TYAM, mbäät ndukxondakëmë jukyˈäjtën. Mët ko nbanëjkxëmë Diosë kyäjpxwijën diˈib yajpatp mä Biiblyë. Min nˈokˈijxëm tuk peky majtsk peky.

BIIBLYË JYËNAˈANY: Rey Salomón tkujäˈäyë: “Parë naxwinyëdë jäˈäy, nitii duˈun tkaˈoyjyawë extëm ko kyay yˈuugët ets tˈixët ko oybyëtsëëmp ko mëk tyuny yˈayoy” (ECLESIASTÉS 2:24).

Jantsy oy nayjäˈäwëm ko ja tuunk yajxon nduˈunëm. Pääty, oy tsip nimëjää ja xëë tiempë nyaxy mbäät ndukxondakëm ko nˈijtëm tuumbë jäˈäy ets ko tëyˈäjtën mëët tijaty nduˈunëm.

BIIBLYË JYËNAˈANY: “Niˈigyë njotkujkˈäjtëm ko wiink jäˈäy nbudëjkëm es kyaj ko wiink jäˈäy xypyudëjkëm” (APOSTɄLɄTY 20:35).

Ko nmëguˈukˈäjtëm tijaty ndukmëduˈunëm, yëˈë diˈib xyajxondakëm ets kyaj nayjäˈäwëm ko nëgoobë jyawë njukyˈäjtëm. Mbäät nyajtuˈunëmë xëë tiempë etsë jot mëjää parë nbudëjkëm pënaty pyattëbë ayoˈon jotmay. Ja rey Salomón dyajkyë käjpxwijën: “Tukmëdun ja oyˈäjtën pënaty yajtëgoyˈäjttëp, pën jamë madakënë xymyëdaty parë duˈun xytyunët” (Proverbios 3:27).

Extëm nˈokpëjtakëmë Ralph, kyaj nety yˈoktuunë jeˈeyë mëjuy yˈijnë, ta tpëjtakyë wyinmäˈäny parë yëˈëyë Diosë  tyuunk ttunanë, duˈun extëm tyuny ja nyëdoˈoxy. Ets poˈo boˈo duˈun nimajtsk ja xyëë tiempë dyajtundë parë ttukniˈˈixëdë jäˈäy ja tëyˈäjtën diˈib yajpatp mä Biiblyë. Yëˈë jyënaˈany: “Kojëts tsuu njäjnëdë mätsë ndëjk tëjëts njantsy anuˈkxëdë, per kyaj yëˈëjëty kojëts të nmëjjäˈäyëndë, yëˈë duˈun kojëts të nduunëdë Diosë tyuunk. ¡Ets jantsy jotkujkëts nayjawëdë oyëts nuˈun të nˈanuˈkxëdë!”. Ralph mëdë nyëdoˈoxy jantsy jotkujk nyayjawëdë ko tpudëkëdë jäˈäy.

BIIBLYË JYËNAˈANY: “Tuˈugë mëtnaymyaayëbë tsojkp xëmë, ets duˈun extëm tuˈugë mëgaˈax ko nmëdäjtëmë ayoˈon jotmay” (PROVERBIOS 17:17).

Tsip nmëmadakëmë jotmay pën naytyuˈuk nyajpatëm. Extëm jyënanyë Francis Bacon, tuˈugë ëxpekyjyaˈay diˈib tsoˈomp Inglaterra, ko jäˈäy tkamëdatyë myëtnaymyaayëbë duˈun yajpääty extëm tuˈugë “lugäärë äänëˈëk tëtsëˈëkpë”. Ko nmëdäjtëmë oybyë mëtnaymyaayëbë, ets ko nˈijtëm oy myëtnaymyaayëbë, yëˈë diˈib xypyudëjkëm parë ndukxondakëmë jukyˈäjtën.

BIIBLYË JYËNAˈANY: “Niˈigyë jyotkujkëty diˈibë myëdoodëp extëm ja Dios jyënaˈany es myëmëdoodëp” (LUKɄS 11:28).

Jesus ojts tnigajpxy ko parë ndukˈoyˈäjtëm diˈibë Dios të twandaˈaky, tsojkëp nmëdoˈoˈijtëm extëm jyënaˈany ets nmëmëdoˈojëm. Mët yëˈëgyëjxmë Biiblyë, Jyobaa xypyudëjkëm parë njaygyujkëm ti tsyejpy ets nduˈunëm mä jukyˈäjtën parë nˈijtëm jotkujk. Duˈun extëm të nˈijxëm mä ja tuˈukpë artikulo, Biiblyë nyimaytyakypy ti Dios të ttuknibëjtäägë parë tyäˈädë Naxwinyëdë. Ets nan nyigajpxypy ti mbäät nduˈunëm, tiko yä nyajpatëm ets tiko jyaˈˈatyë ayoˈon jotmay. Jëjpˈam ets nnijäˈäjëm wiˈix yaˈˈatsoojëmbijtäˈäy parë mbäät ndukxondakëmë jukyˈäjtën. Ets pënaty jyuˈttëbë tiempë parë tˈëxpëktë Biiblyë etsë net tkuytyundë, ta agujk jotkujk yajpäättë. Duˈunën oy yˈittë mëdë Jyobaa, ja “Diosë jotkujkpë” (1 Timoteo 1:11, Traducción del Nuevo Mundo).

