TUˈUGË soldäädë wintsën diˈib Ruanda ets tyuny mä ONU jyënany: “Tëjëts mëdë Mëjkuˈu nayˈayoˈoyëty”. Ets duˈun jyënany, mët ko tmëmëdooy ja anaˈamën parë tˈakˈyaˈooktët ja mayjyaˈay jap Ruanda mä jëmëjt 1994. Ja tuˈugë jäˈäy diˈib yˈijx wiˈixën jyäämˈook nyääxˈooktë jäˈäy jyënany: “Nipën mbäät kyawinmay ko kyaj jyaˈˈatyë Mëjkuˈu extëm yajkuˈixë jutoty ja may oˈkpë”. Per ¿yëˈëdaa Mëjkuˈu diˈib yajjaˈäjtypyë duˈumbë axëkˈäjtën?

Ko jäˈäy nyayaˈook nyayajtëgoyëdë ets ko jyaˈˈatyë naytyëytyunë kyaj tmëbëktë ko yëˈë duˈun adëtspë axëk anklës. May wyinmaytyë ko duˈun të nmëmaxuˈunkˈäjtëm ja axëkˈäjtën ets ko tapën nmëdäjtëm jodoty. Etsë wiinkpë yëˈë pyokyˈijxtëbë jäˈäy diˈib myëdäjttëbë meeny sentääbë ets diˈib mëj ijttëp yä naxwiiny, diˈib kanäk jëmëjt kujk tˈëxtäˈäytyë winmäˈäny parë tˈanaˈamdëdë naxwinyëdë jäˈäy. Ets nan ta diˈib pyokyˈijxtëbë anaˈambëtëjk ko yëˈë yajjaˈäjttëbë ayoˈon jotmay ets ko kyaj tijaty ttundë tëyˈäjtën mëët.

Ets mijts, ¿wiˈix mwinmay? ¿Tiko niˈigyë myëjwindëkë axëkˈäjtën, naytyëytyunë, nayaˈook nayajtëgoyë etsë ayoˈon jotmay oyë jäˈäy tjatundë mëjää parë dyajjëjptëgoytyët? ¿Tiko jäˈäy kyaj tjaygyukëdë ko yajmoˈoytyë käjpxtëˈëwën ets niˈigyë nyayajkutëgoyëdë? ¿Jamdaa pën diˈib nyikëjxmˈäjtypy? ¿Pënën yˈaneˈembyë naxwinyëdë jäˈäy? Waˈan mëjmëdoy xyjawët ko xyˈixët wiˈix yaˈˈatsoojëmbity.