1, 2. 1) ¿Ti Jesus nyimaytyak tyunäˈäny jyatäˈänyëty mä tiempë diˈib jëjpkëxanëp? 2) ¿Ti nˈixäˈänëm mä tyäˈädë artikulo?

OKWINMAY ko Jesus tam yˈuˈunyë mä ja Oliibës kopk mä yajmëjˈijxpety ja templë diˈib Jerusalén mët nimäjtaxk ja yˈapostëlë, Pedro, Andrés, Santiago etsë Juan. Ets ttukmëtmaytyaˈaky tijaty tunan jatanëp mä ja tiempë jyëjpkëxanë, ko nety të tyëkë anaˈambë mä Diosë yˈAnaˈam Kyutujkën. Ta tˈanëëmë ja yˈëxpëjkpëty ko mä tadë tiempë jaˈˈatäämbë tuˈugë “tuumbë diˈib kuwijy ets tyuumpy ti wyintsën tsyejpy”, diˈib kudanëyanëp yä Naxwiiny. Tyäˈädë “tuumbë diˈib kuwijy”, yëˈë nety nyikëjxmˈataampy tmoˈoyëdë kyaˈay yˈukën ja Dios mëduumbëty mä meerë dyajtëgoyˈattë (Matewʉ 24:45-47).

² Jesus ta net ojts tmaytyaˈaky ja nimäjkpë toˈoxyˈënäˈk diˈib mä tyäˈädë artikulo yajnimaytyäˈägäämp (käjpxë Matewʉ 25:1-13). Nˈixäˈänëm tëgëk pëky. Tuˈuk,  ¿ti netyë Jesus tyukniˈˈixëyaampy ja yˈëxpëjkpëty ko tmaytyaky ja nimäjkpë toˈoxyˈënäˈk? Majtsk, ¿wiˈix tpadundë pënaty nëjkxandëp tsäjpotm? ¿Wiˈix wyimbëtsëmäˈäny? Ets tëgëëk, ¿wiˈix mbäät ndukˈoyˈäjtëm niduˈuk niduˈuk?

3. 1) ¿Wiˈix ijty tëëyëbë ëxpëjkpajn tnimaytyaˈaky ja nimäjkpë toˈoxyˈënäˈk? 2) ¿Tidaa tuun jäjtë ko yëˈëyë yajnimaytyaky diˈib kyaj jyëjpˈamëty?

³ Mä ja tuˈukpë artikulo ojts nˈijxëm ko tuumbë diˈib kuwijy kyaj duˈun tijaty tnekynyimaytyaˈaky extëm ijty. Pes tëëyëp nëgoo ijty tˈoknimaytyaknë wiˈix nyikejy tuˈuk tuˈugë maytyaˈaky diˈib miimp mä Biiblyë, per tyam niˈigyë tnimaytyaˈaky wiˈix mbäät xypyudëjkëm. Extëm ko ijty yajnimaytyaˈaky mä ëxpëjkpajn ja nimäjkpë toˈoxyˈënäˈk, yëˈëyë ijty yajnimaytyakp wiˈix nyiwijy nyikejy diˈib kyaj jyëjpˈamëty extëm ja lamprë, aseytë ets ja abëjkën. Ko ijty duˈun yajnimaytyaˈaky, ta tyëgoy diˈib niˈigyë jëjpˈam. Pääty mä tyäˈädë artikulo, yëˈë yajnimaytyäˈägäämp ti diˈib xytyukniˈˈijxëm ja nimäjkpë toˈoxyˈënäˈk diˈib Jesus myaytyak.

4. 1) ¿Pën ja pëjkpë yetyëjk, ets wiˈix nnijäˈäwëm? 2) ¿Pënaty yajtijtëp ja toˈoxyˈënäˈk, ets wiˈix nnijäˈäwëm?

