WAˈAN të xymyëdoy o të myajtukniˈˈixë diˈib kyaj tyëyˈäjtënëty mä Dios, extëm të yajnimaytyaˈaky mä kanäägë artikulo. Ets mbäät kyaj mˈity seguurë parë xyajtëgatsëdë mëbëjkën pën tëëyëp duˈun myajtukniˈˈijxënë.

Ets yajjaygyujkëp tiko dyuˈunëty. Mä näägë tsäjptëjk kyaj jäˈäy yaˈˈanëëmëdë parë tˈijxkijpxyët mëdë Biiblyë tijaty yajtukniˈˈijxëdëp. Ets ta net diˈib nyitsiptuundëp tijaty kyaj tyëyˈäjtënëty, jyënäˈändë ko Biiblyë tsip yajjaygyukë ets ko kyaj ojts yajjäˈäy parë niˈamukë njaygyujkëm. Per may ja Jesusë yˈëxpëjkpë jyaygyujkëdë tijaty yajtukniˈˈijxëdë oy tkamëdäjttë ëxpëjkën (Apostʉlʉty 4:13).

Waˈan kyaj xypyayoˈoyäˈänët pën tëyˈäjtën tijaty mmëbejkypy mët ko xyajnigëxëˈëgët ko kyaj xymyëdatyë mëbëjkën. Per ¿waˈandaa Dios xytyukjotˈambëjkëm ko nbayoˈoyëm mä Biiblyë parë njaygyujkëm ti yëˈë tsyejpy ets nduˈunëm? Kyaj. Pes mä yˈAyuk xyˈanmäˈäyëm parë këˈëm nˈëxpëjkëmë Biiblyë. Yëˈë jyënaˈany: “Këˈëm miitsëty xyˈixtët diˈibë duˈun oy ets diˈib yajkupëjkp ets diˈibë duˈun ja Dios tsyejpy” (Romanos 12:2, Traducción del Nuevo Mundo [NM]).

Ko xynyijawët ja tëyˈäjtën mä pënën Dios, kyaj jeˈeyë mbudëkëyaˈanyëty ets niˈigyë tijaty xynyijawët, nan mbäät dyaˈoyë mjukyˈäjtën (Fwank 8:32). Duˈun pyudëjkë Deanne diˈib të yajmaytyaˈaky mä tim jawyiimbë artikulo. Tijaty tyam myëbejkypy yëˈë diˈib yajpatp mä Diosë yˈAyuk. Yëˈë jyënaˈany: “Kyajtsë nety nnijawë pënë Biiblyë wäˈäts tijaty tnimaytyaˈaky axtë koonëmëts nˈëxpejky. Tyam nˈixyˈajtypyëtsë Jyobaa ets nnijäˈäbëts ko kyaj yëˈëjëty tuˈugë Dios diˈib kyaj ti tjawë, yëˈëtsë duˈunë nDeetyë tsäjpotmëdë diˈib tsojkp. Tyam kyajts nanëgoobë njukyˈaty”.

Waˈan të xyˈëxpekyë Biiblyë ets kyaj nëgoo mbudëjkë. Pën duˈun, këdii mˈëxtëkëwaˈaky. Tsip njaygyujkëmë Biiblyë pën kyaj tyëyˈäjtënëty extëm nyajtukniˈˈijxëm mä pënën Dios, duˈun extëm ko mnëjkxët mä tuˈugë lugäär diˈib kyaj xyˈixyˈaty ets kyaj yajxon myajtukˈawanët wiˈix jam mjäˈtët. Mbäät oy mˈoknëjkxy, per ko xykyapäädët ja tuˈu diˈib mˈëxtaapy, mbäät axëëk mnayjawëty. Pääty pën mjäˈtäämp mä të xynyitsoonë, tsojkëp xymyatsët ja nëˈë tuˈu diˈib oy ets myaˈˈanëëmët yajxon wiˈix jam mjäˈtët.

¿Mnijawëyaampy ja nëˈë tuˈu diˈib oy ets ja tëyˈäjtën mä pënën Dios? Anëëmë Jyobaa tyestiigëty diˈib mä mgäjpn o nijayë mä kyojˈyë tyäˈädë rebistë parë namayˈäjtën xyˈëxpëkëdë Biiblyë (mä pajina 4 jap myiny kanäägë direksion).

[Letrë diˈib miimp mä dibujë mä pajina 9]

“Këˈëm miitsëty xyˈixtët diˈibë duˈun oy ets diˈib yajkupëjkp ets diˈibë duˈun ja Dios tsyejpy.”

(ROMANOS 12:2, NM)