Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. ¿Ti nˈawijx njëjpˈijxëm mä oˈkpë?

Ko Jesus jyajty Betania, tuˈugë käjpn diˈib yajpatp Jerusalén bëˈääy, të nety tyaxk xëëjëp yˈoˈknë ja myëtnaymyaayëbë Lázaro. Ta ojts nyijkxy mëdë Marta etsë María, ja Lázaro myëgaˈaxëty, mä nety të nyaxtëkë. Ko waanë yˈijty, ta jyantsy myiindë may jyaˈay. ¿Mbawinmaapy nuˈun jyantsy xyondaktë Marta mëdë María ko tˈijxtë Jesus dyajjukypyeky ja Lázaro? (Käjpxë Fwank 11:20-24, 38-44.)

Marta myëbejkypyë nety ko oˈkpë jukypyëkäämp. Axtë Dios mëduumbë diˈib tëëyëp jukyˈäjttë nyijäˈäjëdëbë nety ko mä tiempë myiny kyëdaˈaky, Dios yajjukypyëkaambyë oˈkpë yä Naxwiiny. (Käjpxë Job 14:14, 15.)

2. ¿Wiˈix yajpäättë oˈkpë?

Naxwinyëdë jäˈäy etsë jëyujk myëdäjttëp tuˈugë mëjää diˈib yajjukyˈäjtëdëp, per kyaj yëˈëjëty tuˈugë anmë diˈib jodoty nmëdäjtëm ets jyukyˈäjtˈadëˈëtsy ko nˈoˈkëm (Eclesiastés 3:19; Génesis 7:21, 22). Jäˈäy naxway të kyojy (Génesis 2:7; 3:19). Ko kyatunyë kukoˈoxy, ta tyëgooytyaˈay ja jot winmäˈäny. Pääty ko Lázaro jyukypyejky, kyaj tmaytyaky mä wiˈixë nety të nyayjawëty, pesë oˈkpë kyaj ti tjawëdë. (Käjpxë Salmo 146:4; Eclesiastés 9:5, 10.)

Extëm të nˈijxëm, oˈkpë kyaj yˈayowdë. Pääty kyaj tyëyˈäjtënëty ko axëkjäˈäy nyëjkxtë ayoobë. Tyäˈädë tukniˈˈijxënë axëëgë Dios dyajweˈemy, pes yëˈë ninuˈun tkayajnaxy wyinmäˈänyoty etsë jäˈäy nyitoyët. (Käjpxë Jeremías 7:31.)

 3. ¿Mbäät nmaytyakëm mëdë oˈkpë?

Oˈkpë kyaj kyäjpxtë (Salmo 115:17). Perë kaˈoybyëtëjk mbäädë jäˈäy tmëgäjpxtë ets nyayajnaxëdët extëm ja jäˈäy diˈib të yˈooky (2 Peedrʉ 2:4). Päätyë Jyobaa yajkubojkypy ko tuˈugë jäˈäy tmëtmaytyäˈägäˈänyë oˈkpë. (Käjpxë Deuteronomio 18:10, 11.)

4. ¿Pënaty jukypyëkandëp?

Mä ja jembyë jukyˈäjtën, miyonkˈamë jäˈäy jyukypyëkäˈändë diˈib të yˈooktë, axtë pënaty tyuundë axëkˈäjtën mët ko kyaj tnijäˈäjëdë Diosë yˈanaˈamën. (Käjpxë Lukʉs 23:43; Apostʉlʉty 24:15.)

Pënaty jukypyëkandëp nëjkxëp tnijawëyäˈändë ja tëyˈäjtën mä pënën Dios, ets pën mëdoodëp, ta dyaˈixëdët ko myëbëjktëbë Jesus (Diˈibʉ Jatanʉp [Apocalipsis] 20:11-13). Ets pënaty tyuundëp ja oyˈäjtën, ta jyukyˈatäˈändë winë xëë yä Naxwiiny. Per pënaty tyuunˈadëˈëtsandëbë axëkˈäjtën kyaj nëjkx jyukyˈattë winë xëë, ets extëmë Jesus jyënany, nëjkxëp jyukypyëktë parë “yajpayoˈoytyët”. (Käjpxë Juan 5:28, 29, Traducción del Nuevo Mundo.)

5. ¿Ti xytyukniˈˈijxëm mä wiˈix jyaˈayˈatyë Dios ko dyajjukypyëkäˈänyë oˈkpë?

Mbäädë oˈkpë jyukypyeky mët ko Dios tkejxy ja yˈUˈunk parë ojts xykyuˈoˈkëm. Jyobaa yëˈë yaˈijxë ko xytsyojkëm ets ko jantsy oyjyaˈay. (Käjpxë Fwank 3:16; Romanʉs 6:23.)

Pën mˈaknijawëyaampy, ixë kapitulo 6 etsë 7 mä tyäˈädë liibrë, diˈib yajpëtsëëmdëbë Jyobaa tyestiigëty.

[Letrë diˈib miimp mä dibujë mä pajina 22]

Adán naxway ojts kyojy