¿Nmëmëdowäˈänëmë Jyobaa extëm xyˈanmäˈäyëm?
“Tyäˈädë yëˈë duˈun ja tuˈu. Yëˈë panëjkxtë.” (ISA. 30:21)
1, 2. ¿Ti Satanás mëktaˈaky tyunaampy, ets ti naybyudëkë nbatëm mä Diosë yˈAyuk?
Nˈ OKPAWINMÄˈÄYËM ko nëjkxëm mä karreteerë, ta nˈijxëm tuˈugë letreerë diˈib mbäät xyajjäjtëm wiinktsoo. Ko nbanëjkxëm mbäät jeˈeyë ja tiempë nyajtëgoˈoyëm ets axtë nyajpatëm jotmay jëjpˈam. Per yˈoyëty ko të tuˈugë mëtnaymyaayëbë xyˈanmäˈäyëm ets kyaj nbanëjkxëm, mët ko tadë letreerë yëˈë jäˈäy të dyajtëgatsy parë tˈaxëktunäˈänyë tsyofeer. Ta netyë njamyajtsëm extëm të xyˈanmäˈäyëm.
2 ¿Pën duˈun adëtsp extëm ja diˈib yajtëgäjtsypy ja letreerë? Yëˈë Satanás, diˈib mëktaˈaky xyajtuˈudëgoyäˈänëm (Diˈibʉ Jat. 12:9). Xytyukjëjpwooduˈudäˈänëm ja tuˈu diˈib yajnëjkxp mä jukyˈäjtënë winë xëëbë ets pääty tpëjtaˈaky nëˈääy tuˈääyë letreerë diˈib mbäät xywyinˈëˈënëm, extëm të nnijäˈäjëm tëgëk peky mä ja tuˈukpë artikulo (Mat. 7:13, 14). Jyobaa, diˈib oy mëët nnaymyaˈayëm, xytyukˈawäˈänëm wiˈix mbäät nnaygyuentˈäjtëm. Perë Mëjkuˈu kanäk peky tijaty yajtuumpy parë xyajkäˈäjäˈänëm. Min nˈakˈijxëm ja tëgëk peky. Ko Biiblyë xyˈanmäˈäyëm wiˈix mbäät nnaygyuentˈäjtëm, duˈunxyëp extëmë Jyobaa xypyamiˈinëm ets xyˈanmäˈäyëm: “Tyäˈädë yëˈë duˈun ja tuˈu. Yëˈë panëjkxtë” (Isa. 30:21). Oy ko yajxon nbawinmäˈäyëm tijaty xytyukˈawäˈänëm, net ja winmäˈäny nbëjtakëm parë nmëmëdoˈojëm.
Yaˈëxpëjkpë diˈib andaktëp
3, 4. 1) ¿Tiko njënäˈänëm ko yaˈëxpëjkpë diˈib andakp duˈun extëmë nëgoondakn diˈib të tyëtsnë? 2) ¿Mä tsyoondë yaˈëxpëjkpë diˈib andaktëp, ets ti diˈib tyukniwinmäˈäyëdëp?
3 Nˈokpëjtakëm jatëgok ko tam nduˈuyoˈoyëm. Ets yëˈë nduknäjxëm tuˈugë lugäärë äänëˈëk tëtsëˈëkpë, ta nˈijxpatëm jagam tuˈugë nëgoondakn, ta ninëjkxëm parë tëëtsë nyajnaxäˈänëm. Per ko jam njäjtëm, ta nˈijxëm ko të tyësnë. ¡Jantsy axëëk nayjäˈäwëm! Nan tim duˈun jyaty mëdë yaˈëxpëjkpë diˈib andaktëp: pënaty ninëjkxëdëp parë tjapäädäˈändë tëyˈäjtën nitii tkapäättë. Päätyë Jyobaa xytyukˈawäˈänëm mët yëˈëgyëjxmë Pedro etsë Pablo parë nnaygyuentˈäjtëm (käjpxë Apostʉlʉty 20:29, 30 etsë 2 Pedro 2:1-3, Traducción del Nuevo Mundo, [NM]). Min nˈokˈijxëm wiˈix tkujäˈäyëdë, duˈuntsoo nijäˈäjëm pënë tyäˈädë yaˈëxpëjkpë diˈib andaktëp, mä tsyoondë ets wiˈix tijaty ttundë.
