“Yajkäjxwäˈxäämp [...] mä tëgekyë naxwinyëdë.” (MATEWɄ 24:14)

ABËTSEMY nyaxwinyëdë Jyobaa tyestiigëty tkäjpxwäˈkxtë ja oybyë ayuk. Ets wiˈixëm ttundë:

Ko jäˈäy tmëtmaytyäˈäktë. Jyobaa tyestiigëty këˈëm tninëjkxtë jäˈäy parë ttukmëtmaytyäˈäktë ja oybyë ayuk, duˈun extëmë Jesus ttuuny mëdë yˈëxpëjkpëty (Lukʉs 8:1; 10:1). Kyaj tˈawixtë etsë jäˈäy yˈëxtäˈäyëdët, këˈëm tninëjkxtë ets tukmëtmaytyäˈäktë ja Diosë yˈAnaˈamën, ja tyam tyundë jëxtujk miyonk naxy. Ets wiˈixëm kyäjpxwäˈkxtë, tëjkm mdëjk, nëˈääy tuˈääy ets mä telefënë. Tadë jëmëjt të nyaxy ja të dyajtundë tiempë naxy 1,500 miyonk oorë.

Ets kyaj jeˈeyë jäˈäy ttukniˈˈixëdë Diosë yˈAnaˈamën, nanduˈun tijatyë Jesus ojts tniˈanaˈamë (Matewʉ 28:20). Ja naa tuktujk miyonk naxyën dyaˈëxpëktë jäˈäy namayˈäjtën mä jyëën tyëjk.

Jyobaa tyestiigëty ja kyäjpxwäˈkxtë 236 paˈis. Oypyënëty tmëtmaytyäˈäktë ets oymyääjëty, duˈun kamoty ets syudääjoty. Oy mä yukˈit diˈib yajpatp Siberia o mä diˈib yajtijp selva amazónica, ets oy mä yˈit lyugäärë äänëˈëk tëtsëˈëkpë África ets axtë Himalaya diˈib yajpatp tunoty kopkoty. Nipën kyayajmëjuy, namayˈäjtënë xyëë tiempë etsë myeeny sentääbë dyajtundë mä kyäjpxwäˈkxtë. ¿Tiko duˈun tyundë? Mët ko ttsoktë Dios etsë myëguˈuktëjk.

Mët yëˈëgyëjxmë ëxpëjkpajn. Tyäˈädë rebistë diˈib xyëˈäjtypy: Diˈib Xytyukˈawäˈänëm. Yëˈë nyigajpxypyë Jyobaa yˈAnaˈamën, ja pyëtsemy tuˈuk tuˈugë numero 42 miyonk naxy mä 188 ayuk. Etsë jyamyëët ¡Despertad!, diˈib nanduˈun nyimaytyakypyë Diosë yˈAnaˈamën ja pyëtsemy naa 40 miyongën mä 83 ayuk.

Nanduˈun dyajpëtsëmdë liibrë, foyetë, trataadë, DVD, CD diˈib yajmëdooˈijtp etsë MP3 naa 540 ayukën. Ets ja të dyajwäˈkxtë 20,000 miyonk, nuˈun të nyaxy mäjk jëmëjt, duˈunxyëp extëm të tˈaxäjëdë këjk tëgëëgë jäˈäy nuˈun tsyëënëdë abëtsemy nyaxwinyëdë.

Jyobaa tyestiigëty nan të dyajpëtsëmdë kanäk naxë Biiblyë o të tniˈanaˈamëdë parë jäˈäy dyajpëtsëmët. Extëmë Traducción del Nuevo Mundo de las Santas Escrituras diˈib këˈëm kyäjpxnäjxtëp, dyajpëtsëmdë ets dyajwäˈkxtë mä 96 ayuk, ta diˈib miimp kaˈpxy ets ta diˈib jeˈeyë tuk peky. Ja kujkë jäˈäy të yajmoˈoy 166 miyonk.

Mä tyuˈukmuktë. Sëmään sëmään nyëjkxtë mä lugäär diˈib xyëëmooytyëp Tëjk mä yˈËxpëktë. Kyaj jeˈeyë nyëjkxtë parë Dios awdattë nanduˈun parë tˈaxäjëdë käjpxwijënë diˈib miimp mä Biiblyë. Nyaxyë diskursë mä yajnimaytyaˈagyë Diosë yˈAyuk ets tˈëxpëktë Biiblyë mëdë ëxpëjkpajtën diˈib pudëjkëdëp extëm Diˈib Xytyukˈawäˈänëm. Ko duˈun tyuˈukmuktë jap tjattë wiˈixë jäˈäy ttukniˈˈixët ja oybyë ayuk.

Abëtsemy nyaxwinyëdë ja jyaˈˈaty 107 mil naxyë naymyujkën ets tuˈugyë ja ëxpëjkpajtën  diˈib yˈëxpëjktëp diˈib tuˈugyë yaˈijtëdëp. Mä tyuˈukmuktë mbäät oypyënëty nyëjkxtë, kyaj jap pën yaˈˈamdoyë meeny sentääbë. Per extëm nˈakˈixäˈänëm, kyajxyëp tsyobääty tixyëp tyuundëp koxyëp tkakuytyundë ti yˈëwäˈkx kyäjpxwäˈkxtëp.

Mëdë yˈijxpajtën. Jyobaa tyestiigëty tyuundëbë mëjää parë dyaˈixëdë ko jantsy Dios mëduundëp ets duˈunë myëguˈuk ttukmëdundë tijaty extëm ttsoktë yajtukmëdundët (Matewʉ 7:12). Pokyjyaˈayëty ets tëgooytyëp, per tyukmëdunandëbë oyˈäjtënë wiink jäˈäy. Pääty ttukmëtmaytyäˈäktë ja oybyë ayuk ets tpudëkëdë pën jam ti dyajtëgoyˈattë.

Jyobaa tyestiigëty ëwäˈkx käjpxwäˈkxtëp oy niˈamukë jäˈäy kyatëkët ëxpëjkpë. Nyijäˈädëp ko jäˈtäämbë tiempë mä Jyobaa jyënäˈänäˈäny ets jabäät kyäjpxwäˈkxtët. Ta net myinäˈäny ja jëjptëgoˈoyën diˈibë Jesus ojts tnaskäjpxë. Per ¿ti myaytyäˈägan?

[Letrë diˈib miimp mä dibujë mä pajina 7]

Jyobaa tyestiigëty kyäjpxwäˈkxtëp ja oybyë ayuk abëtsemy nyaxwinyëdë