MÄ TUˈUGË xëë duˈunëtsë ndääk xyˈanmääy: “¡Kyajts njaygyukë tiko kyaj xyˈawdatäˈäny ja mˈaptëjk! ¿Ti kyaj xypyëkyë kuentë ko yëˈë myajjukyˈäjtëp? Nitii xykyamëjjawë. ¿Wiˈixën ko kyaj xyˈoktimtunanë ja kostumbrë diˈib tyuundë ja mˈaptëjk? Pën kyaj xyˈawdatäˈäny, axëëgëtsë netyë nrelijyonk xyajwëˈëmy”. Tajëts ja ndääk jyantsy tyëjkë jëëy yaxpë.

Tamë nety nyëjkxnë kanäk poˈo mäjëtsë ndääk yˈanmääyë Jyobaa tyestiigëty ko tyukniˈˈixëyäˈänëdë Biiblyë. Per yëˈë kyaj nety yˈëxpëkäˈäny, ta tˈanmääy etsëts ëjts xyaˈëxpëktët. Pääty, ¿tikotsë net xytyukjotˈambëjky? Yëˈko yëˈëjëtsë nety nmëmëdowaambyë Jyobaa etsëts nyajjotkujkˈatäˈäny. Ets kyajtsë nety nekytyunäˈäny diˈibëts ja ndääk xyjatuktunäämp. Mëkëts ojts xytsyiptakxë, perë Jyobaa yëˈëts xymyëjämooy.

Budistëtsë nety extëmtsë nfamilyë, extëm mayë jäˈäy diˈib Japón. Per majtsk poˈojëtsë nety kujk nˈëxpëky mëdë Testiigëty, tajëts nˈijxy ko Biiblyë myëdäjtypyë tëyˈäjtën. Ets kojëts nnijäˈäwë ko tam yajpääty tsäjpotm tuˈugëtsë nDeety, tajëts nˈixyˈatany. Kojëts ogäˈän ndëjkë nˈëxpëjkpë, xëmëts nimaytyaˈaky mëdëtsë ndääk tijatyëts njäjtypy. Nan tajëts ogäˈän nˈyoˈoytsyondaky domingë domingë mä tyuˈukmuktë Jyobaa tyestiigëty. Ets kojëts niˈigyë nˈëxpëjkˈadëtsy, tajëtsë ndääk nˈanmääy ko kyajts nekytyunäˈäny tijaty tyuundëbë budistë. Tajëts ajotkumonë xyˈanmääy: “Ayoˈon tsoytyuˈun pën ja niduˈuk mä familyë diˈib kyaj twintsëˈëgë ja yˈaptëjk”. Tajëts xyˈanmääy ko kyajts xynyekykyaxäˈäny reunyonk ets ko kyaj tnekytsyeky nˈëxpëkëdëtsë Biiblyë. ¡Kyajtsë nety ndimwinmay etsëts duˈunë ndääk xyˈanëëmët! Kyaj nety nyekyjaˈajëtyëts ja ndääk.

Ndeetyëts nan yëˈë pyuwäˈkëtsë ndääk. Tëjëtsë nety nnijawë mä Éfesʉ 6 ko Jyobaa tsyejpy etsë uˈunk ënäˈk tmëmëdowdëdë tyääk tyeety. Itäämbëtsë nety jatëgok tuˈugyë mëdëtsë ndääk ndeety, ets nwinmääyëts ko pën nmëdoowˈijtypyëts wiˈixëts xyˈanëëmëdë, mbäät nanduˈun tmëdoowˈittë wiˈixëts nˈanëëmëdë. Mä tadë tiempë, tsojkëbëtsë nety nˈëxpëkët niˈigyë mët ko yëˈëtsë nety ndunaambyë nˈeksamen mä nˈeskuelë. Päätyëts ngupëjky extëmtsë ndääk ndeety xyˈanmääy etsëts kyaj nekynyëjkxët tëgëk poˈo mä reunyonk. Per tajëts ndukwandakyë Jyobaa ko jantsy jeˈeyë nyaxët tëgëk poˈo, tajëts jatëgok nnëjkxäˈäny.