4 Pablo duˈun tˈanmääy ja mëjjäˈäytyëjk diˈib Éfeso: “Mä miitsëty këˈëm pyëdëˈëgäˈändë yetyëjkëty ets tkäjpxäˈändë ää ayuk diˈib mäˈät” o diˈib kyaj tyëyˈäjtënëty. Etsë Pedro nanduˈun tnijäˈäyë ja myëguˈuktëjk: “Jaˈˈatäämbë yaˈëxpëjkpë diˈib andakp mä miitsëty”. ¿Nbëjkëmë kuentë mä tsyoondë? Nimaybyë jap pyëtsëmdë mä naymyujkën. Ets yajxëëmoˈoytyë apostata. * ¿Ti tyukniwinmäˈäyëdëp? Kyaj kyonformarattë ko jeˈeyë ttukpëtsëëmduˈuttë Diosë kyäjpn diˈib tuk tiempë tyukˈijtëdë. Pablo jyënaˈany: “Wyoˈonbëtsëmandëp ja ëxpëjkpëtëjk ets pyanëjkxëdët”. Yëˈë apostatas kyaj tjäˈäyˈatäˈäny diˈib kyaj tnijawëdë tëyˈäjtën, yëˈë duˈun diˈib yajpattëp mä naymyujkën. Duˈun extëmë “waxkäˈuk awäˈän”, tsyuˈtstëgoyaambyë Dios mëduumbë parë dyajtëgoyët ja myëbëjkën ets pyëtsëmët mä ja tuˈu diˈib tëyˈäjtën (Mat. 7:15; 2 Tim. 2:18).
5. ¿Wiˈix tyundë yaˈëxpëjkpë diˈib andaktëp?
5 ¿Wiˈix tyundë yaˈëxpëjkpë diˈib andaktëp? Yajxon tniwinmäˈänyˈattë wiˈix tijaty ttundë. Biiblyë tnigajpxy ko tmëdëkëyäˈändë wyinmäˈäny diˈib yajmäˈtp “ayuˈutsy ameˈtsyë”. Duˈun extëmë jäˈäy ayuˈutsy ameˈtsyë ttundë negosyë diˈibë ley yajkubojkypy, nanduˈunë apostatas ayuˈutsyë wyinmäˈäny tmëdëkëdë. Ets duˈun extëmë jäˈäy xytyukˈaxäjëyäˈänëmë meeny diˈib agojwinaxy, nanduˈunë yaˈëxpëjkpë diˈib andakp, xytyukmëbëkäˈänëmë yˈää yˈayuk diˈib “kyaj tyëyˈäjtënëty”. Yajtëjkëdëbë ëxpëjkën diˈib “winˈëˈëmp” ets “wyijtsmäˈttëp [ja] Diosë jyaaybyajtën” parë tyuˈugyët mët ja wyinmäˈäny (2 Ped. 2:1, 3, 13; 3:16, NM). Yajxon nˈijxëm ko kyaj ttundë diˈib mbäät ndukˈoyˈäjtëm. Ko nbanëjkxëm, jeˈeyë nëjkx xyajtuˈudëgoˈoyëm ets kyaj nbatëm ja jukyˈäjtën diˈib winë xëë.
6. ¿Ti Biiblyë xytyukˈanaˈamëm mä yaˈëxpëjkpë diˈib andaktëp?
