Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëjëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.

1. ¿Myëdooˈijtaabyë Dios nuˈkxtakën?

Jyobaa yˈanmaapy abëtsemy nyaxwinyëdë jäˈäy ets myëwingonëdët mët ko myënuˈkxtäˈägëdët (Salmo 65:2). Perë Jyobaa kyaj tmëdooˈijtäˈäyë nuˈkxtakën. Extëm ko ijty ja israelitëty janääm jatsojk ttundë axëkˈäjtën, kyaj tmëdoy ko myëgäjpxëdë (Isaías 1:15). Nan mbäät kyaj yajmëdoyë nyuˈkxtakën tuˈugë yetyëjk diˈib tyuumpy axëëgë nyëdoˈoxy (1 Peedrʉ 3:7). Perë Dios myëdoobyë nyuˈkxtakën axtë pënaty të pyokytyundë mëjwiin kajaa ko jyodëmbittë. (Käjpxë 2 Crónicas 33:9-13.)

2. ¿Wiˈix mbäät nuˈkxtakëm?

Nitii kyaduˈunëty extëm ko nmënuˈkxtakëmë Dios ets ko duˈun nˈawdäjtëm, pääty yëˈëyë mbäät nmëgäjpxëmë Jyobaa (Mateo 4:10; 6:9, Traducción del Nuevo Mundo). Kom pokyjyaˈay nyajpatëm, pääty jyëjpˈamëty nuˈkxtakëm xyëëgyëjxmë Jesus, mët ko yëˈë duˈun ja “tuˈu” (Fwank 14:6). Jyobaa kyaj ttseky nmënuˈkxtakëm agëbajky o nbaˈijxëm nekyëjxy, yëˈë tsyejpy ets nmënuˈkxtakëm extëm njäˈäwëm mä korasoon. (Käjpxë Matewʉ 6:7 etsë Filipʉs 4:6, 7.)

Jyobaa myëdoopy ko nmëgäjpxëm ayuˈutsy ameˈtsyë (1 Samuel 1:12, 13). Xyˈanmäˈäyëm ets nmënuˈkxtakëm oytyim näˈäjëty, extëm ko nguxëënyëm o ngugootsëm, ko ngayäˈänëm o ko nbatëmë amay jotmay. (Käjpxë Salmo 55:22 etsë Matewʉ 15:36.)

3. ¿Tiko nyaymyukëdë Dios mëduumbë?

Tsiptakp nmëwingoˈonëmë Dios mët ko mayë jäˈäy kyaj myëbëkëdë ets tyukxiktëp ko twandaˈaky dyajminäˈänyë jotkujkˈäjtënë yä Naxwiiny (2 Timotee 3:1, 4; 2 Peedrʉ 3:3, 13). Pääty tsyekyëty ets naymyëjämoˈoyëm nixim niyam mëdë nmëguˈukˈäjtëm. (Käjpxë Ebreeʉsʉty 10:24, 25.)

Mbäädë Dios nmëwingoˈonëm ko naymyaˈaybyëjkëm mëdë jäˈäy diˈib tsyojktëbë Dios. Ko nyaymyukëdë Jyobaa tyestiigëty, yëˈë pudëjkëdëp ko tˈixtë ja myëguˈuktëjkë myëbëjkën. (Käjpxë Romanʉs 1:11, 12.)

  4. ¿Wiˈix mbäät xymyëwingonyë Dios?

Ko xypyawinmayët tijaty të xyjaty mä yˈAyuk, tijaty tyuumpy, tijaty të twandaˈaky ets wiˈix xytyuˈumoˈoyëm. Ko nbawinmäˈäyëm ets nuˈkxtakëm, ta niˈigyë nmëjjäˈäwëm ko Dios xytsyojkëm ets ko wyijˈyëty. (Käjpxë Josué 1:8 etsë Salmo 1:1-3.)

Net mbäädë Dios nmëwingoˈonëm pën nmëbëjkëm. Per tsojkëp ets nguentˈäjtëmë mëbëjkën parë kyaj nyajtëgoˈoyëm. Niˈigyë mbäät nyajkëktëjkëm mët yëˈëgyëjxm ko nbawinmäˈäyëm tijaty kujk nˈëxpëjkëm. (Käjpxë 1 Tesalónikʉ 5:21 etsë Ebreeʉsʉty 11:1, 6.)

5. ¿Wiˈix ndukˈoyˈäjtëm ko nmëwingoˈonëmë Dios?

Jyobaa kyuentˈäjtypy pënaty tsojkëp. Xykyuwäˈänëm mä tijaty mbäät dyajtëgoyë mëbëjkën ets ja jukyˈäjtënë winë xëë diˈib nˈawijx njëjpˈijxëm (Salmo 91:1, 2, 7-10). Nan xyˈanmäˈäyëm tijaty axëktuump, extëm diˈib mbäät xyajpäˈämbajtëm o xypyëjkëmë jotkujkˈäjtën, ets nan xytyukniˈˈijxëm wiˈix mbäät oy njukyˈäjtëm. (Käjpxë Salmo 73:27, 28 etsë Santya̱ˈa̱gʉ 4:4, 8.)

Pën mˈaknijawëyaampy, ixë kapitulo 17 mä tyäˈädë liibrë, ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.