Kyaj yˈoyëty extëmëts nˈadëtsy. Tuk pëky, yëˈkots nwinmääy ko duˈunyëmëtsë netyë ntsokäˈänyë Jyobaa ko nyaxët tëgëk poˈo. Per kyaj dyuˈunˈäjty. Pes pojënëts ja ntsojkënë ojts xyeemy. Ets ja tuk pëky, yëˈko niˈigyëts ja ndääk ndeety mëktaˈaky xyˈanmääytyë parëts nmastuˈudëdë Jyobaa.

Mä ja tuˈukmujkën tëjëtsë nety nˈixyˈaty nimayë Testiigë diˈib nanduˈun pyattëbë jotmay extëm ëjts. Tëjëtsë nety xyˈanëëmëdë ko Jyobaa yëˈëjëts xymyëjämoˈoyäämp, ets ko pën nmëmadakypyëts, mbäädëtsë nfamilyë ok tˈixyˈattë Jyobaa (Matewʉ 10:34-37). Ndukˈijxpataambyëtsë netyë Jyobaa, päätyëts ndëjkë nuˈkxtakpë amumduˈukjot.

Ndääk ndeetyëts kanäk pëkyë winmäˈäny tˈëxtääytyë parëts xytyukmastuˈudäˈändë Jyobaa. Extëmtsë ndääk mas niˈigyëts xytyuunkmooy parëts kyaj muum nekynyëjkxët. Nan ojtsëts näˈäty xyajwëˈëmdë tëjäˈp ets nan kyajts xyajkääytyë. Janääm jatsojkëtsë ndääk xyˈanmääy etsëts kyaj nekyˈëxpëkëdë Biiblyë. Per xëmëts ijty amonyë nwëˈëmy. Pes kojëts nˈatsoy, tajëts nimajtsk naynyibëdëˈëgëdë mët ko ak duˈunëts nwinmaytyë ko tëyˈäjtënëts njënäˈändë. Koxyëbëts nyaˈijxë niˈigyë wintsëˈkën mä wiˈixëts ja ndääk nyayjawëty ets tijaty myëbëjkypy, waˈanxyëp nëgoo kyajotˈambëjky.

Ndäägëts ta tˈanmääyë wiink jäˈäy parëts xypyudëkët. Extëm ojts ttukmëtmaytyaˈaky ja nmaˈestrëts, per yëˈë ta jyënany ko kyaj ttuktëkëyaˈany ti jotmayëts nmëdäjttëp. Ok, tajëts ojts xywyoonëjkxy mä tyuny, ta tˈanmääy ja wyintsën parëts xytyukjaygyukët ko ni diˈibë relijyonk duˈun kyaˈoyëty extëmë budismo. Nan ojts tmëgajpxy mä telefënë kanäägëtsë njiiky nmëguˈuk ets twinjëëy twinˈyaxy parëts xypyudëkëdët. Axëëgëts xyajnayjäˈäwë tijaty tyuun. Per mä ja tuˈukmujkën, tajëtsë mëjjäˈäytyëjk xyˈanmääytyë ko diˈibëts ja ndääk tyuumpy, yëˈë nyimaytyakypy ja tëyˈäjtën ko ttukmëtmaytyaˈagyë wiink jäˈäy ti jotmayëts nmëdäjtypy.

Ndääk ndeetyëts yëˈëjëts xytyukmëtsojk etsëts nˈëxpëkët mä unibersidad parëts nmëdatëdë oybyë tuunk, xëmëts ijty ntsiptundë kojëts nimaytyäˈäktë. Päätyëts nduknijäˈäyëdë kanäägë neky mäjëts  nnimaytyaky tijatyëts ndunaampy. Tëgok, mëkëts ndeety jyantsy jotˈambëjk, axtë xyˈanmääyëts: “Nëjkx bomë mduunk ëxtäˈäy aber pën mˈokpatypy, per pën kyaj xypyaaty, ta xyyoˈoyëdë mnëˈë mduˈu”. Tajëtsë Jyobaa nmënuˈkxtaky parëts xypyudëkët. Jakumbom, tajëts ojts nëjkxy käjpxwäˈkxpë, ets tajëts nimajtskë nmëguˈukˈäjtëm xyˈawäˈänëdë tuunk, nyaˈëxpëkëdëts ja yˈënäˈkuˈunk. Per ja ndeetyëts en lugäär xyondäˈägët, duˈun nyaybyëjtakë extëmxyëbëts kyaj njamëty. Ets ja ndäägëts xyˈanmääy ko mas oyxyëbëts ko njëmbity maˈtspë yajjäˈäyˈoˈkpë ets kyaj kojëts nDestiigëˈatët.