6 ¿Wiˈix mbäät nnaygyuentˈäjtëm? Ko nbanëjkxëmë Jyobaa kyäjpxwijën (käjpxë Romanʉs 16:17 etsë 2 Fwank 9-11). Biiblyë xyˈanmäˈäyëm: “Mmastuˈuttë” apostata. Tyäˈädë yëˈë yˈandijpy ets jagam nyajpatëm. Extëm nˈokpëjtakëm, ¿ti nduˈunëm ko tuˈugë doktoor xyˈanmäˈäyëm ets kyaj nmëwingoˈonëm tuˈugë jäˈäy diˈib ninäjxpë pyäˈäm ets yaˈoˈkp? Netyë nmëmëdoˈojëm. Pesë Jyobaa, yëˈë duˈun ja Mëj Doktoor, diˈib xytyukˈanaˈamëm ets ninuˈun mëdë apostatas ngataˈanmujk ngawäˈkmujkëm, mët ko duˈun yajpäättë extëmë jäˈäy “diˈibë jyot kyëbäjk të myaˈaty” ets xytyukpäädäˈänëm ja pyäˈäm o ja tyukniˈˈijxënë diˈib kyaj tyëyˈäjtënëty (1 Tim. 6:3, 4, NM). Extëm nˈijxëm, Dios nidëyë xytyukˈanaˈamëm, pääty tsojkëbë winmäˈäny nbëjtakëm xëmë nmëmëdoˈojëm.
7, 8. 1) ¿Wiˈix mbäät njëjpkudijëmë yaˈëxpëjkpë diˈib andaktëp? 2) ¿Tiko mëk ja winmäˈäny të nbëjtakëm parë njëjpkudijëyäˈänëm?
7 ¿Wiˈix mbäät njëjpkudijëmë yaˈëxpëjkpë diˈib andaktëp? Ko ninäˈä ngakäjpxpoˈkxëm ets ni ngayajtëjkëm tëgoty. Ets nan kyaj nmëdoˈoˈijtëm tijaty myaytyaktëp mä telebisionk, rebistë o mä Internet, ets nan ni jeˈeyë ngakujäˈäyëm wiˈix nwinmäˈäyëm mä tmëdattë pyajina mä Red. ¿Tiko duˈun ja mëk winmäˈäny nyajpëtsëˈëmëm? Tim jawyiin, mët ko ntsojkëmë Jyobaa, yëˈë “Dios diˈib tëyˈäjtën”. Pääty ninuˈun ngadimnijawëyäˈänëm extëm dyajmäˈättë Diosë yˈAyuk diˈib tëyˈäjtën (Sal. 31:5; Fwank 17:17). Ets ja tuk peky, mët ko ntsojkëmë Diosë kyäjpn diˈib tijaty të xytyuknijäˈäjëm, extëmë Diosë xyëë ets extëm nyikejy, tiko Dios ojts dyajkojˈyë Naxwinyëdë, wiˈix yajpäättë oˈkpë ets ko jukypyëkandëp jatëgok. ¿Njamyajtsëm wiˈix ojts nayjäˈäwëm ko timˈogäˈän ojts nyajtukmëtmaytyakëmë tyäˈädë tëyˈäjtën? Pääty, ¿tiko net nmëdoˈoˈijtëm tijaty myaytyaktëbë apostata? Pes jeˈeyë xytyukmëdowäˈänëm wiˈix täˈämë yˈää jyot tjawëdë (Fwank 6:66-69).
8 ¡Oy wiˈix tyimjënäˈändëdë yaˈëxpëjkpë diˈib andaktëp! Kyaj nmëdooˈitäˈänëm. Pes tiko nmëmëdoˈojëm pën duˈun yajpäättë extëmë nëgoondakn diˈib të tyëtstäˈäy, jeˈeyë wyinˈëëndë. Të nbëjtakëm ja winmäˈäny ko ninäˈä ngamastuˈudäˈänëmë Jyobaa mëdë kyäjpn, diˈib xëmë xyajnijk xyajxaˈamëm mëdë nëë diˈib yajpatp mä Biiblyë (Isa. 55:1-3; Mat. 24:45-47).
Nˈokjëjpkudijëmë “jekymyaytyaˈaky”
9, 10. ¿Wiˈixë Pablo tˈanmääyë Timoteo, ets ti jekymyaytyaˈagyëdaa nety wyinmaapy? (Ixë nota.)
