“Njikyˈäjtëm extëm ja Espiritë Santë xytyukniˈˈijxëm, kyaj nnakyjyikyˈäjtëm extëm ttseky ja nniniˈxˈäjtëm ngëbäjkˈäjtëm.” (ROM. 8:4)

1, 2. 1) ¿Ti jotmay mbäät tpäätyë jäˈäy diˈib jëˈijx nasˈijxëp mä kyarrëwiity? 2) ¿Wiˈix kyujotmayëty ko tijaty xyajjëˈijx xyajnasˈijxëm mä nDiosmëduˈunëm?

DIˈIB tuump secretario de Transporte de Estados Unidos, jyënaˈany ko mëjwindëjkëbë jotmay mä jäˈäy kyarrëwiittë ko jyëˈix nyasˈixëdë. Extëm nˈokpëjtakëm, yajtëgooytyëp ja yˈijxënë ko kyäjpxtë mä selulaar. May jyënäˈändë ko të yˈayoˈonbäättë o ko jawaanë të kyaˈˈayoˈonbäättë mët ko nety ja wiink jäˈäy kyajpxy mä telefënë. Mayë jäˈäy kyaj dyajtëgoyäˈändë tiempë, pääty ttundë tijaty myentrës kyarrëwiittë, per mbäät mëjwiin kajaa yaˈˈayoˈonbäädëdë.

² Tuˈugë karrëwiˈtpë diˈib jëˈijx nasˈijxëp mbäät wyinmay ko kyaj ti jotmay tpäädët. Mä nDiosmëduˈunëm nan mbäät duˈun njäjtëm. Pën jam tijaty xyajjëˈijx xyajnasˈijxëm, mbäät axtë nyajtëgoˈoyëm ja mëbëjkën (1 Tim. 1:18, 19). Apostëlë Pablo ojts tnigajpxyë tyäˈädë jotmay ko tˈanmääy ja Dios mëduumbëty diˈib Roma: “Diˈibaty  nayäjkëdëp mët ja diˈibë nyiniˈx kyëbäjk tsyejpy, tyäˈädë jäˈäyëty patëdëp ja oˈkën. Per diˈibaty nayäjkëdëp mä yëˈë Espiritë Santë, tyäˈädë jäˈäyëty patëdëp ja jotkujkˈäjtën es ja jikyˈäjtën” (Rom. 8:6). ¿Ti Pablo myaytyäˈägan? ¿Ti mbäät nduˈunëm parë kyaj nnayäjkëm mä diˈibë niniˈkx këbäjk tsyejpy? ¿Ets wiˈix mbäät nnayäjkëm mä espiritë santë o Diosë myëjää?

Nitii tëytyuˈunën tkaˈˈawixtë

3, 4. 1)¿Ti tsip myëdäjtë Pablo? 2) ¿Tiko yˈoyëty nnijäˈäjëm ja jotmay diˈibë Pablo pyat?

³ Mä Romanʉs japë Pablo tkujäˈäyë wiˈix ja wyinmäˈäny tsyiptuny mët ja nyiniˈkx kyëbäjk (käjpxë Romanʉs 7:21-23). Ko duˈun jyënany, kyaj nety nyaynyikäjpxtuˈutyëty o nyaybyaˈˈayoyëty ko pyokyjyaˈayëty ets ko kyaj ti mbäät tnekytyuny. Pes nyijäˈäbë nety kajaa tëyˈäjtën ets të netyë Dios wyinˈixyëty parë tyunët apostëlë mäjaty ja nasionk (Rom. 1:1; 11:13). Per ¿tiko tkujäˈäyë mä nety tsyiptuny?

⁴ Pablo yëˈë nety myaytyakypy ko kyaj mbäät ttuny ti Dios tsyejpy extëm tjatsojkënyëˈaty. ¿Tiko kyaj? Yëˈë jyënany: “Mët ko nidëgekyë të pyekytyundë es dëˈën të tmëjagamgaˈaktë ja Dios” (Rom. 3:23). Kom niˈamukë të ntsoˈonëm mä Adán, Pablo nan pokyjyaˈayë nety ets myëdäjt ja axëëkpë tsojkën. Mbäät njaygyujkëm wiˈix nyayjäˈäwë, pes nanduˈun tyam mëk nduˈunëmë mëjää parë njëjpkuwäˈkëm ja poky kaytyey ets ja axëëkpë tsojkën. Ets nan taa tijaty mbäät xyajjëˈijx xyajnasˈijxëm o xytyukjëjpˈyoˈoytyutëm “ja tuˈu diˈibë nëjxp mä ja jikyˈäjtënë winë xëë winë tiempë” (Mat. 7:14). Perë Pablo mbäädë nety yˈawäˈätspëtsemy ets nanduˈun ëtsäjtëm.

