“Dios wyinmäˈänymyooy ja jyaˈayëty es tkëxjäˈäyët tëgekyë ja Diosë jyaaybyajtën, es [...] tuump oy es nyaˈëxpëjkëm, ndukˈanaˈamëm, nyaˈoˈoyëm, es njëjwijtsëmbijtëm pënextëm jyikyˈatët tëyˈäjtën mëët.” (2 TIMOTEE 3:16)

TSOJKËBË uˈunk ënäˈk tnijawëdët ja tëyˈäjtën mä pënën Dios. ¿Mä mbäät tnijawëdë? Mä Biiblyë, tadë liibrë diˈibë jäˈäy mëj yaˈijttëp.

Biiblyë duˈun extëm tuˈugë neky diˈibë Dios të xytyuknijäˈäyëm, mä tnimaytyaˈagyë jyaˈayˈäjtën ets mä tnigajpxy wiˈix mbäät jyukyˈattë niˈamukë yˈuˈunk yˈënäˈk, duˈunë ënäˈktëjk etsë mëjjäˈäytyëjk. Tyä tuˈuk majtsk yajnigajpxy diˈibë Biiblyë xytyukniˈˈijxëm ets diˈib mbäät tjattë axtë ënäˈkuˈunk.

¿Ti Dios tsyejpy ets nnijäˈäjëm mä yëˈë?

▪ Biiblyë jyënaˈany: “Mijts, mxëˈaty Jyobaa, mijts jeˈeyë naytyuˈuk diˈib mˈijtp jantsy Këjxm abëtsemy Nyaxwinyëdë” (Salmo 83:18).

¿Ti xytyukniˈˈijxëm? Dios jantsy yëˈë tuˈugë jäˈäy ets myëdäjtypyë xyëë.

▪ Biiblyë jyënaˈany: “Mëwingondë Dios, es yëˈë nandëˈën mmëwingonëdëp miitsëty” (Santya̱ˈa̱gʉ 4:8).

¿Ti xytyukniˈˈijxëm? Jyobaa naytyukjotmaytyuunëp mët ëtsäjtëm ets nanduˈunë ënäˈkuˈunk (Salmo 10:14; 146:9). Yëˈë tsyejpy ets nˈixyˈäjtëm.

▪ Biiblyë jyënaˈany: “Këdii ëxëëk xytyunëty yëˈë [...] kuˈookyˈuˈunk kuˈookyˈënäˈk. Jaˈa ko [...] tpëjktsowdëty ja pudëjk pubajtën määjëts ëjtsën. Ëjts ninëjkxaamybyëts yëˈëjëty, etsëts mbudëkëjäˈändë” (Éxodo 22:22-24, Mʉgoxpʉ ja̱ noky mʉdiˈibʉ jyaayʉn Moisés [MNM]).

¿Ti xytyukniˈˈijxëm? Jyobaa myëdooˈijtypy ko nmënuˈkxtakëm ets nanduˈun ko ënäˈkuˈunk myënuˈkxtäˈägëdë. Mbäät ndukmëtmaytyaktäˈäyëm tijaty nwinmäˈäyëm ets tijaty njäˈäwëm mä jot korasoon.

▪ Biiblyë jyënaˈany: “Mëk ja Diosteety tjäjäˈäwëy jaˈa ko këˈëm ënety të tˈëkˈyajkojy ja jäˈäy” (Génesis 6:6, MNM).

¿Ti xytyukniˈˈijxëm? Diˈib ngäjpx nmaytyakëm ets diˈib nduˈunëm mbäädë Jyobaa yajjotkujkˈatyëty o axëëk yajnayjawëty, pääty mä kyajnëm ti nmaytyakëm o ti nduˈunëm oy ko jawyiin nwinmäˈäyëm.

 ¿Wiˈix mbäät njäˈäyˈäjtëm mëdë jäˈäy diˈib wiink lugäär tsoˈomp?

▪ Biiblyë jyënaˈany: “Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty diˈibë wintsëˈkëdëp es tmëduny” (Apostʉlʉty 10:34, 35).