⁴ Parë nnijäˈäwëm ti Jesus tukniˈˈixëyan, tsojkëp jawyiin njaygyujkëm pënaty yajmaytyaktëp. ¿Pën ja pëjkpë yetyëjk? Yëˈë Jesus. ¿Wiˈix nnijäˈäwëm? Yëˈko tëgok ojts nyayˈijxkijpxyëty mët tuˈugë pëjkpë yetyëjk (Lukʉs 5:34, 35). ¿Ets pën ja toˈoxyˈënäˈkëty? Yëˈë pënaty nëjkxandëp tsäjpotm. ¿Wiˈix nnijäˈäwëm? Yëˈko Jesus duˈun tëgok tnimaytyaky ko yëˈëjëty duˈun extëm ja toˈoxyˈënäˈk diˈib mëdë lyamprë tˈawixtë ja noobyë yetyëjk. Okˈix wiˈix tˈanmääy pënaty nëjkxandëp tsäjpotm: “Nayjëjpˈixëdë mët ja mlamprë es xyajtoyët. Dëˈën extëmë poˈoduumbë diˈibë yˈawijxypy yëˈë wyintsën ko jyëmbitët mä të yˈotsy pëjkpë nigaabyë” (Lukʉs 12:32, 35, 36). Apostëlë Pablo mëdë Juan nan ojts tˈijxkijpxyëdë pënaty nëjkxandëp tsäjpotm mëdë toˈoxyˈënäˈk diˈib kyajnëm pën mëët tsyëënë (2 Korintʉ 11:2; Diˈibʉ Jatanʉp 14:4). Pääty extëm Jesus tnimaytyaky ja nimäjkpë toˈoxyˈënäˈk mä Matewʉ 25:1-13, yëˈë myaytyäˈägan pënaty nëjkxandëp tsäjpotm.

5. 1) ¿Näˈä yˈadëy extëm yajmaytyaˈaky ja nimäjkpë toˈoxyˈënäˈk? 2) ¿Wiˈix nnijäˈäwëm?

⁵ ¿Näˈä yˈadëy extëm yajmaytyaˈaky ja nimäjkpë toˈoxyˈënäˈk? Mä tyäˈädë tiempë diˈib jëjpkëxanëp. ¿Wiˈix nnijäˈäwëm? Min nˈokˈijxëm. Ko Jesus tmaytyaktääy ja nimäjkpë toˈoxyˈënäˈk, ta net jyënany: “Net jyajty ja pëjkpë yetyëjk” (Matewʉ 25:10). Mä rebistë Diˈib Xytyukˈawäˈänëm 1 äämbë julië 2013, ojts tnigajpxy ko mä Matewʉ kapitulo 24 etsë 25 tuktujkˈokë Jesus  ojts jyënaˈany ko myinäˈäny, o jyäˈtäˈäny. Nanduˈun tnimaytyaky ko Jesus jaa myinäˈäny mä nety tyuny jyatyëty ja mëk ayoˈon, parë tpayoˈoyaˈanyë jäˈäy ets dyajjëjptëgoyaˈany tukëˈëyë axëkˈäjtën. Pääty njaygyujkëm ko extëm yajnimaytyaˈaky ja nimäjkpë toˈoxyˈënäˈk, ja yˈadëy mä ja tiempë diˈib jëjpkëxanëp, perë Jesus ja myinäˈäny mä tyun jyatyëty ja mëk ayoˈon.

6. ¿Ti diˈibë Jesus tukniˈˈixëyan ko tmaytyaky ja nimäjkpë toˈoxyˈënäˈk?

⁶ ¿Ti diˈibë Jesus tukniˈˈixëyan ko tmaytyaky ja nimäjkpë toˈoxyˈënäˈk? Mä Matewʉ kapitulo 24 jap ojts tmaytyaˈaky ja tuumbë diˈib kuwijy o tuk grupë jäˈäy diˈib nëjkxandëp tsäjpotm, diˈib tyuˈumoˈoyandëp ja Dios mëduumbëty mä ja tiempë diˈib jëjpkëxanëp. Jesus ojts tˈanëëmë tyäˈädë grupë ko ninäˈä mbäät tkamastuˈuttë Dios. Ets ko tnimaytyaky ja nimäjkpë toˈoxyˈënäˈk, yëˈë nety tyukniˈˈixëyaampy ko tsojkëp nyayaˈitëdët wijy, per kyaj yëˈëyëty ja tuumbë diˈib kuwijy, nanduˈun niˈamukë pënaty nëjkxandëp tsäjpotm (Matewʉ 25:13). ¿Wiˈix tyam nyayaˈitëdë wijy pënaty nëjkxandëp tsäjpotm? Min nˈokˈijxëm.