Näˈäty, nnayajtëëwëts pënë Jyobaa yˈoyˈijxypy kojëts njëjpkugäjpxë wiˈixëtsë ndääk ndeety xyˈanëëmë. Päätyëts ijty nmënuˈkxtaˈaky etsëts nwinmayë tekstë mä tmaytyaˈaky wiˈixë Jyobaa dyaˈixyëty ko xytsyojkëm. Tyäˈädë yëˈëjëts xypyudëjkë parëts kyaj axëëk nwinmayët mäjëts ja ndääk ndeety ets parëts njaygyukët ko yëˈë naytyukjotmaytyuunëdëp mët ëjts. Jyobaa yëˈëjëts xypyudëjkë parëts nyaˈoyëdë nwinmäˈäny ets parëts nnijawët tijatyëts ndunëp. Ets kojëts ijty mas janäämëty nëjkxy käjpxwäˈkxpë, niˈigyëts njantsy tyukxondaˈaky kojëts nimaytyaˈagyë Jyobaa. Ntsojkënyëˈajtypyëtsë nety ndunäˈäny prekursoora.

Ko näägë nmëguˈukˈäjtëm tnijäˈäwëdë ko tunäämbëts prekursoora, tajëts xyˈanmääytyë ets jaanëmëts nduundëkët kojëts wanatyë ndääk ndeety jyotxaamdët. Tajëts nˈamdooyë Jyobaa naybyudëkë, ojtsëts nbayoˈoy mä ëxpëjkpajn tijatyëts mbäät nduny etsëts nwinmääy tikots ndunäˈäny prekursoora. Nan ojtsëts nˈamdoyë käjpxwijënë nmëguˈukˈäjtëm diˈib jeky kujk Dios mëduunë. Tajëtsë nwinmäˈäny nbëjtaky ko yëˈëjëtsë Jyobaa nyajnayjawëyanëp agujk jotkujk. Etsëts njaygyujkë ko pën ak awijxpëts, kyaj nety syeguurëty pën ja ndääk ndeetyëts winmääytyëgäjtstëp.

Ja tuk jëmëjtëtsë nety nˈakˈëxpëkäˈäny sekundaaryë kojëts nduundëjkë prekursoora. Ko waanë tiempë nyajxy, tajëts nwinmääy nëjkxäˈäny käjpxwäˈkxpë mä tyëgoyˈatyë naybyudëkë. Per kyajts ja ndääk ndeety xykyaxandë. Tajëts nmaˈkxtujky axtë koonëmtsë njëmëjt nyaˈˈabejty 20. Tajëts ngejxy tuˈugë neky Betel parëts nyajkaxët mä tuˈugë lugäär Japón, mä nety tsyëënëdëtsë njiiky nmëguˈuk parëts ja ndääk kyaj nëgoo tyim may tyim täjjët.

Mä tyäˈädë lugäär niganäägëtsë jäˈäy nbudëjkë parë nyëbattët. Nan njäjtëtsë inglés parëts niˈigyë nmëdunëdë Jyobaa. Mäjëtsë nety nduˈukmuky, tapë nety nimajtskë prekursoor espesial. Xyajmonyˈijx xyajmonyjäˈäwëts wiˈix tpëjtäˈäktë jyot myëjää mä Diosë tyuunk ets tpudëkëdë jäˈäy. Tajëts nanduˈun nbëjtakyë nwinmäˈäny parëts ndunäˈäny prekursoora espesial. Mä tadë tiempë majtskˈokëtsë ndääk pyäˈämbejty. Ets majtskˈokëts njëmbijty mäjëtsë ndëjk parëts nguentˈäjty. Yëˈë kyaj nety tyim winmay ninëjkxëdëts. Per ko duˈun tˈijxy, ta wanaty wanaty ojts jyotxeemy.