BIIBLYË JYËNAˈANY: “Jamyats pën të myajkojˈyëty mä tyam [...] kyajnëm tsip nimëjää ja mxëë mdiempë xyajnaxy; pes jäˈtäämp ja xëë jëmëjt mä mjënäˈänäˈäny: Kyajts ti nˈoktukxondaknë” (ECLESIASTÉS 12:1, VERSIÓN POPULAR).

Rey Salomón yëˈë tyäˈädë käjpxwijën myooy ja ënäˈktëjk, diˈib näˈäty ak tim oy tˈixtë ja jukyˈäjtën. Per nan pudëjkëdëp diˈib mëjjäˈäy mëˈˈënäˈk. Nëjkxëp ndukxondakëm ja jukyˈäjtën pën jam nbëjtakëmë jot winmäˈäny mä Diosë tyuunk. Kyaj duˈun nwinmäˈäyëm extëm nääk jyënäˈändë: “Nˈokkäˈäy nˈokˈukëm jeˈeyë. Aya bom nˈoˈkëm” (1 Korintʉ 15:32).  Eclesiastés 8:12 jyënaˈany ko pënaty pyëjtaktëp jëjpˈamë Diosë tyuunk, tyukˈoyˈatandëp.

Tuˈugë kiixy diˈib xyëˈäjtypy Wendi dyajtëyˈäjtëndëkë. Yëˈë mëdë myëgaˈax ojts tjattë amxan parë tuk tiempë nyëjkxäˈändë mä República Dominicana, mä tyëgoyˈatyë käjpxwäˈkxpë. Wendi jyënaˈany: “Oyëts kajaa ojts xytsyiptakxëdë, per jantsy jotkujkëtsë nxëë ndiempë nyajnäjxtë. Nuˈunëts nˈijttë tëdujk poˈo nitiijëts mëët ngaˈijxkijpxyë.”

Niˈigyë ndukxondakëmë jukyˈäjtën ko ngamastutëmë Dios

Ko oy nˈijtëm mëdë Dios yëˈë xypyudëjkëm parë ndukxondakëmë jukyˈäjtën. ¿Mjamyejtsypy ko Satanás yëˈë yajtëgooyë Adán mëdë Eva? Per kyaj yëˈëyë duˈun ttuuny. Ok, ta nanduˈun dyajjaygyukëyany ko nituˈugë naxwinyëdë jäˈäy tkamëdunëdë Dios ko tpäättëdë amay jotmay (Job 1:9-11; 2:4). Pääty, tsojkëp nyajnigëxëˈkëm ko Satanás andakp. ¿Wiˈix? Ko kyaj Dios nmastutëm, ko nmëmëdoˈojëmë kyäjpxwijën ets ko nyajnigëxëˈkëm ko yëˈën diˈib myëdäjtypy ja kutujkën parë xyˈanmäˈäyëm diˈibë oy ets diˈibë axëëk (Diˈibʉ Jatanʉp 4:11).

Mbäät nbatëmë amay jotmay mët ko nbanëjkxëmë oybyë nëˈë tuˈu. Per ¿mbäädë net yëˈë xypyëjkxëmë jotkujkˈäjtën? Nˈokpëjtakëm tuˈugë ijxpajtën, ko mniminëdët tuˈugë jäˈäy ets tniwäämbatët ja mëtnaymyaayëbë o niduˈugë mfamilyë. ¿Këdii mnikäjpxtuˈudëp? Ets oyë net myajmëtsipˈatët, kyaj yëˈë mbëjkxëdët ja jotkujkˈäjtën, ¿këdiijë? Pes nanduˈunën jyaty mëdë Dios ko yajniwäämbety, oy ko nyajwatsëm ja xyëë. Pën xëmë nmëduˈunëm oy nuˈun xytsyiptakxëm, ta nëjkx nyajxondakëmë jyot kyorasoon (Proverbios 27:11).

Ja jukyˈäjtën diˈib xëmë ndukxondäˈägäˈänëm

Extëm tukëˈëyë të nnijäˈäjëm, tsojkëbë net nduˈunëmë mëjää parë nˈixyˈäjtëmë Dios ets nnijäˈäjëm tijaty të ttuknibëjtäägë. Jesus jyënany: “Esë tyäˈädë jikyˈäjtën winë xëë winë tiempë, jaˈa yëˈë ko jäˈäy mij, tiˈigyë Dios, mˈixyˈatëdët es xyˈaxäjëdëts ëj extëm ja Kristë es tmëbëktët ko mij xykyajxëts yä naxwiiny” (Fwank 17:3). Pënaty kyaj tmastuˈuttë Jyobaa yˈixandëp wiˈix yˈadëwäˈäny diˈib të ttuknibëjtäägë parë naxwinyëdë jäˈäy: “jikyˈäjtën winë xëë winë tiempë” yä Naxwiiny ko nety të jyëmbity extëm tuˈugë it lugäärë tsujpë. Taanëmë net niˈamukë ndukxondäˈägäˈänëm ja jukyˈäjtën (Salmo 145:16).

Per ¿mä net mbäät xynyijawë ja tëyˈäjtën diˈibë Jesus myaytyak? Mä Biiblyë, ja Diosë yˈAyuk. Parë xynyijawët tijaty tukniˈˈijxëbë Biiblyë, mbäät xynyijayë pënaty yajpëtsëëmdëbë tyäˈädë rebistë, yëˈëjëty mbäät pën ttuknipëktë parë nëjkx myaˈëxpekyëty.