9 Ko nëjkxëm mä karreteerë, ta näˈäty nbëjkëmë kuentë ko të pën dyajtëgatsy ja letreerë diˈib wiinktsoo xyajjäˈtäˈänëm. Per näˈäty kyaj nbëjkëmë kuentë ko të tyëgatsy. Nanduˈun tijatyë Satanás yajtuumpy, ta diˈib yajxon këxëˈkp ets ta diˈib kyaj. Tuk peky diˈib kyaj kyëxeˈeky, yëˈë “jekymyaytyaˈaky” (käjpxë 1 Timotee 1:3, 4). Pën nbanëjkxäˈänëm ja tuˈu diˈib mënëjkxp mä jukyˈäjtënë winë xëëbë, tsojkëp yajxon nnijäˈäjëm tidën jekymyaytyaˈakyˈäjtp diˈibë Pablo nyigäjpx ets wiˈix mbäät nnaygyuentˈäjtëm parë kyaj xywyinˈëˈënëm.
10 Tyäˈädë käjpxtëˈëjën jap yajpääty mä ja myëduˈukpë neky diˈibë Pablo tyuknigajxë Timoteo. Mä tˈanmääy ets dyaˈitët wäˈäts ja naymyujkën ets tpudëkët ja myëguˈuktëjk parë xëmë tmëdundëdë Jyobaa (1 Tim. 1:18, 19). Diˈib të yajkäjpxnaxy “jekymyaytyaˈaky”, mä ayuk grieegë yëˈë yˈandijpy diˈib jeˈeyë yajpawinmääytyëëp o diˈib kyaj tyëyˈäjtënëty. Ets nan ja tyuny ko yajmaytyaˈaky “diˈibë jäˈäy këˈëm wyaˈpy ets kyaj tyëyˈäjtënëty” (Diccionario exegético del Nuevo Testamento). Pablo waˈanë nety twinmay ja anëë diˈib yajpatp mä relijyonk diˈib miimp mä jekymyaytyaˈaky o anëë maytyaˈaky. * Per ¿tiko “jeˈeyë dyajtëgoy ja tiempë”? Yëˈko, ko jäˈäy tmëdooˈity, ta nyayajtëwëdë tijaty etsë net nëgoobë tpayoˈoytyë. Tyäˈädë yëˈë tuk peky diˈib Satanás yajtuumpy, tadë Mëj Winˈëˈëmbë. Kanäk nax dyajtunyë anëë etsë jekymyaytyaˈaky diˈib tsoˈomp mä relijyonk parë dyajtëgoy ja diˈib të nyaygyujäˈäytyëgoyëty. Päätyë Pablo yajxon xyˈanmäˈäyëm: ¡Këdii xymyëdoogukëdë tadë jekymyaytyaˈaky!
11. ¿Wiˈixë Satanás twinˈëënyë jäˈäy mëdë relijyonk diˈib kyaj tyëyˈäjtënëty, ets ti käjpxwijën mbäät nmëmëdoˈojëm?
11 ¿Diˈibë jekymyaytyaˈaky mbäät yajtëgoyëty pën të nyaygyumanaxyëty? Ko jyënaˈany “jekymyaytyaˈaky”, yëˈë yˈandijpy tukëˈëyë anëë diˈib tsoˈomp mä relijyonk diˈib kyaj tyëyˈäjtënëty. ¿Wiˈix mbäädë jäˈäy yˈaxëktunyëty? Biiblyë jyënaˈany ko “kyaj tmëdooˈitäˈändët ja tëyˈäjtën” (2 Tim. 4:3, 4). Satanás diˈib nayajnäjxëp “extëm tuˈugë Dios ja yˈanklës”, yëˈë yajtuumbyë relijyonk diˈib kyaj tyëyˈäjtënëty parë twinˈëënyë jäˈäy (2 Kor. 11:14). Mäjatyë tsäjptëjk tyukniˈˈixëdë anëë etsë jekymyaytyaˈaky extëmxyëp tˈëxpëjkënëtyë Kristë, extëm ko jyënäˈändë nmëdäjtëm tuˈugë anmë diˈib kyaj yˈooky, ko tapë ayodakn etsë Trinidad. Nan yajmëjwindëjkëdëbë xëë extëmë Diosˈuˈunk Xëë o Amääy Xyëë, perë tyäˈädë jam tsyoony mä jäˈäy diˈib ijty yˈawdäjttëp mayë dios ets mä jekymyaytyaˈaky. Parë kyaj nyajwinˈëˈënëm, jëjpˈam nmëmëdoˈojëmë Jyobaa ko xyˈanmäˈäyëm: “Tukpëtsëëmduˈuttë es [...] katë mˈadëˈëtstë extëm ja yˈaxëkwinmäˈäny” (2 Kor. 6:14-17).