Ko nyajxy jëxtujk jëmëjt, ta Atsushi, niduˈuk ja prekursoor espesial xytyuknigejxyëts tuˈugë neky. Jap jyënaˈany ko pëkäämp ets xyajtëëyëts pën njäˈäwëbëts ti mët yëˈë. Tim tëyˈäjtën kyajtsë nety ti njawë mët yëˈë, ets duˈunëtsë nety nwinmay ko yëˈë nan kyaj ti tjawë mët ëjts. Ko nyajxy tuk poˈo, tajëts nˈatsoowëmbijty ko oyëts mët niˈigyë nnayˈixyˈatëdët. Ok, tajëts nˈijxtë ko tuˈugyëp tijatyëts ndunandëp. Duˈunyëmëtsë nety nmëdunäˈändë Jyobaa oyëts mää ndimˈyajkaxtët. Ko ja tiempë nyajxy, tajëts nbëjktë. Jantsy jotkujkëts nnayjäˈäwë kojëts ja ndääk ndeety etsëts näägë njiiky nmëguˈuk yˈojtstë mäjëts nbëjktë.

Jatsë nety nimajtsk ndundë prekursoor regulaar ko Atsushi yaˈˈanmääy parë näˈäganäˈäty nëjkx tkuˈixë näägë tuˈukmujkën. Ok, tajëts nyaˈˈanmääytyë  ndundët prekursoor espesial, ets ko jaa, tajëts ndëjkëdë tuumbë sirkuitë. Kojëts nyaˈˈabëtsëëmdë myëdukˈokpë mäjatyëtsë nety të nguˈixëdë ja tuˈukmujkën, tajëts ojts xymyëgäjpxtë nmëguˈukˈäjtëm diˈib Betel parëts xyajtëëwdë pën mbäädëts nëjkxtë Nepal parëts jap ndundët sirkuitë.

Kyajtsë nety nnijawë wiˈixëts ja ndääk ndeety jyënäˈänäˈändë kojëts nˈanëëmëdët ko jagamëts nëjkxnëdë. Per kojëts ojts nmëgäjpxtë, tajëts ja ndeety xyˈanmääy: “Jantsy tsujë tadë lugäär mä mnëjkxtë”. Të nety tuˈugë myëtnaymyaayëbë tyuksëmäänëp nyamoˈoyëty tuˈugë liibrë mä yajnimaytyaˈagyë Nepal. Ko ojts tkäjpxtäˈäy, ta wyinmääy ko Nepal yëˈë tuˈugë lugäärë tsujpë parë nˈixyˈäjtëm.

Jantsy jotkujkëtsë nety nnayjawëdë Nepal, pes jantsy ajiiky amëguˈugë jäˈäyëty. Per ok, tajëts nyaˈˈanmääytyë parëts nëjkxtët tuumbë sirkuitë Bangladesh. Naymyëwingonˈäjtëbë tyäˈädë paˈis, per tim tëgatsyatyë kostumbrë. Pääty kyaj tyuknaxëty wiˈixëts ja jäˈäy ndukmëtmaytyäˈäktë Diosë yˈayuk. Ko nyajxy mëgoxk jëmëjt, tajëts jatëgok nyajkajxtë Japón. Tyam japëts agujk jotkujk nsirkuitëˈattë.

Kojëts të ndundë Bangladesh, Nepal ets tyam Japón, mëjwiin kajaats xytyukniˈˈixëdë wiˈix jyaˈayˈatyë Jyobaa. Tuˈuk tuˈugë tyäˈädë paˈis, ak tëgatsyatyë kostumbrë ets tuˈuk tuˈugë jäˈäy nan tëgatsy. Per tëjëts nˈixy ko Jyobaa pyudëjkëp, kyuentˈäjtypy ets kyupëjkypyë jäˈäy oy mä tsyoondë.

Taaˈäjtp kanäk pëky tikots mbäät nmoˈoyë dyoskujuyëmë Jyobaa. Pes të tnasˈixë parëts nˈixyˈatët, nmëdunët ets tëjëts xymyoˈoy tuˈugë njamyëët diˈib jantsy oyjyaˈay ets Dios mëduump. Nan tëjëts xypyudëkë parëts të xytyuˈumoˈoy. Nmoobyëtsë dyoskujuyëmë Jyobaa ko tyam oyëts jatëgok nˈity mëdëtsë ndääk ets mët niˈamukëtsë njiiky nmëguˈuk. Xëmëts nmëjjawëyaˈany kojëts mbäät oy nˈity mëdë Dios ets mëdëtsë ndääk.