5. ¿Mä Pablo tpatyë naybyudëkë etsë jotkujkˈäjtën?

⁵ Pablo dyajtëëy: “¿Pënëts xyajnitsoˈogëp [...]?”. Ta net jyënany: “[Dyoskujuyëmë] Dios ko jyaaty ja nitsokën mët yëˈëgyëjxmë Nintsënˈäjtëm Jesukristë” (Rom. 7:24, 25). Pablo ta tˈanmääy pënaty “jaˈäjtëdëp ja Jesukristë” o diˈib nëjkxandëp tsäjpotm, ko mët yëˈëgyëjxmë espiritë santë yˈaxäjëdë Jyobaa extëmë yˈuˈunk ets wyinˈixëdë parë tpäättët “ja kumäˈäny” mëdë Kristë (käjpxë Romanʉs 8:1, 2; Rom. 8:14-17). Tyäˈädë Dios mëduumbëty yëˈë pudëjkëdëbë Diosë myëjää ets ja mëbëjkën diˈib pyëjtaktëp ko Kristë të jyuuybyëtsëmëdë parë tmëmadäˈäktët ja tsip diˈibë Pablo myaytyak. Pääty “kyaj [tˈawixtë] nitii tëytyuˈunën” të yˈawäˈätspëtsëmdë mä ja “poky yˈanaˈamëny” ets ja “oˈkëny tëgooyëny yˈanaˈamëny”.

6. ¿Tiko jyëjpˈamëty ets niˈamukë Dios mëduumbë tjaygyukëdët extëmë Pablo jyënany?

⁶ Pablo yëˈë duˈun yˈanmääy ja Dios mëduumbë diˈib nëjkxandëp tsäjpotm, per ko tmaytyakyë Diosë myëjää ets ko Kristë të xyjuˈuybyëtsëˈëmëm, xypyudëjkëm niˈamukë Dios mëduumbë, duˈun diˈib nëjkxandëp tsäjpotm ets diˈib wëˈëmandëp yä Naxwiiny. Dios wyinmäˈänymyooyë Pablo ko dyajky ja käjpxwijën, pääty jyëjpˈamëty ets niˈamukë Dios mëduumbë tjaygyukëdët ets nyaytyukpudëkëdët.

Dios yajtëgooy ja pokyë myëkˈäjtën

7, 8. 1) ¿Wiˈixtsoo ja Leyë myëkˈäjtën kyujënajky ko jäˈäy ttundë diˈibë nyiniˈkx kyëbäjk tsyojktëp? 2) ¿Ti Jyobaa të ttuny mët yëˈëgyëjxmë myëjää ets ko Jesus të xyjuˈuybyëtsëˈëmëm?

⁷ Mä Romanʉs kapitulo 7, jap tmaytyaky ja mëkˈäjtënë diˈib myëdäjtypyë poky mä niniˈkx këbäjk. Ets mä kapitulo 8, jap tmaytyaky ja mëkˈäjtënë diˈib myëdäjtypyë Diosë myëjää ets wiˈix tpudëkë Dios mëduumbë mä tsyiptuny mët ja pokyë myëkˈäjtën. Duˈuntsoo mbäät jyukyˈattë extëmë Jyobaa ttseky ets kyupëkëdët. Pablo ojts tnigajpxy ko mët yëˈëgyëjxmë Diosë myëjää ets ko Jesus të xyjuˈuybyëtsëˈëmëm, Jyobaa të ttuny diˈib kyaj ttuuny ja Ley diˈibë Moisés yajmooy.

 ⁸ Ja Ley myëmiimpy ijty jantsy mayë anaˈamën wiˈix yajkumëdowët ja poky. Ets ja saserdotë wintsën nan poky jyaˈayë nety yajpäättë ets kyaj mbäät dyaktë tuˈugë wintsëˈkën extëm pyaatyëty parë nyiwäˈätsët ja poky. Duˈun ja Ley ja “myëkˈäjtën [kyujënajky] ko ja jäˈäy ttundë diˈibë nyiniˈx kyëbäjk tsyojktëp”. Per ko “Diosë yˈUˈunk tkejxy es yaˈijxy extëmë pekyjyaˈay” ets ojts xykyuˈoˈkëm, ta Dios dyajtëgooy ja pokyë myëkˈäjtën. Duˈuntsoo twinäjxy “diˈibë ja anaˈamën kyaj mbäät oj ttuny”. Pääty, pënaty nëjkxandëp tsäjpotm wäˈäts jäˈäy nyaxtë mët ko tmëbëktë ko Jesus të jyuuybyëtsëmëdë. Ets yaˈˈanëëmëdë parë jyukyˈattët extëmë Diosë myëjää tyuˈumoˈoyëdë, kyaj extëm ja niniˈkx këbäjk ttseky (käjpxë Romanʉs 8:3, 4). Ets duˈunën jyukyˈattët axtë ko yˈooktët parë yajtukumaytyë ja “jikyˈäjtën” (Diˈibʉ Jat. 2:10).

