyudëjkëm parë kyaj xëmë mon tuk nnayjäˈäwëm. Nan mbäät nmëmadakëm tukëˈëyë jotmay diˈib nbatëm (Éfesʉ 5:20; käjpxë Filipʉs 4:6, 7).
NˈOKNAYJÄˈÄWËM JOTKUJK KO JYOBAA NDIOSˈÄJTËM
14. ¿Ti jotkujkˈäjtën xytyukwandakëmë Jyobaa? (Ixë dibujë mä tsyondaˈaky.)
14 Nuˈunë tiempë pyety kyuˈty xëmë Dios mëduumbë tkukäjpxëdë ko Jyobaa pyudëkëdë. Extëm ko ja israelitëty yˈawäˈätspëtsëëmdë mä ja mejnyë Tsaptspë, ta ojts tmoˈoytyë dyoskujuyëmë Jyobaa ko tkuyˈëëwdë (Éxodo 15:1-21). Tyam, nan xyjotkujkmoˈoyëmë Dios. Wyandakypy ko tim tsojk dyajjëjptëgoyaˈany tijaty xyaˈˈayoˈojëm (Salmo 37:9-11; Isaías 25:8; 33:24). Nˈokwinmäˈäyëm wiˈix nnayjawëyäˈänëm ko netyë Dios dyajkutëgoy niˈamukë myëtsip ets ko nety nyajpatëm mä ja jembyë jukyˈäjtën. ¿Këdii nëjkxëp nmoˈoyëmë dyoskujuyëmë Jyobaa? (Diˈibʉ Jatanʉp 20:1-3; 21:3, 4.)
Dios nan xyjotkujkmoˈoyëm. Wyandakypy ko tim tsojk dyajjëjptëgoyaˈany tijaty xyaˈˈayoˈojëm
15. ¿Ti mbäät nduˈunëm mä tyuˈuyoˈoyaˈanyë jëmëjt 2015?
15 Seguurë ko Jyobaa mëjwiin kajaa tijaty xytyukmëdunäˈänëm mä tyäˈädë jëmëjt 2015. Waˈan nanduˈun nmëdatäˈänëmë amay jotmay, per nnijäˈäwëm ko Jyobaa ninäˈä xykyamastuˈudäˈänëm (Deuteronomio 31:8; Salmo 9:9, 10). Yëˈë duˈunyëm xymyoˈoyäˈänëm tijaty nyajtëgoyˈäjtëm parë kyaj nmastutëm. Pääty nˈokpanëjkxëmë yˈijxpajtënë ja kugajpxy Habacuc, diˈib jënan ko oy mëjwiin kajaa tmëdatëdë amay jotmay ets oy tkamëdatëdë kyaˈay yˈukën, agujk jotkujk yajpäädäˈäny mët ko Jyobaa pyudëkëty (Habacuc 3:17, 18). Pääty, mä jëmëjt 2015 nˈokwinmäˈäyëm tijaty oyˈäjtënë Dios xymyoˈoyëm ets nˈoktuˈunëm extëm jyënaˈanyë tekstë diˈib mä tyäˈädë jëmëjt: “Mmoˈoytyë dyoskujuyëmë Jyobaa, mët ko yëˈë oyjyaˈay” (Salmo 106:1).
Waˈan nanduˈun nmëdatäˈänëmë amay jotmay, per nnijäˈäwëm ko Jyobaa ninäˈä xykyamastuˈudäˈänëm
^ parr. 4 Salmo 40:5: “Mëjwiin kajaa tijaty të xytyuny, mijts Jyobaa diˈib nDiosˈäjtypy, jantsy oy tijaty të xytyuny ets tijaty mdunaampy mët ëëtsëty. Nipën mbäät mëët mgayaˈijxkijpxyë; koxyëbëts mbäät nˈoknimaytyaˈaky tijaty të xytyuny kyajxyëbëts mbäät nnimaytyaktäˈäy mët ko jyantsy myayëty”.
^ parr. 4 Salmo 107:43: “Oypyënëty diˈib wijy, yˈixaampy tyunaambyë tyäˈädë ets pyawinmayaampy yajxon tijatyë Jyobaa të ttuny mët ja tsojkën diˈib xëmë yaˈijxëp”.
^ parr. 6 Salmo 92:1, 2: “Oy ko yajmoˈoyëdë dyoskujuyëmë Jyobaa ets yajkuyˈëwët ja mxëë, mijts diˈib ijtp këjxm, yajnimaytyäˈägët jopyëp ja mtsojkën diˈib xëmë myaˈijxëp ets koots ja mdëyˈäjtën”.
^ parr. 8 Salmo 27:4: “Tuˈuk jeˈeyë diˈibëtsë Jyobaa të nˈamdoy, yëˈë diˈibëts nˈëxtääyˈadëˈëtsaampy, nˈitëdëts mä Jyobaa tyëjk nuˈunëts ja nxëë njukyˈäjtën, parëts nˈixëdë Jyobaa yˈoyjyaˈayˈäjtën ets parëts nmëjˈix nmëjjawëdë tyëjk”.
^ parr. 10 Mä tyäˈädë artikulo të näägë xëë tyëgatsy.
You May Also Like
DIʼIB XYTYUKʼAWÄʼÄNËM