7, 8. 1) ¿Tiko nety nyayaˈitëdë listë ja toˈoxyˈënäˈk diˈib kuwijˈyëty? 2) ¿Wiˈix nyayjëjpˈixëdë pënaty nëjkxandëp tsäjpotm?

⁷ Mä yajnimaytyaˈaky ja nimäjkpë toˈoxyˈënäˈk, Jesus jyënany ko nimëgoxk “diˈibë kyaj kyuwinmäˈänyëty” o tsuu. Pääty duˈun ojts ttijy mët ko kyaj nety yajpäättë listë ko jyajty ja noobyë yetyëjk. Per ja nimëgoxkpë toˈoxyˈënäˈk ja ojts ttijy “kuwinmäˈänybyë” o kuwijypyë, mët ko listë nety yajpäättë. ¿Tiko? Yëˈko të nety kontiempë nyayjëjpˈixëdë ets wijˈyë nety të nyayaˈitëdë. Niˈamukë nety mbäät nyayaˈitëdë wijy ets tuktsuˈum dyajtoytyët ja lyamprë. Ja nimëgoxkpë toˈoxyˈënäˈk diˈib kuwijy ojts tˈakmënëjkxtë ja yˈaseitë, per ja diˈib tsuu kyaj ojts nyayjëjpˈixëdë. Per ¿wiˈix nyayjëjpˈixëdë pënaty nëjkxandëp tsäjpotm ko myinëdë Jesus?

⁸ Pënaty nëjkxandëp tsäjpotm tyunandëp tijatyë Jyobaa tukˈanaˈamëdëp axtë ko myinët ja kutëgoˈoyën. ¿Wiˈix nyayjëjpˈixëdë? Myëduˈuk, yëˈko xondaˈakyˈää xondaˈakyjyot të tjëjpkudijëdë tukëˈëyë diˈib jaˈäjtp naxwiiny parë tmëdundë Jyobaa. Myëmajtsk, të wyinmäˈäny tpëjtäˈäktë ko ninäˈä tkamëdëgoyäˈändë Dios, oy näˈä myinët ja kutëgoˈoyën mët ko tsyojktëbë Jyobaa etsë Jesus. Ets myëdëgëëk, kyaj yëˈë tpaˈoˈktëwëdë meeny sentääbë, axëëkpë ijt tsënaaky o jeˈeyë nyaymyëmay nyaymyëdäjëdë extëmë naxwinyëdë jäˈäy. Pënaty nëjkxandëp tsäjpotm yëˈë mëët yaˈijxkijpxyë ja toˈoxyˈënäˈk diˈib kuwijˈyëty, diˈib nayaˈijtëdë listë ets  toyeˈeky dyaˈijttë ja lyamprë. Yëˈëjëty nanduˈun tyam nyayaˈitëdë listë ets tˈawixtë maˈkxtujkën myëët ja noobyë yetyëjk oy kyatsojkjäˈtët (Filipʉs 2:15).

9. 1) ¿Ti diˈibë Jesus tyukˈawäˈänë pënaty nëjkxandëp tsäjpotm? 2) ¿Wiˈix të yˈatsowdë pënaty nëjkxandëp tsäjpotm ko të yaˈˈanëëmëdë: “¡Ta myiny ja pëjkpë yetyëjk!”? (Ix nanduˈunë notë.)