9. Mä Romanos 8:2 jap jyënaˈany anaˈamën o ley, ¿ti yˈandijpy?

⁹ Pablo nan ojts tmaytyaˈaky ja “Espiritu Santo yˈanaˈamëny”, ja “poky yˈanaˈamëny” ets ja “oˈkëny tëgooyëny yˈanaˈamëny” (Rom. 8:2, Nuevo Testamento de Mazatlán [NTM]). ¿Ti yˈandijpyë tyäˈädë anaˈamën o ley? Kyaj yëˈë tˈandijy tuˈugë Ley extëm diˈibë Moisés yajmooy. Tuˈugë liibrë jyënaˈany ko mä tyäˈädë bersikulo, ayuk grieegë ley, yëˈë yˈandijpy ja oybyë o axëëkpë diˈibë jäˈäy tyuumpy ets diˈib anaˈamëdëp extëm tuˈugë ley. Ets nan mbäät yëˈë tˈandijy wiˈixë jäˈäy twinˈixy jyukyˈatäˈäny.

10. ¿Wiˈix nmëdäjtëm ja yˈanaˈamënë oˈkën ets ja poky?

¹⁰ Apostëlë Pablo ojts tkujayë: “Dëˈën extëm tuˈuk jeˈeyë ja jäˈäy kyaj tmëmëdooy ja Dios es mëdë tyäˈädë pojpëkyëjxm tsyondaky ja oˈkën, pääty nidëgekyë ja jäˈäyëty yˈooktë, mët ko nidëgekyë pyojpëtuundë” (Rom. 5:12). Kom jam të ntsoˈondäˈäyëm mä Adán, ta niˈamukë nmëdäjtëm ja yˈanaˈamënë oˈkën ets ja poky. Yëˈë niniˈkxˈäjtëm diˈib poky myëët xëmë ttunäˈäny tijatyë Dios kyaj ttukjotkëdaˈaky ets ta net ngumëdoˈojëm mëdë oˈkën. Mä Galasyʉ japë Pablo jyënany ko diˈibë niniˈkx këbäjk wyinmäˈänyˈajtypy, yëˈë tijaty nduˈunëm o wiˈix njäˈäyˈäjtëm. Ta net jyënany: “Pënëtyë dëˈën axëkjikyˈäjttëp, kyaj yˈittët mä Diosë kyutujkën” (Gal. 5:19-21). Pënaty duˈun jukyˈäjttëp yëˈë tyuundëp ti ja niniˈkx këbäjk tsyejpy ets yëˈë myëmëdoodëp (Rom. 8:4). Per ¿yëˈëyë duˈun jukyˈäjttëp extëm ja niniˈkx këbäjk ttseky pënaty ijt tsënääytyëp axëëk, tyun  kyäjpxtë mëdë kaˈoybyë, dyajnaxtë tijaty extëmë dios o ttundë mëjwiin kajaabë poky? Kyaj, pes ko jyënaˈany diˈibë niniˈkx këbäjk wyinmäˈänyˈajtypy, nan yëˈë yˈandijpy extëm ko jäˈäy tˈaxëkˈixyë myëguˈuk, ko jyantsy awäˈänëty, ko tsyiptun tsyipkäjpxtë ets ko ti tnaywyinaxëjawëdë. Pääty, nipën mbäät kyajënäˈäny ko kyaj tsyiptuny mëdë nyiniˈkx kyëbäjk diˈib poky myëët.

11, 12. ¿Ti Jyobaa të ttuny parë xyaˈˈawäˈätspëtsëˈëmëm mä yˈanaˈamënë poky etsë oˈkën? ¿Ti tsojkëp nduˈunëm parë Jyobaa xykyupëjkëm?