12, 13. 1) ¿Ti anëë yajwaˈxypyë Satanás tëgëk peky, per diˈibën tëyˈäjtën? 2) ¿Ti mbäät nduˈunëm parë kyaj xywyinˈëˈënëmë Satanás mëdë yˈanëë maytyaˈaky?
12 Mëjkuˈu nan yajtuumbyë wiingatypyë anëë ets pën kyaj nnaygyuentˈäjtëm mbäät xywyinˈëˈënëm. Min nˈokˈijxëm tëgëk peky. Myëduˈuk: Mijts mbäät xytyuny ti mdimtunaampy; këˈëm xywinˈixët ti oy ets ti axëëk. Tyäˈädë xëmë nˈijx nmëdoˈojëm mä telebisionk, pelikula, perioodikë ets mä Internet, ets mbäät tyuny parë kyaj nekymyëmëdoˈojëmë Diosë yˈanaˈamën. Perë naxwinyëdë jäˈäy tsyojkëp ets pën tyuˈumoˈoyëdët, ets yëˈë Jyobaa diˈib mbäät duˈun ttuny (Jer. 10:23). Myëmajtsk: Dios ninäˈä tkayaˈoyëyaˈanyë amay jotmay. Päätyë jäˈäy jyukyˈattë extëm tyimjukyˈatäˈändë mët ko wyinmaytyë ko yëˈëyë tyäˈädë jyukyˈäjtënëˈäjtp. Ko nanduˈun nwinmäˈäyëm, mbäät nëjkx nanëgoobë njukyˈäjtëm ets kyaj nekyyajmëjwiinëmë Diosë tyuunk (2 Peed. 1:8). Per diˈibën tëyˈäjtën, yëˈë ko Jyobaa xyëë wingoonˈadëtsp ets tsojkëp nˈawijx njëjpˈijxëm näˈä jyäˈtäˈäny (Mat. 24:44). Etsë myëdëgëëkpë: Dios kyaj mmëmay mmëdäjˈyëty. Satanás tsyejpy ets nwinmäˈäyëm ko kyaj xynyitëjkëm parë Jyobaa xytsyojkëm, duˈuntsoo xyaˈëxtëkëwäˈägäˈänëm. Per diˈibën tëyˈäjtën, yëˈë ko Jyobaa xytsyojkëm ets mëj xyajnäjxëm niduˈuk niduˈuk (Mat. 10:29-31).
13 Tsojkëp xëmë nnaygyuentˈäjtëm. Pes mbäät nwinmäˈäyëm ko tëyˈäjtën extëmë naxwinyëdë jäˈäy jyënäˈändë o wyinmaytyë. Tyamën tsyekyëty nmëmëdoˈojëmë Biiblyë kyäjpxwijën pën kyaj ntsojkëm ets xywyinˈëˈënëm mëdë “anëë maytyaˈaky diˈibë jäˈäyëty [...] të dyaˈoyëdë” (2 Peed. 1:16).
Kyaj naytyukpawijtsëmë Satanás
14. ¿Ti käjpxwijënë Pablo myooy ja kuˈookytyoxytyëjk diˈib kujk ënäˈk, ets tiko mbäät nmëmëdoˈojëm?