⁹ Ja toˈoxyˈënäˈk diˈib kuwijˈyëty listë nety yajpäättë mët ko kyaj nety të nyaygyumanaxëdë. Per ¿tiko Jesus jyënany ko ja nimäjkpë toˈoxyˈënäˈk ojts myanaxtë mët ko kyaj tsojk jyajty ja noobyë yetyëjk? Yëˈë parë ttukˈawäˈänë pënaty nëjkxandëp tsäjpotm ets kyaj nyaygyumanaxëdët axtë ko yëˈë jyäˈtët. Nyijäˈäwëbë nety ko mbäät tuˈugë jäˈäy nyaygyumanaxyëty mientrës yˈawixy. Pääty, pënaty nëjkxandëp tsäjpotm tyuundëbë mëjää parë nyayaˈitëdë wijy. ¿Wiˈix? Nˈokjamyajtsëm mä yajnimaytyäˈäktë ja nimäjkpë toˈoxyˈënäˈk, Jesus jyënany ko myëdoodë ko ojts yajnigajpxy: “¡Ta myiny ja pëjkpë yetyëjk!”, per yëˈëyë ja “kuwinmäˈänybyë” ojts nyayaˈitëdë wijy (Matewʉ 25:5, 6; 26:41). Nanduˈun mä tyäˈädë tiempë diˈib jëjpkëxanëp, të tmëdowdë ko yajnigajpxy: “¡Ta myiny ja pëjkpë yetyëjk!”. ¿Ti të ttundë? Të tˈëxkaptë ja ijxwëˈëmënë ko ta Jesus tyim minanë ets ijttëp listë parë tˈaxäjëyäˈändë. * Min nˈokˈijxëm wiˈix kyugëxë tyäˈädë maytyaˈaky, diˈib myaytyakypy tuk tiempë.

10. ¿Ti mbäät nnayajtëˈëwëm ko myaytyäˈäktë ja toˈoxyˈënäˈk diˈib tsuu mët ja diˈib kuwijˈyëty?

¹⁰ Mä ja noobyë yetyëjk kyajäˈtynyëm, ta ja nimäjkpë toˈoxyˈënäˈk myaytyäˈäktë. Ja nimëgoxkpë diˈib tsuu, tˈamdowdë aseytë ja toˈoxyˈënäˈk diˈib kuwijˈyëty. Per yëˈëjëty kyaj tmooytyë (käjpxë Matewʉ 25:8, 9). Extëm ja toˈoxyˈënäˈk nyayˈanmääyëdë, waˈan yëˈë tˈandijy diˈib tunan jatanëp mä nety meerë Jesus tyim minanë, ko nety jyëjpkëxanë ja mëk ayoˈon. Per waˈan nnayajtëˈëwëm: “¿Ti waˈandaa pënaty nëjkxandëp tsäjpotm kyaj pën tnekypyudëkëyäˈändë?”. Parë nnijäˈäwëm, tsojkëp nwinmäˈäyëm ko mä tyäˈädë tiempë të nety yajtsääytyaˈaytyë pënaty nëjkxandëp tsäjpotm.

11. 1) ¿Ti tunan jatanëp ko nety tsyondäˈäganë ja mëk ayoˈon? 2) ¿Ti yˈandijpy ko ja toˈoxyˈënäˈk diˈib tsuu tjaˈˈamdoowdë ja aseytë, ets ko yaˈˈanmääytyë ets nëjkx tjuytyë?

¹¹ Ko nety tyimtsondäˈäganë ja mëk ayoˈon, ta niˈamukë yajtsäˈäyäˈändë pënaty nëjkxandëp tsäjpotm diˈib kyaj të tmastuˈuttë Dios (Diˈibʉ Jatanʉp 7:1-4). Tyäˈädë yëˈë yˈandijpy ko seguurë nyëjkxäˈändë tsäjpotm. Per ¿wiˈix jyatäˈändë pënaty kyaj të nyayaˈitëdë wijy ets të tmastuˈuttë Dios mä kyajnëm myiny ja mëk ayoˈon? Kyaj yajtsäˈäyäˈändë. Ko tsyondäˈägët ja mëk ayoˈon, duˈunyë wyëˈëmëyäˈändë ko tˈixtët wiˈix kyutëgoy tukëˈëyë ja relijyonk diˈib kyaj tyëyˈäjtënëty. Waˈan jaanëm tjaygyukëyäˈändë ko kyaj yajpäättë listë parë tˈaxäjëdët ko myinëdë Jesus. Ets ko nëjkx tjaˈˈamdowdë naybyudëkë, ¿ti tunan jatanëp? Pes  extëm të yajnimaytyaˈaky ja nimäjkpë toˈoxyˈënäˈk, ja diˈib tsuujëty ojts tjaˈˈamdowdë ja aseytë, per ta ja kuwijypyë yˈanmääyëdë ets nëjkx tjuytyë. Per kom meerë tsuˈumˈit kyaj pënë aseytë tooky. Tyäˈädë yëˈë yˈandijpy ko kyaj mbäät ti tnekytyundë.

