Nääk jyënäˈändë: “Dios yëˈë anaˈamp yä naxwiiny, ets tukëˈëyë tyuny jyatyëty mët ko yëˈë duˈun ttseky. Ets yëˈë pyoky ko naxwinyëdë të tyuktuky mëdë naytyëytyunë, nayˈaxëkˈixë ets ko kyaj pën ttunyë tëyˈäjtën”.

Biiblyë tyukniˈˈixë: Dios kyaj yëˈë tnikëjxmˈaty ko jäˈäy tkatundë tëyˈäjtën. Biiblyë jyënaˈany: “Yëˈë ak oy yëˈë winë ttuny, ko tii ttuny ak yëˈë mëdiˈibë mëdëyën” (Deuteronomio 32:4, Mʉgoxpʉ ja̱ noky mʉdiˈibʉ jyaayʉn Moisés).

Dios oyjyaˈay mët niˈamukë jäˈäy, axtë diˈib kyaj nyitëkëty. “Tyukniˈaampy yëˈë xëë tiˈigyë ja oyjyaˈayëty es diˈibëty kyajë Dios tmëdundë, es yajtiipy mä ja jäˈäyëty diˈibë jikyˈäjttëp tëyˈäjtën mëët es nandëˈën diˈibëty kyaj jyikyˈattë tëyˈäjtën mëët.” (Matewʉ 5:45.) Dios nan niˈamukë jäˈäy ttsojktäˈäy oy diˈib nax diˈibë käjpn tsyoonët, extëm jyënaˈanyë Apostʉlʉty 10:34, 35: “Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty”.

Per ¿tiko net kyaj yajtunyë tëyˈäjtën? Tuk peky, yëˈë ko mayë jäˈäy kyaj tpanëjkxäˈändë Diosë yˈijxpajtën ets kyaj ttundë ja tëyˈäjtën (Deuteronomio 32:5). Ets ja tuk peky, yëˈë ko Dios tnasˈixë tuk tiempë etsë Mëjkuˈu tˈanaˈamëdë naxwinyëdë (1 Juan 5:19, Traducción del Nuevo Mundo). * Per tim tsojkë Mëjkuˈu yajpëjkëyaˈanyë kyutujkën mä tˈaneˈemyë naxwinyëdë. Jyobaa të tijaty ttuuntsondaˈaky parë “dyajkutëgoyaˈany diˈibë ja mëjkuˈugopk tyiimpy” (1 Fwank 3:8).

¿Wiˈix mbudëkëdët ko xynyijawët ja tëyˈäjtën? Mbäät myajmony myajtukyëty ko jyaˈˈatyë naytyëytyunë, nayˈaxëkˈixë ets ko kyaj pën ttunyë tëyˈäjtën. Per ko xynyijawët pën yajjaˈäjtypyë amay jotmay, yëˈë mbudëkëdëp parë xyjaygyukët tiko nëgoo tyimjaˈäjnë axëkˈäjtën ets tiko kyaj yˈoybyëtsemy ko naxwinyëdë jäˈäy tjayaˈoyëyäˈändë tijaty (Salmo 146:3). Pääty, en lugäär xyajtunëdë mdiempë etsë mëjää parë tijaty yˈoyët diˈib jeˈeyë waanë yajtukˈoyˈatëp, mas oy ko mˈitët seguurë ko Dios yaˈˈadëwaampy tijaty të twandaˈaky (Diˈibʉ Jatanʉp [Apocalipsis] 21:3, 4).

Ko xytyukjäjtëmë ayoˈon, xyjotkujkmoˈoyëm ko nnijäˈäjëm pën yajjaˈäjtypy. Ets ko axëëk nyajtuˈunëm, mbäät njënäˈänëm extëm tuˈugë Dios mëduumbë diˈib xyëˈäjt Habacuc: “Të jyuuny ja ley, ets ja tëyˈäjtën ninäˈä kyapëtsemy” (Habacuc 1:4). Dios kyaj ojts tˈooy ja Habacuc ko duˈun jyënany, niˈigyë ojts tˈanëëmë ko të nety ttuknibëjtäägë dyaˈoyëyaˈany ja jotmay ets tpudëjkë parë yˈitët jotkujk oyë nety dyajnaxy ja ayoˈon (Habacuc 2:2-4; 3:17, 18). Nanduˈun ëtsäjtëm, ko nmëbëjkëm ko Dios yajjëjptëgoyaambyë axëkˈäjtën extëm të twandaˈaky, yëˈë xymyoˈoyäˈänëmë jotkujkˈäjtën mä tyäˈädë axëëkpë jukyˈäjtën.

[Notë diˈib noky ëxˈääy]

[Letrë diˈib miimp mä dibujë mä pajina 7]

¿Yëˈë Diosë pyoky ko jyaˈˈatyë axëkˈäjtën etsë ayoˈon?

[Dibujë diˈib miimp mä pajina 7 yëˈë të dyaktë]

© Sven Torfinn/Panos Pictures