Seguurë nayjäˈäwëm ko amumduˈukjot nmëbëjkëmë Jyobaa
“Jyobaa këˈëm myëdowaampy kots nmëgäjpxët.” (SAL. 4:3)
1, 2. 1) ¿Ti mëj jotmay pyatë David? 2) ¿Ets ti nnijawëyäˈänëm mä majtskpë Salmo?
DAVID jekyë naty kujk yˈanaˈamnë jam Israel ko tpaty tuˈugë mëj jotmay. Ja yˈuˈunk Absalón nyibëdëˈkë ets nyayajtëjkë rey, ta David kuanë ttukpëtsëëmduty ja Jerusalén käjpn. Ta pyejty mët niwaanë jyaˈay mä ja Olivos kopk, tekywyäˈäts ets jyantsy jyëˈëy jyantsy yaˈaxy. Per kyaj yëˈëjëty jeˈeyë, ja jäˈäy diˈibë naty oy mëët jyantsy nyaymyayëty, ojts myastuˈutyëty ets tpuwäˈkë Absalón. Ets ok, ta Simeí diˈibë naty myëguˈukˈäjtypyë Saúl ojts yˈaxëkmëgajpxyëty, tsyäägäˈtsë ets jyantsy nyaxwaynyiwëjë (2 Sam. 15:30, 31; 16:5-14).
2 Ko rey David oˈktëy jyajty kyëbejty, ¿waˈandaa net ojts tmëˈoˈknë ja amay jotmay? Kyaj, pes myëbëjkë Jyobaa extëm tnigajpxy mä Salmo 3, mä tkujäˈäyë ko ojts kyeˈeky. Tyäˈädë rey nan ojts tjäˈäyë Salmo 4, mä nanduˈun ojts tnigajpxy wiˈix yˈijty seguurë ko Dios myëdoopy ets yˈatsoojëmbijtypy pënaty mëduunëp (Sal. 3:4; 4:3). Mä tyäˈädë majtskpë Salmo jyënaˈany ko Jyobaa kyaj myastutëdë xëëny koots, ets ko kunuˈkxëdë ets pudëjkëdë, ets yajnayjäˈäwëdë agujk jotkujk ets seguurë (Sal. 3:5; 4:8). Pääty, oy ko nˈëxpëjkëmë tyäˈädë majtskpë Salmo ets nˈijxëm wiˈix mbäät xypyudëjkëm parë seguurë nayjäˈäwëm ets nyajkëktëjkëmë mëbëjkën mä Dios.
Kojëts “xynyibëdëˈëktë jantsy nimay”
3. Extëm jyënaˈanyë Salmo 3:1, 2, ¿ti jotmayë naty yajnäjxypyë David?
3 Tuˈugë kugajpxy tˈanmääyë David: “Yëˈë kyorasoonë yetyëjkëty diˈib Israel yëˈë pyanëjkxtëbë Absalón” (2 Sam. 15:13). Ko David tmëdooy wiˈix ja Absalón mayë jäˈäy pyanëjkxyëty, ta jyënany: “Jyobaa, ¿tiko nyimayëtsë nmëtsip? ¿Tikots xynyibëdëˈëktë jantsy nimay? May jyënäˈändë mäjëtsë njukyˈäjtën: Kyaj mbäädë Dios yajnitsoˈogyëty” (Sal. 3:1, 2). Extëm nˈijxëm, mayë naty ja israelitë wyinmaytyë ko Jyobaa kyaj dyaˈˈawäˈätspëtsëmäˈänyë David mä Absalón etsë jyaˈay.
4, 5. 1) ¿Ti diˈibë David seguurë myëdäjt? 2) ¿Ti myaytyäˈägaampy ko jyënaˈany: “Ja diˈib yajkujkëbëtsë ngëbäjk”?