12. 1) Ko nety tyunyëty ja mëk ayoˈon, ¿wiˈix jyatäˈändë pënatyë nety të tmastuˈuttë Dios mä kyajnëm yajtsäˈäytyë? 2) ¿Wiˈix jyatäˈändë pënaty duˈun yajpattëp extëm ja toˈoxyˈënäˈk diˈib tsuu?

¹² Ko nety tyunyëty ja mëk ayoˈon, pënaty nëjkxandëp tsäjpotm kyaj mbäät tnekypyudëkëdë ja myëguˈuktëjk diˈibë nety të tmastuˈuttë Dios, pes të nety kyuxuˈtsënë ja tiempë. Per ¿wiˈix jyatäˈändë? Duˈun extëm jyäjttë ja toˈoxyˈënäˈk diˈib tsuu ko ojts nyëjkxtë aseytë juuybyë, ta “jyajty ja pëjkpë yetyëjk. Ja toˈoxyˈënäˈk diˈibë naty të nyayˈëxkukëty, ta tyëjkëdë mët ja pëjkpë mä pyëjkpënigayäˈändë. Ta yˈadijky ja tëjk”. Ko Jesus myinët mä nety tyim jëjpkëxanë ja mëk ayoˈon, ta dyajtuˈukmukäˈäny tsäjpotm pënaty kyaj të tmastuˈuttë Dios (Matewʉ 24:31; 25:10; Fwank 14:1-3; 1 Tesalónikʉ 4:17). Per kyaj tkupëkäˈäny diˈibë nety duˈun extëm ja toˈoxyˈënäˈk diˈib tsuu. Waˈan jyënäˈänäˈändë: “Wintsën, wintsën, yaˈˈawäˈäts”. Perë Jesus, ta tˈatsowäˈäny extëm tˈatsoy pënaty të tmastuˈuttë Dios: “Kyajts miits nˈixyˈattë” (Matewʉ 7:21-23; 25:11, 12).

13. 1) ¿Wiˈix nnijäˈäwëm ko Jesus kyaj yëˈë tmaytyäˈägany ko pënaty nëjkxandëp tsäjpotm nimay tmastuˈudäˈändë Dios? 2) ¿Tiko njënäˈänëm ko Jesus tyukjotkujkˈäjtypy pënaty nëjkxandëp tsäjpotm ko tnimaytyaky ja nimäjkpë toˈoxyˈënäˈk? (Ixë dibujë mä tsyondaˈaky.)