14 Nˈokpëjtakëm jatëgok ko tam nyajpatëm mä karreteerë. Koxyëp nbatëm tuˈugë letreerë mä jyënaˈany: “Yatsoo yajpäättë pënaty pyanëjkxtëbë Satanás”, ninuˈun ngawinmäˈäyëm ets jatsoo nëjkxëm, ¿këdii? Perë Pablo jyënaˈany ko Dios mëduumbë mbäät tmatsyë tadë tuˈu parë Satanás “nyaytyukpawits[ëdët]” (käjpxë 1 Timotee 5:11-15). Ko Pablo duˈun jyënany, yëˈë nety kyäjpxwijpy ja “kuˈeekytyoˈoxy diˈibë kujk ënäˈkpë”, per tyam nan xypyudëjkëmë tyäˈädë käjpxwijën. Waˈanë tyäˈädë Dios mëduumbëty kyaj tyimwinmäätyë pën yëˈë pyanëjkxtëbë Satanás extëm nety ja kyostumbrë tmëdattë. Tuk peky, jyantsy piˈtskäjpxtëbë nety. Min nˈokˈijxëm ti käjpxwijënë mooyëdë Pablo, pes yëˈë xypyudëkëyäˈänëm parë kyaj nbanëjkxëmë Satanás.
15. ¿Ti Mëjkuˈu jyatsojkënyëˈajtypy, ets tijaty yajtuumpy diˈibë Pablo xyˈanmäˈäyëm ets mëët naygyuentˈäjtëm?
15 Mëjkuˈu jyatsojkënyëˈajtypy parëxyëp kyaj nekykyäjpxwäˈkxëm ja oybyë ayuk (Diˈibʉ Jat. 12:17). Pääty xytyuktunäˈänëm diˈib jeˈeyë mëdë xëë tiempë nyajtëgoˈoyëm ets xyajnaywyäˈkxëm. Duˈunën dyajtuuny ja kuˈookytyoxytyëjk mä primer siiglë. Extëm yˈanmääyëdë Pablo yëˈë xytyukˈijxëm ko të netyë Satanás kanäk peky yajtëgoyëdë. Myëduˈuk, jyëdittë winjëën windëjk. “Ta jyëmbijnëdë nuux”. Mä tyäˈädë tiempë nan mbäät ngäˈäjëm mä duˈumbë jotmay. Extëm nˈokpëjtakëm, mbäät nyajtëgoˈoyëmë xëë tiempë ets nanduˈun ja nmëguˈukˈäjtëmë xyëë tiempë ko nmaytyakëm diˈib kyaj tyimjëjpˈamëty o kyaj tyëyˈäjtënëty, mbäät ko mëët nduˈukmujkëm, mä mensajes electrónicos o mä telefënë. Myëmajtsk, tyäˈädë toxytyëjkëty nanduˈunë nety “yˈabiˈtsˈattë”. Ëtsäjtëm nan mbäädë duˈumbë jotmay nbatëm, nimaytyakëm axëëgë nmëguˈukˈäjtëm ets axtë niwäämbajtëm etsë net xyajnaywyäˈkxëm (Pro. 26:20). Ets oy nbëjkëmë kuentë o kyaj, ko niwäämbajtëmë nmëguˈukˈäjtëm yëˈë nety niˈˈijxtutëmë Satanás. * Ets myëdëgëk, ja kuˈookytyoxytyëjk “nëgoo oytyiity tnamaytyäˈäktë diˈibë kyaj pyaatyëty”. Nipën tkamëdatyë madakën ets tˈanëëmëdë myëguˈuk ti mbäät ttuny mä pyaatyëty këˈëm twinˈixët ti tyunaampy. Ko xyajkäˈäjëmë tyäˈädë tëgëk pekypyë, jeˈeyë netyë xëë tiempë nyajtëgoˈoyëm ets nyajtëjkëmë tsip kajpxy, mä jyapäätyëty nduˈunëm diˈibë Jyobaa të xytyuknipëjkëm: ngäjpxwäˈkxëm ja yˈAnaˈamën. Ko xëmë nganekytyuˈunëm, yëˈë nety nbuwäˈkëmë Satanás, pes kyaj mbäät njënäˈänëm ko nipën ngapuwäˈkëm (Mat. 12:30).
