¿TIDAA ko njukyˈäjtëm? Duˈun mayë jäˈäy nyayajtëwëdë. Jyaˈëxtääytyëbë winmäˈäny wiˈix tnijawëdët, per jotmaymyëët njënäˈänëm ko kyaj tnijawëdë ti tyundëp. Duˈun nyayjawëdë extëm ojts tkujayë tuˈugë neurólogo diˈib Austria Viktor E. Frankl ko “nëgoobë jyawë njukyˈäjtëm ets ko kyaj mbäät ti yaˈˈawixy yajjëjpˈixy”.

¿Tiko duˈunë jäˈäy nyayjawëdë? Tim jawyiin, yëˈë ko abëtsemy naxwinyëdë jäˈäy tpäättë ayoˈon jotmay. Tuˈuk tuˈugë xëë nyaxy, yˈayowdë jäˈäy mët ko yˈamääytyaˈagyë meeny sentääbë, jyaˈˈatyë yuu päˈäm, yaˈˈaxëkˈixtë mët ko wiink paˈis tsyoondë o ko kyaj ti tëyˈäjtën mëët yajtuny. Tyam, “mëk täˈämë” jäˈäyë jyukyˈäjtën dyajnëjkxtë duˈun extëm jyënanyë Job diˈib tëëyëp jukyˈäjt (Job 14:1, La Palabra de Dios para Todos). Yëˈëyë yˈakwinmääytyëp wiˈix jakumbomë xyëë dyajnaxtët.

Miyonkˈamë jäˈäy diˈib jyamëdäjttëbë meeny sentääbë o nayjawëdë seguurë, kyaj tpäättë jotkujkˈäjtën. ¿Tiko dyuˈunëty? Yëˈko nëgoo jeˈeyë jyantsy tyundë, pes axtë niˈigyë dyajtëgoytyë myeeny syentääbë o yˈayoˈonbäättë extëm ko yˈooky tuˈugë uˈunk ets yëˈë diˈibë net yajtëgooytyaapy ti nety yˈawijx jyëjpˈijxtëp (Salmo 90:10).

Ja tuk peky diˈib xyajnayjäˈäwëm ko “nëgoobë jyawë njukyˈäjtëm ets ko kyaj ti mbäät yaˈˈawixy yajjëjpˈixy”, yëˈë ko waanë jeˈeyë njukyˈäjtëm ets pääty mëk njantsy jäˈäwëm. Mayë jäˈäy tsip tjaygyukëdët tiko naxwinyëdë jäˈäy diˈib të kyojy parë tijaty ttunët, jeˈeyë waanë jyukyˈattë. Ets duˈunën tyam jyaty kyëbety, oy njamëmadaktäˈäyëmë amay jotmay diˈib nwinguwäˈkëm, per ja oˈkën yëˈë diˈib xypyëjkxëtyaˈayëm (Eclesiastés 3:19, 20).

¿Waˈandaa duˈun xëmë yˈitäˈänyë jukyˈäjtën?

Salomón, tuˈugë rey diˈib tëëyëp anaˈamp Israel, ojts tˈixy wiˈixë netyë jäˈäy jyukyˈattë mä tadë tiempë duˈun extëm tyam, jyantsy tyundë mëk parë tijaty  tpäädäˈändë: nyiˈiptë kyojtë, jyëëngoj tyëjkojtë, tˈijxˈit tkuentˈattë fyamilyë, per ¿wiˈix wyimbëtseemy? Yëˈë jyënany, ko “nëgoobë jukyˈäjtën, duˈunxyëp extëm ko poj yajpaboˈoy” (Eclesiastés 2:17).

¿Yëˈëdaa netyë Salomón wyinmaapy ko oy nuˈun ja jäˈäy tjatunyë myëjää kyaj mbäät ti tˈawix tjëjpˈixtë? Kyaj. Yëˈëyë nyimaytyak extëm yˈixëty ja jukyˈäjtën ets diˈib tyam ja tuun jäjtëp. Perë Diosë yˈAyuk twandaˈaky ko kyaj duˈun xëmë yˈitäˈänyë jukyˈäjtën.

Mä tadë majtskpë artikulo xyˈaknijawëyaˈany tiko mbäät nmëbëjkëm diˈibë Dios të twandaˈaky. Jap nanduˈun yajnimaytyäˈägäˈäny tiko kyëxeˈeky ko nëgoobë jyawë jukyˈäjtën, wiˈix yˈoyëyaˈanyë tyäˈädë jotmay ets ti mbäät nduˈunëm parë tyam ndukxondakëmë jukyˈäjtën.