4 Perë David seguurë ojts nyayjawëty mët ko myëbëjkë Jyobaa tuˈukˈää tuˈukjot. Pääty yˈëëy: “Per mijts Jyobaa, duˈunëts xyajnaduky extëm tuˈugë eskuudë, mijts nmëjˈäjtënˈäjtypy ets Ja diˈib yajkujkëbëtsë ngëbäjk” (Sal. 3:3). Seguurë yˈijty ko Jyobaa kuwäˈänanëp duˈun extëm tuˈugë eskuudë tkuwäˈänyë soldäädë. Tyäˈädë rey diˈibë naty të myëjjäˈäyënë windäˈägë naty kyeˈeky ets kupeˈeny parë dyajnigëxeˈeky ko oˈktëy jyaty, perë Jyobaa yajtëgatsaambyë naty ja yˈayoˈon jyotmay ets mëjë naty yajnaxäˈänyëty. Ets jatëgok tëyë yoˈoy nyaxët ets kujkë kyëbäjk. Pääty tmënuˈkxtakyë Jyobaa ets yˈijty seguurë ko myëdooˈitaampy wiˈix tˈanëëmë. Ets ëtsäjtëm, ¿nyaˈijxëmë duˈumbë mëbëjkënë mä Jyobaa?
5 Ko David ojts ttijˈyë Jyobaa, “Ja diˈib yajkujkëbëtsë ngëbäjk”, yëˈë naty yˈëxkajpy ko jam tsyoonyë nyaybyudëkë. Mä Biiblyë La Palabra de Dios para Todos (2008) duˈun tkäjpxnaxyë tyäˈädë bersikulo: “Mijts, Wintsën, mijts nˈeskuudëˈäjtypy. Mijts mëjjëts xyajnaxy ets xymyëjämoobyëts”. Tuˈugë diksionaaryë duˈun tkäjpxtudaˈaky “Ja diˈib yajkujkëbëtsë ngëbäjk”: “Ko Dios dyajkujkë [...] ngëbäjkˈäjtëm, ta xyajnayjäˈäwëm jotkujk ets seguurë”. David ojts jyantsy myay jyantsy tyajy, pes të naty yajpëjkë yˈanaˈamdakn. Per kom yëˈë Jyobaa diˈib yajkujkë ja kyëbäjk, ta tmëdäjtyë jotmëkˈäjtën, kyëktëjkë ja myëbëjkën ets nyayjäˈäwë mas seguurë.
“Yëˈëjëts xyˈatsowäämp”
6. ¿Tiko David jyënaˈany ko Jyobaa yˈatsoojëmbitäˈänyëty mä ja wäˈätspë kyopk?
6 David amumduˈukjot tmëbejkyë Jyobaa ets yëˈë diˈib seguurë yajnayjäˈäwë, pääty jyënany: “Mëdëtsë nˈää nˈyoˈkn nmëgäjpxäˈänyëtsë Jyobaa këˈëm, ets yëˈëts xyˈatsowäämp mä wäˈätspë kyopk” (Sal. 3:4). Ja kääxë kajpxyˈatypyë, diˈib yˈandijpy ko jamë Dios yajpääty, jamë naty yˈity mä ja Sión kopk, duˈun extëmë natyë David të tniˈanaˈamë (käjpxë 2 Samuel 15:23-25). Päätyë David jyënany ko Jyobaa yˈatsoojëmbitäˈänyëty mä ja wäˈätspë kyopk.
7. ¿Tiko David kyaj tsyëˈkë?
7 David nyijäˈäbë naty ko kyaj nanëgoobë nyuˈkxtäˈägäˈäny, pääty kyaj tsyëˈkë, extëm jyënany mä yˈëy: “Ets ëjts, nëjkxëbëts nnaygyoˈogyëty parëts nmäˈäjäˈäny; ets seguurëts njotwijäˈäny, yëˈko Jyobaa yëˈëjëts xëmë xypyudëjkëp” (Sal 3:5). David kyaj tsyëˈkë myanaxët koots, mä meerë kyujotmayëty ets ajotkumonë yajtukjäˈtët. Seguurë yˈijty ko kyuxëënyëyaˈany, pes të naty kanäkˈok tˈixy wiˈixë Jyobaa pyudëkëty diˈib myëbejkypy amumduˈukjot. Ëtsäjtëm nan mbäät nˈijtëm seguurë pën xëmë nbanëjkxëmë “Jyobaa nyëˈë tyuˈu” ets pën ninäˈä ngamastutëm (käjpxë 2 Samuel 22:21, 22).