16. ¿Tijaty käjpxwijënë mbäät xypyudëjkëm parë kyaj naytyukpawijtsëmë Satanás?
16 ¿Ti mbäät nduˈunëm parë kyaj naytyukpawijtsëmë Satanás? Ko nmëmëdoˈojëm Biiblyë kyäjpxwijën. Min nˈokˈijxëm tijaty käjpxwijënë Pablo yäjk. Duˈunyëm “xytyundët waanë niˈigyë ja Nintsënˈäjtëmë tyuunk” (1 Kor. 15:58). Ko njantsy jotmoˈoyëmë Diosë tyuunk, yëˈë xykyuwäˈänëm parë kyaj nuuxtakëm o nyajtëgoˈoyëm ja xëë tiempë (Mat. 6:33). Tkäjpx tmaytyäˈäktët diˈib “yajmëjwiin yajkajaajëp ja myëbëjkën” (Éfe. 4:29). Oy ko kyaj nmëdoˈoˈijtëmë piˈtskajpxy ets kyaj nyajwäˈkxëm. * Niˈigyë mbäät nduˈunëmë mëjää ets nwintsëˈkëmë nmëguˈukˈäjtëm ets kyaj axëëk nwinmäˈäyëm mä yëˈëjëty. Pën nduˈunëm duˈun, ta xëmë nëjkx jantsy oy nigäjpx nimaytyakëm. Pablo nan ojts tnigajpxy ti mbäät nduˈunëm ko jyënany: “Xywyits xymyaytyët ja mgëˈëmduunk” o mjotmay (1 Tes. 4:11). Oy ko nmëmäˈäy nmëdäjëmë nmëguˈukˈäjtëm, per tsojkëp nwintsëˈkëm wiˈix dyajnëjkxyë jukyˈäjtën ets nmëjˈijxëm. Kyaj mbäät nyajtuˈunëm ja winmäˈäny pën yëˈë patëp ets këˈëm twinmayët ti tyunaampy (Gál. 6:5, NM).
17. 1) ¿Tiko Jyobaa tijaty xytyukˈawäˈänëm? 2) ¿Wiˈix mbäät ja winmäˈäny nbëjtakëm?
17 ¡Jantsy jotkujk nayjäˈäwëm ko Jyobaa yajxon xyˈanmäˈäyëm tijaty mbäät njëjpkudijëm! Mä tyäˈädë artikulo ets mä ja tuˈukpë, të xytyukˈawäˈänëm kanäk peky. Nˈokˈyaˈijtëm xëmë winmäˈänyoty ko pääty xytyukˈawäˈänëm mët ko xyjantsy tsyojkëm ets kyaj ttseky nguˈayoˈojëm ko nbanëjkxëm ja Satanásë lyetreerë diˈib yajpatp nëˈääy tuˈääy. Mbäät tsyiptaˈaky nbanëjkxëmë Jyobaa nyëˈë tyuˈu, per yëˈë diˈib tëyë xyajnëjkxëm mä ja jukyˈäjtënë winë xëëbë (Mat. 7:14). Pääty, nˈokpëjtakëmë winmäˈäny ets nmëmëdoˈojëm ko xyˈanmäˈäyëm: “Tyäˈädë yëˈë duˈun ja tuˈu. Yëˈë panëjkxtë” (Isa. 30:21).
[Notë diˈib noky ëxˈääy]
^ parr. 4 Apostata, yëˈë diˈib atsip aˈˈakë tyukpëtsëëmdutypyë relijyonk diˈib tëyˈäjtën, etsë net axëëk tnimaytyaknë.
