3 Dios tëytyuump. ¿Tëyˈäjtënëdaa?
Nääk jyënäˈändë: “Dios myaytsyoobyë poky kaytyey, ta net tkexyë jäˈäy infiernë mä jëën tyoy parë jap tkumëdowët winë xëë”.
“Ko tijaty yˈayoˈonbëjtaˈaky yëˈë Dios tyëytyuumbyë pokyjyaˈay.”
Biiblyë tyukniˈˈixë: Mä 2 Peedrʉ 3:9 jyënaˈany ko Jyobaa tsyejpy “es ja pojpë jäˈäy jyodëmbittët, [...] këdiibë kyutëgoytyët”. Yëˈë kyaj tˈixy mä ndëgoˈoyëm, yëˈë yˈijxypy mä oy tijaty nduˈunëm. Yëˈë “tyukˈijxëtyaapy tukëˈëyë naxwinyëdë parë myëjää ttukpudëkëyaˈany pënaty amuumë kyorasoon ijtp mët yëˈë” (2 Crónicas 16:9).
Kyaj yajpääty mä Biiblyë ko jyaˈˈatyë infiernë. Etsë Dios ninäˈä tkayajnaxy wyinmäˈänyoty etsë jäˈäy nyitoyët winë xëë. Ja jeˈeyë ttukumëdowët ja axëkjäˈäy, ko dyajkutëgoyët (Jeremías 7:31; Romanʉs 6:7). Ets ko tijaty yˈayoˈonbëjtaˈaky, kyaj yëˈë Dios duˈun yˈadëˈëtsy, yëˈë duˈun ko jyaˈtyë tiempë diˈib kyaj pën tˈawixy ets mbäät oypyënëty yˈayoˈonbääty (Eclesiastés 9:11).
¿Wiˈix mbudëkëdët ko xynyijawët ja tëyˈäjtën? Mbäät nmëwingoˈonëmë Dios ko nnijäˈäjëm ko yëˈë ijtp “listë ets xypyokymyaˈkxäˈänëm” ets ko kyaj netyë xytyukumëdoˈojëm ti nduˈundëgoˈoyëm (Salmo 86:5). Kyaj nmëduˈunëmë Dios mët ko ti nbokyjäˈäwëm o mët ko ntsëˈkëm xytyëytyuˈunëm. Ets mbäät niˈigyë ja mëbëjkën nyajkëktëjkëm mët ko ntsojkëm. Tyäˈädë tsojkënë yëˈë diˈibë net xymyëjämoˈoyëm parë nduˈunëm diˈib tyukjotkëdakypy (Matewʉ 22:36-38; 1 Fwank 5:3).
Dios tsyejpy ets niˈamukë jäˈäy ttunët diˈib oy, per nan nyijäˈäp ko may ninäˈä tkatunäˈändë. Pääty dyajkutëgoyaˈany axëkjäˈäy diˈib kyaj jyodëmbittë, pes ko duˈun tkatunët, ta nyaxët extëm tuˈugë anaˈambë diˈib pyëjtakypyë ley ets kyaj ti tnekytyuny parë yajpanëjkxët, ets duˈun yˈitët winë xëë ja naytyëytyunë ets ja ayoˈon jotmay (Eclesiastés 8:11). Per ko nnijäˈäjëm ko Dios kyaj tnasˈixëyaˈany winë xëë ets jyaˈˈatëdë axëkˈäjtën, ta xyjotkujkmoˈoyëm parë nˈawijxëmë tyäˈädë tiempë. Yëˈë të twandaˈaky ko dyajkutëgoyaˈany pënaty kyaj tmastuˈuttë axëkˈäjtën. Netë oyjyaˈay nëjkx jyukyˈaty winë xëë extëmë Dios ojts ttuknibëjtäägë (Salmo 37:10, 11, 29). *
[Notë diˈib noky ëxˈääy]
^ parr. 7 Jap niˈigyë xynyijawët wiˈixë Dios ttuknibëjtäägë dyajjëmbitäˈänyë Naxwinyëdë jantsy tsuj mä liibrë ¿Ti tëyˈäjtën jantsy tukniˈijxëbë Biiblyë? kapitulo 3 ets 8.
[Letrë diˈib miimp mä dibujë mä pajina 6]
¿Waˈandaa Dios ttseky ets nmëduˈunëm mët ko ntsëˈkëm ja tëytyuˈunën?
[Dibujë diˈib miimp mä pajina 6 yëˈë të dyaktë]
Yëˈë yaˈoˈoyë Doré