8. ¿Wiˈixë David dyaˈijxë ko jyantsy myëbëjkë Dios mä Salmo 27:1-4?
8 Mä jatuˈugë Salmo diˈibë David jyaay, dyaˈijxë ko seguurë nyayjawëty ets ko myëbejkypyë Jyobaa amumduˈukjot: “Jyobaa yëˈëjëtsë ndëˈkx njäjën etsëtsë nnitsokën. ¿Pënëts ntsëˈëgëp? [...] Jyobaa yëˈë tuˈugë potsyë täˈtspekypyë mätsë njukyˈäjtën. ¿Pënëts ntsëˈëgëp? [...] Oy [nyaynyikojtäˈäyëdët] nbëˈääyëts, kyajtsë ngorasoon tsyëˈëgëyaˈany. [...] Tuˈuk jeˈeyë diˈibëtsë Jyobaa të nˈamdoy... yëˈëjëts diˈib nˈëxtäˈäyaampy, nˈitëdëts mä Jyobaa tyëjk nuˈunëtsë nxëë njukyˈäjtën, parëts nˈixëdë Jyobaa yˈoyjyaˈayˈäjtën ets parëts nmëjjawëdë tyemplë” (Sal. 27:1-4). ¿Wiˈix nyajnigëxëˈkëm ko nanduˈun nayjäˈäwëm extëmë David? Ko nëjkxëm xëmë mä naymyujkën ets kyaj nasˈijxëm parë xyajtuˈudujkëm diˈib kyaj tyimjëjpˈamëty (Ebre. 10:23-25).
9, 10. Extëm jyënaˈanyë Salmo 3:6, 7, ¿tiko mbäät njënäˈänëm ko David kyaj ijty ttuunëmbity ko pën wiˈix tyunyëty?
9 Oyë natyë David të nyibëdeˈegyëty ja yˈuˈunk ets të myastuˈutyëty may ja jyaˈay, yëˈë jyënany: “Kyajts ntsëˈëgët mäjk milë jäˈäy diˈibë të nyaywyäˈptäˈäyëdë ets të xyajnaduktëts. ¡Pëdëˈëk, oyë, mijts Jyobaa! ¡Yajtsokëts, Dios miyë! Mët ko niˈamuktsë nmëtsip xykyoxäˈäny mä yˈabäjk. Yëˈë axëkjäˈäyëtyë tyëts nëjkxëp xytyëjwäˈkxtäˈäy” (Sal. 3:6, 7).
10 David kyaj ttuunëmbijty ko pën wiˈix tyunyëty, kyaj naty yëˈë tkoxäˈäny “mä yˈabäjk” ja myëtsipëty, yëˈë duˈunë Jyobaa diˈibë naty duˈun tyunëp. Yëˈë të naty tnijääytyuˈuty ja Ley ets nyijäˈäp ko Jyobaa jyënaˈany: “Ëjts xypyatp nduunëmbitët ets ndukëbatëdëts” (Deu. 17:14, 15, 18; 32:35). Nan nyijäˈäbë naty ko Jyobaa kyëˈëjoty wyeˈemy pën tyëjwäˈkxaampy ja “axëkjäˈäyëtyë tyëts”. O diˈib yˈandijpy ko mbäät tpëjkë myëjää parë kyaj ti tnekytyunët. Jyobaa nyijäˈäp pënaty axëkjäˈäy mët ko “yëˈë yˈijxypyë korasoon” (1 Sam. 16:7). Njantsy kyukäjpxëm ko Jyobaa xyajnayjäˈäwëm seguurë ets xymyëjämoˈoyëm parë nnayaˈijtëm mëk ets nwinguwäˈkëmë Satanás diˈib mas axëkjäˈäy, diˈib tim tsojk yajtsumäämp ets yˈitanë extëmë kää diˈib muup jeˈeyë ko të yajtëtsjuˈtäˈäy ets tˈawijxnët ja kutëgoˈoyën (1 Peed. 5:8, 9; Diˈibʉ Jat. 20:1, 2, 7-10).