¿Ti xytyukniˈˈijxëm? Dios kyupëjktaapy niˈamukë jäˈäy, pääty kyaj yˈoyëty ets nˈëxtijëm diˈib tëgatsy ixˈäjttëp o diˈib wiink koloor.

▪ Biiblyë jyënaˈany: “Xëmë mˈitët listë parë xynyimaytyäˈäktë ko pën myajtëwëdët ti mˈawijx mjëjpˈijxtëp, per duˈun xytyundët mëdë yuunkˈäjt naxypyëˈäjtën ets mëdë wintsëˈkën” (1 Pedro 3:15, Traducción del Nuevo Mundo [NM]).

¿Ti xytyukniˈˈijxëm? Oy ko nimaytyakëm ja nmëbëjkënˈäjtëm amëk jotmëk, per kyaj njotˈambëjkëm. Ets nan oy ko nwintsëˈkëm pënaty kyaj duˈun ja mëbëjkën tmëdattë extëm ëtsäjtëm.

¿Wiˈix mbäät nˈijtëm mëdë familyë?

▪ Biiblyë jyënaˈany: “Miitsëty uˈunk ënäˈkëty, mëmëdowdë ja mdääk mdeety, mët ko tyäˈädë dëˈën yˈoyjäˈäp ja Nintsënˈäjtëm” (Kolosʉ 3:20).

¿Ti xytyukniˈˈijxëm? Ko uˈunk ënäˈk myëdowdë yëˈë yajnigëxëˈktëp ko tsyojktëbë tyääk tyeety ets ko yajjotkujkˈatandëbë Dios.

▪ Biiblyë jyënaˈany: “Naymyëmaˈxtukëdë nixim niyam es naymyaˈxëdë pën ja pën nyaymyëdëgoyëty mët ja wiinkpë. Dëˈën extëm ja [“Jyobaa”, NM] oj mmaˈxëdë, dëˈën xytyundët nandëˈën miitsëty” (Kolosʉ 3:13).

¿Ti xytyukniˈˈijxëm? Näˈäty axëëk xyajnayjawëyäˈänëmë nfamilyëˈäjtëm etsë wiink jäˈäy. Per tsojkëp nbokymyaˈkxëm, pën ntsojkëm etsë Dios nanduˈun xypyokymyaˈkxëm (Matewʉ 6:14, 15).

 ¿Tiko mbäät nˈijtëm oyjyaˈay ets nduˈunëm tijaty tëyˈäjtën myëët?

▪ Biiblyë jyënaˈany: “Katë mnakyˈandäˈäktë, nik maytyäˈäktë tëyˈäjtën nixim niyam” (Éfesʉ 4:25).

¿Ti xytyukniˈˈijxëm? Ko nmaytyakëmë tëyˈäjtën, yëˈë nety niˈˈijxtutëmë Dios ets nyajxondakëmë kyorasoon. Per pën të nˈijxwëˈëmëm nˈandakëm, yëˈë nety nbanëjkxëmë Satanás, Diosë myëtsip diˈib “yajtsondak ja andakën” (Fwank 8:44; Titʉ 1:2).

▪ Biiblyë jyënaˈany: “Pes dëˈën diˈibë miits mdsojktëp es ja wiinkpëty mdukmëdunëdët, miits mdukmëdundëbë taadë” (Matewʉ 7:12).

¿Ti xytyukniˈˈijxëm? Oy ko nmëjpëjtakëm wiˈix nyayjawëty ja jiiky mëguˈuk ets pënaty mët nyajpatëm ets wiˈix wyinmaytyë ets ti yajtëgoyˈäjttëp. Pën nduˈunëmë mëjää parë njaygyujkëm wiˈix nyayjawëdë ets nˈoyjyaˈaytyakëm, ta nanduˈun ja wiinkpë nëjkx dyajjëmbity (1 Peedrʉ 3:8; Lukʉs 6:38).

Extëm ja të nˈijxëm, ja käjpxwijën diˈib yajkypyë Biiblyë pudëjkëbë ënäˈkuˈunk parë ko yaˈknëdët oy jyaˈayˈattët ets wyintsëˈëgëdët. Per ¿pën mbäät tyukniˈˈixëdë?