“Nituˈugë ëxpëjkpë diˈibë myëbäädëp ja wyintsën, per ko oy dyajkexy ja yˈëxpëjkën, dëˈën jyäˈtët extëm ja wyintsën.” (LUKɄS 6:40)

NÄÄGË tääk teety nyayjawëdë ko kyaj mbäädë yˈuˈunk yˈënäˈk ttukniˈˈixëdë mä pënën Dios. Waˈan wyinmaytyë ko kyaj yˈëxpekyˈattë o mët ko kyaj tijaty tnijawëdë diˈib mä relijyonk. Päätyë net ttuknipëktë tuˈugë jyiiky myëguˈuk o diˈib nyiwintsënˈäjtypyë relijyonk.

Per ¿pënën patëp ets ja uˈunk ënäˈk tyukniˈˈixëdët ja tëyˈäjtën diˈib mä relijyonk ets wiˈix jyukyˈattët? Min nˈokˈijxëm wiˈixë Biiblyë jyënaˈany ets wiˈix tyuˈugyë mët wiˈix jyënäˈändë ëxpekyjyaˈay.

¿Ti nyikëjxmˈäjtypyë uˈunkteety?

Biiblyë tyukniˈˈixë: “Uˈunkteetyëty, katë nëgoo xyˈoodë es xytyundë mˈuˈungëty extëm jeˈeyë xyajjotˈambëkäˈändë, jëjwijtsëmbittë niˈigyë yajxon es tukˈixtë wiˈixë dëˈën ja Kristë ttseky es njikyˈäjtëm” (Éfesʉ 6:4).

Ëxpekyjyaˈay tˈëxpëjkpëtsëmdë: ¿Wiˈixë uˈunk teety ttukˈoyˈaty ko dyajkëktëkë myëbëjkën mä tuˈugë relijyonk? Mä tuˈugë artikulo diˈib pëtsëëm 2009 yajkujäˈäyë: “Ko yajtukˈitë tuˈugë relijyonk mbäät tpudëkë tuˈugë jäˈäy parë oy yˈuˈunkteetyˈatët. Ja relijyonk yëˈë diˈib pudëjkëp ets tyukniˈˈixëty parë oy jyaˈayˈatët, kanäk peky tyukniˈˈixëty ets nyëˈëmoˈoy tyuˈumoˈoyëty mä jyukyˈäjtën” (Fathersˈ  Religious Involvement and Early Childhood Behavior [Religiosidad paterna y comportamiento infantil]).

Biiblyë nyigajpxypy ko yëˈë ja uˈunkteety diˈib nyikëjxmˈäjtypy mä dyajˈyeegyë yˈuˈunk yˈënäˈk ets mä tˈëwijy tkäjpxwijy (Proverbios 4:1; Kolosʉ 3:21; Ebreeʉsʉty 12:9). Per tyam, ¿jëjpˈamëdaa tyäˈädë käjpxwijën? Mä 2009 Universidad de Florida dyajpëtseemy tuˈugë artikulo mä tnimaytyaky wiˈixë uˈunk ënäˈk tijaty tjattë mä tyeety. Ëxpekyjyaˈay të tˈëxpëjkpëtsëmdë ko ja uˈunkteety nyaytyukjotmaytyunyëty parë tˈëwijy tkäjpxwijˈyë yˈuˈunk yˈënäˈk, ta ja uˈunk ënäˈk këˈëm nyayajtsobäädëdë ets ta net nyaytyukjotmaytyunëdë wiink jäˈäy. Ja yaˈayˈënäˈk oy jyaˈayˈattë ets ja toˈoxyˈënäˈk tmëdattë wäˈäts ja jyot wyinmäˈäny. Duˈunë duˈun, tyambäät xypyudëjkëmë Biiblyë kyäjpxwijën.

¿Ti nyikëjxmˈäjtypyë uˈunktääk?

Biiblyë tyukniˈˈixë: “Kyaj xyjyaˈaytyëgoyëdë mdäägë yˈanaˈamën” (Proverbios 1:8).

Ëxpekyjyaˈay tˈëxpëjkpëtsëmdë: Mä 2006 pyëtseemyë tyäˈädë liibrë Handbook of Child Psychology, mä ëxpekyjyaˈay tˈëxpëjkpëtsëëmdë wiˈix ja ënäˈkuˈunk yajpäättë, ets ojts yajkujayë ko ja uˈunktääk niˈigyë tiempë dyajnaxtë mët niduˈuk niduˈugë yˈuˈunk yˈënäˈk ets kyaj dyuˈunëty ja uˈunkteety. Ets tyam duˈunën tyuny jyatyëty mä kanäägë it lugäär. Ko ja uˈunktääk yajpääty xëmë mëdë yˈuˈunk, ta ja ënäˈkuˈunk nyinaxëdë ja jyaˈayˈäjtënë tyääk extëm ja kyäjpx myaytyakën, tyuˈunën ets ja jyaˈayˈäjtën.

Ko ja tääk teety ttukniˈˈixëdë yˈuˈunk yˈënäˈk ja tëyˈäjtën mä pënën Dios, yëˈë nety myooytyëp majtskë regalë diˈib mëjwiin kajaa tsobatp. Tuˈuk, yëˈë parë oy yˈittët mëdë nDeetyˈäjtëmë tsäjpotmëdë ets ttukˈoyˈattët winë xëë winë tiempë. Majtsk, yëˈë parë tjattët wiˈixën ja yetyëjk diˈib të pyëjknë ets ja toxytyëjk mbäät nyaybyudëkë parë ttundët tijaty të ttuknibëjtäägëdë (Kolosʉ 3:18-20). Uˈunktääk uˈunkteety mbäät pyudëkëdë wiink jäˈäy, per yëˈën diˈib patëdëp ttukniˈˈixëdët ja yˈuˈunk yˈënäˈk mä pënën Dios ets wiˈix yëˈë ttseky jyukyˈattët ja familyë.

Pääty, ¿wiˈix mbäät ttukniˈˈixëdë? ¿Ti mbäät pyudëkëdë parë oy tyukniˈˈixëdët?