^ parr. 10 Extëm tuˈugë liibrë diˈib kyaj Dios tjaˈajëty yëˈë Tobías o (Tobit). Diˈib yajjääy ko nety tyëgoyˈaty naa tëgëk siiglë parë Kristë myinët, ets yaˈixyˈäjt ko Pablo jyukyˈajty. Jap tmaytyaˈaky extëmxyëp jyantsy tyëyˈäjtënëty mä jäˈäy tyun kyäjpxtë mëdë kaˈoybyë, ttundë majia ets mä dyajkäjpxtë tijaty (ixë Perspicacia para comprender las Escrituras, volumen 1, pajina 154 ets 155).
^ parr. 15 Mëjkuˈu, ja yajtijy mä ayuk gryieegë diábolos, diˈib nikajp “niwäämbajtpë”. Nanduˈun yajtijy Satanás, mët ko yëˈë diˈib mas jyajtypy yˈandäˈägët (Fwank 8:44; Diˈibʉ Jat. 12:9, 10).
^ parr. 16 Ixë rekuäädrë “Tutk jëmk yˈabojwäˈkxtäˈäy”.
¿Wiˈix nˈatsoˈojëmbijtëm?
¿Wiˈix mbäät xypyadunyë tyäˈädë käjpxwijënë diˈib yajpatp mä tyäˈädë tekstë?
• 2 Pedro 2:1-3, NM
[Yajtëˈëwën]
[Letrë diˈib miimp mä dibujë mä pajina 19]
Tutk jëmk yˈabojwäˈkxtäˈäy
[Letrë diˈib miimp mä dibujë mä pajina 19]
Ta tuˈugë judiyëtëjkë jyekymyaytyaˈaky, diˈib xytyukˈijxëm wiˈix yˈaxëktuny ko nbiˈtskäjpxëm.
Jagëdën tëgok, tuˈugë jäˈäy ojts tjantsy nyibiˈtskäjpxë ja kuwijy jyaˈay diˈib mä kyäjpn. Ok, tajëk ojts tpekyë kuentë ko axëëktëm të yˈadëˈëtsy. Tajëk ojts tninëjkxy ja wijy jyaˈay parë tˈamdowäˈänyë maˈkxën ets dyajtëëy wiˈix mbäät dyaˈoyë ja jotmay. Ja wijy jyaˈay tajëk yˈanmääyë ti tyunëp: yëˈë tsyujkwäˈkxëp tuˈugë koy diˈib myëdäjtypyë tutk jëjmk ets dyaˈˈabojwäˈkxtäˈäyët. Ja abiˈts naa tëgatsy tmëdooy, per tajëk duˈun ttuuny. Ok, tajëk jatëgok ojts tninëjkxy ja wijy jyaˈay ets dyajtëëy:
¿Tëjëtsë net xymyeˈkxy?
Tajëk ja wijy jyaˈay yˈatsoojë: Nëjkx jawyiin yajmujktäˈäy ja tutk jëjmk.
Ja abiˈts tajëk yˈatsooy: ¡Per kyajts mbäät nëjkx nekyyajmuktäˈäy! Të ja pyojwäˈkxtäˈäy.
Netëk ja wijy jyaˈay yˈatsoojë: Pes nanduˈunën kyaj mbäät xynyekyyaˈoyë tijaty të xyajmäˈäty mëdë mˈää mˈayuk.
Wäˈäts njaygyujkëm tidënë tyäˈädë xytyukniˈˈijxëm: Ko pyëtsëëmnë ja ää ayuk, kyaj mbäät nekyyajjëmbijtëm, ets näˈäty kyaj mbäät nekyyaˈoˈoyëm wiˈix të nˈaxëktuˈunëm ja jäˈäy. Pääty mä axëëk nganimaytyakëmë nmëguˈukˈäjtëm, nˈokjamyajtsëm ko yëˈë nety jam ndimˈyajˈabojwäˈkxäˈänënë ja tutk jëmk.
[Letrë diˈib miimp mä dibujë mä pajina 16]
¿Wiˈix mbäädë apostata tyëkëdë tëgoty?