“Jyobaa yëˈë yajkypyë nitsokën”
11. ¿Tiko mbäät ninuˈkxtakëmë nmëguˈukˈäjtëm?
11 David nyijäˈäbë naty ko Jyobaa yëˈëyë diˈibë mbäät yaˈˈawäˈätspëtsemyëty mä meerë dyajtëgoyˈaty. Per nan ojts tmëmay tmëdäjy ja Diosë kyäjpn, pääty duˈun dyajjëjpkejxy ja yˈëy: “Jyobaa yëˈë yajkypyë nitsokën. Yëˈë mgunuˈkxën jam yˈity mä mgäjpn” (Sal. 3:8). Oyë natyë David dyajnaxy mëjwiin kajaa amay jotmay ojts tninuˈkxtäägë ja käjpn parë yajkunuˈkxët. ¿Këdii oyxyëp ko nanduˈun ninuˈkxtakëmë nmëguˈukˈäjtëm? Xëmë mbäät ninuˈkxtakëm parë Jyobaa ttuknigaxëdë myëjää ets tmëdattëdë jotmëkˈäjtën parë tkäjpxwäˈkxtët ja oybyë ayuk ets nyayjawëdët seguurë (Éfe. 6:17-20).
12, 13. ¿Wiˈix jyajtyë Absalón, ets wiˈixë David nyayjäˈäwë?
12 Absalón, oˈktëy kyugëjxë jyukyˈäjtën, ets mbäät duˈun jyattë pënaty yˈaxëktuundëbë myëguˈuktëjk, ets mas pën yëˈë diˈibë Dios të wyinˈixëdë duˈun extëm ja David (käjpxë Proverbios 3:31-35). Ko ja Absalón mëdë tsyiptuumbë kyaj myadaktë, ta kyeky mulëkëjxy. Per kom jantsy kuwääy yeny, ta ojts jyaanwëˈëmë mä tuˈugë mëj kepyë yˈaay xyeˈentsy axtë koonëmë Joab tyukjëduujë mä kyorasoon tëgëëgë lansë diˈib naa mutskaty, ta yˈoˈky (2 Sam. 18:6-17).
13 ¿Ojtsë David ttukxondaˈaky ko tnijäˈäjë të ja yˈuˈunk yˈooky? Kyaj. Niˈigyë tyëjkë jëëy yaxpë, wyäˈknäjxy wyäˈktëjkë ets jyënany: “¡Absalon, uˈunk jaˈa, uˈunk jaˈa! ¡Nek oyxyëbëts ëjts të nˈooky ets kyajxyëp myijtsëty Absalon, uˈunk jaˈa, uˈunk jaˈa!” (2 Sam. 18:24-33). Yëˈëyë Joab ja yˈää yˈayuk ojts jyotkujkmoˈoyëty. Oˈktëy kyugëjxë Absalón, per këˈëm tˈëxtääy mët ko jyantsy atsejky, pääty axtë tsyiptuuny mët ja rey diˈibë naty kyaj jeˈeyë tteetyëty, yëˈë naty diˈibë Jyobaa të wyinˈixyëty (2 Sam. 19:1-8; Pro. 12:21; 24:21, 22).
David tnigajpxy jatëgok ko amumduˈukjot tmëbejkyë Dios
14. ¿Wiˈix yajnimaytyaˈagyë Salmo 4?
14 Mä Salmo 4, jap nanduˈunë David amumduˈukjot nyuˈkxtaky ets dyaˈijxë nuˈunën tmëbekyë Jyobaa (Sal. 3:4; 4:3). Ko nyajxtääy ja jotmay diˈib myëdäjt mëdë Absalón, waˈanë David ja ojts tmaˈkxyë tyäˈädë ëy parë tˈanmääyë Dios ko jotkujk nyayjawëty ets ko myëjjäˈäp ko naty të yaˈˈawäˈätspëtsemyëty. O waˈan ojts tmaˈkxy parë dyajtundët ja lebitë diˈib ëëdëp. Per oywyiˈixˈatët, ko nwinmäˈäyëmë tyäˈädë Salmo yëˈë yajkëktëkëbë mëbëjkën mä Jyobaa.
