“Tyäˈädë oybyë ayuk diˈib nyimaytyakypy ja anaˈamën yajkäjpxwäˈkxäˈäny abëtsemy nyaxwinyëdë parë yajtuknijawët tukëˈëyë nasionk; ets taanëm myinäˈäny ja jëjptëgoˈoyën.” (MATEO 24:14, Traducción del Nuevo Mundo)

MAYË ëxpekyjyaˈay jyënäˈändë ko tyäˈädë tekstë mëjwiin kajaa nyikejy. Tuk peky, yëˈko yajtunäˈänyë tyäˈädë tuunk abëtsemy nyaxwinyëdë. Myëmajtsk peky, yëˈko pënaty myëbëjktëbë Jesus yëˈë nyikëjxmˈäjttëp ets tkäjpxwäˈkxtëdë tyäˈädë “oybyë ayuk”, tuˈugë tuunk diˈib jawyiin yajtunäämp mä kyaminyëm “ja jëjptëgoˈoyën” diˈibë Jesus ojts tnaskäjpxë.

Diˈib ojts yajnaskäjpxë mä Mateo 24:14, ta tyam yˈadëy. Etsë tyäˈädë “oybyë ayuk” jëjpˈam parë mijts, mët ko tsojkëp xywyinˈixët ti mdunaampy: mbuwäˈägëyaambyë Diosë yˈAnaˈamën o mjëjpkudijëyaampy. Ti mwinˈijxypy mbäät nyikejy oˈkën o jukyˈäjtën.

Min nˈokˈijxëm ti jawyiin tuun jäjtë mä natyë Jesusë duˈun kyajënäˈäny. Tuk xëë majtsk xëë naty tyëgoyˈaty parë yˈoogët, ko ja yˈëxpëjkpëty yajtëëwëdë ti miin këdakp. Yëˈë naty nyijawëyandëp näˈä myinäˈäny ja Diosë yˈAnaˈam, diˈibë natyë Jesus xëmë të tnimaytyaˈaky. Nan nyijawëyandëbë naty näˈä tpäädäˈäny “ja tiempë mä jyëjptëgoyaˈanyë tyäˈädë jukyˈäjtën”, o extëmë wiinkpë ayuk Biiblyë jyënaˈany, ko “naaxwiimbë naty kyëxaan tyëgoyaanë” (Mateo 24:3, Nuevo Testamento de Mazatlán).

Jesus jawyiin ojts tnigajpxy tijaty ayoˈon tunan jatanëp. Tyunäˈänyëtyë mëj tsip, mëk yuu, myinäˈänyë axëkpäˈäm etsë mëk ujx. Nan ojts tnigajpxy ko myëjwindëkëyaˈanyë axëkˈäjtën, maˈtspë yajjäˈäyˈoˈkpë ets diˈib nyiwintsënˈäjttëbë relijyonk twinˈëënäˈändë mayjyaˈay ets yaˈˈaxëkˈixäˈändë pënaty jantsy panëjkxëdëp (Matewʉ 24:4-13; Lukʉs 21:11).

Perë Jesus nan ojts tnigajpxy tijaty oyˈäjtënë tunan jatanëp, extëm diˈib anikëjxy të yajnigajpxy mä Mateo 24:14. Nuˈun kujkë xëë tiempë nyaxy, mayë jäˈäy tmëmay tmëdäjtë tyäˈädë ayuk, per nan jotkujkmooyëdëp. May kyaj tnijawëdë wiˈix nyikejˈyë tyäˈädë tekstë. Pääty, mä artikulo diˈib akmiimp nˈatsoojëmbitäˈänëmë tyäˈädë yajtëˈëwën: ¿Ti yˈandijpy ja oybyë ayuk? ¿Ti yˈandijpy ja Anaˈamën? ¿Näˈä ets wiˈix yˈadëy diˈib ojts yajnaskäjpxë? ¿Ti yˈandijpy “ja jëjptëgoˈoyën”?

 [Letrë diˈib miimp mä dibujë mä pajina 2]

CÓDICE WASHINGTONIANO DE LOS EVANGELIOS (FACSÍMIL). MATEWɄ 24:14 YËK KYËXEˈEKY

Mä liibrë Facsimile of the Washington Manuscript of the Four Gospels in the Freer Collection (1912)