¹¹ Jantsy jotkujk nayjäˈäwëm ko Jyobaa të xyaˈˈawäˈätspëtsëˈëmëm mä ja yˈanaˈamënë poky etsë oˈkën. Jesus jyënany: “Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë winë tiempë es kyaj kyutëgoytyët”. Pën nyajnigëxëˈkëm ko ntsojkëmë Dios ets nmëbëjkëm ko Jesus të xyjuˈuybyëtsëˈëmëm, ta nˈawäˈätspëtsëˈëmëm mä ja oˈkën diˈib xynyitëjkëm ko nbokytyuˈunëm (Fwank 3:16-18). Pääty nanduˈun njënäˈänëm extëmë Pablo: “[Dyoskujuyëmë] Dios ko jyaaty ja nitsokën mët yëˈëgyëjxmë Nintsënˈäjtëm Jesukristë”.

¹² Tyam duˈun nyajpatëm extëmxyëp nmëdäjtëm tuˈugë mëk päˈäm ets ntsoybyajtëm. Pën agëdäˈägäˈänëm yajxon, tsojkëp nduˈunëm extëm ja doktoor xyˈanmäˈäyëm. Ko nmëbëjkëm ko Jesus të xyjuˈuybyëtsëˈëmëm, mbäät nˈawäˈätspëtsëˈëmëm mä yˈanaˈamënë poky etsë oˈkën, per duˈunyëm ndëgoˈoyëm ets kyaj wäˈäts jäˈäy nyajpatëm. Pääty, ta diˈib tsojkëp nduˈunëm parë yajxon nˈijtëm mëdë Dios ets xykyupëjkëm. Pablo jyënany ko pën agëdäˈägäˈänëm mä ja poky ets ja tëgoˈoyën, tsojkëp njukyˈäjtëm extëmë Diosë myëjää xytyuˈumoˈoyëm.

Nˈokjukyˈäjtëm extëmë Diosë myëjää xytyuˈumoˈoyëm

13. ¿Ti yˈandijpy njukyˈäjtëm extëmë espiritë santë ttseky?

¹³ Ko njukyˈäjtëm extëmë Diosë myëjää xytyuˈumoˈoyëm, ta wanaty wanaty nwinbajtëm mä ja tëyˈäjtën (1 Tim. 4:15). Tsojkëp nduˈunëmë mëjää tuˈuk tuˈugë xëë ets njukyˈäjtëm “neby ja espiritu ttsokyëny” (Gál. 5:16, NTM). Duˈuntsoo nëjkxëbë Dios xykyupëjkëm.

14. ¿Wiˈix wyinmaytyë ets ti tyuundëp pënaty “nayäjkëdëp mët ja diˈibë nyiniˈx kyëbäjk tsyejpy”?

¹⁴ Ko Pablo tjääyë Romanʉs majtsk pekyë jäˈäy tmaytyaky diˈib kyaj tuˈugyë wyinmaytyë (käjpxë Romanʉs 8:5). Ko tmaytyakyë  niniˈkx këbäjk, kyaj yëˈë tmaytyäˈäganyë niniˈkxˈäjtëm. Pes ko näˈätyë Biiblyë dyajtunyë tyäˈädë ayuk, yëˈë yˈandijpy ja poky kaytyey diˈib myëdäjtypyë naxwinyëdë jäˈäy. Ets yëˈë diˈib yajtsiptuumbyë winmäˈäny mëdë niniˈkx këbäjk. Perë jäˈäyëty diˈib “nayäjkëdëp mët ja diˈibë nyiniˈx kyëbäjk tsyejpy”, kyaj tsyiptundë. En lugäär tˈixtët ti diˈibë Dios tsyejpy ets tkupëktët ja naybyudëkë “yëˈë jeˈeyë wyinmääytyëp diˈibë nyiniˈx kyëbäjk tsyejpy”. Per pënaty “nayäjkëdëp mä Espiritë Santë” jamë wyinmäˈäny tpëjtäˈäktë mä tijatyë Dios yajkypy ets mä ja tyuunk.

15, 16. 1) ¿Wiˈix wyimbëtsemy ko ti nwinmäˈäyëm? 2) ¿Ti mayë jäˈäy wyinmäˈänyˈäjttëp?

¹⁵ (Käjpxë Romanʉs 8:6.) Ko jäˈäy ttuny diˈib oy o axëëk jawyiin twinmay. Pääty ko tuˈugë jäˈäy twinmay tijaty ja niniˈkx këbäjk tsyejpy, ta net yëˈëyë aduˈuk twinmäˈänyˈäjnë. Jamyë dyaˈijnë ja jyot wyinmäˈäny, tsyojkën ets ja jyot jyäˈäwën.