15. ¿Tiko mbäädë Jyobaa amumduˈukjot nmënuˈkxtakëm mët yëˈëgyëjxmë Jesus?
15 David ta jatëgok dyaˈijxë ko amumduˈukjot tmëbekyë Jyobaa ets seguurë yˈijty ko yaˈˈatsoojëmbitäämp. Yëˈë jyënany: “Kojëts ngäjpxët, atsoogëts, nDiosëts diˈib myëdäjtypyë tëyˈäjtën. Mätsë ngëjx ndujkën mmoogyëts kajaa mlugäär. Niˈˈijxkëdakëts ets mmëdowëtsë nnuˈkxtakën” (Sal. 4:1). Pën jukyˈäjtëm extëmë Jyobaa tyëyˈäjtën jyënaˈany, ta nëjkx nmëdäjtëmë duˈumbë mëbëjkën extëmë David. Pes nnijäˈäjëm ko Dios “myëdäjtypyë tëyˈäjtën” ets ko kyunuˈkxypy pënaty tëyˈäjtën mëët jukyˈäjtp. Ko nmëbëjkëm ko Jesus të xyjuˈuybyëtsëˈëmëm, ta mbäät nmëgäjpxëmë Jyobaa mët yëˈëgyëjxmë yˈUˈunk ets nˈijtëm seguurë ko myëdooˈitaampy (Fwank 3:16, 36). ¡Jantsy jotkujkë tyäˈädë xyajnayjäˈäwëm!
16. ¿Ti mbäädë David ojts yaˈëxtëkëwaˈagyëty?
16 Näˈäty mbäät tijaty xyaˈëxtëkëwäˈkëm ets kyaj amumduˈukjot nekymyëbëjkëmë Jyobaa. Waˈan duˈun tuk tiempë David jyajty, pääty yˈëëy: “Yetyëjkëtyë yˈuˈunk, ¿axtë näˈänëm yˈitäˈänyëtsë nmëjˈäjtën nixiˈiky tukxiˈiky, myentrës miitsëty niˈigyë xytsyoktë diˈib kyaj ti ttsoojëty, myentrës niˈigyë xyˈëxtäˈäytyë ets xypyäädäˈändë tuˈugë anëë?” (Sal. 4:2). Ko jyënaˈany “yetyëjkëtyë yˈuˈunk”, yëˈë yˈandijpyë naxwinyëdë jäˈäy. Per ko duˈunë David jyënany, waˈan ojts tmäˈätmëgajpxy ja myëtsipëty, diˈibë naty niˈigyë ttsoktë diˈib kyaj ti ttsoojëty. Yëˈë Biiblyë Nueva Versión Internacional duˈun tkäjpxnaxyë tyäˈädë bersikulo: “¿Axtë nuˈunën xytsyokäˈändë awinax diˈib kyaj ti ttsoojëty ets xypyanëjkxäˈändë diˈib nëgoobë?”. Yˈijxpajtënë David yëˈë xytyukniˈˈijxëm ko mbäät näˈäty xyaˈëxtëkëwäˈkëm ti tyuundëbë wiink jäˈäy, per nˈokmënuˈkxtakëmë Dios ets nˈokmëbëjkëm amumduˈukjot.
17. Nimaytyäˈäk wiˈix mbäät tuk peky nbaduˈunëmë Salmo 4:3.
17 David, ta jatëgok dyaˈijxë nuˈunën tmëbekyë Jyobaa, ko jyënany: “Pääty, nijawëdë ko Jyobaa yˈëxkapaampy diˈib kyaj myastuˈutyëty; Jyobaa yëˈë këˈëm myëdowaampy kojëts nmëgäjpxët” (Sal. 4:3). Parë kyaj nmastutëmë Jyobaa, tsojkëp nmëdäjtëmë jotmëkˈäjtën ets nyaˈijtëm mëk ja mëbëjkën. Jëjpˈam nyaˈijxëmë duˈumbë jäˈäyˈäjtën ko tuˈugë nfamilyëˈäjtëm yaˈëxkaxët mä Diosë kyäjpn mët ko kyaj jyodëmbity. Jyobaa kyunuˈkxypy pënaty kyaj myastuˈudëdë ets pënaty wintsëˈkëdëbë yˈanaˈamën. Ets ko nbuwäˈkëmë Jyobaa ets nmëbëjkëm amumduˈukjot, ta jotkujk yajpäädëdë kyäjpn (Sal. 84:11, 12).