¹³ ¿Yëˈë netyë Jesus myaytyäˈägaampy ko pënaty nëjkxandëp tsäjpotm nimay tmastuˈudäˈändë Dios ets ko jaˈˈatäämbë wyingudëgats? Kyaj. Parë njaygyujkëm tiko kyaj, min nˈokˈijxëm wiˈix jyënaˈanyë Matewʉ kapitulo 24, japë Jesus ojts tˈanëëmë ja tuumbë diˈib kuwijy ets kyaj jyëmbittët axëk mëduumbë, per kyaj nety yëˈë tˈandijy ko duˈun jyatäˈäny. Jeˈeyë nety ttukˈawanë parë nyaygyuentˈatëdët. Nanduˈun jyaty ko yajnimaytyaˈaky ja nimäjkpë toˈoxyˈënäˈk. Jesus yëˈë nety tyukˈawäˈänëp pënaty nëjkxandëp tsäjpotm parë nyaygyuentˈatëdët. Niduˈuk niduˈuk mbäät twinmaytyë pën nayaˈitanëdëp kuwijy o kyaj, duˈun extëm nimëgoxk ja toˈoxyˈënäˈk diˈib ijttë kuwijy ets nimëgoxk kyaj. Pablo nanduˈun tˈanmääy ja myëguˈuktëjk diˈib nëjkxandëp tsäjpotm (käjpxë Ebreeʉsʉty 6:4-9; nanduˈun jyënaˈany mä Deuteronomio 30:19). Pablo mëk ojts tmëgajpxy ja myëguˈuktëjk, per nan ojts tˈanëëmë ko ijtp seguurë ko kyaj tmastuˈudäˈändë Dios. Ets ko Jesus tnimaytyaky ja nimäjkpë toˈoxyˈënäˈk, yëˈë xytyukˈijxëm ko tyukjotkujkˈäjtypy pënaty nëjkxandëp tsäjpotm. Nyijäˈäwëp ko niduˈuk niduˈuk kyaj tmastuˈudäˈändë Dios ets ko yˈaxäjëyandëp ja kumäˈäyën.

14. ¿Tiko nanduˈun xypyudëjkëm ko Jesus tnimaytyaky ja nimäjkpë toˈoxyˈënäˈk?

¹⁴ Ja ijxpajtën diˈibë Jesus myaytyak, yëˈë xytyukniˈˈijxëm ko tsojkëp nnayaˈijtëm wijy. Jesus yëˈë duˈun yˈanmääy pënaty nëjkxandëp tsäjpotm, per nan mbäät xypyudëjkëm nuˈun njukyˈatäˈänëm yä Naxwiiny (Fwank 10:16). ¿Tiko? Yëˈko jyënany: “Diˈibë nˈanmääytyëp miitsëty, nˈanmääytyëpts nandëˈën nidëgekyëty: Wëˈëmdë wijˈyëty” (Markʉs 13:37). Jesus tsyejpy parë niˈamukë nnayjëjpˈijxëm ets nnayaˈijtëm wijy, ets nbanëjkxëmë yˈijxpajtën pënaty nëjkxandëp tsäjpotm ets nbëjtakëm jëjpˈamë Diosë tyuunk. Ninäˈä duˈun ngaˈˈadëtsëm extëm ja toˈoxyˈënäˈk diˈib yˈamdoowdë aseytë ja myëguˈuktëjk diˈib kuwijˈyëty. Kyaj nˈawijxëm etsë wiink jäˈäy nyayjëjpˈixëdët o nyayaˈitëdët wijy ëtsäjtëmgyëjxm. Pes niduˈuk niduˈuk xypyatëm ets duˈun nduˈunëm. Tim tsojkë Jesus myinäˈäny parë xypyayoˈoyäˈänëm niˈamukë, ets niduˈuk niduˈuk nguentëkëyakäˈänëm. Pääty nˈoknayaˈijtëm listë.

15. ¿Tiko jantsy jotkujk nnayjäˈäwëm ko Jesus pyëkäˈäny?

¹⁵ Jantsy jotkujk nnayjäˈäwëm ko Jesus tmaytyaky ja pëjkpëty. Ko nyaxët ja Armajedon, ta pënaty nëjkxandëp tsäjpotm pyëkäˈändë mëdë Kristë (Diˈibʉ Jatanʉp 19:7-9). Ets nan tyukˈoyˈatandëp pënaty jukyˈatandëp yä Naxwiiny. ¿Tiko? Yëˈko ko pyëktët, ta tmëdatäˈändë tuˈugë gobiernë diˈib tëyˈäjtën mëët tijaty tyunaampy. Pääty oy njukyˈatäˈänëm yä Naxwiiny o jam tsäjpotm, nˈoknayjëjpˈijxëm ets nˈoknayaˈijtëm wijy. Net nëjkx nˈaxäjëm ja kunuˈkxën diˈibë Jyobaa të twandaˈaky.