¹⁶ ¿Ti diˈib tyam masë jäˈäy tsyojktëp? Apostëlë Juan tkujäˈäyë: “Tëgekyë diˈibë jaˈäjtp naxwiiny, ko jäˈäy tˈëxtäˈäytyë diˈibë niniˈx këbäjk tsyejpy, ko tˈatsoktë ko tii tˈixtë es ko myëj pyäädëdë ko tii tmëdat tjaygyaptë, tëgekyë tyäˈädë winmäˈäny esë dëˈëmbë jikyˈäjtën ja myiny mä yëˈë naxwinyëdë, es kyaj myiny mä Dios” (1 Fwank 2:16). Mä liibrë, rebistë, perioodikë, mä telebisionk, mä pelikula ets mä Internet, yëˈë tyukˈatsejpyë jäˈäy ets axëëk yˈit tsyëënëdët, nyayajmëjpëtsëmëdët ets tˈatsokët mas niˈigyë jukyˈäjt madakën. Mayë jäˈäy yëˈëyë wyinmäˈänyˈäjttëp. Per “nmëdäjtëm ja winmäˈäny mä niniˈx këbäjk yëˈë yˈandijpyë oˈkën”, duˈun tyam nyajpatëm ooky Dios windum ets mä tiempë myiny kyëdaˈaky nëjkxëp njantsy oˈkëm. ¿Tiko? Yëˈko “diˈibë nayäjkëdëp mä yëˈë diˈibë nyiniˈx kyëbäjk tsyejpy, myëtsipˈäjttëp ja Dios, mët ko ni tkatsoktë es ni mbäät tkapadundë ja Diosë yˈanaˈamën. Pääty diˈibë jikyˈäjttëp extëm ttsoktë ja nyiniˈx kyëbäjkëty, ninäˈä mbäät kyatukjotkëdäˈägëdë Dios” (Rom. 8:7, 8).

17, 18. ¿Wiˈix mbäädë winmäˈäny nbëjtakëm mä tijatyë Dios jyaˈäjtypy, ets wiˈix wyimbëtsëmäˈäny?

¹⁷ Pënaty “nayäjkëdëp mä yëˈë Espiritë Santë, [...] patëdëp ja jotkujkˈäjtën es ja jikyˈäjtën” ets yˈittë jotkujk ets oy mëdë Dios. ¿Wiˈix mbäät nnayäjkëm mä yëˈë Diosë myëjää? Ko xëmë nwinmäˈäyëm tijatyë Dios jyaˈäjtypy ets nyajmëjwindëjkëmë oybyë jäˈäyˈäjtën diˈib tyukjotkëdäˈägëp. Duˈun ja nwinmäˈänyˈäjtëm tpanëjkxët “ja Diosë yˈanaˈamën” ets nwinmäˈäyëm extëm yëˈë wyinmay. Ets ko nbatëm tuˈugë jotmay diˈib xyajtëgoyäˈänëm, nëjkxëp nnijäˈäjëm ti mbäät nduˈunëm ets nwinˈijxëm diˈib oy, ets nduˈunëm extëmë Diosë myëjää xytyuˈumoˈoyëm.

¹⁸ Pääty, jëjpˈam etsë jot winmäˈäny nbëjtakëm mä tijatyë Dios jyaˈäjtypy ets yëˈë nduˈunëm mä jukyˈäjtën, extëm nuˈkxtakëm xëmë, ngäjpxëm ets nˈëxpëjkëmë Biiblyë, nëjkxëm mä naymyujkën ets käjpxwäˈkxpë (1 Peed. 1:13). Kyaj nlugäärmoˈoyëm ets tijatyë niniˈkx këbäjk wyinmäˈänyˈajtypy xyajjëˈijx xyajnasˈijxëm, nˈoknasˈijxëm etsë Jyobaa xytyuˈumoˈoyëm mëdë myëjää. Pën nduˈunëm duˈun, ta nëjkx mëjwiin kajaa nyajkunuˈkxëm, nˈaxäjëm ja jukyˈäjtënë winë xëëbë ets nˈijtëm agujk jotkujk (Gal. 6:7, 8).

¿Mbäät xynyimaytyaˈaky?

• ¿Ti yˈandijpy ko ja Leyë myëkˈäjtën kyujënajky, ets wiˈixë Dios tmëmadaky?

• ¿Ti yˈandijpy ja “poky yˈanaˈamëny” ets ja “oˈkëny tëgooyëny yˈanaˈamëny”, ets wiˈix mbäät nˈawäˈätspëtsëˈëmëm?

• ¿Wiˈix mbäät nnayäjkëm etsë Diosë myëjää xytyuˈumoˈoyëm?

[Yajtëˈëwën]

[Letrë diˈib miimp mä dibujë mä pajina 16, 17]

¿Jukyˈäjtëm extëm ja niniˈkx këbäjk ttseky o extëm xytyuˈumoˈoyëmë Diosë myëjää?