18. Extëm jyënaˈanyë Salmo 4:4, ¿ti mbäät nduˈunëm ko pën axëëk xyajnayjäˈäwëm?
18 Per ¿ti mbäät nduˈunëm ko pën axëëk xyajnayjäˈäwëm mëdë yˈää yˈayuk o ko wiˈix xytyuˈunëm? Kyaj nyajtëgoˈoyëm ja jotkujkˈäjtën pën nbaduˈunëmë kyäjpxwijënë David: “Jotˈambëktë, per kyaj mbokytyundët, jënäˈändë wiˈix mdimjënäˈänäˈändë mä mgorasoon, mä mwëëty mabajn, ets amondë” (Sal. 4:4). Pën të pën axëëk xyajnayjäˈäwëm, kyaj yˈoyëty nduˈunëmbijtëm parë kyaj nnayajpokykyäˈäjëm (Rom. 12:17-19). Mbäät nyajpëtsëˈëmëm ayuˈutsyë wiˈix nayjäˈäwëm mä wëëty mabajn. Ets ko ndukmëtmaytyakëmë Jyobaa, mbäät xypyudëjkëm parë kyaj nekyˈijxëm ja jotmay extëmë naty nˈijxëm ets nbokymyaˈkxëm ja nmëguˈukˈäjtëm mët ko ntsojkëm (1 Peed. 4:8). Pablo nan yäjkë tyäˈädë käjpxwijën diˈib waˈan dyajtsoˈony mä Salmo 4:4: “Pën myajjotˈambëjkëdëp, exkëm mët yëˈë mbekykyäˈä. Katë xënaxy mˈakëdë. Katë xylyugäärmoˈoy yëˈë Mëjkuˈugopk” (Éfe. 4:26, 27).
19. ¿Wiˈix mbäät nbaduˈunëm Salmo 4:5 ko nduˈunëm tijatyë Dios jyaˈäjtypy?
19 David, ta jatëgok tnigajpxy ko jëjpˈam nmëbëjkëmë Dios, ko jyënany: “Yaktë ja mwintsëˈkën mët ja tëyˈäjtën, ets mmëbëktë Jyobaa” (Sal. 4:5). Ja wintsëˈkën diˈib ijty yäjktëp ja israelitë net tsyobääty ko dyaktë wäˈäts ää wäˈäts jot (Isa. 1:11-17). Nanduˈun tyam, netë Dios tˈaxäjëyaˈany tijaty ndukmëduˈunëm pën nyäjkëm wäˈäts ää wäˈäts jot ets pën nmëbëjkëm amumduˈukjot (käjpxë Proverbios 3:5, 6 etsë Ebreeʉsʉty 13:15, 16).
20. ¿Ti yˈandijpy ko jyënaˈany: “Tuknitëˈkxtëgëtsë mdëˈkx mjäjën diˈib mä mwiin mjëjp”?
20 David yˈakjënany: “Ta may diˈib jënandëp: ¿Pën xytyukˈijxëm diˈib oy? Jyobaa, tuknitëˈkxtëgëtsë mdëˈkx mjäjën diˈib mä mwiin mjëjp” (Sal. 4:6). Ko jyënaˈany “mdëˈkx mjäjën diˈib mä mwiin mjëjp”, yëˈë yˈandijpy ko xykyupëjkëm (Sal. 89:15). Pääty ko David tˈanmääyë Dios: “Tuknitëˈkxtëgëtsë mdëˈkx mjäjën diˈib mä mwiin mjëjp”, duˈunxyëp extëm tˈanëëmë: “Kupëjktëgëts”. Ko nmëbëjkëmë Jyobaa, ta xykyupëjkëm ets jantsy jotkujk nayjäˈäwëm ko nmëduˈunëm.
21. ¿Ti nëjkx seguurë nmëdäjtëm ko nduˈunëmë Diosë tyuunk amumduˈukjot?
21 David seguurë yˈijty ko Jyobaa mas niˈigyë yajjotkujkˈatäˈänyëty ets kyaj dyuˈunëty ja kamduump ujtstuumbë ko dyajmuktë ja pyëjtaˈaky. Pääty tkuyˈëëyë Jyobaa: “Nëjkxëbëts xymyoˈoy mätsë ngorasoon tuˈugë xondakën diˈib mas mëjwiin kajaa ets kyaj dyuˈunëty mä të yˈity wyindëy mëjwiin kajaa jyeˈxy peky etsë byinë jembyë” (Sal. 4:7). Ëtsäjtëm nan mbäät seguurë nˈijtëm ko Jyobaa xyajjotkujkˈatäˈänëm, pën nduˈunëmë tyuunk mët winë jot mëjää (Luk. 10:2). Tyam, mëjwiin kajaa njantsy tyukxondakëm ko niˈigyë jyantsy nyimayë pënaty pyudëjkëp ja “mëjpë [...] nasionk” diˈib nëjkxandëp tsäjpotm (Isa. 9:3). Pääty nˈoknayajtëˈëjëm: “¿Nmëdäjtypyëts mëjwiin kajaa xondakën kojëts ndunyë tyäˈädë tuunk?”.
Nˈokmëbëjkëmë Jyobaa amumduˈukjot
22. Duˈun extëm jyënaˈanyë Salmo 4:8, ¿wiˈix yˈijttë ja israelitë ko tmëmëdoodë Diosë Lyey?
22 David duˈun dyajkugëjxë yˈëy: “Jotkujkëts nëjkx naygyoˈogyëty ets nanduˈunëts nmäˈäjët, jaˈko mijts, duˈun, mijts jeˈeyë, Jyobaa, xyajjukyˈäjtpëts seguurë” (Sal. 4:8). Ko ja israelitë tmëmëdoodë Diosë Lyey, ta tuˈugyë yˈijttë mëdë Jyobaa ets nyayjäˈäwëdë seguurë. Extëm nˈokpëjtakëm, “Judá etsë Israel agujk jotkujk tsyënääytyë” ko ojts yˈaneˈemyë Salomón (1 Rey. 4:25). Axtë ko axëëk tyuunëdë wiinkpë nasionk, ja israelitë diˈib myëbëjktë Dios jotkujk yˈijttë. Ets duˈun extëmë David, ëtsäjtëm nan mbäät nmäˈä nboˈkxëm agujk jotkujk, pesë Dios yëˈë diˈib xyajjotkujkˈäjtëm.
23. ¿Ti nëjkx nbatëm ko nmëbëjkëmë Jyobaa amumduˈukjot?
23 Pääty, nˈokˈijtëm seguurë ko Jyobaa xypyudëkëyäˈänëm. Ets ko nmëgäjpxëm amumduˈukjot, ta nëjkx nbatëmë jotkujkˈäjtën “diˈibë waanë niˈigyë myëjëty këdiinëm diˈibë jäˈäy mbäät tjaygyukë” (Fili. 4:6, 7). ¡Jantsy jotkujkë tyäˈädë xyajnayjäˈäwëm! Duˈunë duˈun, mbäät nwinguwäˈkëm tijaty miin këdakp, pes nmëbëjkëmë Jyobaa amumduˈukjot.
¿Wiˈix nˈokˈatsoˈojëmbijtëm?
• ¿Ti jotmayë David pyat mët yëˈëgyëjxmë pyokyë Absalón?
• ¿Wiˈix xyajnayjäˈäwëm seguurë ets xyjotkujkmoˈoyëmë Salmo 3?
• ¿Wiˈix dyajkëktëkë mëbëjkënë Salmo 4?
• ¿Ti kunuˈkxën nˈaxäjëm ko nyaˈijxëmë mëbëjkënë amumduˈukjot mä Jyobaa?
[Yajtëˈëwën]
[Letrë diˈib miimp mä dibujë mä pajina 32]
¿Nmëbëjkëmë Jyobaa amumduˈukjot?
